Ore i mexü̃ ga Luca ümatüxü̃ 13
13
Yíxema tama nüxü̃ rüxoxe i tümacüma i chixexü̃ rü itarütaxu
1Rü yexgumaxü̃cüü rü Ngechuchuxü̃tawa nangugü ga ñuxre ga duü̃xü̃gü. Rü Ngechuchumaxã nüxü̃ nixugü nax ãẽ̱xgacü ga Pirátu rü norü churaragüxü̃ namuxü̃ nax nadaiaxü̃ca̱x ga ñuxre ga Gariréaanecüã̱x ga yatügü ga yexguma norü carnérugü Tupanaca̱x nadaixgu ga napatawa.
2Rü Ngechuchu nüxna naca rü ñanagürü nüxü̃: —¿Pema nagu perüxĩnüegu rü yemaacü nüxü̃ nangupetü ga yema yatügü, yerü yema togü ga Gariréaanecüã̱xarü yexera nipecaduã̱xgü?
3Pemaxã nüxü̃ chixu rü tama nixĩ. Rü ngẽxguma chi pema rü tama nüxü̃ perüxoegu i pecüma i chixexü̃, rü guxãma i pema rü tá ipeyarütauxe.
4¿Rü ẽ̱xna pema nagu perüxĩnüegu rü guxü̃ ga Yerucharéü̃cüã̱xarü yexera nipecaduã̱xgü ga yema 18 ga yatügü ga yuexü̃ ga yexguma Chiloéwa yexmaxü̃ ga dauxü̃taechica namaxã iwa̱xgu?
5Pemaxã nüxü̃ chixu rü tama nixĩ. Rü ngẽxguma chi pema rü tama nüxü̃ perüxoegu i pecüma i chixexü̃, rü guxãma i pema rü tá ipeyarütauxe —ñanagürü ga Ngechuchu.
Ore ga nanetü ga igu ga ngearü õṍxü̃gu ixuxü̃
6Rü nüma ga Ngechuchu rü nüxü̃ nixu ga wüxi ga ore ga igugü ixuxü̃, rü ñanagürü: —Rü wüxi ga yatü nüxü̃́ nayexma ga wüxi ga úbanecü. Rü yexma nanato ga wüxi ga igu. Rü nüma ga gumá yatü rü ínayadauuxü̃ ga yema igu rü naxõõ̱x, natürü taxuxü̃ma ga norü oxü̃ inayangau.
7Rü yemaca̱x yema norü duü̃xü̃ ga norü naanena dauxü̃xü̃ ñanagürü: “Dücax, tomaepü̱x ya taunecü guxü̃guma íchayadauxü̃ i ñaa igu, rü taguma naxo. Rü ngẽmaca̱x chanaxwa̱xe nax cuyadaxüchixü̃ nax tama natüca̱xma nua naanewa naxĩaneã̱xü̃ca̱x”, ñanagürü nüxü̃.
8Natürü ga yema norü duü̃xü̃ ga norü naanena dauxü̃, rü norü corixü̃ nangãxü̃, rü ñanagürü: “Pa Corix, ¡nüetama doma taunecüxicatama nangexma̱x! Rü tá chanaxaimüanepǘne rü waxmüanexü̃maxã tá chanagüpüne.
9Rü bexmana ngẽxguma ngẽma chaxüxgu rü tá naxo. Natürü ngẽxguma taxũtáma naxo̱xgu rü tá chayadaxüchi” —ñanagürü.
Ngechuchu rü ngü̃xchigaarü ngunexü̃gu ngĩxca̱x nayataanexẽxẽ ga wüxi ga ngecü ga püca̱xwecü
10Rü wüxi ga ngü̃xchigaarü ngunexü̃gu rü Ngechuchu nangu̱xẽẽtae ga wüxi ga ngutaque̱xepataü̃wa.
11Rü yéma iyexma ga wüxi ga ngecü ga 18 ga taunecü ida̱xawecü. Rü ipüca̱xwe yerü wüxi ga ngo̱xo ngĩxü̃ napüca̱xwexẽxẽ, rü taxuacüma iyarüwe̱xãchi.
12Rü yexguma Ngechuchu ngĩxü̃ da̱u̱xgu rü ngĩxca̱x naca, rü ñanagürü ngĩxü̃: —Pa Ngecüx, ñu̱xma rü marü cuxca̱x nitaane i curü da̱xawewa —ñanagürü.
13Rü yexguma rü ngĩxü̃ ningõgü, rü yexgumatama iyarüwe̱xãchiwemüxü̃, rü inaxügü nax Tupanaxü̃ yacua̱xüxü̃xü̃.
