Ore i mexü̃ ga Luca ümatüxü̃ 5
5
Muxü̃ma ga choxni nax ínayauxü̃xü̃chiga
(Mt. 4.18-22; Mr. 1.16-20)
1Rü wüxicana ga yexguma naxtaxa ga Guenecharéxanacüwa nayexmagu ga Ngechuchu, rü muxü̃ma ga duü̃xü̃gü rü naxü̃tawa nangugü. Rü düxwa yéma nayaxãũxtügü, yerü nüxü̃ naxĩnüechaü̃ ga Tupanaarü ore.
2Rü Ngechuchu yéma nüxü̃ nadau ga taxre ga ngue ga ingeãcune. Rü gumá nguegü rü naxnecüpechinüwa nanadagü, yerü ga püchaetanüxü̃ rü nüxna yéma ínachoü̃, yerü norü pücha niyauxgü.
3Rü Chimóü̃arü nguegu nixüe ga Ngechuchu. Rü namaxã nüxü̃ nixu nax naxpechinüarü ngãxü̃tüwaxüra nangeaxü̃ca̱x. Rü gumá nguewa narüto ga Ngechuchu. Rü yéma inanaxügü ga duü̃xü̃güxü̃ nax nangúexẽẽxü̃.
4Rü yexguma yagúegagu ga Ngechuchu nax yadexaxü̃, rü Chimóü̃xü̃ ñanagürü: —¡Yea ínamatamaxü̃wa namaxã naxã ya daa ngue. Rü ngéma penatáe i perü pücha nax choxnita piyauxgüxü̃ca̱x! —ñanagürü.
5Rü Chimóü̃ nanangãxü̃, rü ñanagürü nüxü̃: —Pa Ngúexẽxẽruxü̃, ngewa̱x rü guxü̃ i chütaxü̃ rü tapüchae, natürü taxuxü̃ma i choxni tiyaxu. Natürü ñu̱xma nax choxü̃ cumuxü̃ rü wena táxarü íchanatáe i chorü pücha —ñanagürü.
6Rü yexguma ínatáegüãgu ga norü pücha, rü muxü̃ma ga choxni ínayauxü̃. Rü düxwa narügáuxchaü̃ ga norü pücha yerü namuxũchi ga choxni.
7Rü naxme̱xmaxã nai ga nguewa yexmagüxü̃ ga natanüxü̃ca̱x nacagü nax nüxü̃ yanangü̃xẽẽgüxü̃ca̱x. Rü yéma naxĩ ga yema natanüxü̃ ga naxca̱x nacagüxü̃. Rü nanaxüãcugü ga gumá taxre ga ngue rü wixgutaa̱x inangutaü̃gü yerü namuxũchi ga choxni.
8Rü yexguma yemaxü̃ nada̱u̱xgu ga Chimóü̃ ga Pedru, rü Ngechuchupe̱xegu nayacaxã́pü̱xü, rü ñanagürü nüxü̃: —¡Choxna ixũgachi! Pa Corix. Erü choma rü wüxi i duü̃xü̃ i pecaduã́xü̃ chixĩ —ñanagürü.
9Rü yema ñanagürü ga Chimóü̃ yerü nüma rü guxü̃ma ga natanüxü̃ rü namaxã naba̱i̱xãchiãẽgü ga yema muxü̃ma ga choxni nax ínayauxü̃xü̃.
10Rü naba̱i̱xãchiãẽgü ta ga Chimóü̃mücügü ga Chantiágu rü Cuáü̃ ga Chebedéu nanegü. Natürü Ngechuchu rü Chimóü̃xü̃ ñanagürü: —¡Taxṹ i cumuü̃xü̃! Erü ñu̱xmacürüwa rü tá chauxü̃tawa cunagagü i duü̃xü̃gü —ñanagürü.
11Rü yexguma naxãnacüwa namaxã nangugügu ga naweü̃gü, rü yéma nanawogü ga norü guxü̃ma rü Ngechuchuwe narüxĩ.
