1 Timote 1
1
Atsyɛ̀’te
1Yɔɔn ŋwà’ne áa ŋwe’e mèŋ Pɔl, ngàŋ ntúm Yěsô Kristo. Mèŋ n gee ngàŋ ntúm Yěsô á nue e Ssé pɔ́ Yěsô la tsẅi ngie mèŋ n gwɔ́ wɛ̌. Yé Ssé zɔ gÿo pege tsẅɛ́ɛ, Yěsô Kristo ne ńgÿo yé ngie kɔ̀ɔkɔ́ɔ gie pege ne ńzwí’te mbwo Ssé à pumte.
2Mèŋ n ŋwe’e ńnáa mbwo gù Timoté. Ɔ̀ɔ mbwo mèŋ ńgwɔ́ míŋ wɔ̀ɔn tɛ’, ńtí nò Yěsô Kristo gẅie pɔgɔ pǔ ńzáb ntʉ́m ná yé. Mèŋ n ne ńdúɔ mbwo Tá wege Ssé mbɔɔ mbwo Cʉ̀apʉ̀a wege Yěsô Kristo ngie pɔ́ gwɔ́ né gù, ńtsɔ́ɔn mezìŋe mú, ńnéŋe sẅétè ntʉ́m gù.
Timote lʉ’ʉ́ mmó gie mé zí’i pʉ̀a à těen ńzsé wɔ́
3Mèŋ n ne ńkwoŋo ngie ɔ̀ ńnéŋe Efeso, pá’ mèŋ n ka gwɔ́ gʉa lê Makedonia ńtsẅii mbwo gù la, ńnéŋe wó, ńzsé ngie ɔ̀ ge lʉ’ʉ mbwo tsɔ́ pʉ̀a pie ée wó ngie tà pɔ́ gíŋe ńzí’i pʉ̀a menò mie ée ná nò Yěsô Kristo é té ná mánzsè wɔ́. 4Gɔɔn né pɔ́b ngie pɔ́ nyé menò pú’nkwɔb, lâ menò pà mangʉa njʉ’ pɔ́b pie pɔ́ tʉ́ é té mag. Yɛ̌ ntí menò gÿo mé zoŋo nò pɔ́ sẅɛ̀ɛ sẅɛ̀ɛ, é té kẅéte lézsé mmó gie Ssé la kwaŋa légÿo nyìŋ mesoŋ tsẅɛ́ wɔ́. Mé lɔg pɔ́ lézáb ntʉ́m nà Ssé tá ńzsé yɛ̌ mmó. 5Ɔ̀ gɔɔn yɛ̌ nò né pɔ́b légwɔ́ gie pɔ́ ge kwoŋ petsɔ́ pʉ̀a tà shwóŋó nò. Lekwoŋo nyìŋ tà shwóŋó nò, à zɛ́te légẅiin ntʉ́m Ndʉalʉ̌a, ńzɛ́te légÿo mmó gie mbùm ɔ̀ té cúa gú mǒ wɔ́, ḿbiŋe ńzɛ́te lézáb ntʉ́m nà Ssé, kwà’ nénʉ́. 6Etsɔ́ pʉ̀a kéen ńnyé mɔɔn menò, ńkúu pyé, ńcʉ́’ʉ ńzɔ́gɔ ńzoŋo pɔ́ menò mie é té tyé. 7Pɔ́ ne ńkwoŋo légwɔ́ pà zí’i mbʉ̌ Mǒsê mbwo pʉ̀a. Pɔ́ ne ńgɔɔn nò gie kwà’ pɔ́b té ne ńjú’u wɔ́, ḿbiŋe ne ńdá’te nò gie pɔ́ té ne ńzsé wɔ́ tà ńnéŋe pɔ́ twó.
8Pege metsèm ne ńzsé ngie mbʉ̌ mie e Ssé la cʉa ná Mǒsê ńná, ée mbòŋ ná pá’ mé lɔɔn ńkú’te ná ntí gie é ne ńzɛ́te. 9Pege giŋé ńne ńzsé ngie e Ssé lɔ̌ɔn těen ńtÿɔ́gɔ *lepʉ̌ ńtí pʉ̀a pie pɔ́ gÿo nò gie á tyé wɔ́, à lɔ̌ɔn ńtÿɔ́gɔ *lepʉ̌ ńtí pàfʉ̀’ menò, lâ pàtʉʉ twó, ńtí pàgwág Ssé, lâ pàgÿo menò tepòŋ, ńgíŋe ńtí mbɔɔ pʉ̀a pie pɔ́ té jú’ ncwò Ssé wɔ́, ńké tè lɔgɔ tsɔ́ mmó gie á fóo mbwo yé ńtóŋo tsɔ́ mmó wɔ́. E Ssé lɔ̌ɔn ńgíŋe ńtÿɔ́gɔ *lepʉ̌ ńtí pʉ̀a pie pɔ́ zẅéte metá pɔ́b lâ memá pɔ́b, ńtí mefÿɛ́. 10Mé la tÿɔ́g *lepʉ̌ ńtí pʉ̀a pie pɔ́ pumo wɔ̌wɔ́ɔ pâ pɔ̌ nuŋe nuŋe, ńtí mbàŋa gie é nuŋe petsɔ́, ńtí pàtáŋa pu’. Mé la tÿɔ́g *lepʉ̌ ńtí ngàŋa cÿɔ̌ nò, ńtí pàjÿò ńgyá pie é gwɔ́ pɔ́ mengàŋa cÿɔ̌ nò. À la tÿɔ́g *lepʉ̌ ńtí pʉ̀a pie é fa’ shÿó ńgÿo mmó gie á té pumte nà nò nénʉ́ gie mé zí’i wégè wɔ́. 11Yɛ̌ nò gie mé zí’i wégè, áa tsɛ̀ɛ nkʉ̀ mbòŋo gẅie pege fó mǒ ńzsé shʉ́shÿɔ́g Ssé. Yé Ssé gẅie à ne ńkwoŋo pɔ́ nò mbòŋo ná pege léen ńcʉ́me wɛ̌ nkʉ̀ mbòŋo mbwo mèŋ.
