2 Jan 1
1
Lakula bîla
1Yang, serts almukka sna ba, Gâd mita bâk ai sakan; bara wan kristian daknika bâk sakan uplika nani sut ra laikula blikisna. Witin nani ra kasak pali latwan kaikisni, bara yang baman apia, kuna diara kasak tânka ba kakaira takan nani sut mita sin. 2Diara kasak pali wan kupia ra bri ba mita, yang bui man nani ra latwan mai kaikisni, bara baha dukia kasak pali ba sin, ban wan kupia ra kabia. 3Gâd Aisa bara ai Luhpia Jisas Kraist mita yamni mai munbia bara umpira mai kaikbia, kupia kumi lâka ba maikbia, diara kasak pali ba tânka ra bara latwan lâka ra sin.
4Yang uya lilia pali takri, kan man luhpiam tila nani kaikri ba ra, witin nani lika kasak tânka kat ban iwisa;#3 Jn 3. Gâd Aisa dîa adarka wankan ba tânka kat. 5Bara nanara, laikra, mamkabisna yawan pana pana wan walka ra latwan kaikaia.#Jn 13.34; 15.12,17. Naha man ra ulbisna na, lâ raya lika apia sa, kuna baha sim lâka yawan tâ pali ra bri kata ba sika. 6Latwan lâka tânka ba sika naha: Gâd lâka nani ra dîa wi ba kat iwi kaia; bamna tâ pali piua ra baha lâka ba dukiara pat walram baku, man nani latwan lâka ra iwi kama.#Jn 14.15,23-24; 1 Jn 5.3.
Kunin mamunra nani ba
7Kuninkira ailal naha tasba ra wataukisa, bara witin nani lika Jisas Kraist upla kasakkira naha tasba ra balan ba tânka param pali aisin ba bîla wali daukras sa. Ya baha baku ba sika kuninkira, bara Kraist mapara ba. 8Man nani aman pali kaiki bas, baku lika warkkam mana tikma apia, sakuna mamna aiska pali ba brima.
9Ani uplika Kraist smalkanka ba swi si ai kupia lâka kat ban tauki ba, witin lika Gâd luha pali sa; kuna ani uplika Kraist smalkanka kat ba, witin lika Aisa ba brisa bara Luhpia ba sin.#1 Jn 2.22-23; 4.15. 10Ani uplika naha smalkanka brih man nani ra balras sa kaka, wamtla ra dingki bripara, bara lakula sin wipara; 11kan ani uplika mita lakula wibia kaka, witin lika baha uplika saura dauki ba wal kumi takisa.
Prakaia lakula nani
12Yang diara manis brisni man nani ra mai wiaia, kuna brin ai daukras baha ba ulbi mai wiaia. Man nani ra waia lukisni, wînam pali kat baha sturka ba aisaia,#3 Jn 13-14. bara baku mika wan liliaka ba aiska pali kabia.
13Muihkam luhpia nani, witinka nani ra Gâd mita bâk saki brin nani ba mita sin, ai lakula nani mai blikisa.
Currently Selected:
2 Jan 1: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua