Matyu 1
KRIO13

Matyu 1

1
Jizɔs Krays In Fambul Layn
(Lyuk 3:23-28)
1Na Jizɔs Krays in fambul dɛn, frɔm Ebraam in tɛm dɛn wan ya: Jizɔs Krays na wan pan Devid in grampikin pikin dɛm, ɛn Devid na wan pan Ebraam in grampikin pikin dɛm. 2Ebraam bɔn Ayzak, Ayzak bɔn Jekɔb, Jekɔb bɔn Juda ɛn Juda in brɔda dɛn, 3Juda bɔn Pɛrɛz ɛn Zera (na Tama na bin dɛn mama), ɛn Pɛrɛz bɔn Ɛzrɔn, Ɛzrɔn bɔn Ram. 4Ram bɔn Ami na dab, Ami na dab bɔn Nashɔn, Nashɔn bɔn Salmɔn, 5Salmɔn bɔn Boaz (Boaz in mama bin nem Reab), Boaz bɔn Obɛd (Obɛd in mama bin nem Rut), Obɛd bɔn Jɛsi, 6Jɛsi bɔn Devid we na bin kiŋ.
Kiŋ Devid bɔn Sɔlɔmɔn wit Yuraya in wɛf, 7Sɔlɔmɔn bɔn Rɛoboam, Rɛoboam bɔn Abija, Abija bɔn Asa, 8Asa bɔn Jɛosha fat, Jɛosha fat bɔn Joram, Joram bɔn Uzaya, 9Uzaya bɔn Jotam, Jotam bɔn Eaz, Eaz bɔn Ɛzi kaya, 10Ɛzi kaya bɔn Manasɛ, Manasɛ bɔn Emɔs, Emɔs bɔn Josia, 11Josia bɔn Jɛoya kin ɛn ɔda bɔy pikin dɛn we na Jɛoya kin in brɔda dɛn. Josia bin bɔn dɛn pikin ya di tɛm we dɛn bin kɛr di Izrɛl pipul dɛn go Babilɔn go mek dɛn slev.
12Afta dɛn kɛr dɛn go mek dɛn slev na Babilɔn, Jɛoya kin bɔn Shiɛltiɛl, Shiɛltiɛl bɔn Zɛrubabɛl, 13Zɛrubabɛl bɔn Abiɔd, Abiɔd bɔn Ɛliakim, Ɛliakim bɔn Azɔ, 14Azɔ bɔn Zadɔk, Zadɔk bɔn Akim, Akim bɔn Ɛliɔd, 15Ɛliɔd bɔn Ɛlieza, Ɛlieza bɔn Matan, Matan bɔn Jekɔb, 16Jekɔb bɔn Josɛf we mared Meri we bɔn Jizɔs, we dɛn kɔl Mɛsaya, dat na di pɔsin we Gɔd pik.
17Na fotin difrɛn jɛnareshɔn (frɔm grampapa papa dɛn to grampikin pikin dɛm) bin de frɔm Ebraam in tɛm sote rich Kiŋ Devid in tɛm, ɛn na fotin bin de frɔm Kiŋ Devid in tɛm sote rich di tɛm we dɛn kɛr di Izrɛl pipul dɛn go Babilɔn go mek dɛn slev, ɛn na fotin bin de frɔm di tɛm we di Izrɛl pipul dɛn bin bi slev na Babilɔn sote di tɛm we Krays bɔn.
Aw Jizɔs Krays Bɔn
(Lyuk 2:1-7)
18Ɔl wetin bi di tɛm we Jizɔs Krays bɔn nain a de kam tɛl una so: Josɛf bin dɔn put stɔp fɔ mared Meri we na Jizɔs in mama, bɔt bifo dɛn mared, Meri fɛnɔt se Gɔd in Spirit mek i gɛt bɛlɛ. 19Josɛf na bin man we de waka tret, ɛn i nɔ bin want mek ɔlman no wetin bi to Meri, bikɔs Meri bin go shem. So i mekɔp fɔ lɛf Meri, saful. 20Wɛn Josɛf bin de tink bɔt wetin i go du, nain Gɔd sɛn enjɛl kam to am na drim. Di enjɛl se, “Josɛf, yu we na Kiŋ Devid in grampikin pikin nɔ fred fɔ mared Meri, bikɔs na Gɔd in Spirit kam pan am we i gɛt bɛlɛ. 21Meri go bɔn bɔy pikin ɛn yu go kɔl di pikin Jizɔs; bikɔs i go sev Gɔd in pipul dɛn frɔm dɛn sin.”
22Ɔl dis bi so dat wetin Gɔd bin dɔn mek di prɔfɛt dɛn tɔk go bi lɛkɛ aw dɛn bin se. Di prɔfɛt dɛn bin se, Gɔd se, 23“Wan yɔŋ uman we nɔ no bɔt man yet go gɛt bɛlɛ ɛn i go bɔn bɔy pikin, dɛn go gi di pikin nem Imanyuɛl” (Imanyuɛl min se, Gɔd de wit wi).
24So wɛn Josɛf wek, i du wetin di enjɛl tɛl am fɔ du; i mared Meri. 25Bɔt Josɛf nɔ no Meri fɔ wɛf sote Meri dɔn bɔn di bɔy pikin. Josɛf kɔl di pikin, Jizɔs.

Krio Bible © The Bible Society of Sierra Leone, 2013.


Learn more about Krio Fɔs Oli Baybul

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.