Ore i mexü̃ ga Matéu ümatüxü̃ 21
21
Yerucharéü̃gu naxücu ga Ngechuchu
(Mr. 11.1-11; Lc. 19.28-40; Jn. 12.12-19)
1Rü yexguma marü yangaicagügu ga Yerucharéü̃wa nax nangugüxü̃, rü nawa nangugü ga guma ĩane ga Bexchagué ga Oribunecüarü Ma̱xpǘnewa yexmane. Rü Ngechuchu nanamu ga taxre ga norü ngúexü̃gü.
2Rü ñanagürü nüxü̃: —¡Gua tórü to̱xma̱xtawa ngẽxmane ya ĩanexacüwa pexĩ! Rü ngẽxma tá ngĩxü̃ pengau i wüxi i búru i ngẽxma ngãxü̃cü namaxã i wüxi i ngĩxacü i yatüxü̃ i ngĩxü̃tagu irüxã́ũxü̃. ¡Rü ngĩxü̃ piwẽxü̃, rü nua chauxü̃tawa ngĩxü̃ pega namaxã i ngĩxacü!
3Rü ngẽxguma texé pexna caxgux nax ta̱xacüca̱x ngĩxü̃ piwẽxü̃xü̃, ¡rü tümamaxã nüxü̃ pixu rü ñapegügü: “Torü Cori nangĩxwa̱xe namaxã i ngĩxacü, natürü paxa tá ngĩxü̃ natáeguxẽxẽ namaxã i ngĩxacü”, ñapegügü tüxü̃! —ñanagürü.
4Rü yema nangupetü nax yanguxü̃ca̱x ga yema ore ga nũxcüma Tupanaarü orearü uruxü̃ ümatüxü̃ ga ñaxü̃:
5“¡Chióü̃cüã̱xgümaxã nüxü̃ pixu rü ñapegü!
‘¡Dücax ya perü ãẽ̱xgacü ya nua pexü̃tawa ũcü!
Rü nüma rü tama nügü yacua̱xüü̃ãcü ínangu, rü wüxi i búruxacüétügumare naxaunagüãcü ínangu’ ”,
ñanagürü ga yema ore.
6Rü yexguma ga yema taxre ga norü ngúexü̃gü rü yéma naxĩ, rü nanaxügü ga yema Ngechuchu namaxã nüxü̃ ixuxü̃.
7Rü Ngechuchuxü̃tawa ngĩxü̃ nagagü ga yema búru ngĩxacümaxã. Rü yema norü ngúexü̃gü rü naxchirumaxã nanacha̱xatagü ga yema ngĩxacü, rü ñu̱xũchi ga Ngechuchu rü natagu naxaunagü.
8Rü yema muxü̃ma ga duü̃xü̃gü ga nawe rüxĩxü̃ rü naxchirumaxã nayachama ga nama. Rü togü rü naixtanü nadaü̃gü rü yemamaxã nayachama ga nama.
9Rü yema duü̃xü̃gü ga nape̱xegu ĩxü̃, rü yema wixweama ãgüxü̃, rü tagaãcü ñanagürügü: —¡Namaxü̃ ya daa Dabítaxa! ¡Rü namecümaxüchi ya daa Tupanaégagu núma ũcü! ¡Rü pema rü ta, Pa Dauxü̃cüã̱x, rü nüxü̃ picua̱xüü̃gü ya Tupana! —ñanagürügü.
10Rü yexguma Ngechuchu Yerucharéü̃gu naxücu̱xgu, rü guxü̃ma ga yema ĩanecüã̱x rü nanaxĩ̱xãchiãẽgü, rü ñanagürügü: —¿Texé nixĩ ya daa? —ñanagürügü.
11Rü yema Ngechuchuwe rüxĩxü̃ ga duü̃xü̃gü rü nanangãxü̃gü rü ñanagürügü: —Daa nixĩ ya Tupanaarü orearü uruxü̃ ya Ngechuchu ya Gariréaanewa ngẽxmane ya ĩane ya Nacharétucüã̱x ixĩcü —ñanagürügü.
Ngechuchu rü Tupanapata ga taxü̃newa ínanawoxü̃ ga duü̃xü̃gü ga yéma taxegüxü̃
(Mr. 11.15-19; Lc. 19.45-48; Jn. 2.13-22)
12Rü Tupanapata ga taxü̃nea̱xtügu naxücu ga Ngechuchu, rü ínanawoxü̃ ga yema yéma taxegüxü̃. Rü nanangüegutanü ga norü mechagü ga yema duü̃xü̃gü ga diẽrumaxã taxegüxü̃ rü yema diẽruca̱x taxegüxü̃ rü yema muxtucugümaxã taxegüxü̃.
13Rü ñanagürü nüxü̃ ga yema duü̃xü̃gü: —Tupanaarü ore i ümatüxü̃wa rü ñanagürü:
“Chopata rü yumüxẽpataxü̃ nixĩ”.
Natürü pema rü ngĩ́ta̱xaxgüxü̃pataxü̃ peyaxĩxẽxẽ —ñanagürü.
14Rü yéma Tupanapata ga taxü̃newa Ngechuchuca̱x naxĩ ga ñuxre ga ingexetügüxü̃ rü ichixeparagüxü̃. Rü Ngechuchu nanameexẽxẽ.
15Natürü ga chacherdótegüarü ãẽ̱xgacügü rü ngúexẽẽruü̃gü ga mugüwa ngu̱xẽẽtaegüxü̃, rü nüxü̃ nadaugü ga yema mexü̃gü ga Tupanaarü poramaxã naxüxü̃ ga Ngechuchu. Rü buxü̃güxü̃ naxĩnüe nax Tupanapata ga taxü̃newa ñagüxü̃: —¡Namaxü̃ ya daa Ngechuchu ya Dabítaxa! —ñagüxü̃. Rü yemaca̱x ga yema chacherdótegüarü ãẽ̱xgacügü rü ngúexẽẽruü̃gü rü nanue.
16Rü ñanagürügü Ngechuchuxü̃: —¿Nüxü̃ cuxĩnüxü̃ i ngẽma ore i buxü̃gü namaxã ngéma icagüexü̃? —ñanagürügü. Rü Ngechuchu nanangãxü̃, rü ñanagürü: —Ngü̃, nüxü̃ chaxĩnü. ¿Natürü taguma ẽ̱xna nawa pengúe i Tupanaarü ore i buxü̃güchiga ümatüxü̃ i ñaxü̃:
“Ngẽma buxü̃gü i íxraxü̃ rü õxchanagü rü tá ta cuxü̃ nicua̱xüü̃gü”,
ñaxü̃? —ñanagürü.
17Rü yexguma ga Ngechuchu rü nüxna yéma nixũ, rü ñu̱xũchi ínaxũxũ ga guma ĩanewa. Rü ĩane ga Betániawa naxũ, rü yexma nayape.
Ngechuchu rü ori̱x ga igunecü ga ngearü oṍxü̃maxã guxchaxü̃ naxuegu
(Mr. 11.12-14, 20-25)
18Rü moxü̃ãcü ga pa̱xmama rü wenaxarü Yerucharéü̃ca̱x nataegu ga Ngechuchu, rü nataiya.
19Rü namacüwawa nüxü̃ nadau ga wüxi ga nanetü ga igunecü. Rü naxca̱x nixũ, natürü taxuxü̃ma ga norü oxü̃ inayangau, rü naatüxicaxü̃ inayangau. Rü yemaca̱x ñanagürü nüxü̃ ga yema nanetü: —Tagutáma wena cuxo̱x —ñanagürü. Rü yexgumatama narüñexẽ ga yema nanetü.
20Rü yexguma yemaxü̃ nadaugügu ga norü ngúexü̃gü, rü naba̱i̱xãchiãẽgü. Rü Ngechuchuna nacagüe rü ñanagürügü: —¿Ñuxãcü i ñaa nanetü i paxãma nañexẽxü̃? —ñanagürügü.
21Rü Ngechuchu nanangãxü̃ rü ñanagürü: —Pemaxã nüxü̃ chixu rü ngẽxguma chi aixcüma peyaxõgügu rü tama ngẽma igunecümaxã chaxüxü̃xica chi pexü, natürü ngẽmaarü yexeraxü̃ chi pexü. Rü ngẽxguma chi daa ma̱xpǘnexü̃ ñapegügu: ¡Ixũgachi i nua rü márwa cugü yatáe!, ñapegügu nüxü̃, rü pega chi naxĩnü.
