Mateyo 1
1
Basikale ba Jesu
(Luka 3.23-38)
1Jesu Kilisito buzyalwe bwakwe buzwa ku mwami Devedi a Abulahamu. 2Abulahamu wakazyala Izaka, Izaka wakazyala Jakobo, Jakobo wakazyala Juda, ababunyina. 3Juda wakazyala Pelezi a Zela kuli Tama, Pelezi wakazyala Heziloni, Heziloni wakazyala Lamu. 4Lamu wakazyala Aminadabu, Aminadabu wakazyala Nasyoni, Nasyoni wakazyala Salimoni. 5Salimoni wakazyala Bowazi kuli Lahabu, Bowazi wakazyala Obedi kuli Lute, Obedi wakazyala Jese.
6Jese wakazyala mwami Devedi. Lino Devedi wakazyala Solomoni kuli wakali muka Uliya. 7Solomoni wakazyala Lehobowamu, Lehobowamu wakazyala Abija, Abija wakazyala Asa. 8Asa wakazyala Jehosyafati, Jehosyafati wakazyala Jolamu, Jolamu wakazyala Uziya, 9Uziya wakazyala Jotamu, Jotamu wakazyala Ahazi, Ahazi wakazyala Hezekiya. 10Hezekiya wakazyala Manase, Manase wakazyala Amosi, Amosi wakazyala Josiya. 11Josiya wakazyala Jekoniya ababunyina kuciindi cakutolwa kwa Baisilayeli ku Babuloni.
Basikale ba Jesu kutalikila ciindi nibakagwisigwa mu bwaange ku Babuloni kusikila kuku zyalwa kwakwe
12Lino musule aakutolwa ku Babuloni, Jekoniya wakazyala Syiyalutiyeli, Syiyalutiyeli wakazyala Zelubabeli. 13Zelubabeli wakazyala Abiyudi. Abiyudi wakazyala Eliyakimu, Eliyakimu wakazyala Azo. 14Azo wakazyala Zadoki, Zadoki wakazyala Akimu, Akimu wakazyala Eliyudi. 15Eliyudi wakazyala Eliyazaa, Eliyazaa wakazyala Matani, Matani wakazyala Jakobo. 16Jakobo wakazyala Josefa mulumi wa Maliya, banyina Jesu uutegwa Munanike wa Leza. 17Aboobo mazyalani oonse kuzwa kuli Abulahamu kusikila kuli Devedi akali kkumi aane, alimwi kuli Devedi kusikila kuciindi cakutolwa ku Babuloni kwakali mazyalani aali kkumi aane, alimwi kuzoosika kukuzyalwa kwa Kilisito kwakali mazyalani aali kkumi aane.
Kuzyalwa kwa Jesu Kilisito
(Luka 2.1-7)
18Lino mboobu mbwaakazyalwa Jesu Kilisito. Maliya banyina bakalikkalidwe kuli Josefa, lino kabatana swaangana, kwakajanika kuti Maliya wakalimitide kwiindila munguzu zya Muuya Uusalala. 19Mpawo Josefa mulumaakwe, nikuba kuti wakali muntu uululeme, alimwi mbwaatakali kuyanda kuti amuusye nsoni, wakayeeya kuti amuleke cacuumunizi. 20Nkabela naakacili kuyeeya ceeci, mungelo wa Mwami wakalibonya kuli nguwe muciloto wati, “Josefa, mwanaa Devedi, utayoowi kukwata mukaintu wako, nkaambo eeco ncamitide nca Muuya Uusalala. 21Uyoozyala mwana mulombe ngoti kaulike zina lya Jesu, nkaambo uyoofutula bantu bakwe kuzwa kuzinyonyoono.”
22Eezi zyoonse zyakacitika kuti zibe masimpe eezyo Mwami zyaakaamba kwiindila mumusinsimi kuti, 23“Ncobeni musimbi uutazi musankwa uyoomita, akuzyala mwana mulombe nkabela zina lyakwe liyootegwa Imanuweli,” nkokwaamba kuti Leza ulaandiswe.
24Ciindi Josefa naakasinsimuka wakacita mbubonya mbuli mungelo wa Mwami mbwaakamulailila, wakakwata mukaintu wakwe. 25Pele taakwe nibakaswaangana, mane kusikila mwana wakatumbukwa, eelyo wakamuulika zina lya Jesu.
Currently Selected:
Mateyo 1: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.