Malaquías 3
3
1Llapanta mandaq Tayta Diosmi nin: <<Nänita pitsaqnö runakuna alistakuyänanpämi willakuqnïta puntäta mandashä.#Mat. 11.10; Mar. 1.2; Luc. 1.76; 7.27. Tsaymi shuyaykäyanqayki mandaq chämur illaqpita templuman yaykunqa. Paymi qamkunawan pactu ruranqäta willakunqa. Rikayta munayanqayki willakuqqa chämunqanam.
2<<Payqa jutsata rurayanqaykipita purificashunaykipä lunyaykaq ninanö y taqshakuna jabonnömi kanqa.#Mat. 3.10-12. Tsaynö kaykaptinqa chämuptin ¿pirä awantanman? Tsaynölla paypa puntanchö ¿pirä ichiraykanman?#Joel 2.11; Apoc. 6.17. 3Payqa qorita y yuraq qellayta ninawan tsullutsir qanranta jipiqnömi levitakunata purificanqa. Noqa munanqänöna sacrificiukunata altarchö rupatsiyaptinmi 4Judá y Jerusalén runakuna sacrificiuta apayämunqanta kushishqa chaskishä. Unay castankuna sacrificiukunata apayämuptin chaskinqänömi paykuna apayämuptinpis kushishqa chaskishä>>.
5Llapanta mandaq Tayta Diosmi nin: <<Kikïmi qamkunata juzgayäshayki brüjuta rurayaptiki, majayuq kaykar jukwan kakuyaptiki, jutïchö awnirkur mana cumpliyaptiki, arurkatsir mana pägayaptiki, viüdatawan waktsata ñakatsiyaptiki, jäpa runata mana alli rikayaptiki y mana mantsapakayämaptiki>>.
Diezmuta y ofrendata apayänanpä ninqan
6<<Noqa Tayta Diosmi imaypis promitinqäta cumplï.#Núm. 23.19; Heb. 13.8; Stg. 1.17. Tsaymi unay castayki Jacobta promitinqäta#Gén. 28.13-15; 35.10-12. cumplir qamkunata ushakätsirqätsu. 7Tsaynö kaykaptinpis qamkunaqa unay castaykikuna kawayanqanpitam leynïkunata cumpliyankitsu. Llapanta mandaq Tayta Dios karmi nï: ¡Noqaman kutiyämuy! Noqaman kutiyämuptikiqa yapaymi yanapayäshayki.#Isa. 55.7; Zac. 1.3.
<<Tsaynö niptïmi qamkuna niyanki: <¿Imatatä cäsuyarqätsu?>
8<<Qamkunaqa suwapaykäyämankim>>.
<<Tsaynö niptïmi qamkuna niyämanki: <¿Imatatä qamta suwapäyarqä?>
<<Qamkunaqa suwapäyämarqayki diezmutawan ofrendata mana apamurmi. 9Qamkunaqa llapan nacionnikikunawan suwapäyämanqaykipitam maldicionädu kaykäyanki.
10<<Diezmukunata llapanta wayïchö almacenman apayämuy. Tsaymi wayïchö atska mikuy kanqa. Tsaynöllam ciëlu punkuta kichar qamkunaman bendicionnïta sobray sobray churamushä. Rasunpa churamunäpä kanqäta musyayänaykipä mä diezmuta apayämuy.#Lev. 27.30; Deut. 12.6; 14.22-29; 26.12; Neh. 13.12; Eze. 44.29-31. Noqa llapanta mandaq Tayta Diosmi tsaynö nï. 11Mikuy ushaq kurukunata ushakätsiptïmi chakraykikunachö mikuynikikunapis y üvaykikunapis alli wayunqa. Noqa llapanta mandaq Tayta Diosmi tsaynö nï. 12Markaykikuna maypis täkuy munay kaptinmi llapan nación runakunapis munapäyanqa. Noqa llapanta mandaq Tayta Diosmi tsaynö nï>>.
Cäsukuqkunata kuyapänanpä ninqan
13Mastam Tayta Dios nin: <<Qamkunaqa conträmi parlayarquyki.
<<Tsaynö niptïmi niyämanki: <¿Imatatä contrayki parlayarqä?>
14<<Qamkunaqa conträ parlarmi niyarqayki: <Wallällam Diosta sirvintsik. ¿Imapätä leyninkunatapis cäsuntsik? Jutsata ruranqantsikpita llakikushqapis llapanta mandaq Tayta Diosqa manam cäsumantsiktsu. 15Orgullösu runakunaqa kushishqam kawayan. Jutsa ruraqkunapis rïcum kayan. Tayta Diosta mana cäsuyaptinpis paykunapäqa ima castïgupis manam kantsu> >>.#Mal. 2.17.
16Tsaymi Tayta Diosta mantsapakuqkunaqa willanakur valuratsinakuyarqan payta imaypis cäsuyänanpä. Tsaynö willanakuyanqanta wiyarmi Tayta Diosqa rölluman jutinkunata puntanchö qellqatsirqan imaypis yarparänanpä.
17Llapanta mandaq Tayta Diosmi nin: <<Juzganä junaqmi tsay runakunata kuyapäshä. Cäsukuq tsurinta papänin kuyapanqannömi noqapis paykunata kuyapäshä.#Sal. 103.13. 18Tsaymi runakuna yapay tantiyayanqa cäsumaqkunata kuyanqäta y mana cäsukamaqkunata castiganqäta, sirvimaqkunata alli rikanqäta y mana sirvimaqkunata mana alli rikanqäta>>.
Currently Selected:
Malaquías 3: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.