22Rü guxü̃ma i ngẽma naxca̱x ípeca̱xaxü̃ i perü yumüxẽwa, rü tá penayauxgü ega aixcüma peyaxõgüãcüma naxca̱x ípeca̱xgu —ñanagürü.
Ngechuchuna nacagüe rü: ¿texé cuxü̃ tamu nax Tupanapatawa cungu̱xẽẽtaexü̃?
(Mr. 11.27-33; Lc. 20.1-8)
23Rü yema ñaxguwena ga Ngechuchu rü Tupanapata ga taxü̃negu naxücu. Rü yexguma yéma ínangu̱ẽẽtaeyane rü naxca̱x naxĩ ga chacherdótegüarü ãẽ̱xgacügü rü Yudíugüarü ãẽ̱xgacügü. Rü Ngechuchuna nacagüe rü ñanagürügü: —¿Texégagu cunaxü i ngẽma nua cuxüxü̃? ¿Rü texé cuxna taxãga nax cunaxüxü̃ca̱x i ngẽma? —ñanagürügü.
24-25Rü Ngechuchu nanangãxü̃ rü ñanagürü: —Choma rü tá ta pexna chaca, rü ngẽxguma choxü̃ pengãxü̃gu i ngẽma pexna naxca̱x chaca̱xaxü̃, rü choma rü tá ta pemaxã nüxü̃ chixu nax texé choxü̃ muxü̃ nax nua changu̱xẽẽtaexü̃. ¿Rü texé tanamu ga Cuáü̃ ga báiü̃xẽẽruxü̃ nax duü̃xü̃güxü̃ ínabaiü̃xẽẽxü̃ca̱x? ¿Tupana yixĩxü̃ ga namucü rü ẽ̱xna wüxi i duü̃xü̃mare? —ñanagürü. Rü yexguma ga yema ãẽ̱xgacügü rü inanaxügüe ga nügümaxã nax yaporagatanücüüxü̃. Rü nügümaxãtama ñanagürügü: —¿Ñuxũ ñagügüxü̃ tá? Erü ngẽxguma chi nüxü̃ ixuxgu nax Tupana núma namuxü̃ rü nüma rü tá ñanagürü tüxü̃: “¿Rü tü̱xcüü̃ ga tama nüxü̃́ peyaxõgüxü̃?” ñanagürü tá.
26Rü ngẽxguma chi nüxü̃ ixuxgu nax yatügümare núma namuxü̃ rü taxca̱x rü tá naxãũcüma, erü duü̃xü̃gü tá tüxü̃ nadai. Erü guxü̃ma i duü̃xü̃gü rü nayaxõgü nax Tupana yixĩxü̃ ga Cuáü̃xü̃ núma muxü̃ —ñanagürügü.
27Rü yemaca̱x Ngechuchuxü̃ nangãxü̃gü rü ñanagürügü: —Tama nüxü̃ tacua̱x nax texé núma namuxü̃ ga Cuáü̃ ga báiü̃xẽẽruxü̃ —ñanagürügü. Rü yexguma ga Ngechuchu rü ñanagürü nüxü̃: —Choma rü tá ta taxũtáma pemaxã nüxü̃ chixu nax texé choxü̃ muxü̃ nax chanaxüxü̃ i ngẽma choxna naxca̱x peca̱xaxü̃ —ñanagürü.
Ore ga taxre ga nanegügu ixuxü̃
28Rü ñanagürü ta ga Ngechuchu —¿Ñuxũ ñapegüxü̃ naxca̱x i ñaa ore i tá pemaxã nüxü̃ chixuxü̃? Rü wüxi ga yatü rü nüxü̃́ nayexma ga taxre ga nane. Rü wüxi ga gumá nanemaxã nüxü̃ nixu rü ñanagürü nüxü̃: “Pa Chaunex, chanaxwa̱xe i yea chorü úbanecüwa cuyapuracü”, ñanagürü.