Lezsě nò mbòŋo gie Ssé gÿo
12Mèŋ sǐe Cʉ̀apʉ̀a wege Yěsô Kristo pá’ à la náa wɔ̀ɔn metʉ̀ á lélɔg fa’a fà’ yé. Mèŋ sǐe yé pá’ à la gyá ngie mèŋ n ku’u we nyìŋ, ńtsɔ́’ɔ wɔ̀ɔn ńdɔg ńgÿo ngàŋa fà’ we. 13Tà mbɔɔ pá’ á laa tsɔ́ fʉ̀’, mèŋ shwóŋó ná yé té poŋ, ńtsɔ́’ɔ kwò pʉ̀a pé té poŋ, ńzoonte yé. E Ssé la tsɔ́ɔn mezìŋe mɔ́ɔn, mélà’mie n dɔ̌ɔn ńgÿo té zsé mmó gie mèŋ n gÿo yɛ̌, mbà mèŋ n kaa záb ntʉ́m ná yé wɔ́. 14Cʉ̀apʉ̀a wege Yěsô Kristo, la gÿo nò mbòŋo yé ná mèŋ tà á zyɛ́’. Á la gÿo mèŋ n záb ntʉ́m ná yé, mèŋ m biŋ ńkwoŋ petsɔ́ pʉ̀a. Á fóo ná pá’ mèŋ n da nnɛ́ ná yé.
15Yěsô Kristo la tóo tsɛ̀ɛ njÿó légÿo pʉ̀a tepòŋ tsẅɛ́, yɛ̌ nò áa jʉ’ó ńgwɔ́ pú’u, à lɔɔn ńgwɔ́ nyìŋ záb ntʉ́m wé mǒ ntsèm ntsèm. Mèŋ m biŋ ńgwɔ́ tsetsɛ̀ɛ pʉ̀a tepòŋ ńgwɔ́ ndúm. 16Tá’, e Ssé la tsɔ́ɔn mezìŋe mɔ́ɔn, tà Yěsô Kristo nyɛɛ ná mèŋ gẅie mèŋ n gee ndúm tsetsɛ̀ɛ pàgÿo menò tepòŋ ngie à zsé léshÿɔg. Pú’u ńdɔg ńná fʉ̀’ mbwo pʉ̀a pie é ge gÿo záb ntʉ́m ná yé, é gẅiin le gwɔ́ tèmì. 17Mekù’ lâ gù’te é lá’a ńgwɔ́ mengù’u mengù’, ńgwɔ́ pɔ́ mbwo fùɔ gẅie à ge lá’a gwɔ́ pɔ́ wó. Yé gẅie aa ndá’ Ssé, ńgwɔ́ tèkwé, ńgwɔ́ gẅie mé té gyá yé nê lejÿɔ́g wɔ́. *Amen.
18Timoté, gù míŋ wɔ̀ɔn, mèŋ n cʉ́me yɔɔn shwóŋè mbwo gù, á gwɔ́ pá’ pà *ntsẅì nkʉ̀ Ssé la tʉ́ njÿó ńgɔ́ɔn ná gù. Néŋe ne ńkímte menò mie pɔ́ la gɔɔn ŋwɛ́, ńzsé ngie é ge gwɔ́ shú shúm lɔg ńdÿɔ́’ ncù mbòŋo ná lezíŋ Ssé. 19Ɔ̀ lɔɔn ńcʉ́’ʉ lélÿɔ́’ wɛ̌ ncù, ɔ̀ lɔg pɔ́ lézáb ntʉ́m nà Ssé, ḿbiŋ ḿbɔ́ɔn légÿo mmó gie mbùm jù ge cúa gú mǒ. Mbùm tsɔ̌ lelÿò pʉ̀a la cúa wɔ́b, pɔ́ lʉ’ʉ lé jú’, wɔb lézáb ntʉ́m nà Ssé kúu pyé. 20Áa tsetsɛ̀ɛ pɛ̌, Himené pɔ́ Alekzáŋdele gwɔ́ wó. N da néŋ pɔɔn pʉ̀a mépʉ́a nà mbwó Sátà. Légwɔ́ gie pɔ́ ge kúu mbwo yé, é zí’i pá’ pɔ́ té gíŋe gwá kʉ́’ʉ cʉŋte lezíŋ Ssé wɔ́.
Currently Selected:
1 Timote 1: NGBM
Highlight
Share
Copy
Want to have your highlights saved across all your devices? Sign up or sign in
Nouveau Testament en Ngienboum © Alliance Biblique du Cameroun, 2007.