Lucas 12
12
Fariseukunanö mana kanantsikpä Jesús ninqan
Mateo 10.26-27
1 Fariseukuna contran kayaptinpis Jesús yachatsinqanta wiyayta munarmi runakuna waranqa waranqapa qorikaykur tanqanakurrä kaykäyarqan. Tsaymi discïpulunkunata yachatsir Jesús nirqan: <<Cuidädu fariseukunapa levadüranta chaskiyankiman. Tsay levadüraqa allish tukuq kayanqanmi kaykan. 2Pakayllapa rurayanqanpis rikakanqam. Pipis mana rikaykaptin rurayanqanpis llapanmi musyakanqa. 3Tsakaychö pakayllapa parlayanqaykitam atsikyaychö wiyayanqa. Punkuta wichqarkur shapshapyayllapa parlayanqaykitam wayi jananman yarkurkur jinchipa willakuyanqa.
Pitapis mana mantsayänanpä Jesús yachatsinqan
Mateo 10.28-31
4<<Kuyay amïgükuna, qamkunatam nï: Ama mantsariyankitsu pipis wanutsiyäshunaykipä jurapäyäshuptiki. Wanutsiyäshurnikipis mastaqa manam imatapis rurayäshunkinatsu. 5Tsaypa rantinqa Tayta Diospita mantsapakuyay. Paymi sïqa poderyuq kaykan wanuskatsiyäshurniki infiernuman qaykuyäshunaykipä. Tsaymi paypitaqa mantsapakuyänayki.
6<<¿Manaku pitsqa pishqukunata ishkay centimullachö rantikuyan? Tsaynö kaptinpis pishqukunata Tayta Diosmi imaypis rikan. 7Aqtsaykikunapis paypäqa yupashqam kaykan. Qamkunaqa atska pishqukunapitapis masmi väliyanki. Tsaynö kaykaptinqa ama mantsariyaytsu.
Jesúspa favornin parlaqkuna imanö kayänanpä ninqan
Mateo 10.19-20, 32-33; 12.32
8<<Noqam nï: Pipis runakunapa puntanchö favornï parlaptinqa Runapa Tsurinpis Tayta Diospa angelninkunapa puntanchömi paykunapa favornin parlanqa. 9Pipis runakunapa puntanchö ñëgamaptinqa noqapis Tayta Diospa angelninkunapa puntanchömi ñëgashä.
10<<Pipis Runapa Tsurinpa contran parlayaptinqa Tayta Diosmi perdonanqa. Peru Espíritu Santupa contran parlayaptinmi sïqa Tayta Dios imaypis perdonanqatsu.#12.10 Espíritu Santuqa jutsantsikta dëjaskir Jesucristuman yärakunantsikpämi tantiyatsimantsik (Juan 16.8-11). Tsaymi Espíritu Santupa contran parlarqa pay tantiyatsinqanta mana chaskikur Jesucristuman imaypis yärakuntsu (Hech. 7.51). Peru Jesucristuman yärakuq kaqmi sïqa perdonashqa kanqa.#Mat. 12.32.
11<<Sinagögakunaman, juezkunaman y autoridäkunaman apayäshuptiki ama llakikur niyankitsu: <¿Imatarä nishä? ¿Imanörä parlashä?> 12Parlayanqayki höram Espíritu Santu imata parlayänaykipäpis tantiyatsiyäshunki>>.
Imapäpis mallaqashqa mana kanantsikpä Jesús yachatsinqan
13Runakunapa chawpinpitam juk runa Jesústa nimurqan: <<Rabí, wawqïta niykuy töcamanqan herenciäta rakipamänanpä>>.
14Jesúsnam nirqan: <<Amïgu, noqaqa manam jueznikitsu kä herenciaykikunata rakipänäpä>>.
15Tsaypitanam runakunata nirqan: <<Cuidädutä imapäpis mallaqashqa kayankiman. Alli kawayqa manam imaykayuqpis kayrätsu>>.