29Rü gumá nane nanangãxü̃ rü ñanagürü: “Chaxo nax ngéma chaxũxü̃”, ñanagürü. Natürü yixcama nagu narüxĩnü rü yéma naxũ rü nayapuracü.
30Rü yixcüra ga gumá nanatü rü nai ga nanemaxã nidexa, rü ñanagürü nüxü̃: “Pa Chaunex, chanaxwa̱xe i yea chorü úbanecüwa cuyapuracü”, ñanagürü. Rü gumá nane nanangãxü̃ rü ñanagürü: “Marü name, Pa Pax, rü ngéma tá chaxũ”, ñanagürü. Natürü tama nixaixcüma nax yéma yapuracüxü̃.
31Rü ñu̱xma, Pa Chacherdótegüarü Ãẽ̱xgacügü rü Yudíugüarü Ãẽ̱xgacügüx, ¡rü chomaxã nüxü̃ pixu rü ngexcürüücü ga gumá taxre ga nane ga aixcüma naxücü ga yema nanatü naxwa̱xexü̃! —ñanagürü. Rü nümagü nanangãxü̃gü rü ñanagürügü: —Gumá nüxíra namuãcü nixĩ ga naga ĩnücü —ñanagürügü. Rü yexguma ga Ngechuchu rü ñanagürü nüxü̃: —Aixcüma pemaxã nüxü̃ chixu rü ngẽma yatügü i Rómaarü ãẽ̱xgacüca̱x diẽru ngĩxü̃ dexü̃ rü ngẽma ngexü̃gü i naxü̃nemaxã taxexü̃ tá nixĩ i nüxíra pexü̃pa ichocuxü̃ ya Tupana ãẽ̱xgacü íxĩxü̃wa.
32Yerü Cuáü̃ ga báiü̃xẽẽruxü̃ rü núma naxũ nax pemaxã nüxü̃ yaxuxü̃ca̱x nax ñuxãcü tá pemaxẽxü̃, natürü ga pema rü tama nüxü̃́ peyaxõgü. Natürü ga yema yatügü ga Rómaarü ãẽ̱xgacüca̱x diẽru ngĩxü̃ dexü̃ rü yema ngexü̃gü ga naxü̃nemaxã taxexgüxü̃ rü Cuáü̃axü̃́ nayaxõgü. Natürü ga pema rü woo nüxü̃ nax pedaugüxü̃ nax yaxõgüãxü̃, rü tama nüxü̃ perüxoechaü̃ i pecüma i chixexü̃ nax peyaxõgüxü̃ca̱x —ñanagürü.
Chixexü̃ ga puracütanüxü̃gu ixuxü̃ ga ore
(Mr. 12.1-12; Lc. 20.9-19)
33Rü ñanagürü ta ga Ngechuchu: —Chanaxwa̱xe i iperüxĩnüe i ñaa to i ore i cua̱xruxü̃ i tá pemaxã nüxü̃ chixuxü̃. Rü nayexma ga wüxi ga yatü ga nüxü̃́ nayexmacü ga wüxi ga norü naane. Rü yexma nanato ga muxü̃ma ga ori̱x ga úba. Rü ñu̱xũchi ínanapoxegu, rü nanaxü ga wüxi ga úbaarü yauxtüü̃chica rü wüxi ga dauxü̃taechica. Rü ñu̱xũchi ñuxre ga puracütanüxü̃na nanaxã nax nümagü namaxã inacua̱xgüxü̃ca̱x. Rü ñu̱xũchi ga yema naanearü yora rü wüxi ga to ga nachixü̃ane ga yáxü̃guxü̃wa naxũ.
34Rü yexguma úbaarü buxgüwa nanguxgu, rü yema naanearü yora rü yéma nanamugü ga ñuxre ga norü duü̃xü̃gü nax yema puracütanüxü̃na ngĩxca̱x yaca̱xaxü̃ca̱x ga yema úbatanü ga norü yorana ücü.
35Natürü ga yema puracütanüxü̃ rü ínanayauxü̃ ga yema coriarü duü̃xü̃gü. Rü nanacua̱i̱xgü ga wüxi, rü to rü nayama̱xgü, rü yema to rü nutamaxã ínanamuxũchigü.
