Ore i mexü̃ ga Matéu ümatüxü̃ 26
26
Yudíugüarü ãẽ̱xgacügü naxca̱x nadaugü nax ñuxãcü Ngechuchuxü̃ yayauxgüxü̃
(Mr. 14.1-2; Lc. 22.1-2; Jn. 11.45-53)
1Rü yexguma Ngechuchu nüxü̃ rüchauxgu ga yema orexü̃ nax yaxuxü̃, rü ñanagürü norü ngúexü̃güxü̃:
2—Pema nüxü̃ pecua̱x rü taxre i ngunexü̃ nataxu nax nawa nanguxü̃ i Üpetüchigaarü peta. Rü ngẽxguma tá nixĩ iyayauxgüãxü̃ ya Tupana Nane ya duü̃xü̃xü̃ ixĩcü nax curuchawa yapotagüãxü̃ca̱x —ñanagürü.
3Rü yema ngunexü̃gügu rü chacherdótegüarü ãẽ̱xgacü ga Caipápatawa nangutaque̱xegü ga norü ngü̃xẽẽruü̃gü ga chacherdótegü, rü yema ngúexẽẽruü̃gü ga mugüwa ngu̱xẽẽtaegüxü̃, rü Yudíugüarü ãẽ̱xgacügü.
4Rü yema ngutaque̱xewa nügümaxã nanamexẽẽgü nax womüxẽẽãcüma Ngechuchuxü̃ yayauxgüxü̃ nax yama̱xgüãxü̃ca̱x.
5Natürü nügümaxã ñanagürügü: —Taxucürüwa i ñu̱xma petagu tayayauxgü, erü duü̃xü̃gü rü tá tamaxã nanue —ñanagürügü.
Wüxi ga nge rü Ngechuchuerugu inaba ga pumara
(Mr. 14.3-9; Jn. 12.1-8)
6Rü Ngechuchu rü Betániawa nayexma napatawa ga Chimóü̃ ga rüchaxünecümaxã naxugüxü̃.
7Rü yexguma mechawa ínayexmayane ga Ngechuchu, rü wüxi ga nge rü naxca̱x yéma iyaxũ namaxã ga wüxiwexü̃ ga pumara ga tatanüxü̃chixü̃ ga mexẽchicü ga butiyamaxã ãchiü̃xü̃. Rü ngĩma rü naerugu inaba ga yema pumara.
8Rü yexguma yemaxü̃ nadaugügu ga Ngechuchuarü ngúexü̃gü, rü naãxẽwa nangu̱x, rü inanaxügüe ga nax ñagüxü̃. —¿Tü̱xcüü̃ ngẽxma inaxaiyaxü̃ i ngẽma pumara?
9Rü narümemae chi nixĩ i tatanüxü̃gu namaxã itaxe, rü ñu̱xũchi ngẽma diẽrumaxã nüxü̃ rüngü̃xẽxẽ i ngẽma duü̃xü̃gü i ngearü diẽruã̱xgüxü̃ —ñanagürügü.
10Rü Ngechuchu nüxü̃ naxĩnü, rü ñanagürü nüxü̃: —¿Tü̱xcüü̃ ngĩxü̃ pechixewe i ñaa nge? Erü ngẽma chomaxã naxüxü̃ rü wüxi i mexü̃ nixĩ.
11Ngẽma ngearü diẽruã̱xgüxü̃ rü guxü̃gutáma petanüwa nangẽxmagü. Natürü choma rü taxũtáma guxü̃gu petanüwa changexma.
12Rü ngẽma chomaxã naxüxü̃ i ñaa ngecü nax chaxunegu nabaãxü̃ i ngẽma pumara, rü chaxune i yuxü̃arü mexẽẽruxü̃ nixĩ nax ngẽmaãcü choxü̃ inata̱xgüxü̃ca̱x.
13Rü aixcüma pemaxã nüxü̃ chixu rü guxü̃ i naanewa i ngextá duü̃xü̃gü nüxü̃ íxugügüxü̃wa i Tupanaarü ore, rü ñaa ngecü chomaxã üxü̃ rü tá ta nüxü̃ nixugügü. Rü ngẽmaãcü tá ngĩxna nacua̱xãchie i duü̃xü̃gü —ñanagürü ga Ngechuchu.
Yúda rü ãẽ̱xgacügümaxã nanamexẽxẽ nax Ngechuchuxü̃ yayauxgüxü̃ca̱x
(Mr. 14.10-11; Lc. 22.3-6)
14Rü ñu̱xũchi wüxi ga Ngechuchuarü ngúexü̃ ga Yúda ga Ichariótegu ãégaxü̃ rü chacherdótegüarü ãẽ̱xgacügüxü̃tawa naxũ.
15Rü Yúda rü ñanagürü nüxü̃: —¿Ñuxre tá choxü̃́ penaxütanüxü̃ i ngẽxguma pexü̃́ chanatauxchaxẽxẽgu nax Ngechuchuxü̃ piyauxgüxü̃ca̱x? —ñanagürü. Rü yexguma ga yema chacherdótegüarü ãẽ̱xgacügü rü 30 tachinü ga diẽru nüxü̃́ nanaxütanügü.
16Rü nüma ga Yúda rü yexgumama inanaxügü ga naxca̱x nax nadauxü̃ ga ñuxãcü nüxü̃́ nax natauxchaxẽẽgüãxü̃ nax Ngechuchuxü̃ yayauxgüxü̃ca̱x.
Cori ya Nechuchuarü õnachiga
(Mr. 14.12-25; Lc. 22.7-23; Jn. 13.21-30; 1 Co. 11.23-26)
17Rü nüxíraxü̃ ga ngunexü̃ ga nagu inaxügüxü̃ ga yema peta ga paũ ga ngearü pu̱xẽẽruü̃ã́xü̃ nagu nangõ̱xgüxü̃, rü norü ngúexü̃gü rü Ngechuchuca̱x naxĩ, rü ñanagürügü nüxü̃: —¿Ngextá i cunaxwa̱xexü̃ nax tanamexẽxẽxü̃ i nachica i nawa nangõ̱xgüxü̃ i õna i Üpetüchigaarü petagu? —ñanagürügü.
18Rü nüma ga Ngechuchu rü ñanagürü nüxü̃: —¡Ngéma ĩanewa pexĩ, rü yimá yatü i nüxü̃ pecuácüpatawa pexĩ! ¡Rü namaxã nüxü̃ pixu rü ñapegügü: “Torü Ngúexẽẽruxü̃ rü ñanagürü: ‘Marü ningaicaxüchi nax chayuxü̃, rü nua cupatawa chorü ngúexü̃gümaxã chanangupetüxẽxẽchaü̃ i Üpetüchigaarü peta’ ” —ñapegügü tá nüxü̃!
19Rü yéma naxĩ ga yema norü ngúexü̃gü. Rü yema Ngechuchu namaxã nüxü̃ ixuxü̃rüxü̃ nanaxügü. Rü nanamexẽxẽgü ga yema õna ga Üpetüchigaarü petagu tá nangõ̱xgüxü̃.
20Rü yexguma nachütagu rü yéma mechawa narüto ga Ngechuchu namaxã ga yema 12 ga norü ngúexü̃gü.
21Rü yexguma ínachibüeyane, rü Ngechuchu rü ñanagürü nüxü̃: —Aixcüma pemaxã nüxü̃ chixu rü wüxíe i petanüwa tá tixĩ ya bexma chauechita choxü̃ íyaxuaxü̃xe —ñanagürü.
22Rü yexguma ga nümagü ga norü ngúexü̃gü rü poraãcü nangechaü̃gü. Rü wüxichigü nüxna nicachigü, rü ñanagürügü: —Pa Corix, ¿choma ẽ̱xna tá chixĩxü̃ ya yíxema cuxü̃ íyaxuaxü̃xe? —ñanagürügü.
