Gálatas 2
2
Jerusalénchö apostolkuna Pabluta chaskiyanqan
1Tsaypita chunka chusku watatarämi Tituta pushakurkur Bernabéwan#Hech. 11.29-30; 15.2. Jerusalénman kutirqä. 2Tsayman kutirqä Tayta Dios revelacionchö aywanäpä tantiyatsimashqa kaptinmi. Jerusalénchö apostolkunawan shuyni qorikarmi mana Israel runakunata imata yachatsinqätapis willarqä. Llutanta yachatsinqäta yarpäyaptinqa pasaypa ñakar willakunqäpis manakaqllapämi kanman karqan. 3Willakunqäta tantiyatsiptïmi alli kanqanta niyämarqan. Tsaynöpam mana Israel runa kanqanta musyarpis <<Tito señalakutsun>> niyarqantsu.
4Willakunqä alli kanqanta niyaptinpis juk ishkay runakunam criyiq tukur Moisés qellqanqan leykunata cumpliyänapä wawqikunata y panikunata yachatsiyarqan. Peru Jesucristuman criyikushqana kaykarqa manam tsay leykunata cumplinantsikpänatsu kaykantsik. Paykuna niyanqanta chaskirqa manam libritsu kaykantsik, sinöqa tsay leykunapa poderninchö karmi esclävunölla kaykantsik. 5Peru tsay llutan yachatsikuykunata manam chaskiyarqütsu. Chaskiyaptïqa qamkunapis chaskiyankimanmi karqan.
6Jerusalénchö apostolkunaqa willakuptï manam michäyämarqantsu (Jesucristuwan juntu purishqa kayaptinpis Tayta Diospäqa llapantsikpis iwalmi kantsik),#Deut. 10.17. 7sinöqa tantiyakuyarqan Israel runakunata willananpä Pedruta churanqannö mana Israel runakunata willanäpä noqatapis Tayta Dios churamanqantam. 8Israel runakunapa apostolnin kananpä Pedruta Tayta Dios churanqannömi mana Israel runakunapa apostolnin kanäpä noqatapis churamashqa.
9Tsaymi Santiago, Pedro y Juanpis tantiyayarqan willakuyninta willakur purinäpä Tayta Dios churamanqanta. (Paykunapäqa iglesiachö columna kayanqantam niyan.) Tsaypitanam paykunawan willanakuyarqä: <<Mana Israel runakunaman Bernabéwan qam aywayay y noqakunana Israel runakunaman aywayäshä>>.
Tsaynö willanakuyanqätam acuerdu kayarqan. 10Tsaynöllam niyämarqan faltapakuq wawqikunata y panikunata mana qonqaypa yanapayänäpä. Tsaytaqa imaypis ruraykämi.#Hech. 11.29-30; 24.17.
Pedruta Pablo ollqutupanqan
11Antioquíaman Pedro chaykamur mana allita ruraptinmi ollqutuparqä. 12Puntataqa mana Israel wawqikunawan y panikunawan qorikarmi mikuq.#Hech. 11.2. Peru Santiaguwan puriq runakuna chäyämuptinmi sïqa penqakuyman churayänanta mantsarir mana Israel kaqkunawan qorikarqannatsu. 13Pedruta rikarmi wakin wawqikuna y panikunapis y Bernabépis mana Israel kaqkunawan mikuyänanpä qorikäyarqannatsu.
14Tsaynö ruranqan mana alli kaptinmi wawqikunapa y panikunapa puntanchö Pedruta ollqutupar nirqä: <<Qampis mana Israel runanö Moisés qellqanqan leykunata mana cumpliykarqa ¿imanirtä munanki mana Israel runakuna tsay leykunatarä cumpliyänanta? 15Noqantsikqa manam mana Israel runatsu kantsik, sinöqa yurinqantsikpitam Israel runa kantsik. 16Musyantsikmi Tayta Dios imanö perdonamanqantsikta. Manam Moisés qellqanqan leykunata cumplishqatsu perdonamantsik,#Sal. 143.2; Rom. 3.20. sinöqa Jesucristuman yärakushqam. Tsaymi Tayta Dios perdonamänantsikpä Jesucristuman yärakuntsik.#Rom. 3.22. Tsay leykunata cumplinqanpitaqa manam pitapis Tayta Dios salvantsu>>.
17Moisés qellqanqan leykunaman yärakunantsikpa rantin Jesucristuman yärakushqam wakin runakuna yarpäyan jutsata ruranqantsikta. Tsaynö yarpäyaptinpis ¿Jesucristutsurä jutsata ruratsimantsik? ¡Manam! 18Sinöqa jutsayuq kantsik Moisés qellqanqan leykunaman yapay yärakurmi. 19Moisés qellqanqan leykunapa poderninchö karmi tsay leykunapä wanushqanöna karqä.#Rom. 7.4. Kananqa librinam kä#Gál. 3.19, 24. Tayta Dios munanqannö kawanäpä. 20Noqaqa Jesucristuwan cruzchö wanushqanömi kä.#Rom. 6.6-8; Gál. 5.24; 6.14; Col. 2.20. Manam noqanatsu kawä, sinöqa Jesucristum noqachö kawan. Tsaymi Tayta Diospa Tsurinman yärakur kawaykä.#Fil. 1.21. Paymi kuyamarnintsik noqantsik raykur wanurqan.
21Manam Tayta Dios kuyapämanqantsikta manakaqmantsu churaykä. Wakin runakuna niyanqannö leyninkunata cäsukushqarä Tayta Dios salvamashqaqa Jesucristo wanunqanpis manakaqllapämi kanman karqan.
Currently Selected:
Gálatas 2: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.