Ore i mexü̃ ga Matéu ümatüxü̃ 2
2
Ngechuchuxü̃ ínayadaugü ga yatügü ga nüxü̃ cua̱xüchigüxü̃ ga éstewa ne ĩxü̃
1Rü Ngechuchu rü Yudéaanewa yexmane ga ĩane ga Beréü̃gu nabu ga yexguma Eróde ãẽ̱xgacü ixĩxgu ga yema nachixü̃anewa. Rü yexguma nixĩ ga ĩane ga Yerucharéü̃wa nangugüxü̃ ga ñuxre ga yatügü ga nüxü̃ cua̱xüchigüxü̃ ga woramacuriwa ngúexü̃ ga éstewa ne ĩxü̃.
2Rü duü̃xü̃güna nacagüe, rü ñanagürügü: —¿Ngextá nixĩ i nangẽxmaxü̃ ya yimá Yudíugüarü ãẽ̱xgacü ya ngexwaca bucü? Toma rü yéama éstewa nüxü̃ tadau nax nangóxü̃ ya norü woramacuri rü ngẽmaca̱x núma taxĩ nax nüxü̃ tayarücua̱xüü̃güxü̃ca̱x —ñanagürügü.
3Rü yexguma yemachigaxü̃ nacua̱xgu ga ãẽ̱xgacü ga Eróde rü poraãcü naxoegaãxẽ. Rü guxü̃ma ga duü̃xü̃gü ga Yerucharéü̃cüã̱xgü rü ta naxoegaãẽgü.
4Rü yexguma ga ãẽ̱xgacü ga Eróde rü naxca̱x nangema ga guxü̃ma ga chacherdótegüarü ãẽ̱xgacügü rü yema ngúexẽẽruü̃gü ga Tupanaarü mugüwa ngu̱xẽẽtaegüxü̃. Rü nüxna naca, rü ñanagürü: —¿Ngexta tá nixĩ i nabuégaxü̃ ya Cristu? —ñanagürü.
5Rü nümagü nanangãxü̃gü, rü ñanagürügü: —Nua Yudéaanewa ngẽxmane ya ĩane ya Beréü̃gu tá nixĩ i nabuxü̃. Yerü yemaacü nanaxümatü ga Tupanaarü orearü uruxü̃.
6Rü nüma rü ñanagürü:
“Cumax, Pa Ĩane Pa Beréü̃ ya Yudáanewa Ngẽxmanex,
rü cuma rü tama wüxi ya ngexnerüxünemare ya ĩane quixĩ natanüwa ya yima ĩanegü ya itaxü̃ne ya Yudáanewa ngẽxmagüne.
Erü cugu tá nabu ya wüxi ya ãẽ̱xgacü i tá chorü duü̃xü̃gü i Iraétanüxü̃maxã icuácü”,
—ñanagürü.
7Rü yexguma ga ãẽ̱xgacü ga Eróde rü bexma nüxica naxca̱x nangema ga yema yatügü ga nüxü̃ cua̱xüchigüxü̃ ga éstewa ne ĩxü̃. Rü nüxna naca nax ta̱xacürü ngunexü̃ yixĩxü̃ ga nangóxü̃ ga gumá woramacuri.
8Rü ñu̱xũchi ga Eróde rü Beréü̃wa nanamugü ga yema yatügü ga éstewa ne ĩxü̃. Rü ñanagürü nüxü̃: —¡Ngéma pexĩ rü mea naxca̱x peyada̱u̱x i ngẽma buxü̃! ¡Rü ngẽxguma nüxü̃ ipeyangauxgu, rü chomaxã nüxü̃ pixu nax choma rü ta ngéma chaxũxü̃ca̱x, nax nüxü̃ chayarücua̱xüxü̃xü̃ca̱x i ngẽma buxü̃! —ñanagürü.
9Rü yexguma yema orexü̃ naxĩnüeguwena, rü inaxĩãchi ga yema yatügü. Rü gumá woramacuri ga noxri éstewa nüxü̃ nadaugücü rü nape̱xegu nixũchigü rü ñu̱xmata gumá bucü ga Ngechuchu íyexmaxü̃étüwa nangu. Rü yéma nayachaxãchi.
10Rü yexguma gumá woramacurixü̃ nadaugügu ga yema yatügü, rü poraãcü nataãẽgü.
11Rü nagu nachocu ga gumá ĩ ga nawa nayexmane ga gumá bucü, rü yexma nüxü̃ nayangau ngĩmaxã ga naé ga María. Rü gumá bucüpe̱xegu nacaxã́pü̱xügü, rü nüxü̃ nicua̱xüü̃gü. Rü ñu̱xũchi nayawãxna ga norü ãmarechixü̃gü, rü gumá bucüna nanaxãmaregü ga úiru rü pumarate̱xe rü míra.
12Rü yemawena ga yema yatügü rü nanegüwa Tupana nayaxucu̱xẽgü nax tama Eródeca̱x nawoeguxü̃ca̱x. Rü yemaca̱x to ga namagu nachixü̃aneca̱x nawoegu.