16Tsaynö niskirnam iwalatsikuypa yachatsikur nirqan: <<Juk rïcu runash murukunqanpita atskata cosechanä. 17Tsayshi yarpachakur ninä: <Kananqa ¿maymantä kaytsika mikuynïta churashä? Wayï manam aypannatsu churanäpä>. 18Tsaynö yarpachakurshi ninä: <Churakuna wayïta paskaskirmi mas jatuntana shäritsishä. Tsaymanmi llapan qorinqä mikuynïkunata y imaykäkunatapis churashä. 19Atska watapä tsaynö churakuykurqa imapäpis mana yarpachakurnam mikur upyar kushishqa kawakushä>. 20Tsaynö yarpachakur kaykaptinshi Tayta Dios ninä: <¡Llutan yarpaq malafë toqshu! ¡Kanan paqasmi wanunki! Llapan churanqaykikuna ¿pipärä quëdanqa?> >>
21Jesús parlar ushaskirmi nirqan: <<Tsaynömi kikillanpä imaykata qoriq runata päsan. Rïcu karpis Tayta Diospäqa pobripitapis masmi llakipaypä kaykan>>.
Tayta Diosman criyikunantsikpä Jesús yachatsinqan
Mateo 6.25-34
22Tsaypitanam discïpulunkunata Jesús nirqan: <<Ama yarpachakuyaytsu: <¿Imanörä kawashä? ¿Imatarä mikushä? ¿Imatarä jatikushä?> 23Manam mikuyllapä ni röpallapä yarpachakunapätsu kaykantsik. 24Pishqukuna imanö kawayanqantapis tantiyakuyay. Paykunaqa manam murukuyantsu ni cosechayantsu ni churakuyantsu. Tsaynö kayaptinpis Tayta Diosmi mikuyta qaran. Tayta Diospäqa pishqukunapitapis masmi väliyanki.
25<<Pasaypa yarpachakurpis ¿pirä tamäñunpita mastaqa jatunyanman? 26Tsayllatapis mana puëdiykarqa ¿imapätä kay vïdachö kaqkunapä yarpachakuyanki?
27<<Waytakuna imanö wiñayanqantapis tantiyayay. Waytakunaqa manam arukuyantsu ni putskakuyantsu. Noqam nï: Waytakuna kuyayllapä kayanqannöqa manam rey Salomónpa röpankunapis kuyayllapä karqantsu.#1Rey. 10.4-7; 2Crón. 9.3-6. 28Yärakuyniynaq janan shonqu runakuna, waray warantin rupatsishqa kananpä kaptinpis qewakunata kuyayllapä wiñaykätsirqa ¿manatsurä qamkunatapis munayanqaykita Tayta Dios alistapäyäshunki?
29<<Tsaynö kaykaptinqa ama yarpachakur niyaytsu: <¿Imatarä mikushun? ¿Imatarä upushun?> 30Kay patsachöqa llapan runakunapis tsaynömi llakikuyan. Qamkunapa Papänikim imata munayanqaykitapis musyan. 31Mas bien Tayta Diospa mandakuyninchö kawayänaykipä yarpachakuyay. Tsaynö kawayaptikiqa imata munayanqaykitapis alistapäyäshunkim.
Pobrikunata yanapanapä Jesús yachatsinqan
Mateo 6.19-21
32<<Qatirämaqnïkuna, wallka üshanölla karpis ama llakikuyaytsu. Qamkunatam Papäniki akrayäshurqayki paypa mandakuyninchö kawayänaykipä.
33<<Imaykaykikunatapis rantikuskir pobrikunata yanapayay. Tsaynö rurarqa riquëzaykita gloriamanmi churakuykäyanki. Tsaytaqa manam suwapis apanqatsu ni puyupis ushanqatsu. 34Riquëzaykita churayanqaykimanmi shonquykipis yarparaykanqa.
Alistakushqa kanantsikpä Jesús yachatsinqan
35<<Tseqllaykikunata alli wachakakurkur aktsikikuna tsaritsishqa listu kaykäyay. 36Casaray fiestapita patronnin kutimunanta shuyaraq sirviqnö kayay. Tsay sirviqkunaqa patronnin chaykur töcakuptin jinan höram punkuta kichapuyanqa. 37Patronnin chämur shuyaykaqta tarinqanpitam sirviqninkuna pasaypa kushikuyanqa. Rasunpam nï: Kikin patronmi sirviqninkunata mësaman jamaykatsir mandilta jatikurkur mikuyninkuna qaranqa. 38Pullan paqas o madrugädu patronnin kutimur shuyaykaqta tariptinmi sirviqninkuna pasaypa kushikuyanqa.