Ngechuchu rü wüxi ga rüchaxünexü̃ca̱x nayataanexẽxẽ
(Mt. 8.1-4; Mr. 1.40-45)
12Rü yexguma wüxi ga yéma yexmagüne ga ĩanewa nayexmagu ga Ngechuchu, rü yéma naxü̃tawa nangu ga wüxi ga yatü ga chaxünemaxã ida̱xawexü̃. Rü yexguma Ngechuchuxü̃ nada̱u̱xgu rü nape̱xegu nayacaxã́pü̱xü rü yexma nanangücuchi. Rü Ngechuchuxü̃ naca̱a̱xü̃, rü ñanagürü: —Pa Corix, ngẽxguma cuma cunaxwa̱xegu, rü cuxü̃́ natauxcha nax choxü̃ curümexẽẽxü̃ nawa i chorü da̱xawe —ñanagürü.
13Rü yexguma ga Ngechuchu rü nüxü̃ ningõgü, rü ñanagürü nüxü̃: —Ngü̃, chanaxwa̱xe. ¡Rüme! —ñanagürü. Rü yexguma yema ñaxgu ga Ngechuchu, rü naxca̱x nitaane ga yema yatü ga chaxüneã́xü̃.
14Rü Ngechuchu nanaxucu̱xẽ rü ñanagürü nüxü̃: —¡Dücax, taxúematama nüxü̃ quixu, natürü chacherdótexü̃ cugü yadauxẽxẽ nax curümexü̃! ¡Rü yanguxẽxẽ i ngẽma Moiché nüxü̃ ixuxü̃ nax duü̃xü̃gü nüxü̃ cuáxü̃ca̱x nax marü curümexü̃ nawa i curü da̱xawe! —ñanagürü.
15Natürü ga Ngechuchuchiga rü guxü̃wama ninguchigüama. Rü muxü̃ma ga duü̃xü̃gü rü naxca̱x naxĩtaque̱xegü nax norü orexü̃ naxĩnüexü̃ca̱x, rü naxca̱x nax yataanexẽẽãxü̃ca̱x ga norü da̱xawegüwa.
16Natürü Ngechuchu rü ñuxguacü rü taxúema íxãpataxü̃wa naxũũxü̃. Rü yéma nayayumüxẽxü̃.
Ngechuchu rü wüxi ga yatü ga nawãĩxãchicüca̱x nayataanexẽxẽ
(Mt. 9.1-8; Mr. 2.1-12)
17Rü wüxi ga ngunexü̃ Ngechuchu íngu̱xẽẽtaeyane, rü yéma narütogü ga ñuxre ga Parichéugü rü ñuxre ga ngúexẽẽruü̃gü ga Moichéarü mugümaxã ngu̱xẽẽtaegüxü̃ ga guxü̃ ga Gariréaanearü ĩanexacügüwa ne ĩxü̃, rü Yudéaanewa ne ĩxü̃, rü Yerucharéü̃wa ne ĩxü̃. Rü Tupana rü poraãcü Ngechuchuwa inanawe̱x ga norü pora rü muxü̃ma ga ida̱xaweexü̃ narümeexẽxẽ.
18Rü Ngechuchuxü̃tawa nangugü ga ñuxre ga yatügü, rü naxca̱x yéma nanangetaü̃gü ga wüxi ga yatü ga nawãĩxãchicü. Rü ĩpatagu nanangecuchitaxü̃güchaü̃ nax Ngechuchupe̱xegu yaxütaü̃güãxü̃ca̱x.
19Natürü taxuacüma yexma nanangecuchitaxü̃gü, yerü namuxũchi ga duü̃xü̃gü. Rü yemaca̱x ĩétügu naxĩgü. Rü meama Ngechuchu íyexmaxü̃étüwa ínanapogüãü̃gü ga gumá ĩpata. Rü yéma duü̃xü̃gütanüwa Ngechuchupe̱xewa ínanachü̱xüxüetaü̃gü ga gumá nawãĩxãchicü.
20Rü yexguma Ngechuchu nüxü̃ da̱u̱xgu nax aixcüma nüxü̃́ yaxõgüãxü̃ ga yema yatügü ga nawãĩxãchicüxü̃ yéma rüchü̱xüxüetaü̃güxü̃, rü ñanagürü gumá nawãĩxãchicüxü̃: —Pa Yatüx, marü cuxü̃́ nüxü̃ charüngüma i curü pecadugü —ñanagürü.