23Rü nüma ga Ngechuchu nanangãxü̃ rü ñanagürü: —Ngẽma yimátama poratuwa wüxigu chomaxã yawaixẽẽxü̃ i norü paũ, rü ngẽma tá nixĩ i chauechita choxü̃ íyaxuaxü̃xü̃.
24Rü Tupana Nane ya duü̃xü̃xü̃ ixĩcü rü tá nayu ngẽxgumarüxü̃ i Tupanaarü ore i ümatüxü̃ nüxü̃ ixuxü̃rüxü̃. Natürü wüxi i ngechaü̃xü̃chi nixĩ naxca̱x i ngẽma yatü i ínaxuaxü̃xü̃. Rü narümemae chi nixĩ ga noxtacüma taxũchima nax nabuxü̃ —ñanagürü.
25Rü nüma ga Yúda ga naechita íyaxuaxü̃xü̃, rü ñanagürü: —Pa Ngúexẽẽruxü̃x, ¿ẽ̱xna choma tá chixĩxü̃? —ñanagürü. Rü Ngechuchu nanangãxü̃ rü ñanagürü: —Cugümare quixu nax cuma tá quixĩxü̃ —ñanagürü.
26Rü yexguma ínachibüeyane rü Ngechuchu nanayaxu ga wüxi ga paũ. Rü Tupanana moxẽ naxã, rü inanabücu, rü norü ngúexü̃güxü̃ nayanu. Rü ñanagürü: —¡Penayaxu rü penangṍ! Ñaa rü chaxune nixĩ —ñanagürü.
27Rü ñu̱xũchi nanayaxu ga wüxi ga copu ga bínumaxã ããcuxü̃. Rü Tupanana moxẽ naxca̱x inaxã. Rü ñu̱xũchi norü ngúexü̃güna nanaxã, rü ñanagürü nüxü̃: —¡Guxãma i pema rü ñaa copuwa peyaxa̱xü̱x ya bínu!
28Erü daa bínu rü chaugü nixĩ. Rü yimámaxã Tupana duü̃xü̃güxü̃ nanawe̱x nax aixcüma yixĩxü̃ i norü uneta. Rü yimá chaugü rü muxü̃ma i duü̃xü̃güca̱x nixĩ i nabaxü̃ nax Tupana nüxü̃́ nüxü̃ irüngümaxü̃ca̱x i norü pecadugü.
29Rü pemaxã nüxü̃ chixu rü tagutáma wena bínu chayaxaxü ñu̱xmatáta Chaunatü ya Tupana ãẽ̱xgacü ixĩxü̃wa ngexwacaxü̃cü ya bínu pemaxã chayaxaxü —ñanagürü.
Ngechuchu nüxü̃ nixu rü Pedru rü tá nügü nixã nax norü ngúexü̃ yixĩxü̃
(Mr. 14.26-31; Lc. 22.31-34; Jn. 13.36-38)
30Rü nawena nax nawiyaegüxü̃ ga wüxi ga Tupanaarü wiyae, rü gumá Ma̱xpǘne ga Oribunecügu ãéganewa naxĩ.
31Rü yexguma ga Ngechuchu rü ñanagürü nüxü̃ ga norü ngúexü̃gü: —Guxãma i pema rü tá choxü̃ ípeta̱xgü i ñoma i chütaxü̃gu. Erü Tupanaarü ore i ümatüxü̃wa rü ñanagürü:
“Tá chayama̱x ya carnéruarü dauruxü̃,
rü tá nanaxüanemare i carnérugü”,
ñanagürü i ngẽma ore.
32Natürü ngẽxguma marü yuwa ícharüdaxguwena, rü tá chaxíra pexü̃pa Gariréaanewa chaxũ —ñanagürü.
33Rü yexguma ga Pedru rü nanangãxü̃ rü ñanagürü: —Rü woo guxü̃ma i togü cuxü̃ íta̱xgu, natürü i chomax rü taxũtáma cuxü̃ íchata̱x —ñanagürü.