39<<Tantiyayay. Imay höra suwa shamunanpä kanqanta musyarqa mana punuypam wayinta pipis täpanman. 40Tsaynölla qamkunapis alistakushqalla kayay. Mana musyayanqayki höram illaqpita Runapa Tsurin shamunqa>>.#Mat. 24.44.
Sirviqman Jesús iwalatsinqan
Mateo 24.45-51
41Tsaynö niptinnam Pedro tapurqan: <<Taytay, tsaynö yachatsikunqaykiqa ¿noqakunallapäku o llapan runakunapäwanku?>>
42Jesúsnam nirqan: <<Mas yärakunqan y yachaq sirviqnintam wayinman patronnin churan wakin sirviqkunatapis höranchö qarananpä. 43Patronnin kutimur yätsinqannö llapantapis ruraykaqta tariptinmi tsay sirviq pasaypa kushikunqa. 44Rasunpam nï: Tsay sirviqninpa poderninmanmi llapan imaykantapis patronnin churanqa. 45Peru mana confiakuypä sirviq karmi sïqa <patronnï manarämi kutimunqarätsu> nir sirviq mayinkunata warmitapis ollqutapis maqan y upyaq mayinkunawan mikur upyar jitaräkun. 46Tsaynö kaykaptinmi mana yarpanqan höra illaqpita patronnin kutimur wakin mana cäsuqkunatawan juntu tsay sirviqninta mana kuyapaypa castiganqa.
47<<Patronnin ninqanta musyaykar mana wiyakuypa llutanta ruraq sirviqtaqa pasaypam castiganqa. 48Peru mana musyayninpa llutanta ruraq sirviqtam sïqa alläpa castiganqatsu. Tsaynöllam Tayta Diospis mas yärakunqan kaqkunata cuentata mas mañanqa.
Chikishqa kayänanpä kanqanta Jesús ninqan
Mateo 10.34-36
49<<Noqaqa kay patsachö ninata tsaritsinäpämi shamurqü. ¡Mayna rupaykänantam munä!#12.49 Ninata tsaritsinanpä ninqanqa Jesucristo mana allita ushakätsinanpä (3.9, 17; 9.54) o runakuna chikinakuyänanpä (12.51-53) o Espíritu Santuta mandamunanpä kanqantam (3.16) nin. 50Peru puntataqa pasaypa ñakatsiyämarrämi wanutsiyämanqa. Tsaytam pasaypa llakikur shuyaykä.
51<<¿Kay patsachö runakuna tranquïlu kawayänanpä shamunqätaku yarpäyanki? Manam tsaypätsu shamurqü, sinöqa kikinkunapura chikinakuyänanpämi. 52Kananpitam juk wayichö pitsqaq tarqa ishkay kaqpa contran kimsa kayanqa. Ishkay kaqnam kimsa kaqpa contran kayanqa. 53Tsurinpa contranmi papänin, papäninpa contranmi tsurin, wamranpa contranmi maman, mamanpa contranmi wamran, llumtsuyninpa contranmi suegran y suegranpa contranmi llumtsuynin>>.
Jesús ruranqankunata mana tantiyayanqan
Mateo 16.2-3
54Tsaychö qorikashqa kaykaq tsaytsika runakunatam Jesús nirqan: <<Rupay ullunan kaqpa pukutay yurimuptinqa: <Tamyanqanam> niyanki y niyanqaykinöllam tamyan. 55Sur lädupita vientu shamuptinqa <achanqanam> niyanki y niyanqaykinöllam achan. 56¡Allish tukuqkuna! Tsaykunata tantiyaykarqa ¿imanirtä ruranqäkunata rikaykar Tayta Dios mandamanqanta tantiyayankitsu?
Juezman manarä char arreglanantsikpä Jesús ninqan
Mateo 5.25-26
57<<¿Imanirtä tantiyayankitsu shumaq kawayänaykipä kanqanta?
58<<Pipis demandayäshuptiki autoridäman manarä char ras arreglayay. Mana arreglayaptikiqa juezmanmi apatsiyäshunki. Jueznam wardiakunawan carcelman wichqatsiyäshunki.#12.58 Jueztam Tayta Diosman iwalatsin. Tsaymi Jesucristo nirqan tiempu kanqanyaq Tayta Diosta perdonta mañakunantsikpä. 59Noqam nï: Tsaypita manam yarquyankitsu llapan jaqa kaynikikunata manarä pägarqa>>.
Currently Selected:
Lucas 12: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.