21Natürü yema ngúexẽẽruü̃gü ga Moichéarü mugümaxã ngu̱xẽẽtaegüxü̃ rü yema Parichéugü, rü nagu narüxĩnüe, rü nügüãẽwa ñanagürügü: —¿Ta̱xacü nixĩ i ñaa yatü rü ngẽmaca̱x Tupanape̱xewa chixexü̃ yaxugüxü̃? Erü taxúema pora tüxü̃́ nangẽxma nax duü̃xü̃güaxü̃́ pecaduxü̃ tangechaü̃xü̃. Rü Tupanaxicatama nixĩ ya nüxü̃́ nangẽxmacü i ngẽma pora —ñanagürügü naãxẽwa.
22Natürü ga Ngechuchu rü nüxü̃ nacua̱xama ga ta̱xacügu nax naxĩnüexü̃. Rü yemaca̱x ñanagürü nüxü̃: —¿Tü̱xcüü̃ ngẽmagu perüxĩnüe i pemax?
23¿Ta̱xacü nixĩ irütauxchamaexü̃ nax namaxã nüxü̃ ixuxü̃ ya daa yatü ya nawãĩxãchicü: “Curü pecadugü rü marü cuxü̃́ nüxü̃ charüngüma”, rü ẽ̱xna: “¡Inachi rü íixũ!” ñagüxü̃ nüxü̃?
24Natürü ñu̱xma rü tá pexü̃ nüxü̃ chacua̱xẽxẽ nax Tupana Nane ya duü̃xü̃xü̃ ixĩcü rü ñoma i naanewa nüxü̃́ nangẽxma i pora nax duü̃xü̃güaxü̃́ nüxü̃ narüngü̃maxü̃ca̱x i norü pecadugü —ñanagürü. Rü yexguma yema ñaxguwena rü gumá nawãĩxãchicüxü̃ ñanagürü: —Cumaxã nüxü̃ chixu rü ¡inachi, rü nayaxu i curü caruxü̃, rü cupatawa naxũ! —ñanagürü.
25Rü yexgumatama guxü̃ ga duü̃xü̃güpe̱xewa inachi ga gumá nawãĩxãchicü. Rü nanayaxu ga norü caruxü̃ ga nagu nacaxü̃. Rü Tupanaxü̃ yacua̱xüü̃ãcüma napatawa naxũ.
26Rü guxü̃ma ga duü̃xü̃gü rü naba̱i̱xãchiãẽgü. Rü Tupanaxü̃ nicua̱xüü̃gü. Rü poraãcü namuü̃eãcüma ñanagürügü: —Ñu̱xma rü aixcüma nüxü̃ tadaugü i mexẽchixü̃gü i Tupanaarü poramaxã naxügüxü̃ —ñanagürügü.
Lebíca̱x naca ga Ngechuchu
(Mt. 9.9-13; Mr. 2.13-17)
27Rü yemawena ga Ngechuchu rü ínaxũxũ ga gumá ĩwa. Rü wüxi ga yatü ga Rómaarü ãẽ̱xgacüca̱x diẽru ngĩxü̃ ideexü̃xü̃tawa naxüpetü. Rü gumá yatü rü Lebí nixĩ ga naéga. Rü yéma diẽru ngĩxü̃ ínadexü̃wa narüto. Rü Ngechuchu rü ñanagürü nüxü̃: —¡Chowe rüxũ! —ñanagürü.
28Rü inachi ga Lebí, rü yéma nanata̱x ga guxü̃ma, rü Ngechuchuwe narüxũ.
29Rü yixcama ga Lebí rü napatawa Ngechuchuca̱x nanaxü ga wüxi ga taxü̃ ga õna. Rü muxü̃ma ga yatügü ga Lebírüxü̃ diẽruarü degüwa puracüexü̃, rü muxü̃ma ga togü ga duü̃xü̃gü rü ta yéma mechawa narütogü.
30Natürü ga yema Parichéugü rü yema ngúexẽẽruü̃gü ga Moichéarü mugümaxã ngu̱xẽẽtaegüxü̃, rü Ngechuchuarü ngúexü̃güxü̃ nixugü. Rü nüxna nacagü rü ñanagürügü: —¿Tü̱xcüü̃ namaxã pechibüe rü namaxã pexaxegü i ngẽma yatügü i Rómaarü ãẽ̱xgacüca̱x diẽru ngĩxü̃ dexü̃ rü ngẽma pecaduã̱xgüxü̃? —ñanagürügü.
