Santiago 1
1
Santiago saludanqan
1Maytsaychöpis täraq chunka ishkay trïbu Israel runakuna:
Noqa Santiago,#Mat. 13.55; Mar. 6.3; Gál. 1.19. Tayta Diospa y Señor Jesucristupa sirviqnin karmi qamkunata saludamü.
Imanö ñakarpis Tayta Diosman yärakunantsikpä ninqan
2Kuyay wawqikuna y panikuna, ima ñakaychö karpis llapan shonquykikunawan kushikuyay. 3Musyayankim ñakarrä llapan shonquykikunawan Tayta Diosman criyikuyanqaykita. 4Peru mana ajayaypa criyikurmi Tayta Dios munanqannö kawayänaykipä shumaq yachakuyanki.
5Mayqaykipis Tayta Dios munanqannö kawayta mana puëdirqa tantiyatsishunaykipä payta mañakuyay. Mañakuyaptikiqa tantiyatsishunkim. Mañakuq kaqtaqa imaypis yanapanmi.#Mat. 7.7-11; Juan 16.23-24. 6Peru llapan shonquykiwan criyikur mañakuyay. Mañakuyanqayki höra ama yarpäyaytsu <<¿wiyamanqatsurä o manatsurä?>> nirqa. Tsaynö yarparqa lamarta vientu wakläman kayläman laqchikachätsinqannömi kaykäyanki. 7Tsaynö kaykarqa ama yarpäyaytsu Tayta Diospita imatapis chaskiyänaykipä kanqanta. 8Tsaynö mañakuq runaqa manam shumaq criyikuntsu ni Tayta Dios munanqannötsu kawan.
Pobrikunapä y rïcukunapä ninqan
9Pobri wawqikuna y panikuna, Tayta Dios alli rikashunqaykipita kushikuyay. 10Rïcu wawqikuna y panikuna, qamkunapis kushikuyay riquëzaykikunaman mana yärakuyänaykipä Tayta Dios tantiyatsiyäshunqaykipita. Rïcu karpis waytanö ushakaqllam kaykäyanki.
11Alläpa achaptinmi qewapis tsakiskin.
Waytanpis kuyayllapä kaykanqanpita shushurmi ushakan.
Tsaynöllam rïcukunapis rïcuyaypä mallaqashqa kaykäyanqanchö ushakäyanqa.#Isa. 40.6-7.
Tayta Dios alli ruraq kanqan
12Imayka ñakaychö karpis Tayta Diosman mana ajayaypa criyikuq runaqa kushishqam kawakun. Tsaynö kawarqa Tayta Diospa puntanchömi corönata chaskinqa. Tsay corönaqa mana ushakaq kawaymi. Tsay corönata chaskiyänanpämi kuyaqnin runakunata Tayta Dios promitirqan.
13Yarpaynikikunaman jutsa ruray shamuptin ama niyaytsu jutsata rurayänaykipä Tayta Dios yarpätsiyäshunqaykita. Tayta Diosqa manam imaypis jutsata rurantsu ni pitapis jutsata rurananpä yarpätsintsu. 14Tsaypa rantinqa tsay yarpay kikikikunapa shonquykikunapita kanqanta tantiyakuyay. 15Shonquykikuna llutan yarpanqankunata rurarmi jutsata ruraykäyanki. Jutsa ruraqkunataqa Tayta Diosmi infiernuman qaykunqa.
16Kuyay wawqikuna y panikuna, llutanta ama yarpäyaytsu. 17Llapan allikunata chaskiyanqaykiqa atsikyaqkunata kamaq Papänintsikpitam. Payqa manam llantuy päsaqnötsu, sinöqa imaypis kanqannöllam kaykan. 18Kikin munanqannöllam alli willakuyninwan mushuq kawayta qaramarquntsik llapan kamanqankunapitapis mas kuyay wamrankuna kanapä.#1Ped. 1.23.
Jesucristupa willakuyninta cäsunantsikpä ninqan
19Kuyay wawqikuna y panikuna, tsaynö kaykaptinqa yachaq tukur alläpa ama parlayaytsu, sinöqa wakinpis parlayänanpä upällakuyay. Tsaynölla ama rasllaqa rabyakuyaytsu. 20Rabyakurqa manam Tayta Dios munanqannötsu kawayanki.
21Mana alli ruraykunata y imayka viciukunatapis jaqiyay. Willakuyninta shonquykikunaman Tayta Dios murushqa kaykaptinqa willakuyninta shumaq cäsukuyay. Paypa alli willakuyninqa salvayäshunaykipä poderyuqmi. 22Willakuyninta wiyayanqallaykiwanqa ama contentakuyaytsu, sinöqa cäsukur kawayay. Tsaynö mana kawayaptikiqa yachakuyanqaykipis wallällapämi kanqa.
23Tayta Diospa willakuyninta wiyaykar mana cäsuq runaqa cäranta espëjuchö rikarpis 24aywakur ras qonqaqnömi kaykan. 25Peru Tayta Diospa willakuyninta mana qonqaypa cäsurmi sïqa espëjuchö rikakur cäran imanö kanqantapis mana qonqaqnö kaykan. Tsaynö kawaqtaqa Tayta Diosmi imaykachöpis yanapanqa.
26Mayqaykipis <<Tayta Diosmanmi criyï>> nikarpis mana allikunata parlarqa manam rasunpatsu criyiyanki. Tsaynö kayaptikiqa Tayta Diosman criyiyanqaykipis wallällapämi. 27Tayta Diosman rasunpa criyirqa waktsakunata y viüdakunata mallaqaychö kayaptin yanapayanki. Wakinkuna jutsata rurar kawayaptinpis noqantsikqa jutsata ama rurashuntsu.
Currently Selected:
Santiago 1: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.