34Rü Ngechuchu ñanagürü nüxü̃: —Aixcüma cumaxã nüxü̃ chixu rü ñomatama i chütaxü̃gu rü naxü̃pa nax ota ica̱xaxü̃, rü tomaepü̱xcüna tá cugü quixã nax chorü duü̃xü̃ quixĩxü̃ —ñanagürü.
35Rü Pedru nanangãxü̃ rü ñanagürü: —Rü woo wüxigu cumaxã chayu̱xgu rü taxũtáma chaugü chixã nax curü duü̃xü̃ chixĩxü̃ —ñanagürü. Rü guxü̃ma ga togü ga norü ngúexü̃gü rü ta yema ñanagürügü.
Ngechuchu rü Yechemaníwa nayayumüxẽ
(Mr. 14.32-42; Lc. 22.39-46)
36Rü Ngechuchu rü norü ngúexü̃gümaxã nawa nangugü ga wüxi ga nachica ga Yechemanígu ãégaxü̃. Rü Ngechuchu rü ñanagürü nüxü̃: —¡Nua perütogü! Rü paxa yoxni yéa chayayumüxẽ —ñanagürü.
37Rü Ngechuchu ínayagagü ga Pedru rü Chebedéu nanegü ga Chantiágu rü Cuáü̃. Rü Ngechuchuca̱x inaxügü nax poraãcü nangechaü̃xü̃ rü naxĩ̱xãchiãẽxü̃.
38Rü yexguma ga Ngechuchu rü ñanagürü nüxü̃: —Poraãcü changechaü̃ rü nagu charüxĩnü rü ngẽmamaxã tá chayu. ¡Rü nuxã perücho i pemax, rü chauxrüxü̃ ipedaue! —ñanagürü.
39Rü yexguma ga Ngechuchu rü yéaxüra naxũ. Rü waixü̃müanegu nanangücuchi. Rü nayumüxẽ rü ñanagürü: —Pa Chaunatüx, ngẽxguma cuma cunaxwa̱xegu, ¡rü nüxna choxü̃ ínanguxuchixẽxẽ i ñaa ngúxü̃ i tá chingexü̃! Natürü chanaxwa̱xe i curütama ngúchaü̃ cuxü rü tama i choxrü —ñanagürü.
40Rü yemawena ga Ngechuchu rü nataegu ga yema norü ngúexü̃gü íyexmagüxü̃wa. Rü nüxü̃ inayangau nax ínapeexü̃. Rü ñanagürü Pedruxü̃: —Pa Pedrux, ¿tama ẽ̱xna namaxã peporae nax wüxi i ora chomaxã ipedauexü̃?
41¡Rü ipedaue rü Tupanana naxca̱x peca nax pexü̃ nangü̃xẽẽxü̃ca̱x nax tama choxü̃ ípetáxü̃ca̱x! Erü aixcüma peãẽwa rü ípememare nax ngúxü̃ pingegüxü̃, natürü pexene rü natura —ñanagürü ga Ngechuchu.
42Rü yexguma rü wenaxarü noxri ínayumüxẽxü̃wa naxũ ga Ngechuchu. Rü ñaãcü nayumüxẽ, rü ñanagürü: —Pa Chaunatüx, ngẽxguma tama cunaxwa̱xegu nax nawa choxü̃ ícunguxuchixẽẽxü̃ i ñaa ngúxü̃ i tá chingexü̃, rü marü name i ngẽma cuma cunaxwa̱xexü̃ãcüma chomaxã cunaxü —ñanagürü.
43Rü yexguma wenaxarü norü ngúexü̃gü íyexmagüxü̃wa naxũxgu, rü nüxü̃ inayangau nax ínapeexü̃, yerü poraãcü nayaxtaexüchi.
44Rü yéma nüxna nixũ, rü norü tomaepü̱xcüna wenaxarü noxriãcütama nayayumüxẽ.
45Rü yemawena rü norü ngúexü̃gü íyexmagüxü̃wa naxũ. Rü ñanagürü nüxü̃: —¿Ñu̱xma rü ta pepee rü iperüngüe? Marü nawa nangu i ora nax norü uanügü yayauxgüxü̃ ya Tupana Nane ya duü̃xü̃xü̃ ixĩcü, rü tá pecaduã̱xgüxü̃na nanamugü.