31Rü Ngechuchu nanangãxü̃, rü ñanagürü nüxü̃: —Ngẽma tama ida̱xaweexü̃ rü taxuca̱xma dutúru nanaxwa̱xegü, natürü ngẽma ida̱xaweexü̃ nixĩ i dutúru naxwa̱xegüxü̃.
32Choma rü tama duü̃xü̃gü i mexü̃gu maxẽxü̃ca̱x nixĩ i núma chaxũxü̃, natürü ngẽma pecaduã̱xgüxü̃ca̱x nixĩ i núma chaxũxü̃ nax ngẽmaãcü nüxü̃ naxoexü̃ca̱x i nacümagü i chixexü̃ rü Tupanawe naxĩxü̃ca̱x —ñanagürü.
Ngechuchuna nacagüe ga aurechiga
(Mt. 9.14-17; Mr. 2.18-22)
33Rü nümaxü̃ ga duü̃xü̃gü rü Ngechuchuna nacagüe, rü ñanagürügü: —Cuáü̃ ya baiü̃xẽẽruü̃arü ngúexü̃gü rü Parichéugüarü ngúexü̃gü rü muẽ̱xpü̱xcüna Tupanaca̱x naxauree rü nayumüxẽgü. Natürü i curü ngúexü̃gü, rü tama naxauree. Rü nachibüe rü naxaxegümare —ñanagürügü.
34Natürü ga Ngechuchu rü nanangãxü̃, rü ñanagürü: —¿Ẽ̱xna wüxi i ngĩgüarü petawa rü pexca̱x namexü̃ nax penaxaurexẽẽxü̃ i ngẽma nüxna naxugüxü̃ ega natanüwa nangẽxmagu i ngẽma yatü i ngexwacax ãmaxü̃?
35Natürü wüxi i ngunexü̃ rü ngẽma yatü i ngexwaca ãmaxü̃, rü tá namücügüna nayagagü. Rü ngẽma ngunexü̃gu tá nixĩ i aixcüma naxaureexü̃ i namücügü —ñanagürü.
36Rü yexguma ga Ngechuchu rü namaxã nüxü̃ nixu ga wüxi ga ore, rü ñanagürü: —Taxúema wüxi i ngexwaca̱xü̃xü̃ i naxchiru tiyo nax namaxã tanapaitaxü̃ca̱x i wüxi i naxchiru i marü nga̱xauxü̃. Erü ngẽxguma ngẽmaãcü tanaxü̱xgu rü tanachixexẽxẽ i ngẽma naxchiru i ngexwaca̱xü̃xü̃. Rü ñu̱xũchi ngẽma natüchi i ngexwaca̱xü̃xü̃ rü tama nüxü̃ nayatãũxü̃ i ngẽma naxchiru i marü nga̱xauxü̃.
37Rü ngẽxgumarüxü̃ ta rü taxúema ngexwaca̱xü̃cü ya bínu rü nagu tayabacuchi i wüxi i naxchixü̃ i marü nga̱xauxü̃ i naxcha̱xmünaxca̱x. Erü ngẽxguma ngẽmaãcü naxü̱xgu rü yimá bínu ya ngexwaca̱xü̃cü rü tá narüngu, rü tá nayawã̱ĩ̱xẽxẽ i ngẽma naxchixü̃ i nga̱xauxü̃ i naxcha̱xmünaxca̱x. Rü ngẽxma tá nayarütaxu ya bínu rü ngẽma naxchixü̃ rü ta.
38Rü ngẽmaca̱x tanaxwa̱xe nax yimá ngexwacaxü̃cü ya bínu rü ngexwaca̱xü̃xü̃ i naxchixü̃ i naxcha̱xmünaxca̱xgu yabacuchixü̃. Rü ngẽmaãcü rü taxuxü̃táma inayarütaxu.
39Rü yíxema tümamaxã yaxǘxe nax taunecüã́cü ya bínu tayaxaxüxü̃ rü tama tüxü̃́ nangúchaü̃ ya yimá bínu ya ngexwacaxü̃cü ya maixcuracü. Erü ñanagürü: “yimá bínu ya taunecüã́cü nixĩ i yexera rüchi̱xmaecü” —ñanagürü.
Currently Selected:
Ore i mexü̃ ga Luca ümatüxü̃ 5: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.