Roman 2
2
Gâd ba kasak lâka ra lâ daukisa
1Bahamna, man mita upla wala lâka aisi daukisma kaka, dîa sât uplika kama sin pâtkas kama apia. Upla wala lâka aisi daukisma ba mita, man lika yakan pâtkira pali takisma,#Mt 7.1; Lk 6.37. kan upla wala dîa dauki ba man pali sin daukisma. 2Bamna yawan lika kaikisa, naha diara dauki uplika nani ba, Gâd mita kasakka lâka kat lâ dauki pât ra dingkisa. 3Bara man mita upla wala lâka daukisma, kan man sin upla wala dauki baku daukisma bamna, ¿man lukisma Gâd lâ dauki ba wina swak takma? 4Apia kaka, ¿man lika Gâd yamnika manis ba, bara wihka takaski lâka ba sin bahki kulkisma, bara damra sin walras pali sma, Gâd yamnika lâka ba lika kupiam lakaia dukiara sa? 5Sakuna man lika kupiam karna pali sa, ba mita kupiam lakaia sin want apia sma. Bamna man mita puramra pât tara mangkisma, Gâd kasakka lâka kat lâ dauki marikbia ba yua ra; 6baha yua ra Gâd upla bani dîa daukan ba kat mana yabia.#Law 62.11-12; S L 24.12; Jir 17.10; Isi 18,30; 33.20; Mt 16.27. 7Gâd mita raya ban kaia lâka yabia, ani uplika nani wark painkira daukisa, bara mayunra, pain kulkan lâka wal pliki ba; 8sakuna lawan tara bara kupia baiwanka wal Gâd mita klala yabia, baha nani ai wîna kat baman luki ba, bara diara kasak ba bîla wali daukaia watlika ra diara saura ni dauki nani ba. 9Baku bamna, saura dauki nani ba mapara pât wahwaia lâka bara latwan wahwaia lâka sin bâra kabia, baha lika Ju nani ra pas, bara baha ningkara Ju apia nani ra sin. 10Ban sakuna, yamni dauki nani ra Gâd mita yabia, mayunan lâka, pain kulkan lâka bara kupia kumi lâka sin, Ju nani ra pas, bara Ju apia nani ra sin.
11Kan Gâd ba upla mawanka kulkaia lâka âpu sa, sut ba sim sât kulkisa;#Kli S 10.17. 12bamna baha nani Moses lâka alki briras ban saura dauki banhwi ba, baha lâka âpu kira pât ra tawbia; bara baha nani Moses lâka bri sakuna saura dauki banhwi ba, baha sim lâka ba ni lâka aisi daukan kabia. 13Kan lâ bîla wali baman uplika nani ba Gâd mita pain kulkras sa, sakuna lâ bîla wali dadaukra nani ba lika. 14Bamna Ju apia uplika nani lâ ba briras, sakuna witin nani lâ dîa wi ba kat daukisa, âu baha lâka pali ba bri banhras, kuna witin nani ai wîna ra sika lâ bri ba; 15kan ai tânka nani ba ni marikisa witin nani ai kupia ra lâ ba brisa. Naha kaiki banhwisa ai dara walanka ba ni, bara ai kupia lukanka nani ba mita ai dahra kwahkbia sa, apia kaka, ai hilpka aisabia. 16Sturi yamni smalkisa ba kat, baku sika baha yua Gâd mita Jisas Kraist bâk upla nani sut tânka yukuwan ra ba kat lâ daukbia.
Ju nani Moses lâka ba wal
17Bamna man wisma, man ba Ju, bara Moses lâka ba kat alki daukisma, Gâdkam ba dukiara tara damra walisma. 18Gâd kupia lâka ba kakaira sma, bara lâ mita mamrikisa diara kau pain ba bâk saki briaia. 19Bara man ba aitani sma damra walisma, blain nani tapahkaia bara tihmia tara ra tauki nani ra ingni yaia, 20sins aitani briras nani smasmalkrika kaia, tuktan nani ra sins tânka smalkaia sin. Bamna man lika lâ ba wina pat brisma, diara tânka briaia lâka bara diara kasak pali ba tânka sin. 21Bamna man mita upla wala smalkaia want sma ba, ¿dîa kan man yakan wînam ra smalkras sma ki? Man mita upla ra diara implikaia apia wisi smalkisma ba, ¿dîa muni man implikisma ki? 22Man wisma marit lâka sauhkaia apia, ¿bara dîa muni man pali marit lâka sauhkisma ki? Man aidul nani ra misbara kaikisma ba, ¿dîa muni man pali ai tempelka nani wina implikisma ki? 23Man lika lâ ba dukiara uya mamyunisma, sakuna Gâd swira ni paskisma, kan dîa lâ wi ba kat daukras sma ba mita. 24Bahamna Ulbanka ra aisi ba: “Idan nani ba Gâd mapara saura aisisa man nani pâtkam tâka kumi.”#Ais 52.5.
25Bahamna man lâ bîla wali daukisma kaka lika, Aisa sainka mangkram ba man ra hilp kabia. Sakuna man lâ bîla wali daukras sma kaka, baha lika man ba sin Aisa sainka mangkras baku sma. 26Bara ani uplika Aisa sainka mangkras sakuna dîa lâ wi ba kat daukisa kaka, witin ba sin Aisa sainka mangkan baku praiska kulkan kabia, ai wîna ra baha kau briras kabia sakuna. 27Bamna Aisa sainka briras, kuna lâ bîla wali dauki uplika ba mita lâmka daukbia. Kan man lika lâ ulbanka ba brisma, bara Aisa sainka daukan lâka ba sin, sakuna sip baha bîla wali daukras sma. 28Bamna lata tani Ju mâki ba baha apia sika Ju pali ba, bara Aisa sainka lata tani ra baman mangki ba, baha apia sika Aisa sainka uplika pali ba. 29Ban sakuna, kupia tani wina ba sika Ju pali ba, bara Aisa sainka kasak pali ba lika wan kupia dukia sa;#Kli S 10.16; 30.6; Jir 4.4. baha ba wauhkataya ulban lâka ba apia, kuna Spirit lâka sa. Naha dauki uplika ba upla mita tânka ba pliki kaikbia apia, sakuna Gâd mita lika.
Currently Selected:
Roman 2: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua