Ore i mexü̃ ga Matéu ümatüxü̃ 15
15
Ngẽma Tupanape̱xewa duü̃xü̃güxü̃ chixexẽẽxü̃chiga
(Mr. 7.1-23)
1Rü Ngechuchuca̱x naxĩ ga ñuxre ga Parichéugü rü ngúexẽẽruü̃gü ga mugüwa ngu̱xẽẽtaegüxü̃ ga Yerucharéü̃wa ne ĩxü̃. Rü Ngechuchuna nacagü, rü ñanagürügü:
2—¿Tü̱xcüü̃ i curü ngúexü̃gü rü tama nagu naxĩ i nũxcümaü̃güxü̃ i tórü o̱xigücüma? ¿Rü tü̱xcüü̃ tama nayanguxẽẽgü i ngẽma nacüma nax Tupanaca̱x naya̱u̱xme̱xgüxü̃ naxü̃pa nax nachibüexü̃? —ñanagürügü.
3Natürü ga Ngechuchu rü nüxna naca ga yema Parichéugü rü ngúexẽẽruü̃gü, rü ñanagürü nüxü̃: —¿Rü tü̱xcüü̃ i pema rü nüxü̃ pexo i Tupanaarü mu nax nagu pexĩxü̃ca̱x i pecümagütama?
4Erü Tupana rü norü orewa rü ñanagürü:
“¡Tüxü̃ nangechaü̃ ya cunatü rü cué!”
ñanagürü. Rü ngẽma orewa rü ñanagürü ta:
“Rü texé ya tümanatümaxã rüe̱xna tümaémaxã guxchigaxe rü name i noxtacüma yu tümamaxã naxuegu”,
ñanagürü.
5Natürü pema rü nüxü̃ pixu nax namexü̃ ega wüxi ya yatü nanatüxü̃ rüe̱xna naéü̃ ñaxgu: “Taxucürüwa cuxü̃ charüngü̃xẽẽxü̃ erü guxü̃ma i chorü ngẽmaxü̃gü rü marü Tupanana chanaxã”, ñaxgu.
6Rü ngẽxguma texé ngẽma ñagügu rü pexca̱x rü marü namexü̃ nax tama tümanatüxü̃ rü tümaéxü̃ tarüngü̃xẽẽxü̃. Rü ngẽmaãcü ipeyanaxoxẽxẽ i Tupanaarü mu nax nagu pexĩxü̃ca̱x i pecümagütama.
7Pemax, Pa Duü̃xü̃güpe̱xewa Mea Maxẽnetaxü̃x, aixcüma nixĩ ga yema ore ga Tupanaarü orearü uruxü̃ ga Ichaía pechiga ümatüxü̃ ga ñaxü̃:
8“Ñaa duü̃xü̃gü rü naã̱xmaxãmare choxü̃ nicua̱xüü̃gü.
Natürü naãẽwa rü tama aixcüma chaugu narüxĩnüe.
9Rü taxuwama name nax choxü̃ yacua̱xüü̃güxü̃.
Erü guxü̃ma i norü ngu̱xẽẽtae rü yatügüarü mugümare nixĩ rü tama aixcüma chorü mu nixĩ”,
ñaxü̃ —ñanagürü ga Ngechuchu.
10Rü ñu̱xũchi ga Ngechuchu rü duü̃xü̃güca̱x naca, rü ñanagürü nüxü̃: —¡Mea iperüxĩnüe i ñaa chorü ore, rü nüxü̃ pecuá nax ta̱xacüchiga yixĩxü̃!
11Ngẽma õna i duü̃xü̃gü ngṍxü̃ rü tama ngẽma nixĩ i napecaduã̱xẽẽgüxü̃. Natürü ngẽma ore i chixexü̃ i nüxü̃ yaxugüxü̃, rü ngẽmawaxi nixĩ i napecaduã̱xü̃ —ñanagürü.
12Rü ñu̱xũchi ga norü ngúexü̃gü rü naxca̱x naxĩ, rü ñanagürügü nüxü̃: —¿Pa Corix, nüxü̃ cucuáxü̃ nax Parichéugü rü naãẽwa nangúxü̃ i ngẽxguma nüxü̃ naxĩnüegu i ngẽma ore i nüxü̃ quixuxü̃? —ñanagürügü.
13Natürü nüma ga Ngechuchu rü nanangãxü̃ rü ñanagürü nüxü̃: —Guxü̃ma i ngẽma nanetü i tama Chaunatü ya dauxü̃gucü itoxü̃ rü tá nanabe̱x.
14Rü nüetama i ngẽma Parichéugü, erü nümagü rü namaarü cua̱xruü̃gü i ngexetüxü̃ nixĩgü. Rü ngẽxguma wüxi i ngexetüxü̃ rü naxrüxü̃ ngexetüxü̃maxã inacua̱xgu rü ngürüãchi ngẽma taxre rü wüxi i ãxmaxü̃gu tá nügümaxã nayayicu —ñanagürü.
15Rü ñu̱xũchi ga Pedru rü Ngechuchuna naca, rü ñanagürü: —¡Tomaxã mea nango̱xẽxẽ nax ñuxũ ñaxü̃chiga yixĩxü̃ i ngẽma ore i tomaxã nüxü̃ quixuxü̃! —ñanagürü.
16Rü Ngechuchu nanangãxü̃ rü ñanagürü: —¿Ẽ̱xna pema rü ta tama nüxü̃ pecua̱x i ngẽma ore nax ta̱xacüchiga yixĩxü̃?
17¿Tama ẽ̱xna nüxü̃ pecua̱x rü guxü̃ma i ngẽma õna i duü̃xü̃gü ngṍxü̃ rü naanüwa naxũ, rü yixcama naxü̃newa ínaxũxũ?
18Natürü guxü̃ma i ngẽma ore i duü̃xü̃gü nüxü̃ ixuxü̃ rü naãẽwa nixĩ i ne naxũxü̃. Rü ngẽma ore i chixexü̃ waxi nixĩ i napecaduã̱xẽẽgüxü̃ i duü̃xü̃gü.
19Erü naãẽwa nixĩ i chixexü̃gu naxĩnüexü̃ i duü̃xü̃gü. Rü ngéma ne naxũ nax namáetaxü̃, rü to i ngexü̃ i ãtéxü̃maxã nax inapexü̃, rü nax nangeãẽmarexü̃, rü nax nangĩ́xü̃, rü nax yadorata̱xáxü̃, rü nax naguxchigawa̱xexü̃.
20Rü guxü̃ma i ngẽma chixexü̃ waxi nixĩ i duü̃xü̃güxü̃ pecaduã̱xẽẽxü̃. Natürü ngẽma nax tama naya̱u̱xme̱xgüxü̃ naxü̃pa nax nachibüexü̃, rü ngẽma rü tama nanapecaduã̱xẽxẽ i duü̃xü̃gü —ñanagürü.
Wüxi ga ngecü ga to ga nachixü̃anecüã̱x ga Ngechuchuaxü̃́ yaxõ̱xcüchiga
(Mr. 7.24-30)
21Rü yexguma yéma inaxũãchigu ga Ngechuchu, rü Tíruane rü Chidóü̃anewa naxũ.
22Rü Ngechuchuxü̃tawa ingu ga wüxi ga ngecü ga Canaáü̃cüã̱x ga Tíruanegu ãchiü̃cü. Rü tagaãcü ngĩgürügü nüxü̃: —Pa Cori Pa Dabítanüxü̃x, ¡cuxü̃́ changechaü̃tümüxü̃! Erü chauxacüwa nangẽxma i wüxi i ngo̱xo i poraãcü ngúxü̃ ngĩxü̃ ingexẽẽxü̃ —ngĩgürügü.
23Natürü ga Ngechuchu rü tama ngĩxü̃ nangãxü̃. Rü düxwa ga norü ngúexü̃gü rü naxca̱x naxĩ, rü Ngechuchuxü̃ naca̱a̱xü̃gü, rü ñanagürügü: —Pa Corix ¡Ngĩmaxã nüxü̃ ixu i ngẽma nge rü íyaxũ, erü tawe iyacaechigü! —ñanagürügü.
24Rü yexguma ga Ngechuchu rü ñanagürü: —Tupana núma choxü̃ namu naxca̱x i ngẽma Iraétanüxü̃gü i rütauxexü̃ rü tama togüca̱x nixĩ i nua choxü̃ namuxü̃ —ñanagürü.
25Natürü ngĩma ga yema nge ga tama Yudíu ixĩcü rü Ngechuchuca̱x iyaxũ. Rü nape̱xegu iyacaxã́pü̱xü, rü ngĩgürügü nüxü̃: —Pa Corix ¡choxü̃ rüngü̃xẽxẽ! —ngĩgürügü.
26Natürü Ngechuchu rü ñanagürü: —Tama name i ta̱xacügüna tanapu i õna nax airugüna naxãxü̃ca̱x —ñanagürü.
