1 Tesalonicenses 5
5
1Wawqikuna y panikuna, Señor Jesucristo imay höra ni imay junaq kutimunanpä kanqanta mana musyarmi tsaypäqa qellqamütsu. 2Peru musyayankim paqaspa illaqpita suwa shamunqannö paypis illaqpita kutimunanpä kanqanta.#Mat. 24.43; Luc. 12.39; 2Ped. 3.10. 3Imapis mana päsananpä kanqanta runakuna niyaptinpis qeshyaq warmita illaqpita nanay tsarinqannömi Tayta Diospa castïgun illaqpita shamunqa.#Isa. 13.8. Tsay castïgupita manam pipis qeshpinqatsu.
4-5Peru qamkunaqa wawqikuna y panikuna, manam tsakaychönötsu kaykäyanki Jesucristo suwanö illaqpita kutimur mana alistakushqata tariyäshunaykipä. Qamkunaqa llapaykim aktsichönöna kawaykäyanki. 6Tsaynö kaykaptinqa wakin runakuna punukashqa kayanqannöqa ama kashuntsu, sinöqa maya mayalla Jesucristuta shuyaykäshun.
7Tsakäpakushqanö kaqkunaqa punukashqanö y machashqanö karmi Jesucristo kutimunanpä kanqanta tantiyakuyantsu. 8Peru noqantsikqa atsikyaychöna kar shumaq tantiyakushun, Tayta Diosman yärakushun y piwanpis kuyanakushun. Tsaynö kawarqa chalëcuntsik jatishqanömi kaykantsik. Tayta Dios salvamanqantsikta shumaq tantiyarqa cascuntsik jatishqanönam kaykantsik.#Isa. 59.17; Rom. 13.12; Efe. 6.13-17.
9Manam castigashqa kanantsikpätsu Tayta Dios akramarquntsik, sinöqa Jesucristuman criyikur salvashqa kanantsikpämi. 10Jesucristum noqantsik raykur wanurqan kawaykarpis o wanurpis paywan juntu kawanantsikpä. 11Tsaymi imaypis animatsinakuyanqaykinölla jukniki juknikipis tantiyatsinakur animatsinakuyay.
Wawqikuna y panikuna imanöpis kawayänanpä yätsinqan
12Wawqikuna y panikuna, Señor Jesucristupa alli willakuyninta yachatsishuqnikikunata alli rikayay. Paykunam alli yachatsiyäshunki y animatsiyäshunki Tayta Dios munanqannö kawayänaykipä. 13Tsaynö yachatsiyäshunqaykipita paykunata respitar shumaq kuyayay. Tsaynölla mana chikinakuypa jukniki juknikipis shumaq kawayay.
14Wawqikuna y panikuna, qamkunatam rugayä: Aruyta mana munaqkunata arukuyänanpä yätsiyay. Llakishqa kaykaqkunata kushikuyänanpä animatsiyay. Yanapaypä kaqkunata imallawanpis yanapayay. Pïmaypäpis pacienciaykikuna katsun. 15Runa mayikikuna contrayki kayaptinpis qamkunaqa paykunapa contran ama kayaytsu. Tsaypa rantinqa yärakuq mayikikunawan y pïmaywanpis alli kawayay.
16Imaypis kushishqa kawayay.#Fil. 4.4. 17Imay hörapis Tayta Diosta mañakuyay. 18Imapitapis Tayta Diosta agradëcikuyay. Jesucristupa poderninchö kayaptikim tsaynö kawayänaykita Tayta Dios munan.#Fil. 4.6; Col. 4.2-7.
19Espíritu Santuta cäsuyanki. 20Espíritu Santu tantiyatsinqanta pipis willakuptin ama manakaqman churayankitsu. 21Peru shumaq tantiyakuyanki Espíritu Santupita kanqanta o mana kanqantapis.#Hech. 17.11; 1Juan 4.1-3; Gál. 1.6-9; Mat. 7.15-20. Paypita kaptinqa cäsukuyanki. 22Mana allikunataqa ama rurayankitsu.
23Alli kawayta qaramaqnintsik Tayta Dios yanapaykuyälläshuy pay munanqannö imaypis kawayänaykipä. Tsaynölla cuerpuykita, almaykita y espïrituykitapis alli rikaykullätsun Jesucristo kutimur jutsaynaqta tariyäshunaykipä. 24Qayashuqniki Tayta Diosmi awninqankunata imaypis cumplin. Tsaymi jutsaynaqta tariyäshunaykipä imaypis yanapayäshunki.
Carta ushanan
25Wawqikuna y panikuna, noqakunapäpis Tayta Diosta mañakuykuyällay. 26Wawqikunata y panikunata cäranchö mutsar saludaykuyällay. 27Señor Jesucristupa jutinchömi qamkunata nï wawqikunata y panikunata kay cartata liyipäyänaykipä.
28Señornintsik Jesucristo kuyapäyäshurniki imaypis yanapaykuyälläshuy. [Amén.]
Currently Selected:
1 Tesalonicenses 5: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.