46¡Ipechigü rü ngĩxã ítixĩ! Erü marü ningaica i ngẽma choxü̃ íyaxuaxü̃xü̃ —ñanagürü.
Ngechuchuxü̃ niyauxgü
(Mr. 14.43-50; Lc. 22.47-53; Jn. 18.2-11)
47Rü yexguma íyadexayane ga Ngechuchu, rü ínangu ga Yúda ga norü ngúexü̃chire̱x ixĩxü̃. Rü nawe narüxĩ ga muxü̃ma ga duü̃xü̃gü ga taramaxã rü naimaxã ixãxnexü̃. Rü yema nixĩ ga duü̃xü̃gü ga chacherdótegüarü ãẽ̱xgacügü rü Yudíugüarü ãẽ̱xgacügü yéma mugüxü̃.
48Rü nüma ga Yúda ga ínaxuaxü̃xü̃ rü marü yema duü̃xü̃gümaxã nanamexẽxẽ, rü ñanagürü: —Ngẽma nüxü̃ chachúxuxü̃ tá nixĩ ya Ngechuchu. Rü ngẽma tá nixĩ i piyauxgüxü̃ —ñanagürü.
49Rü yexguma Ngechuchuca̱x nixũ, rü ñanagürü nüxü̃: —Nuxmae Pa Ngúexẽẽruxü̃x —ñanagürü. Rü ñu̱xũchi nüxü̃ nachúxu.
50Rü Ngechuchu nanangãxü̃ rü ñanagürü: —Pa Chomücüx, ¿ta̱xacüwa nua cuxũ? —ñanagürü. Rü yexgumatama ga yema duü̃xü̃gü ga Yúdawe rüxĩxü̃ rü Ngechuchuca̱x naxĩ rü nayayauxgü.
51Rü yexguma ga wüxi ga Ngechuchumücü rü ngĩxü̃ nanawe̱xechi ga norü tara, rü chacherdótegüarü ãẽ̱xgacüarü duü̃xü̃xü̃ ínadaepachinü.
52Rü yexguma ga Ngechuchu rü ñanagürü: —¡Naxchiü̃gu yaxǘcuchi i curü tara! Erü guxãma ya yíxema taramaxã nuẽxe, rü taragu tátama tayue.
53¿Tama ẽ̱xna nüxü̃ cucua̱x rü ngẽxguma chi choma chanaxwa̱xegu, rü Chaunatüna chi naxca̱x chaca nax choxü̃́ núma namugüãxü̃ca̱x i 12 i natücumügü i muxuchixü̃ i norü orearü ngeruü̃gü i daxũcüã̱x nax choxü̃ yanangü̃xẽẽgüxü̃ca̱x?
54Natürü ngẽxguma chi ngẽma chaxüxgu, rü ¿ñuxãcü chi ningu i Tupanaarü ore i ümatüxü̃ i nüxü̃ ixuxü̃ nax choma rü tá chayuxü̃? —ñanagürü.
55Rü yexguma ga Ngechuchu rü ñanagürü nüxü̃ ga yema duü̃xü̃gü: —¿Tü̱xcüü̃ taragü rü naixmena̱xãgümaxã cha̱u̱xca̱x nua pexĩ nax choxü̃ peyarüyauxgüxü̃ca̱x ñoma wüxi i ngĩ́ta̱xaxü̃rüxü̃? Rü guxü̃ ga ngunexü̃gu rü Tupanapata ya taxü̃newa changu̱xẽẽtae, natürü taguma yexma choxü̃ piyauxgü.
56Natürü guxü̃ma i ñaa ñu̱xma ngupetüxü̃, rü ngẽmaãcü nangupetü nax yanguxü̃ca̱x i Tupanaarü ore ga nũxcümaü̃güxü̃ ga norü orearü uruü̃gü ümatügüxü̃ —ñanagürü. Rü yexguma ga guxü̃ma ga norü ngúexü̃gü rü nüxna nibuxmü. Rü nüxicatama yéma nanata̱xgü ga Ngechuchu.
