Ore i mexü̃ ga Matéu ümatüxü̃ 11
11
Cuáü̃ ga báiü̃xẽẽruxü̃ nanamu ga ñuxre ga norü duü̃xü̃gü nax Ngechuchuxü̃tawa íyadaugüxü̃ca̱x
(Lc. 7.18-35)
1Rü yexguma Ngechuchu nüxü̃ rüchauxgu nax yaxucu̱xẽgüãxü̃ ga yema 12 ga norü ngúexü̃gü, rü inaxũãchi ga yema nachicawa nax duü̃xü̃güxü̃ nangúexẽẽxü̃ca̱x rü nüxü̃ yaxuchigüxü̃ca̱x ga ore ga mexü̃ nawa ga guxü̃nema ga ĩanegü ga yema naanewa yexmagüne.
2-3Rü Cuáü̃ ga báiü̃xẽẽruxü̃ rü poxcupataxü̃wa nayexma. Rü nüxü̃ nacuáxchiga ga yema Ngechuchu üxü̃. Rü yemaca̱x ga Cuáü̃ rü Ngechuchuxü̃tawa nanamugü ga ñuxre ga norü duü̃xü̃gü nax nüxna yacagüxü̃ca̱x. Rü nümagü rü Ngechuchuxü̃ ñanagürügü: —¿Cuma yixĩxü̃ i Cristu i cuxü̃ ítanangu̱xẽẽxü̃, rü ẽ̱xna to tá yixĩxü̃ i Cristu i ítanangu̱xẽẽxü̃? —ñanagürügü.
4Rü Ngechuchu nanangãxü̃ rü ñanagürü nüxü̃ ga yema duü̃xü̃gü: —¡Pewoegu rü Cuáü̃maxã nüxü̃ peyarüxu i ngẽma pematama nua nüxü̃ pedaugüxü̃ rü nüxü̃ pexĩnüexü̃!
5¡Rü Cuáü̃maxã nüxü̃ pixu rü ngẽma ngexetügüxü̃ rü marü nidauchigü, rü ngẽma ichixeparaxü̃ rü marü inachigü, rü ngẽma chaxüneã̱xgüxü̃ rü marü naxca̱x nitaanegü, rü ngẽma ngauchi̱xẽgüxü̃ rü marü ningo̱xnamachixẽgü, rü ngẽma yuexü̃ rü wenaxarü namaxẽ, rü ngẽma ngearü diẽruã̱xgüxü̃ rü marü namaxã nüxü̃ tixu i Tupanaarü ore i mexü̃!
6Rü tataãxẽ ya yíxema nüxü̃ dauxe i ngẽma chaxüxü̃ rü tama nüxü̃ rüxoxe nax choxü̃́ tayaxõxü̃ —ñanagürü ga Ngechuchu.
7Rü yexguma nawoegu̱xgu ga yema Cuáü̃arü duü̃xü̃gü, rü Ngechuchu inanaxügü ga gumá Cuáü̃chiga nax yadexaxü̃. Rü ñanagürü nüxü̃ ga duü̃xü̃gü: “¿Ta̱xacü nixĩ ga pema ípeyadaugüxü̃ ga naxnücüanewa ga taxúema íxãpataxü̃wa? ¿Ẽ̱xna wüxi ga yatü i ñoma dexne i buanecümaxã núxwa̱xüchixü̃rüxü̃ ixĩxü̃?
8Rü yexguma tama gumá ípeyadaugügu, ¿rü ta̱xacü nixĩ ga ípeyadaugüxü̃? ¿Ẽ̱xna wüxi ga yatü ga mea nügü nga̱xãẽxü̃ nixĩ ga ípeyadaugüxü̃? Pema nüxü̃ pecua̱x i ngẽma mea nügü nga̱xãẽgüxü̃ rü ãẽ̱xgacügüpatagüwa nangẽxmagü.
9¿Ta̱xacü nixĩ ga ípeyadaugüxü̃? ¿Ẽ̱xna wüxi ga Tupanaarü orearü uruxü̃? Rü aixcüma pemaxã nüxü̃ chixu rü yema nixĩ ga ípeyadaugüxü̃. Rü nüma ya Cuáü̃ rü to i Tupanaarü orearü uruxü̃arü yexera nixĩ.
10Erü Cuáü̃chiga nixĩ ga naxümatüxü̃ ga yema Tupanaarü ore ga ñaxü̃:
‘Cupe̱xegu chayamu i chorü orearü ngeruxü̃ nax cuxü̃pa namexẽẽãxü̃ca̱x i curü nama’,
ñaxü̃.
11Rü aixcüma pemaxã nüxü̃ chixu rü guxü̃ i duü̃xü̃gütanüwa rü nataxuma i Tupanaarü orearü uruxü̃ i Cuáü̃arü yexera ixĩxü̃. Natürü yíxema wixwe üxe ya Tupana ãẽ̱xgacü ixĩxü̃wa rü Cuáü̃arü yexera tixĩ.
12Rü yexguma noxri Cuáü̃ ya báiü̃xẽẽruxü̃ ínguxgu ñu̱xmata ñoma i ngunexü̃wa nangu rü woo nangẽxmagu i guxchaxü̃gü, natürü Tupana ya daxũwa ãẽ̱xgacü ixĩcüarü ore rü nüxü̃ nixugüeama rü muxü̃ma i duü̃xü̃gu pora naxüe nax nayauxgüãxü̃ca̱x.
13Rü guxü̃ma ga Tupanaarü orearü uruü̃gü, rü yema mugü ga Moiché ümatüxü̃wa rü nüxü̃ nixuchigagü rü tá ínanguxü̃ ya Cristu nax ãẽ̱xgacü yixĩxü̃ca̱x. Rü yemaacü nixĩ ñu̱xmata ínangu ga Cuáü̃.
14Rü ngẽxguma chi peyaxõgüchaü̃gu i ñaa chorü ore, rü pemaxã nüxü̃ chixu rü Cuáü̃ ya báiü̃xẽẽruxü̃ nixĩ ya yimá Ería ga ípenangu̱xẽẽcü.
15Rü yíxema ãchi̱xẽgüxe, ¡rü naga taxĩnüe i ngẽma ore!” ñanagürü.
16Rü ñanagürü ta ga Ngechuchu: “¿Ta̱xacügu tá chanangu i ñaa duü̃xü̃gü i ñu̱xma maxẽxü̃? Erü ñaa duü̃xü̃gü rü taxumaama nataãẽgü ngẽxgumarüxü̃ i ñuxre i buxü̃gü i nügümaxã ĩã̱xtüwa rütogüxü̃, rü íxĩnüca̱xwa̱xegüxü̃, rü tagaãcü namücügüxü̃ ñagüxü̃:
17‘Marü wowerumaxã pexca̱x tapaxetagü, natürü tama ípixü̃ãchitanüxü̃. Rü marü ngechaü̃ i wiyaegu pexca̱x tawiyaegü, natürü tama pexauxe’, ñagüxü̃. Rü ngẽma buxü̃gürüxü̃ nixĩ i ñaa duü̃xü̃gü.
18Rü núma naxũ ga Cuáü̃ rü naxaure rü tama nachibü rü tama bínu nayaxaxü. Rü yexguma nüma i duü̃xü̃gü rü: ‘Nango̱xoã̱x’, ñanagürügü nüxü̃.
19Rü ñu̱xũchi núma naxũ ya Tupana Nane ya duü̃xü̃xü̃ ixĩcü rü õna nangõ̱x rü bínu nayaxaxü. Rü ngẽxguma i nüma i duü̃xü̃gü rü taanüxü̃chixü̃ rü ngãxwa̱xexü̃ nüxü̃ nawogüe. Rü nüxü̃ nixugüe rü pecaduã̱xgüxü̃maxã naxãmücü, rü namaxã naxãmücü i ngẽma duü̃xü̃gü i Rómaarü ãẽ̱xgacüca̱x diẽru ngĩxü̃ ideetanüxü̃. Natürü Tupanaarü cua̱x rü tümawa nango̱x ya yíxema aixcüma mexü̃ üxe”, ñanagürü ga Ngechuchu.
Ĩanegü ga tama Tupanaga ĩnüene
(Lc. 10.13-15)
20Rü yexguma ga Ngechuchu rü inanaxügü nax yangagüãxü̃ ga gumá ĩanegücüã̱x ga ngextá yexeraãcü Tupanaarü poramaxã taxü̃ ga mexü̃gü ínaxüxü̃wa. Rü nayangagü yerü yema duü̃xü̃gü rü tama nüxü̃ narüxoe ga norü chixexü̃ rü tama Tupanaaxü̃́ nayaxõgüchaü̃.
