Lucas 14
14
Entëru cuerpun jakaykaq runata Jesús allïtsinqan
1Tsaypitanam juk jamay junaqchö mandakuq fariseupa wayinman Jesús mikuq aywarqan. Tsaychö kaykaq runakunanam Jesústa rikaraykäyarqan <<mä imatash ruranqa>> nirnin. 2Jesúspa puntanchönam entëru cuerpun jakaykaq runa kaykarqan. 3Jesúsnam ley yachatsikuqkunata y fariseukunata tapurqan: <<Qeshyaykaq runata jamay junaqchö ¿allïtsishwanku o manaku?>>
4Peru paykunaqa manam imatapis parlakuyarqantsu. Tsaymi qeshyaq runata Jesús yataykur allïtsirnin nirqan: <<Kananqa wayikipana aywakuy>>.
5Tsaypitanam tsay runakunata nirqan: <<Mayqaykipapis wamraykikuna o töruykikuna pözuman jeqaptin jamay junaq kaykaptinpis ¿manaku jinan höra jipiq aywayanki?>>#14.5 Tsaynö Jesús nirqan runakuna wamranta o törunta jamay junaq kaykaptinpis pözupita jipiyanqannö paypis qeshyaqkunata jamay junaq kaykaptinpis allïtsinqantam.
6Tsaynö niptin manam ima niytapis puëdiyarqantsu.
Punta puntaman mana jamakunantsikpä Jesús yachatsinqan
7Invitanqan runakuna jamakuyänanpä punta puntamanrä aywaqta rikaykurmi Jesús nirqan: 8<<Casaray fiestaman invitayäshuptiki punta puntamanqa ama jamakuyankitsu. Quizasmi qamkunapita mas respitashqa runata invitashqa kanman. 9Tsaychö jamayaptikim invitayäshuqniki niyäshunki: <Pay jamakunanpä witikuy>. Tsaynö niyäshuptikim penqakurnin qepaman aywar jamakuyanki. 10Tsaypa rantinqa fiestaman invitayäshuptiki qepaman jamakuyanki. Tsaymi invitashuqniki shamur niyäshunki: <Amïgu, mas puntaman päsakamuy>. Tsaynö jamatsiyäshuptikim qamwan jamaqkuna respitayäshunki. 11Allish tukuqkunam penqakuyman churashqa kayanqa. Peru llänu shonqu kaqkunam sïqa alliman churashqa kayanqa>>.
Mikuyänanpä pikunata invitanantsikpä Jesús ninqan
12Tsaypitanam wayinman invitaq fariseuta Jesús nirqan: <<Pitapis mikuyänaykipä invitarqa ama kuyanakuyanqayki kaqkunallata, ni wawqikikunallata, castaykikunallata ni rïcu kaq vecïnuykikunallataqa invitankitsu. Paykunallata invitaptikiqa rantintaqa qamtapis invitayäshunkim. 13Tsaypa rantinqa invitanki pobrikunata, ratakunata, wishtukunata y qaprakunata. 14Paykuna mana kutitsiyäshuptikipis alli ruraq runakuna kawayämunqan junaqmi Tayta Dios kutitsishunki>>.
Mikuyänanpä invitanqan runakunaman Jesús iwalatsinqan
Mateo 22.1-10
15Tsaymi mësachö Jesúswan jamaraykanqanpita juk runa nirqan: <<¡Ima kushishqarä kayanqa Tayta Diospa mandakuyninchö mikuqkuna!>>
16Jesúsnam nirqan: <<Juk runash atskaq runakunata invitanä wayinchö mikuyänanpä. 17Mikuy höranash sirviqninta mandanä invitanqan runakunata ninanpä: <Llapanpis listunam. Jinan hörash aywakulläshun>.
18<<Peru tsay invitanqan runakunash rugakuyänä mana aywayänanpä. Tsayshi juknin ninä: <Chakratam tsayrä rantirqü. Tsaymi chakra rikaq aywar shamuyta puëdïtsu. Noqapita ama qallayätsuntsu>.
19<<Jukaqnash ninä: <Pitsqa yuntatam rantirqü. Tsaymi yachatsiq aywaykä. Noqapita ama qallayätsuntsu>.
20<<Y juknin kaqnash ninä: <Tsayrämi casarakurqü. Tsaymi shamuyta puëdïtsu>.
21<<Sirviqnin kutiykurnash runakuna imanö niyanqantapis patronninta willanä. Willaptinshi patronnin pasaypa rabyar sirviqninta ninä: <Pläzakunapa y cällikunapa jinan höra aywar pobrikunata, wishtukunata, ratakunata y qaprakunatapis pushamuy>.
22<<Ninqannö pushaykurshi patronninta ninä: <Taytay, nimanqaykinöllam pushamurqü. Tsaynö kaptinpis wayikiman manarämi juntayanrätsu>.
23<<Patronninnash ninä: <Nänikunapa y chakrakunapa aywar tarinqayki runakunata wayïman juntanqanyaq rigorpa pushamuy. 24Noqam nï: Puntata invitanqäkunaqa mananam wayïchö mikuyanqanatsu> >>.
Discïpulun kananpä Jesús yachatsinqan
Mateo 10.37-38
25Atskaq runakuna qatiräyaptinmi Jesús nirqan: 26<<Pipis discïpulü kayta munarqa mamanta, papäninta, warminta, tsurinkunata, wawqinkunata, paninkunata y kikinpa vïdanta kuyanqanpita noqata mas kuyamätsun. Tsaynö mana kuyamarqa manam discïpulü kayanmantsu. 27Cruzninta apaqnö mana qatirämarqa#14.27 Cruzninta apaqnö mana qatirämar nirqa ima ñakaychö karpis Jesucristuta qatiränanpä kanqantam nin. manam discïpulü kayanmantsu.#Mat. 10.38; Mar. 8.34; Luc. 9.23; Juan 12.25.
28<<Mayqaykipis wayita rurayänaykipä shumaqrämi yarpachakuyanki ushatsiyänaykipä qellayniki aypanqanta o mana aypanqantapis. 29Cimientuykullar dëjaskiptikiqa llapan rikaqkunam jamur niyäshunki: 30<¡Kay runaqa wayita qallaykatsir manam ushatsiyta puëdishqatsu!>
31<<Maski juk rey jukpa contran guërrata rurananpä aywatsun. Manarä aywarmi yarpachakur nin: <Noqapa soldädükunaqa chunka waranqallam (10,000), peru chikimaqnïpaqa ishkay chunka waranqam (20,000). Tsay wallkaqlla soldädükunawan ¿vincishätsurä?> 32Mana vincinanpä kanqanta tantiyarqa contran rey karullachörä kaykaptinmi manana pelyayänanpä willakuqkunata mandan. 33Tsaynöllam mayqaykipis imaykaykikunata noqa raykur mana dëjarqa discïpulü kayta puëdiyankitsu>>.
Kachiman Jesús iwalatsinqan
Mateo 5.13; Marcos 9.50
34<<Kachiqa allim. Qamlaskirqa manam imapäpis välinnatsu. 35Chakrapä ni wanupäpis mana väliptinmi jitaskintsik. ¡Rinriyuq kaqkunaqa ninqäkunata wiyakuyätsun!>>
Currently Selected:
Lucas 14: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.