Ãẽ̱xgacügüpe̱xewa Ngechuchuxü̃ nagagü
(Mr. 14.53-65; Lc. 22.54-55, 63-71; Jn. 18.12-14, 19-24)
57Rü Caipá ga chacherdótegüarü ãẽ̱xgacüxü̃tawa Ngechuchuxü̃ nagagü ga yema duü̃xü̃gü ga yayauxgüxü̃. Rü yexma nixĩ ga nangutaque̱xegüxü̃ ga ngúexẽẽruü̃gü ga ore ga mugüwa ngu̱xẽẽtaegüxü̃ rü Yudíugüarü ãẽ̱xgacügü.
58Natürü ga Pedru rü yáxü̃gu nawe nixãchigü ñu̱xmata chacherdótegüarü ãẽ̱xgacü ga Caipáxü̃tawa nangu. Rü purichíagü ga Tupanapata ga taxü̃nearü dauruü̃gümaxã yéma ĩã̱xtüwa narüto, yerü nüxü̃ nadauxchaü̃ ga ta̱xacü tá Ngechuchumaxã naxügüxü̃.
59Rü yema chacherdótegüarü ãẽ̱xgacügü rü guxü̃ma ga Yudíugüarü ãẽ̱xgacügü rü naxca̱x nadaugü ga wüxi ga ore ga doramare ixĩxü̃ nax yemamaxã Ngechuchuxü̃ ínaxuaxü̃güxü̃ca̱x nax yama̱xgüãxü̃ca̱x.
60-61Natürü woo muxü̃ma ga duü̃xü̃gü doraxü̃mare nachigaxü̃ yéma yarüxugüe, natürü taxuxü̃ma ga chixexü̃ inayangaugü ga naxca̱x tá yama̱xgüãxü̃. Rü düxwa yéma naxĩ ga taxre ga yatügü ga doraxü̃mare yéma yarüxugüxü̃. Rü ñanagürügü: —Toma nüxü̃ taxĩnüe i ñaa yatü rü ñanagürü: “Nagu tá chapogü ya daa Tupanapata ya taxü̃ne, rü tomaepü̱x i ngunexü̃gu tá wenaxarü íchanadaxẽxẽ” —ñanagürügü.
62Rü yexguma ga chacherdótegüarü ãẽ̱xgacü ga Caipá rü inachi, rü ñanagürü Ngechuchuxü̃: —¿Rü ta̱xacümaxã cunangãxü̃ i ñu̱xmax? ¿Rü ñuxũ ñaxü̃ yixĩxü̃ i ngẽma cuchiga i nüxü̃ yaxugüexü̃? —ñanagürü.
63Natürü ga Ngechuchu rü nangea̱xmare. Rü yemaca̱x ga chacherdótegüarü ãẽ̱xgacü ga Caipá rü ñanagürü nüxü̃: —Tupana ya Maxü̃cüégagu cuxü̃ chamu nax aixcüma tomaxã nüxü̃ quixuxü̃ nax texé quixĩxü̃. ¿Rü cuma ẽ̱xna i Cristu ya Tupana Nane quixĩxü̃? —ñanagürü.
64Rü Ngechuchu nanangãxü̃ rü ñanagürü: —Ngẽma nüxü̃ quixuxü̃ chixĩ. Rü pemaxã nüxü̃ chixu rü tá nüxü̃ pedaugü ya Tupana Nane ya duü̃xü̃xü̃ ixĩcü i ngẽxguma Nanatü ya Guxü̃étüwa Ngẽxmacüarü tügünecüwawa rütocü rü ngẽxguma caixanexü̃gu wenaxarü núma naxũxgu —ñanagürü.
65Rü yexguma ga nüma ga chacherdótegüarü ãẽ̱xgacü rü norü numaxã nügüchirugu nagáugü. Rü ñanagürü: —Ñaa yatü rü chixexü̃ Tupanamaxã nixugü. Rü taxuca̱xma marü tanaxwa̱xe i to i duü̃xü̃güarü ore. Rü pematama marü nüxü̃ pexĩnüe nax ñuxãcü chixexü̃maxã nax yadexaxü̃.
