Jems 1
1
Lakula bîla
1Yang, Jems,#Mt 13.55; Mk 6.3; Ap St 15.13; Gal 1.19. Gâd bara Dawan Jisas Kraist dukia dadaukra, Israel kiamka 12 tasba aiska ra yakaban nani ra lakula wisna.#1 Pi 1.1.
Sins lâka ba Gâd wina aula
2Muihki nani, man nani traika kaikanka nani wina trabil sât sât brima ba ra, lilia kaia sma. 3Man nani pat kaikisma kasak lukankam ra traika kaikan aula kaka, kau bapi buaia lâka ba briaia sma. 4Trai kaiks baha bapi buram ba kat kauhras ban kaia, baku mika man nani upla aiska bara aitani kat kama, diara sut sin bri kama.
5Man nani tilamra ya sins lâka luha sa kaka, Gâd ra makabia, bara Gâd mita yabia; kan witin sika ai kupia aiska ni upla sut ra yabisa, swira sin daukras kira.#1 Ki 3.7-12; S L 1-9; Je 3.13-17. 6Sakuna kasak luki makabaia sa, namhpa namhpa lika apia. Baku luki uplika ba lika sim kabu ra rip baku sa, pâsa mita tawi, tani kumi wina wala ra brih auya baku.#Mt 7.7-11; Jn 16.23-24. 7Ya baku sa kaka, lukpara Dawan wina diara brima apia ba, 8kan ya naiwa diara kum lukisa, bara yauhka diara wala, ai daukanka ba wapni bapi buras sa.
9Wan muihni kum bawan lâka bri ba, Gâd mita purara bukbia, bara ai âuyapah kabia;#Jir 9.24. 10lalahkira ba Gâd mita mâyara lahbia ba ra, witin lilia kaia sa. Kan yuyakira ba, twi tangnika nani ban kaia apia ba wal baku sa. 11Lapta uya karna takuya ba ra, twi ba lâwisa, bara tangni ba lika mahka srawi, bamna ai prana ba âpu takisa.#Ais 40.6-7. Baku sin, yuyakira ba ai bisniska tila kat tanis tiwbia.
Pât bara traika kaikanka nani
12Ani uplika traika kaikanka trabilka mapara kasak luki bapi bûi ba, yamni pali sa; kan witin baha mapara kasak bapi bubia ningkara, raya kaia lâka ba kraun kum baku witin ra prisantka yaban kabia. Baha sika Gâd mita pramis munan, witin mita latwan kaiki uplika nani ra. 13Ya ya diara saura daukaia traika kaikanka kat kasak lukbia, witin traika kaikan ba Gâd mita witin ra yabisa. Gâd lika diara saura daukaia traika kaikanka briras, upla ra sin witin mita traika kaikras. 14Kuna, ya ya ai brinka nani mita raski pât ra dingkisa kaka, witin ba traika kaikan ra kauhisa. 15Naha brinka saura nani wina sika saura lâka takisa; bara saurka ba tara pâwan ba ra, prura ba aula.
16Muihki laitwankira nani, upla yarka kunin mai munbiara; 17diara pain bara kasak nani ba, kasbrika pura ba wina balisa; Gâd kasbrika pura ingnika nani paskan ba mita wankisa. Gâd lika piua bani ban kaia ra ban bâra sa,#Kul K 23.19; Mal 3.6. bara witin mita dista kumi ni sin yawan ra wan madiskras sa. 18Sturi kasakkira bâk rayaka wankan sa,#1 Pi 1.23. diara nani sut paskan ba tilara, yawan pas tâura kaia dukiara; kan witin baku pali want sa bamna.
Kristian lâka kasak pali ba
19Naha na âmya ra bri bas, muihki laitwankira nani: man nani kumi bani walaia dukiara ridi kaia sma, sakuna damra wali kaia sma, aisaia bara praut takaia mapa ra. 20Kan upla ai kupia baiki ba, Gâd kupia lâka ba kat sip daukras. 21Baku bamna, tâski lâka, saurka lâka ailal ba sut swi si, bara bawan lâka ra sturi painkira kupiam ra mangkan ba alki bris. Kan baha sturka yamni ba lika, swaki mai sakaia karnika brisa.
22Sakuna sturi yamni na walaia baman apia, dîa wi ba alki daukaia sa; kan baku daukras kaka, wînam ra kunin munisma. 23Bamna ya sturka yamni ba wali, sakuna bîla wali daukras kaka, witin lika upla kum ai mawan kaikaia glaska ra ai mawan kaiki ba baku sa. 24Witin nahki ai tânka ba kaikuya, kuna mahka auya; witin nahki kata ba ai âuya tiwuya. 25Upla kum diara dauki ba mita, Gâd ai yamnika yabia lukisa kaka, aman walaia sa bara ai âuya tikaia apia sa; bara kasakka lâka pri wan dauki ba kat, aman pali tawi kaiki si, baha lâka nina blikaia sa, bara dîa wi ba kat sin daukaia sa.
26Upla kum wisa witin kristian, sakuna ai twisa ba sip alki takaskras kaka, ai wîna ra kunin munisa, bara ai kristianka lâka ba bahki sa. 27Gâd Aisa mapa ra kristian lâka klin bara tâski âpu ba naha sika: Tuktan rau nani bara piarka nani ra hilp munaia, bara naha tasbaya dukia saura nani wal tâski takaia apia.
Currently Selected:
Jems 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua