Ore i mexü̃ ga Luca ümatüxü̃ 8
8
Ngexü̃gü ga Ngechuchuxü̃ rüngü̃xẽẽgüxü̃
1Rü yemawena ga Ngechuchu rü Gariréaanearü ĩanegügu nixũãgüchigü. Rü duü̃xü̃gümaxã nüxü̃ nixuchigü ga Tupanaarü ore nax ñuxãcü ãẽ̱xgacü yixĩxü̃ ya Tupana. Rü ínayaxümücügü ga yema 12 ga norü ngúexü̃gü.
2Rü yexgumarüxü̃ ta íiyaxümücügü ga ñuxre ga ngecügü ga ü̃paacü ngo̱xogü ngĩwa ínawoxü̃cü rü ngĩrü da̱xawewa ngĩxü̃ nameexẽẽgücü. Rü yematanüwa iyexma ga María ga Madarénacüã̱xmaxã ngĩxü̃ naxugücü ga ü̃paacü Ngechuchu 7 ga ngo̱xogü ngĩwa ínawoxü̃cü.
3Rü yéma iyexma ta ga Cuána ga Cúchu naxma̱x. Rü Cúchu nixĩ ga ãẽ̱xgacü ga Eródearü ngü̃xẽẽruxü̃. Rü yéma iyexmagü ta ga Chuchána rü mucüma ga náigü ga ngecügü ga ngĩrü diẽrumaxã Ngechuchuxü̃ rüngü̃xẽẽgücü.
Ore ga toecügu ixuxü̃
(Mt. 13.1-9; Mr. 4.1-9)
4Rü muxü̃ma ga yema ĩanegücüã̱x ga duü̃xü̃gü, rü Ngechuchuxü̃tawa ínayadaugü. Rü yexma nangutaque̱xegü ga muxü̃ma ga duü̃xü̃gü. Rü Ngechuchu namaxã nüxü̃ nixu ga ñaa ore ga cua̱xruxü̃, rü ñanagürü nüxü̃:
5—Wüxi ga yatü ga toecü rü triguchiremaxã nanagüane. Rü yexguma triguchiremaxã nagüaneãgu rü ñuxre ga triguchire, rü namagu nayi. Rü duü̃xü̃gü nawa nangagü, rü werigü rü nanawecu.
6Rü náigü ga triguchire rü nutatanügu nayi. Rü yexguma naxügügu ga gumá triguchire, rü nipagü rü nayuemare, yerü nataxuma ga norü waianexü̃.
7Rü náigü ga triguchire rü tuxunecügu nayi. Natürü yexguma nayaegu ga tuxugü rü gumá triguxü̃ inawocu rü nanadai.
8Natürü náigü ga triguchire rü mexü̃ ga waixü̃mügu nayi. Rü yemaca̱x ga yexguma nayaegu rü muxü̃ma ga trigu nawa ínanguxuchi. Rü wüxipü̱xü ga triguwa ínanguxuchi ga 100 pü̱xü ga trigu —ñanagürü. Rü yemawena rü Ngechuchu tagaãcü ñanagürü nüxü̃ ga duü̃xü̃gü: —Rü yíxema ãchi̱xẽgüxe, rü ¡nüxü̃ taxĩnüe i ngẽma ore! —ñanagürü.
Ta̱xacüchiga nixĩ ga yema ore ga cua̱xruü̃gügu ixuxü̃
(Mt. 13.10-17; Mr. 4.10-12)
9Rü yexguma ga norü ngúexü̃gü rü nüxna nacagüe nax ta̱xacüchiga yixĩxü̃ ga yema ore ga toecügu ixuxü̃.
10Rü Ngechuchu ñanagürü nüxü̃: —Tupana nanaxwa̱xe nax pemaxã nüxü̃ chixuxü̃ nax ta̱xacüchiga yixĩxü̃ i ngẽma ore i ẽxü̃guxü̃ i ñuxãcü ãẽ̱xgacü nax yixĩxü̃ i nümax. Natürü ngẽma togü i duü̃xü̃gü rü cua̱xruü̃gügu chayaxuãcüma namaxã nüxü̃ chixu i ore. Rü ngẽxguma woo nüxü̃ nadaugügu rü ñoma tama nüxü̃ nadaugüxü̃rüxü̃ nixĩgü, rü woo nüxü̃ naxĩnüegu rü ñoma tama nüxü̃ naxĩnüexü̃rüxü̃ nixĩgü —ñanagürü.
Ngechuchu rü mea nanango̱xẽxẽ ga yema ore ga toecüchigagu yaxuxü̃
(Mt. 13.18-23; Mr. 4.13-20)
11Rü Ngechuchu rü ñanagürü: —Ngẽma ore i toecüchigagu pemaxã chixuxü̃ rü ñaachiga nixĩ. Rü ngẽma triguchire rü Tupanaarü orechiga nixĩ.
12Rü gumá triguchire ga namagu yixü̃nerüxü̃ nixĩ i duü̃xü̃gü i ngẽma orexü̃ ĩnüexü̃. Natürü Chataná rü ngẽma duü̃xü̃güxü̃ nüxü̃ inayarüngümaexẽxẽ i ngẽma ore, nax tama yaxõgüãxü̃ca̱x rü tama nayauxgüãxü̃ca̱x i maxü̃ i taguma gúxü̃.
13Rü gumá triguchire ga nutatanügu yixü̃ne, rü ngẽma nixĩ i duü̃xü̃gü i nüxü̃ ĩnüexü̃ i Tupanaarü ore rü taãẽãcü nayauxgüxü̃. Natürü tama aixcüma nagu narüxĩnüe i ngẽma ore rü paxaãchi nayaxõgü, rü yixcüra guxchaxü̃ nüxü̃ üpetügu, rü nüxü̃ narüxoe.
14Rü gumá triguchire ga tuxunecügu yixü̃ne, rü ngẽma nixĩ i duü̃xü̃gü i Tupanaarü orexü̃ ĩnüexü̃ rü yaxõgüxü̃. Natürü norü ngẽmaxü̃güca̱x naxoegaãẽgü, rü norü diẽruguama narüxĩnüe rü tama nüxü̃ narüxoechaü̃ i ñoma i naanearü ngúchaü̃gü. Rü ngẽmagagu düxwa taxuxü̃ma Tupanaca̱x naxü.
15Natürü gumá triguchire ga mexü̃ ga waixü̃mügu yixü̃ne, rü ngẽma nixĩ i duü̃xü̃gü i aixcüma taãẽãcü nayauxgüxü̃ i Tupanaarü ore, rü naga ĩnüexü̃, rü mea naxca̱x maxẽxü̃. Rü ngẽma nixĩ i duü̃xü̃gü i aixcüma Tupanawe rüxĩxü̃ rü naxügüxü̃ i ngẽma nüma nanaxwa̱xexü̃.
Cua̱xruxü̃ ga Omügu ixuxü̃
(Mr. 4.21-25)
16Taxúema wüxi i omüwa tanangixichi nax tanatüxpechitaxü̃ca̱x rüe̱xna tümaarü pechicatüü̃gu tayaxǘcuchixü̃ca̱x. Natürü ngóxü̃gu tanaxǘ nax tüxü̃ nabáxixü̃ca̱x ya yíxema ngẽxma chocuxe.
17Rü ngẽxgumarüxü̃ ta guxü̃ma i ta̱xacü i cúãcü üxü̃ rü yixcüra duü̃xü̃gü tá nüxü̃ nacua̱xgü. Rü guxü̃ma i ta̱xacü i ẽxü̃guxü̃ rü yixcüra tá nango̱xoma.
18¡Mea iperüxĩnüe i ñu̱xmax! Erü texé ya nüxü̃ cuáxe rü naga ĩnüxe i ngẽma ore i mexü̃, rü Tupana rü tá yexeraxü̃ i cua̱x tüxna naxã. Natürü yíxema tama naga ĩnüxe i ngẽma ore, rü woo ngẽma cua̱x i nagu tarüxĩnüxü̃ nax tüxü̃́ nangẽxmaxü̃ rü tá tüxna nanayaxu —ñanagürü.
Ngechuchuarü mama rü naenexẽgüchiga
(Mt. 12.46-50; Mr. 3.31-35)
19Rü naé ga Ngechuchu rü naenexẽgü, rü yema Ngechuchu íyexmaxü̃wa tangugü. Natürü taxuacü naxü̃tawaxüchi tangugü, yerü namuxũchi ga duü̃xü̃gü.
20Rü wüxi ga duü̃xü̃ Ngechuchumaxã nüxü̃ nixu, rü ñanagürü: —Yéa düxétüwa tangexma ya cué rü cuenexẽgü, rü cuxü̃ tadaugüchaü̃ —ñanagürü.
21Natürü nüma ga Ngechuchu rü ñanagürü nüxü̃ ga duü̃xü̃gü: —Yíxema nüxü̃ ĩnüexe i Tupanaarü ore rü nagu maxẽxe rü yíxema tixĩ ya chaué rü chauenexẽgü ixĩgüxe —ñanagürü.
Ngechuchu rü buanecüxü̃ rü yuapexü̃ ínayachaxãchixẽxẽ
(Mt. 8.23-27; Mr. 4.35-41)
22Rü wüxi ga ngunexü̃gu ga Ngechuchu rü norü ngúexü̃gümaxã wüxi ga nguegu nichoü̃. Rü ñanagürü nüxü̃: —¡Ngĩxã naxtaxaarü tocutüwa taxĩ! —ñanagürü. Rü inaxĩãchi.
23Rü yexguma yaxãü̃yane rü nipechigü ga Ngechuchu. Rü ngürüãchi yexma nüxü̃ naxü ga wüxi ga tacü ga buanecü. Rü gumá nguewa rü niyauxcuchichigü ga dexá. Rü marü inayangutaü̃güchaü̃.
24Rü yemaca̱x nüma ga norü ngúexü̃gü rü Ngechuchuxü̃ nacagü nax naba̱i̱xãchixü̃ca̱x. Rü ñanagürügü nüxü̃: —Pa Ngúexẽẽruxü̃x, ngẽmama itabaxü̃gü —ñanagürügü. Rü yexguma ga Ngechuchu rü ínarüda, rü buanecüxü̃ rü yuapexü̃ nanga. Rü ínayachaxãchi ga buanecü, rü inayarüxo ga yuape, rü ínachaxanemare.
25Rü yexguma ga Ngechuchu rü ñanagürü nüxü̃ ga norü ngúexü̃gü: —¿Ta̱xacü pexü̃ naxüpetü rü ngẽmaca̱x tama mea peyaxõgüxü̃? —ñanagürü. Natürü ga nümagü rü naba̱i̱xãchiãẽgü. Rü nügüna nicachigü, rü ñanagürügü: —¿Ta̱xacü ẽ̱xna nixĩ i ñaa yatü rü ngẽmaca̱x a̱i̱xrücü ya buanecü rü yuape rü naga naxĩnüexü̃? —ñanagürügü.
Yatü ga Gadáracüã̱x ga ngo̱xogü nawa yexmagüxü̃
(Mt. 8.28-34; Mr. 5.1-20)
26Rü düxwa Gadáraanewa nangugü ga naxtaxaarü tocutüwa ga Gariréaanearü to̱xma̱xtawa yexmaxü̃.
27Rü yexguma marü nguewa ínaxüegu ga Ngechuchu, rü naxca̱x nixũ ga wüxi ga yatü ga gumá ĩanecüã̱x ga mucü ga taunecü ngo̱xogü nawa yexmagücü. Rü guxü̃guma nangexchiruecha. Rü tama wüxi ya ĩpatawa nayexma, rü duü̃xẽchíque̱xetanügu nayarüxauxchigünexü̃.
28Rü yexguma Ngechuchuxü̃ nada̱u̱xgu, rü nape̱xegu nayacaxã́pü̱xü. Rü aita naxüãcüma ñanagürü: —¿Tü̱xcüü̃ nua choxü̃ cuyachixewe, Pa Ngechuchux, Pa Tupana ya Guxü̃étüwa Ngẽxmacü Nanex? Rü cuxü̃ chaca̱a̱xü̃ nax tama ngúxü̃ choxü̃ quingexẽxẽxü̃ —ñanagürü.
29Rü yema ñanagürü yerü Ngechuchu marü nanamu ga yema ngo̱xogü nax ínachoxü̃xü̃ca̱x. Rü muẽ̱xpü̱xcüna rü gumá yatüxü̃ naxãũãẽxẽẽxü̃ ga yema ngo̱xogü. Rü duü̃xü̃gü rü cadénamaxã nayana̱i̱xchacüügüxü̃ rü nayana̱i̱xparagüxü̃ nax taxuwama naxũxü̃ca̱x. Natürü nüma rü nagu nacaugüama ga cadénagü. Rü yema ngo̱xogü rü chianexü̃wa ga taxúema íxãpataxü̃wa nanagagü.
30Rü Ngechuchu nüxna naca rü ñanagürü: —¿Ta̱xacü nixĩ i cuéga? —ñanagürü. Rü nüma rü Ngechuchuxü̃ nangãxü̃, rü ñanagürü: —Muxũchixü̃ nixĩ i chauéga —ñanagürü. Rü yema ñanagürü yerü namuxũchi ga yema ngo̱xogü ga gumá yatügu chocuxü̃.
31Rü yema ngo̱xogü rü Ngechuchuna nacagü ga tama ngẽma ãxmaxü̃ i taguma iyacuáxü̃gu nax nawocuãxü̃ca̱x.
32Rü guma ma̱xpǘnearü tuãchiwa nayexmagü ga muxü̃ma ga cuchigü ga yéma chibüexü̃. Rü yemaca̱x ga yema ngo̱xogü rü Ngechuchuxü̃ naca̱a̱xü̃gü nax yema cuchigügu nayachocuxü̃ca̱x. Rü Ngechuchu rü: —Ngü̃ —ñanagürü.
33Rü yexguma ga yema ngo̱xogü rü gumá yatüwa ínachoxü̃ rü yema cuchigügu nayachocu. Rü guxü̃ma ga yema cuchigü rü inaxü̃ãchi, rü naxtaxacutüarü ma̱xpǘxü̃wa nayarüyuxgü, rü yexma nayi.
34Rü yexguma yema cuchigüarü dauruü̃gü nüxü̃ daugügu ga yema ngupetüxü̃, rü naba̱i̱xãchiãẽgü rü ínibuxmü. Rü ĩanewa nüxü̃ nayarüxugüe, rü yema ĩanearü ngaicamana ipeagüxü̃ ga duü̃xü̃gütanüwa rü ta nüxü̃ nixugügü.
35Rü ga duü̃xü̃gü rü ínayadaugü ga yema ngupetüxü̃. Rü yexguma Ngechuchuxü̃tawa nangugügu, rü yéma nüxü̃ nadaugü ga gumá yatü ga ngo̱xoã̱xchirécü. Rü Ngechuchucutüxü̃tawa narüto, rü marü tama naxãũãẽ. Rü namuü̃e ga duü̃xü̃gü.
36Rü yema duü̃xü̃gü ga nüxü̃ daugüxü̃ ga yema ngupetüxü̃, rü yema togümaxã nüxü̃ nixugügü nax ñuxãcü Ngechuchu namexẽẽxü̃ ga gumá yatü ga ngo̱xoã̱xchirécü.
37Rü yexguma yemaxü̃ naxĩnüegu, rü guxü̃ma ga yema Gadáraanecüã̱x ga duü̃xü̃gü, rü Ngechuchuxü̃ naca̱a̱xü̃gü nax ínaxũxũxü̃ca̱x ga yema naanewa, yerü poraãcü namuü̃e. Rü yemaca̱x ga Ngechuchu rü nguegu nixüe, rü inaxũãchi.
38Rü gumá yatü ga ngo̱xoã̱xchirécü rü Ngechuchuxü̃ naca̱a̱xü̃ nax nawe naxũxü̃ca̱x. Natürü ga Ngechuchu rü nanamu ga yexma nax naxã́ũxü̃ca̱x, rü ñanagürü nüxü̃:
39—¡Cuchiü̃wa naxũ, rü duü̃xü̃gümaxã nüxü̃ yarüxu ga ta̱xacü cuxca̱x nax naxüxü̃ ga Tupana! —ñanagürü. Rü ínixũ ga gumá yatü, rü guxü̃ma ga yema ĩanecüã̱x ga duü̃xü̃gümaxã nüxü̃ nayarüxu ga yema Ngechuchu naxca̱x üxü̃.
Yáiruxacüchiga rü yema nge ga Ngechuchuchirugu ingógücüchiga
(Mt. 9.18-26; Mr. 5.21-43)
40Rü yexguma Ngechuchu wenaxarü taegugu ga naxtaxaarü tocutüwa, rü duü̃xü̃gü rü taãẽãcüma nanayauxgü, yerü guxü̃ma ínanangu̱xẽẽgü.
41Rü yéma Ngechuchuxü̃tawa nangu ga wüxi ga yatü ga Yáiru ga naéga. Rü nüma ga Yáiru rü ngutaque̱xepataü̃arü ãẽ̱xgacü nixĩ. Rü Ngechuchupe̱xegu nayacaxã́pü̱xü rü nüxü̃ naca̱a̱xü̃ nax napatawa naxũxü̃ca̱x.
42Yerü nüxü̃́ iyexma ga wüxitama ga naxacü, rü iyada̱xawe, rü ituraxüchi. Rü ngĩma rü 12 ga taunecü ngĩxü̃́ nayexma. Rü yexguma Yáirupatawa naxũxgu ga Ngechuchu, rü muxũchixü̃ ga duü̃xü̃gü nawe narüxĩ, rü ínayaxũxtügü.
43Rü yema duü̃xü̃gütanüwa iyexma ga wüxi ga ngecü ga 12 ga taunecü ãgüechacü. Rü yemamaxã iyada̱xaweecha. Rü dutúrugüxü̃tagu ngĩxü̃ igu̱xẽxẽ ga guxcü ga ngĩrü diẽru, natürü taxuxü̃ma ngĩxca̱x nayataanexẽxẽ.