66¿Rü ñuxũ ñapegüxü̃ i pemax? —ñanagürü. Rü nümagü ga togü ga ãẽ̱xgacügü rü nanangãxü̃gü rü ñanagürügü: —Ngẽmáacü chixexü̃ naxü. Rü name nixĩ i noxtacüma nayu —ñanagürügü.
67Rü yexguma rü Ngechuchuchiwewa nacua̱i̱xgüe. Rü nüxna nanacua̱i̱xcagü. Rü togü rü nanapegüchiwegü.
68Rü ñanagürügü: —Pa Cristux, ¡nüxü̃ nacua̱x nax texé cuxü̃ pegüchiwegüxü̃ rü cuxna nacua̱i̱xcagüxü̃! —ñanagürügü.
Pedru rü nügü nixã nax Ngechuchuxü̃ nacuáxü̃
(Mr. 14.66-72; Lc. 22.56-62; Jn. 18.15-18, 25-27)
69Rü yoxni ga Pedru rü ãẽ̱xgacüpataa̱xtüwa narüto. Rü wüxi ga pacü ga ãẽ̱xgacüarü duü̃xü̃ ixĩcü, rü Pedruca̱x iyaxũ. Rü ngĩgürügü nüxü̃: —Cuma rü ta namücü quixĩ i ngẽma Ngechuchu i Gariréaanecüã̱x —ngĩgürügü.
70Natürü ga Pedru rü guxü̃ ga yema duü̃xü̃güpe̱xewa rü nügü nixã nax Ngechuchuarü duü̃xü̃ yixĩxü̃, rü ñanagürü: —Choma rü tama nüxü̃ chacua̱x i ta̱xacüchiga nixĩ i ngẽma nüxü̃ quixuxü̃ —ñanagürü.
71Rü yexguma marü yema ĩpataa̱xtüarü ĩã̱xwa ínaxũũxgu ga Pedru, rü nai ga pacü nüxü̃ idau. Rü ngĩgürügü namaxã ga yema duü̃xü̃gü ga yéma yexmagüxü̃: —Ñaa yatü rü Ngechuchu ya Nacharétucüã̱xmücü nixĩ —ngĩgürügü.
72Natürü ga Pedru rü wenaxarü nügü nixã nax Ngechuchuarü duü̃xü̃ yixĩxü̃. Rü ñanagürü: —Choma rü Tupanaégagu cumaxã nüxü̃ chixu rü tama nüxü̃ chacua̱x i ngẽma yatü —ñanagürü.
73Rü yixcamaxü̃ra rü yema duü̃xü̃gü ga yéma yexmagüxü̃ rü Pedruca̱x naxĩ, rü ñanagürügü nüxü̃: —Aixcüma nixĩ i cuma rü ta rü ngẽma Ngechuchutanüxü̃ quixĩxü̃, erü wüxi i Gariréaanecüã̱x idexaxü̃rüxü̃ quidexa —ñanagürügü.
74Rü nüma ga Pedru rü poraãcü nügü nixã, rü ñanagürü nüxü̃: —Choma rü Tupanaégagu pemaxã nüxü̃ chixu rü tama nüxü̃ chacua̱x i ngẽma yatü —ñanagürü. Rü yexgumatama nica ga ota.
75Rü nüma ga Pedru rü yexguma nüxna nacua̱xãchi ga yema ore ga Ngechuchu namaxã nüxü̃ ixuxü̃ ga ñaxü̃: “Rü naxü̃pa nax ota ica̱xaxü̃, rü cuma rü tomaepü̱xcüna tá cugü quixã nax chorü duü̃xü̃ quixĩxü̃”, ñaxü̃. Rü ínaxũxũ ga Pedru rü poraãcüxüchima naxaxu.
Currently Selected:
Ore i mexü̃ ga Matéu ümatüxü̃ 26: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.