Equítuanewa nabuxmü ga Yúche rü María
13Rü yexguma marü íyaxĩxguwena ga yema yatügü, rü wüxi ga daxũcüã̱x ga Tupanaarü orearü ngeruxü̃, rü nanegüwa Yúcheca̱x nango̱x, rü ñanagürü nüxü̃: —¡Naba̱i̱xãchi rü írüda! ¡Rü ínaxũxũ namaxã ya yimá bucü rü naé rü Equítuanewa naxũ! ¡Rü ngéma pengẽxmagü ñu̱xmatáta choma cumaxã nüxü̃ chixu nax ñuxgu tá cutaeguxü̃! Erü ãẽ̱xgacü i Eróde rü yimá bucüca̱x tá nadau nax yamáãxü̃ca̱x —ñanagürü nüxü̃.
14Rü yexguma ga Yúche rü naba̱i̱xãchi rü ínarüda. Rü yexgumatama chütacü namaxã inaxũãchi ga gumá bucü ga Ngechuchu rü naé. Rü Equítuanewa naxĩ.
15Rü Equítuanewa nayexmagü ñu̱xmata nayu̱x ga ãẽ̱xgacü ga Eróde. Rü yemaacü nangupetü nax yanguxü̃ca̱x ga Tupanaarü ore ga nũxcümaü̃cü ga norü orearü uruxü̃ nüxü̃ ixuxü̃ ga ñaxü̃:
“Naxca̱x changema ya Chaune nax Equítuanena nataeguxü̃ca̱x”,
ñaxü̃ ga yema ore.
Eróde norü churaragüxü̃ namu nax tüxü̃ nada̱i̱xü̃ca̱x ga buxegü
16Rü yexguma ãẽ̱xgacü ga Eróde nüxü̃ cua̱xgu ga to ga namagu nax nawoeguxü̃ ga yema yatügü ga nüxü̃ cua̱xüchigüxü̃ ga éstewa ne ĩxü̃, rü poraãcü nanu. Rü Beréü̃wa nanamugü ga norü churaragü nax guxü̃ ga yema naanewa tüxü̃ nada̱i̱xü̃ca̱x ga guxãma ga guxema buxegü ga iyatüxe ga yexwaca̱x buexe rü ñu̱xmata taxre ga taunecü tüxü̃́ yexmagüxewa nangu. Yerü yema yatügü ga éstewa ne ĩxü̃ rü marü nüxü̃ nixugügü rü taxre ga taunecü nixĩ ga noxri nax nangóxü̃ ga gumá woramacuri.
17Rü yemaacü ningu ga yema ore ga Tupanaarü orearü uruxü̃ ga Yeremía ümatüxü̃ ga ñaxü̃:
18“Ramáwa nüxü̃ taxĩnü i wüxi i naga i poraãcü ngechaü̃gaãcüma axuxü̃.
Rü Raqué iyixĩ i ngĩxacügüca̱x poraãcü axuxcü.
Rü tama inaxwa̱xe nax texé ngĩxü̃ taãẽxẽẽxü̃, erü nayue i ngĩxacügü”,
ñanagürü ga yema ore.
19Natürü yexguma marü nayuxguwena ga ãẽ̱xgacü ga Eróde, rü wüxi ga daxũcüã̱x ga Tupanaarü orearü ngeruxü̃ rü nanegüwa Yúcheca̱x nango̱x ga Equítuanewa. Rü ñanagürü nüxü̃:
20—Pa Yúchex, ¡írüda, rü pechiü̃aneca̱x pewoegu namaxã ya yimá bucü rü naé! Erü marü nayue i ngẽma yama̱xgüchaxü̃xü̃ ya yimá bucü —ñanagürü.
21Rü yexguma ga Yúche rü ínarüda, rü Iraéaneca̱x nataegu wüxigu namaxã ga gumá bucü rü naé.
22Natürü yexguma Yúche nüxü̃ cuáchigagu nax Aqueránu ãẽ̱xgacüxü̃ ingucuchixü̃ nanatü ga Eródechicüü ga Yudéaanewa, rü namuü̃ ga Yúche ga yéma nax naxũxü̃. Yerü Tupana rü nanegüwa nanaxucu̱xẽ nax tama yéma Yudéaanewa naxũxü̃ca̱x. Rü yemaca̱x Gariréaanewa naxũ.
23Rü yexguma Gariréaanewa nanguxgu, rü ĩane ga Nacharétuwa naxũ. Rü yexma naxãchiü̃ nax yanguxü̃ca̱x ga yema ore ga nũxcümaü̃güxü̃ ga Tupanaarü orearü uruü̃gü nüxü̃ ixugüxü̃ ga ñaxü̃:
“Ngechuchu ya Cristu rü Nacharétucüã̱xmaxã tá nanaxugü”,
ñaxü̃.
Currently Selected:
Ore i mexü̃ ga Matéu ümatüxü̃ 2: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.