44Rü yema ngecü rü Ngechuchuweama ne ĩxü̃, rü naxpechinüchirugu iyangõgü. Rü yexgumatama ínayachaxãchi ga nax naxãgüxü̃.
45Rü yexguma ga Ngechuchu rü duü̃xü̃güna naca, rü ñanagürü: —¿Texé tixĩ ya choxü̃ ingõgüxe? —ñanagürü. Rü guxü̃ma ga duü̃xü̃gü rü: —Taxúema —ñanagürügü. Rü yexguma ga Pedru rü namücügü rü ñanagürügü: —Pa Ngúexẽẽruxü̃x, cuma nüxü̃ cudau i ñuxre i duü̃xü̃gü ngéma cuxü̃ nax nayaxũxtügüxü̃, rü ngẽxguma rü ta: “¿Texé ya choxü̃ ingõgüxe?” ñacuxü̃ —ñanagürügü.
46Natürü ga Ngechuchu rü ñanagürü: —Ngẽmáacü wüxíe choxü̃ tingõgü, erü nüxü̃ chicua̱xãchi nax chowa ínaxũxũxü̃ i pora —ñanagürü.
47Rü yexguma nango̱xomagu nax nüxü̃ nacua̱xamaxü̃ ga Ngechuchu ga yema nüxü̃ nax yangõgüxü̃, rü yadu̱xruxãcüma naxü̃tawa ixũ ga yema ngecü. Rü nape̱xegu iyacaxã́pü̱xü. Rü guxü̃ ga duü̃xü̃güpe̱xewa namaxã nüxü̃ iyaxu ga ta̱xacüca̱x nüxü̃ nax yangõgüxü̃, rü yexgumatama ngĩxca̱x nax yataanexü̃.
48Rü yexguma ga Ngechuchu rü ñanagürü ngĩxü̃: —Pa Chauxacüx, cuxca̱x nitaane, erü cuyaxõ. ¡Rü taãẽãcü íixũ! —ñanagürü.
49Rü yexguma íyadexayane ga Ngechuchu, rü yéma nangu ga wüxi ga duü̃xü̃ ga yema ngutaque̱xepataü̃arü ãẽ̱xgacümaxã nüxü̃ yarüxuxü̃, rü ñanagürü: —Cuxacü rü marü iyu. ¡Rü taxṹ i cuyachixewechigüxü̃ ya Ngúexẽẽruxü̃! —ñanagürü.
50Natürü yexguma yema orexü̃ naxĩnügu ga Ngechuchu, rü ñanagürü Yáiruxü̃: —¡Taxṹ i cuxoegaãẽxü̃! ¡Rü yaxõmare! Rü cuxacü rü tá ngĩxca̱x nitaane —ñanagürü.
51Rü yexguma Yáirupatawa nangugügu, rü Ngechuchu nayachocuxẽxẽ ga Pedru rü Chantiágu rü Cuáü̃ rü ngĩnatü rü ngĩé ga yema bucü ga yuxcü. Natürü tama nanaxwa̱xe nax togü yexma chocuxü̃.
52Rü guxü̃ma ga duü̃xü̃gü ga yéma yexmagüxü̃ rü naxauxe rü ngĩxca̱x nangechaü̃gü. Natürü Ngechuchu rü ñanagürü nüxü̃: —¡Taxṹ i pexauxexü̃! Erü ngẽma bucü rü tama nixĩ i nayuxü̃. Rü ipemare —ñanagürü.
53Natürü ga yema duü̃xü̃gü rü Ngechuchuxü̃ nacugüeama, yerü ngĩxü̃ nadaugü nax aixcüma marü nayuxü̃.
54Rü yexguma ga Ngechuchu rü ngĩxme̱xgu nayayauxãchi, rü tagaãcü ñanagürü: —Pa Bucüx, ¡írüda! —ñanagürü.
55Rü yexguma ga ngĩma rü wena imaxü̃, rü yexgumatama íirüda. Rü Ngechuchu nanamu nax ngĩxü̃ naxüwemügüxü̃ca̱x.
56Rü ngĩnatü rü ngĩé ga yema bucü, rü poraãcü taba̱i̱xãchiãẽgü. Natürü Ngechuchu rü tüxü̃ namu nax taxúemaxã nüxü̃ nax tixuxü̃ca̱x ga yema ngupetüxü̃.
Currently Selected:
Ore i mexü̃ ga Luca ümatüxü̃ 8: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.