Roman 9
9
Gâd bui Israel luhpia nani ba bâk saki brin
1Yang Kraist ra kasak lukisna ba mita, kunin aisaras, diara kasak ba aisisna. Baha purkara, yang kupi lukanki ra Spirit Holikira tâi brisa, bara mairikisa aisisna na kasak sa: 2piu bani sarka lâka tara kum brisna, kupi ra sin latwan kum ban brisna, 3bara yang muihki nani bara taiya nani sut ba mapara pain kaia sa kaka, kau yamni kabia yang na Kraist wina ai dakbi saki lahtuban mununhtara ai swibia. 4Ju nani sut ba lika Israel kiamka sa, bara Gâd mita baha nani ba ai luhpia nani baku saki brin.#Imp St 4.22. Bamna Gâd ai mawan pranakira ba wal witin nani tilara kan, bara wal lâ daukan lâka nani ba yan, Moses lâka ba, tempel priaska bara pramiska nani sin. 5Ju nani sut ba lika pas wan damika nani kata ba kiamka nani sa; bara ai kiamka bâk, wan wîna lâka ba kat Kraist balan, witinka diara sut Gâdka ba, bamna mayunan kabia ban kaia ra. Baku kabia.
6Sakuna Gâd bui Israel ra pramis nani munan ba aimakras lika apia; kan Israel kiamka sut ba lika Israel apia sa. 7Bamna Ebraham kiamka sut ba lika Gâd luhpia nani apia sa; kan Gâd mita Ebraham ra win: “Aisak bâk baman kiamkam nani brima.”#Bla St 21.12. 8Naha tânka wan marikisa upla kiamka tilara kaia baman ba mita kau Gâd luhpia wan daukras sa; sakuna Gâd mita pramis daukan ba kulki nani ba baman lika rait kiamka pali kulkisa. 9Gâd mita Ebraham ra pramis munan ba lika naha sa: “Naha piua na praiska kat yang balamna, bara Sara lika luhpa waitna kum bribia.”#Bla St 18.10.
10Bara naha lika sut apia sa. Rebeca luhpia waitna wâl kan ba aisa kumi wina kata, wan damika Aisak; 11-13sakuna baha tuktika waitna wâl ba kau aisubi takras kan, bara witin nani mita diara pain, apia kaka diara saura sin kau daukras kan ba ra, Gâd bui Rebeca ra win: “Luhpiam almuk ba ai muihni sirpi ba dukia daukbia.”#Bla St 25.23. Naha na sin Ulbanka dîa aisi ba kat sa: “Jekob ra latwan kaikri, kuna Isau ra lika misbara kaikri.”#Mal 1.2-3. Bamna Gâd mita ani ba bâk saki briaia kan ba baha kat ban swin, ai kupia brinka ba kat, yaura witin mita paiwaia luki ba, dîa dîa witin nani daukan ba kulkras pali.
14Baku bamna, ¿yawan dîa wibia? ¿Gâd ba kasak apia sa ki? ¡Sip apia pali! 15Kan Gâd mita Moses ra naku win: “Yaura yang mita yamni kaikaia kapri ba, ban yamni kaikamna, bara yaura kupi swapni briaia kapri ba, yang ban kupi swapni brimna.”#Imp St 33.19. 16Baku bamna, upla dîa brin dauki ba, apia kaka daukaia trai muni ba lika apia sa, sakuna Gâd mita yamni kaikbia lika. 17Bamna Ulbanka ra Gâd mita Idsip kingka ra win: “Man bâk karniki ba marikaia king mai mangkri, bara tasba aiska ra yang nini ba latan marikaia.”#Imp St 9.16. 18Baku bamna, yaura Gâd mita yamni kaikaia lukuya ba, witin mita yamni kaikisa, bara ya kupia karna daukaia lukuya ba, witin mita kupia karna daukisa.
19Sakuna man ban ai wima: “Baku sa kaka, ¿dîa kan Gâd mita upla pâtkira kulkisa? Bamna, ¿ya sip sa witin ai kupia lâka ba mapara buaia?” 20Bara man, upla, ¿man ba ya sma Gâd mapara unsabaisma ba? ¿Slaubla dakawa bui ai papaskra ra sip sa ki wiaia: “Dîa kan naku pali ai paskram?”#Ais 29.16; 45.9. 21Bamna dikwa papaskra ba mita slaubla ni dîa dîa witin brin dauki ba kat paskaia sip sa;#Jir 18.4-6. slaubla wiria brin ba ni, sip sa dikwa kumi paskaia diara pain daukaia baman, bara dikwa wala kumi paskaia sip sa dîa dîa daukaia dukiara.
22Bamna Gâd lika ai lawanka bara ai karnika tânka ba marikan dauki kan ba ra, witin wihka ai kupia alki takaski brin, baha uplika nani klala yaia bara âpu daukaia aitani kulkan kan nani ba mapara. 23Baku bamna, Gâd ai prana tara ba yawan bâk marikaia lukan, yaura witin yamnika kaiki ba, bara yaura sin patitara piua wina pat ridi sakan ba, ai prana ba wina ai dukia bribia. 24Bamna Gâd mita wan paiwan, Ju nani tila ba wina baman apia, sakuna Ju apia nani tila ba wina sin. 25Oseas wauhkataya ra aisi ba baku:
“Yang upliki apia nani kan ba,
yang upliki nani wimni;
ani mairka sin latwan kaikras katna ba,
yang laitwankira wimni.#Os 2.23.
26‘Man nani ba yang upliki nani apia sma’ wisata ba,
baha sim pliska ra witin wibia:
‘Man nani ba Gâd rayakira luhpia nani sma.’ ”#Os 1.10.
27Sakuna Israel luhpia nani dukiara Aiseya naku win: “Israel luhpia nani ba lika sim kabu auhika baku kabia kra, sakuna baha ba wina wiria baman swaki sakan kabia, 28kan Dawan lika naha tasba dîa aisin ba kat daukbia tasba aiska ra, bara isti pali sin.”#Ais 10.22-23. 29Baha sim Aiseya kau kainara aisin:
“Dawan, karnika sut bri ba
kiamka nani swiras kan kata, nanara
yawan lika Sodoma bara Gomora ba wal baku kaia kan.”#Ais 1.9.
Ju nani bara sturi yamni ba wal
30¿Bamna yawan naha dukiara dîa wibia? Kan kasak lukan lâka bâk Gâd mita idan nani ra param mariki pâtka wina pri sakan lâka ba yan, witin nani lika baha pri sakaia lâka ba plikras kan. 31Sakuna Israel luhpia nani lika, witin nani lâ lat daukaia kumi nina bliki kan Gâd mawanra yamni kulkan kaia kan ba, bara witin nani ra baha lâka kat mita sip yamni kulkras. 32¿Dîa kan? Kan witin nani lika kasak lukan lâka bâk kasakkira kulkan lâka ba plikras kan, sakuna witin nani mita dîa dauki kan ba bâk ni plikan. Baha mita “mina prukaia walpaya ra” ai mina pruki kauhi banhwan, 33Ulbanka ba ra dîa aisi ba:
“Yang bui walpa tara kum Saion ra mangkuna,
walpa kum bahara witin nani
ai mina prukaia;
ya bahara kasak lukbia ba,
ai lukanka ba kunin munbia apia.”#Ais 28.16.
Currently Selected:
Roman 9: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua