Lucas 19
19
Jesúsman Zaqueo criyikunqan
1Tsaypitanam Jericó markapa Jesús päsaykarqan. 2Tsay markachömi Zaqueo jutiyuq rïcu runa täkurqan. Paymi impuestu cobraqkunapa mandaqnin karqan. 3Tsay runam Jesústa reqiyta munarqan. Peru takshalla karmi atskaq runakuna tsapaptin rikayta puëdirqantsu. 4Tsaymi cörrilla puntaskir sicómoro jachaman yarkuskirqan Jesús päsaqta rikananpä. 5Tsaypa päsaykarmi Zaqueuta rikaykur Jesús nirqan: <<Zaqueo, ras yarpamuy. Kananqa wayikichömi patsatsimanki>>.
6Zaqueo ras yarpaskamurmi pasaypa kushikur wayinman Jesústa pusharqan. 7Tsayta rikaykurmi runakuna Jesúspä rimar niyarqan: <<¡Imanirtä jutsasapa runapa wayinman patsakun!>>
8Wayinchö kaykarnam Zaqueo ichirkur Jesústa nirqan: <<Taytay, llapan riquëzäpita pullan kaqtam pobrikunata qaraykushä. Y pipa imantapis qechushqa karqa chusku kuti mastam kutiykatsishä>>.
9Jesúsnam nirqan: <<Kananmi kay wayiman salvación chämushqa. Kay runapis rasunpam Abrahampa castan. 10Oqrakashqakunata ashir salvananpämi Runapa Tsurin shamushqa>>.
Sirviqninkunata patronnin qellayta jaqipanqan
Mateo 25.14-30
11Jesús tsaynö parlanqanta wiyar y Jerusalénman chänanpäna kaptinmi runakuna yarpäyarqan Tayta Diospa mandakuynin qallaykunanpäna kanqanta. Tsaynö yarpäyaptinmi Jesús iwalatsiypa yachatsir 12nirqan: <<Juk rïcu runash karu nacionman aywanä rey kayta chaskimunanpä. 13Manarä aywarshi chunka sirviqninkunata qayaskatsir atska qellayta#19.13 Griëguchömi nin cada ünu juk minata chaskinqanta. Juk minam karqan juk runa pachak (100) junaq arur gänanqannö. jaqipar ninä: <Kutimunqäyaq kay qellaynïwan aruykäyay>. 14Peru aywakuptinnash marka mayinkuna chikirnin qepantana willakuqkunata mandayänä niyänanpä: <Manam tsay runa mandamaqnï rey kananta munayätsu>.
15<<Tsaynö niyaptinpis rey kananpä yaykunäshi. Tsaypita markanman kutiykurnash qellaynin aykata gänanqantapis musyananpä qellayninta jaqipanqan sirviqninkunata qayatsinä. 16Tsayshi punta chaskiq kaq chaykur ninä: <Taytay, qellaynikiwan chunka kuti mastam gänarqü>.
17<<Tsaynash patronnin ninä: <Alli sirviqmi kanki. Wallkallapitapis qellaynïta miratsinqaykipitam chunka markapa mandaqnin kanaykipä churashayki>.
18<<Tsaypitanash jukaq sirviqnin chaykur ninä: <Taytay, qellaynikiwan pitsqa kuti mastam gänarqü>.
19<<Tsayshi paytapis ninä: <Pitsqa markapa mandaqnin kanaykipämi qamtapis churashayki>.
20<<Peru jukaqnash chaykur ninä: <Taytay, kaychömi qellayniki. Päñuwan qepirkurmi churaykurqä. 21Qamqa mana churanqaykipitam qorinki y mana murunqaykipitam cosechanki. Tsaynö mana alli runa kaptikim mantsapakur churaykurqä>.
22<<Patronninnash ninä: <¡Qamqa mana yärakuypä sirviqmi kanki! Kikikipa shimikipitam juzgashqa kanki. Yaqa kanqäta musyaykar, mana churanqäpita qorinqäta musyaykar y mana murunqäpita cosechanqätapis musyaykarqa 23¿imanirtä qellaynïta bancullamanpis churarquykitsu kutimur wachaynintawan qorinäpä?> 24Tsaychö kaykaq runakunatanash ninä: <¡Tsararanqan qellaynïta qechuskir chunka kuti mas gänatsiq kaqta entregaykuyay!> 25Paykunanash niyänä: <Taytay, peru paypaqa chunka kuti masnam qellayninpis kan>.
26<<Patronnash ninä: <Yärakuypä kaqtaqa mastam alistapanqa. Peru mana yärakuypä kaqtam sïqa ichik tsararanqallantapis qechunqa. 27Rey kanäta mana munar chikimaqkunataqa ¡kayman apaykamur ñöpächö wanuratsiyay!> >>
Jerusalénman Jesús yaykunqan
Mateo 21.1-11; Marcos 11.1-11; Juan 12.12-19
28Tsaynö yachaskatsirnam Jerusalénman Jesús aywar sïguirqan. 29Olivos jirkanchö Betfagé y Betania markakunaman chaykarnam ishkay discïpulunkunata mandar 30nirqan: <<Taqay markaman aywayay. Chaykurmi pipis manarä muntanqan ashnu wataraykaqta tariyanki. Tsay ashnuta paskaskir apayämuy. 31Pipis <¿imanirtä ashnuta paskaykäyanki?> niyäshuptikiqa <Señor Jesúsmi nisitan> niyanki>>.
32Discïpulunkuna aywarmi Jesús ninqannölla tariyarqan. 33Ashnuta paskaykäyaptinnam ämunkuna tapuyarqan: <<¿Imanirtä ashnüta paskaykäyanki?>>
34Paykunanam niyarqan: <<Señor Jesúsmi nisitan>>.
35Ashnuta chaykatsir punchunkunata karunarkuyaptinmi Jesús muntarqan. 36Tsaynö muntashqa aywaykaptinnam runakuna kushikur punchunkunata näniman mashtayarqan.#19.36 Tsay witsan markaman juk rey yaykuptin runakuna kushishqa chaskirmi jakunkunata, punchunkunata y palmatapis näniman mashtayaq. 37Olivos jirkanpita urämunanpä kaykaptinnam milagrukunata rikayanqanpita kushikur tsaytsikaq discïpulunkuna Tayta Diosta jinchipa alabar qallaykuyarqan. 38Tsaynö alabarninmi niyarqan:
<<¡Tayta Diospa jutinchö shamuq rey alabashqa kaykullätsun!#Sal. 118.25-26.
¡Tayta Dioswan allina kawashun!
¡Ciëluchöpis alabashqa kaykullätsun!>>
39Tsaynam runakunapa chawpinchö aywaq wakin fariseukuna niyarqan: <<Rabí, qatiräshuqnikikuna upällakuyänanpä niykuy>>.
40Jesúsnam nirqan: <<Noqam nï: Paykuna upällakuyaptinqa rumikunapis alabayanqam>>.
41Jerusalénman chaykarnam markata rikaskir Jesús waqar 42nirqan: <<¡Imanömi munä Tayta Dioswan alli kawayänaykipä kaqta kanan junaqllapis tantiyakuyänaykita! ¡Peru manam tantiyayankitsu! 43Tsaymi ñakayänaykipä junaqkuna chämunqa. Tsay junaqkunam marka murällaykikuna waqtanman allpata qotur chikiyäshuqnikikuna maytsayninpa atacayäshunki. 44Wayikikunatapis juchutsirmi wamraykikunatawan wanutsiyäshunki. Manam ni juk rumillapis pirqaraykar quëdanqatsu. Tsaynömi kanqa Tayta Dios shamunqanta mana cäsuyanqaykipita>>.
Templuchö rantikuqkunata Jesús qarqunqan
Mateo 21.12-17; Marcos 11.15-19; Juan 2.13-22
45Tsaypitanam templupa patiunman Jesús yaykuskir tsaychö rantikuqkunata [y rantiqkunata] qarqur 46nirqan: <<Tayta Diospa palabranmi nin: <Wayïqa runakuna mañakayämänanpämi kanqa>.#Isa. 56.7. Tsaynö nikaptinpis qamkunaqa suwakunapa machayninmanmi tikratsiyarquyki>>.#Jer. 7.11.
47Tsaypitanam templupa patiunchö qoyay qoyay Jesús yachatsikurqan. Mandaq sacerdötikuna, ley yachatsikuqkuna y autoridäkunam imaykanöpapis Jesústa wanutsiyta munayarqan. 48Peru Jesús yachatsinqankunata llapan runakuna kushishqa wiyayaptinmi ima ruraytapis puëdiyarqantsu.
Currently Selected:
Lucas 19: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.