27Natürü ngĩma ga yema nge rü ngĩgürügü: —Aixcüma nixĩ i curü ore, Pa Corix, natürü airugü rü ta norü yoraarü õnatüchi i mechawa rüyixixü̃ nangõ̱x —ngĩgürügü.
28Rü yexguma ga Ngechuchu rü ñanagürü ngĩxü̃: —Pa Ngecüx, aixcümaxü̃chi cuyaxõ. Marü tá chanaxü i ngẽma cuma cunaxwa̱xexü̃ —ñanagürü. Rü yexgumatama ngĩxca̱x nitaane ga ngĩxacü.
Ngechuchu nanameexẽxẽ ga muxü̃ma ga ida̱xaweexü̃
29Rü yemawena ga Ngechuchu rü inaxũãchi ga yema naanewa, rü naxtaxa ga Gariréacutüwa naxũ. Rü ñu̱xũchi wüxi ga ma̱xpǘnewa ínaxü̃ãchi, rü yéma nayarüto.
30Rü muxü̃ma ga duü̃xü̃gü naxü̃tawa nangugü. Rü yéma naxü̃tawa nanagagü ga duü̃xü̃gü ga ichixeparagüxü̃, rü ngexetügüxü̃, rü chixechacüügüxü̃, rü tama idexagüxü̃, rü muxü̃ma ga togü ga ida̱xaweexü̃. Rü Ngechuchupe̱xegu nayamugü. Rü nüma ga Ngechuchu rü nanameexẽxẽ.
31Rü nüma ga duü̃xü̃gü rü poraãcü nabaixãchiãẽgü ga yexguma nüxü̃ nadaugügu ga yema noxri tama idexagüxü̃ rü marü nax yadexagüxü̃, rü yema noxri chixechacüügüxü̃ rü marü naxca̱x nax yataanegüxü̃, rü yema noxri chixeparagüxü̃ rü marü nax yaxĩxü̃, rü yema noxri ngexetügüxü̃ rü marü nax yadauchigüxü̃. Rü yemaca̱x ga yema duü̃xü̃gü rü inanaxügüe nax Iraétanüxü̃arü Tupanaxü̃ yacua̱xüü̃güxü̃.
Ngechuchu nanachibüexẽxẽ ga 4,000 ga yatügü
(Mr. 8.1-10)
32Rü nüma ga Ngechuchu rü norü ngúexü̃güca̱x naca, rü ñanagürü nüxü̃: —Choxü̃́ nangechaü̃tümüü̃gü i ñaa duü̃xü̃gü, erü marü tomaepü̱x i ngunexü̃ nua chauxü̃tawa nangẽxmagü, rü nüxü̃́ nataxuma i norü õna. Rü taxuacüma ngẽmaãcümare nachiü̃wa chanamugü, erü ngürüãchi namagu tá nayaturae —ñanagürü.
33Rü norü ngúexü̃gü rü ñanagürügü nüxü̃: —¿Natürü ngextá tá tanayaxu i õna naxca̱x i guxü̃ma i ñaa duü̃xü̃gü? Erü taxúema nuxma taxãpata i nua —ñanagürügü.
34Rü Ngechuchu nüxna naca, rü ñanagürü: —¿Ñuxre i paũ pexü̃́ nangẽxma i pemax? —ñanagürü. Rü nanangãxü̃gü, rü ñanagürügü: —Toxü̃́ nangẽxma i 7 i paũ rü noxretama i choxnixacügüxicatama —ñanagürügü.
35Rü yexguma ga Ngechuchu rü duü̃xü̃güxü̃ namu nax ñaxtüanewa natogüxü̃ca̱x.
36Rü nanade ga yema 7 ga paũ rü yema choxnigü. Rü Tupanana moxẽ naxã. Rü ñu̱xũchi inanabücu. Rü norü ngúexü̃güna nanana nax duü̃xü̃güxü̃ yanuaxü̃ca̱x.
37Rü guxü̃ma ga duü̃xü̃gü rü meama nachibüe. Rü yemawena rü 7 ga pexchigü nanapagü namaxã ga yema paũtüchigü rü choxnichipe̱xegü ga íyaxügüxü̃.
38Rü yema yéma chibüexü̃ rü 4,000 ga yatügü nixĩ, natürü ga ngexü̃gü rü buxü̃gü rü tama nayaxugü.
39Rü yemawena ga Ngechuchu rü duü̃xü̃güxü̃ ínimugü. Rü ñu̱xũchi wüxi ga nguegu nixüe, rü Magadáü̃arü naanewa naxũ.
Currently Selected:
Ore i mexü̃ ga Matéu ümatüxü̃ 15: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.