21Rü ñanagürü ga Ngechuchu: “Wüxi i ngechaü̃ nixĩ i pexca̱x, Pa Corachíü̃cüã̱x rü Pa Bechaídacüã̱x. Yerü yexguma chi Tíruarü ĩanewa rü Chidóü̃arü ĩanewa chanaxüxgu ga yema mexü̃gü ga cua̱xruü̃gü ga Tupanaarü poramaxã petanüwa chaxüxü̃, rü woo ga nax poraãcü yachixexü̃ ga yema duü̃xü̃gü, rü nũxcümama chitama nüxü̃ narüxoe ga yema nacüma ga chixexü̃, rü poraãcüxüchi chi nügümaxã nangechaü̃gü rü naxauxe, yerü chi nügü nicua̱xãchitanü nax yapecaduã̱xgüxü̃.
22Natürü pemaxã nüxü̃ chixu rü ngẽma ngunexü̃ ya Tupana nagu napoxcuexü̃ i pecaduã̱xgüxü̃, rü ngẽma ngunexü̃gu rü ngẽma Tírucüã̱x rü Chidóü̃cüã̱xarü yexera tá pexü̃ napoxcue i pemax, Pa Corachíü̃cüã̱x rü Bechaídacüã̱x.
23Rü pemax, Pa Capernáü̃cüã̱x, ¿rü pema nagu perüxĩnüegu rü daxũguxü̃ i naanewa tá pengugüxü̃? Pemaxã nüxü̃ chixu rü naanetüü̃wa i ngextá Tupana Chatanáxü̃ ípoxcuxü̃wa tá nixĩ i pewogüxü̃. Rü yexguma chi Chodómaarü ĩanewa chanaxüxgu ga yema mexü̃gü ga cua̱xruü̃gü ga Tupanaarü poramaxã petanüwa chaxüxü̃, rü guma ĩane ga nũxcüma norü pecadugagu iyarüxoxü̃ne rü ñu̱xma rü chita nangẽxma.
24Natürü pemaxã nüxü̃ chixu rü ngẽma ngunexü̃ ya Tupana nagu napoxcuexü̃ i pecaduã̱xgüxü̃, rü ngẽma ngunexü̃gu rü Chodómacüã̱xarü yexera tá pexü̃ napoxcue i pemax, Pa Capernáü̃cüã̱x”, ñanagürü.
Cha̱u̱xca̱x pexĩ nax chauxü̃tagu perüngü̃ẽxü̃ca̱x
(Lc. 10.21-22)
25Rü yexguma rü ñaãcü nayumüxẽ ga Ngechuchu, rü ñanagürü: “Pa Chaunatü ya Daxũguxü̃ i Naane rü Ñoma i Naanearü Yorax, cuxü̃ chicua̱xüxü̃, erü ñaa chorü ngúexü̃güxü̃ nüxü̃ cucua̱xẽxẽ i ñaa ore i naxcha̱xwa iquicúxü̃ i duü̃xü̃gü i ñoma i naanewa nüxü̃ cua̱xüchigüxü̃.
26Rü moxẽ cuxna chaxã, Pa Chaunatüx, erü cuma cunaxwa̱xe nax ngẽmaãcü cunaxüxü̃”, ñanagürü.
27Rü ñanagürü ta ga Ngechuchu: “Chaunatü choxna nanaxã i guxü̃ma i ta̱xacü i nüxü̃́ ngẽxmaxü̃. Rü Chaunatüxicatama choxü̃ nacua̱x nax texé chixĩxü̃ i choma i Nane. Rü tama guxü̃ma i duü̃xü̃gü aixcüma nüxü̃ nacua̱x ya Chaunatü. Rü choma ya Nane, rü ñu̱xũchi ngẽma duü̃xü̃gü i Chaunatüxü̃ nüxü̃ chacua̱xẽẽchaü̃xü̃xicatama nixĩ i aixcüma Chaunatüxü̃ cua̱xgüxü̃.
28¡Rü nua chauxü̃tawa pexĩ i guxãma i pema ya ipaexe nagagu i perü guxchaxü̃gü rü perü ĩ̱xãchiãẽgü! Rü choma rü tá pexü̃ icharüngü̃güxẽxẽ.
29¡Rü ñu̱xũchi penayaxu i chorü ucu̱xẽgü rü naxca̱x pedauxü̃taegü i chaucüma! Erü choma rü yáxna pemaxã chaxĩnü rü tama chaugü chicua̱xüxü̃. Rü ngẽmaãcü tá nüxna iperüngügü i perü guxchaxü̃gü.
30Erü ngẽma pexü̃ chamuxü̃ rü natauxcha nax naga pexĩnüexü̃. Rü ngẽma pexü̃́ chanaxwa̱xexü̃ rü tama naguxcha nax penaxüxü̃”, ñanagürü ga Ngechuchu.
Currently Selected:
Ore i mexü̃ ga Matéu ümatüxü̃ 11: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.