36Rü yema naanearü yora rü wenaxarü noxriarü yexera rümumaexü̃ ga norü duü̃xü̃gü yéma namugü. Natürü ga yema puracütanüxü̃ rü yema togürüü̃tama nayacua̱i̱xgü rü nayadai.
37Rü düxwa ga yema naanearü yora rü nanexü̃chixü̃ yéma namu yerü nüma nagu naxĩnügu rü chi nanega naxĩnüe ga yema puracütanüxü̃.
38Natürü yexguma yema cori nanexü̃ nadaugügu ga yema puracütanüxü̃, rü nügümaxã ñanagürügü: “Ngẽmaarü tá nixĩ i ñaa naane i yixcama. ¡Rü ngĩxã tayama̱xgü nax tóxrü yixĩxü̃ca̱x!” ñanagürügü.
39Rü nayayauxgü, rü úbanecüarü tóxnamana nanagagü, rü yexma nayama̱xgü —ñanagürü.
40Rü yexguma ga Ngechuchu rü yema chacherdótegüarü ãẽ̱xgacügüna naca rü ñanagürü: —¿Rü ngẽxguma ínanguxgu i ngẽma naanearü yora, rü ta̱xacü tá yema puracütanüxü̃maxã naxü? —ñanagürü.
41Rü yema chacherdótegüarü ãẽ̱xgacügü rü Ngechuchuxü̃ nangãxü̃gü, rü ñanagürügü: —Ngẽma naanearü yora rü tama nüxü̃́ nangechaü̃tümüü̃ãcüma tá nanadai i ngẽma puracütanüxü̃ i chixri maxẽxü̃. Rü ñu̱xũchi tá nüxna nüxü̃ nadauxẽxẽ i togü i puracütanüxü̃ i mea namaxã ngĩxü̃ itoyexü̃ i diẽru i úbatanü i ngẽxguma norü buxguwa nanguxgu —ñanagürügü.
42Rü Ngechuchu rü ñanagürü nüxü̃: —¿Taguma ẽ̱xna nawa pengúe i Tupanaarü ore i ümatüxü̃? Erü ngẽmawa rü ñanagürü:
“Yimá nuta ya ĩpataarü üruü̃gü nüxü̃ oecü rü ñu̱xma rü yimá nuta nixĩ ya nüxíra ixücuchicü nax namaxã inaxügüãxü̃ca̱x ya ĩpata.
Rü tórü Cori ya Tupana nixĩ ga naxücü ga yema, rü ñu̱xma rü taxca̱x namexẽchi”,
ñanagürü i ngẽma ore.
43Rü ngẽmaca̱x pemaxã nüxü̃ chixu rü taxũtáma pexãchica ya Tupana ãẽ̱xgacü ixĩxü̃wa, rü ngẽma duü̃xü̃gü i aixcüma Tupanaga ĩnüexü̃ rü nüxü̃́ puracüexü̃na tá naxã i ngẽma nachica ya Tupana ãẽ̱xgacü ixĩxü̃wa.
44Rü yimá nuta ega texé namaxã yarüñaxgu rü tá itapoü̃gü. Rü yíxema tümaétügu nanguxe ya yimá nuta, rü tá tüxü̃ niñaixmü —ñanagürü ga Ngechuchu.
45Rü yexguma ga chacherdótegüarü ãẽ̱xgacügü rü Parichéugü nüxü̃ ĩnüegu ga yema ore ga cua̱xruxü̃ ga Ngechuchu namaxã nüxü̃ ixuxü̃, rü nüxü̃ nicua̱xãchitanü ga nachiga nax yixĩxü̃ ga yema ore.
46Rü yexguma ga yema ãẽ̱xgacügü rü Ngechuchuxü̃ niyauxgüchaü̃. Natürü taxucürüwama nayayauxgü yerü duü̃xü̃güxü̃ namuü̃e, yerü ga duü̃xü̃gü rü nayaxõgü ga aixcüma Tupanaarü orearü uruxü̃ nax yixĩxü̃ ga Ngechuchu.
Currently Selected:
Ore i mexü̃ ga Matéu ümatüxü̃ 21: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.