14Natürü yema ngutaque̱xepataü̃arü ãẽ̱xgacü rü nanu, yerü Ngechuchu rü ngü̃xchigaarü ngunexü̃gu ngĩxü̃ narümexẽxẽ ga yema nge. Rü yemaca̱x ga yema ãẽ̱xgacü rü ñanagürü duü̃xü̃güxü̃: —Nangexma i 6 i ngunexü̃ i nagu namexü̃ nax ipuracüexü̃. Rü ngẽma ngunexü̃gügu nixĩ i namexü̃ nax nua pexĩxü̃ nax pegü peyarümexẽẽgüxü̃ca̱x rü tama i ngü̃xchigaarü ngunexü̃gu —ñanagürü.
15Rü yexguma ga Cori ga Ngechuchu rü nanangãxü̃, rü ñanagürü: —Pa Duü̃xü̃güx i Mea Maxẽnetaxü̃x, ¿Tama ẽ̱xna guxã i pema rü ngü̃xchigaarü ngunexü̃gu peyawẽxü̃ i perü woca rü ẽ̱xna perü búru nax peyaxaxexẽxẽxü̃ca̱x?
16Rü ñaa ngecü i Abraáü̃tanüxü̃ iyicü, rü Chataná rü 18 ya taunecü ngĩxü̃ ninai namaxã i ñaa da̱xawe. ¿Rü taux ẽ̱xna i namexü̃ i ngü̃xchigaarü ngunexü̃gu nax nawa ngĩxü̃ íchanguxuchixẽẽxü̃ i ngĩrü da̱xawe? —ñanagürü.
17Rü yexguma yema ñaxgu ga Ngechuchu, rü guxü̃ma ga norü uanügü rü poraãcü naxãnee. Natürü guxü̃ma ga togü ga duü̃xü̃gü rü nataãẽgü ga yexguma nüxü̃ nadaugügu ga yema mexü̃gü ga Ngechuchu üxü̃.
Ore i motachachiregu ixuxü̃
(Mt. 13.31-32; Mr. 4.30-32)
18Rü ñanagürü ga Ngechuchu: —¿Ñuxãcü nixĩ i ãẽ̱xgacü nax yixĩxü̃ ya Tupana, rü nañuxraü̃xü̃ i nüma ãẽ̱xgacü íyixĩxü̃wa? ¿Rü ta̱xacügu tá chanangu?
19Wüxi ya motachachire ya wüxi ya yatü naanegu toxü̃nerüxü̃ nixĩ. Rü woo naxíraxüchichire̱x ya naxchire natürü ngẽxguma naxüxgu rü naya̱xgu rü wüxi i nanetü i taetaxü̃ nixĩ. Rü ngẽmaca̱x i werigü rü natanügu nixüachiãü̃ —ñanagürü.
Ore i paũarü pu̱xẽẽruü̃gu ixuxü̃
(Mt. 13.33)
20Rü ñanagürü ta ga Ngechuchu: —¿Ñuxãcü nixĩ ya Tupana ãẽ̱xgacü íyixĩxü̃wa? ¿Rü ta̱xacügu tá chanangu?
21Rü ñoma paũarü pu̱xẽẽruü̃rüxü̃ nixĩ. Rü wüxi i ngecü rü íraxü̃tama i paũarü pu̱xẽẽruü̃maxã inaxüéü̃ i taxü̃ i ngĩrü paũchara. Rü ngẽma paũarü pu̱xẽẽruxü̃ rü woo naxíra rü nayapuxẽxẽ i guxü̃ma i ngĩrü paũchara —ñanagürü ga Ngechuchu.
Ĩã̱x i íraxü̃chiga
(Mt. 7.13-14, 21-23)
22Rü yexguma Yerucharéü̃wa naxũxgu ga Ngechuchu rü gumá namawa yexmagüxü̃ ga ĩanegüwa rü ĩanexacügüwa rü duü̃xü̃güxü̃ ningu̱xexẽẽtaechigü.
23Rü wüxi ga duü̃xü̃ nüxna naca rü ñanagürü: —Pa Corix ¿ẽ̱xna noxretátama nixĩ i ngẽma nayauxgüxü̃ i maxü̃ i taguma gúxü̃? —ñanagürü. Rü nüma ga Ngechuchu nanangãxü̃, rü ñanagürü:
24—Dauxü̃guxü̃ i naanearü ĩã̱x rü naxíraxüchi. ¡Rü paxa naxca̱x pedau nax nawa pichocuxü̃ca̱x! Erü pemaxã nüxü̃ chixu rü muxũchixü̃ma i duü̃xü̃gü tá nüxü̃́ nangúchaü̃ nax nawa yachocuxü̃, natürü taxũtáma nawa nangu nax nawa yachocuxü̃.
25Erü ngẽxguma ngẽma ĩarü yora írüdaxgu nax yanawãxtaü̃xü̃ca̱x i ĩã̱x, rü pema i düxétüwa ngẽxmagüxe rü tá nüxna pecagü nax pexca̱x yanawãxnaü̃xü̃ca̱x i ĩã̱x. Rü ñaperügügü tá: “Pa Corix, ¡paxa toxca̱x yawãxna i ĩã̱x!” ñaperügügü tá. Natürü nüma i cori rü tá pexü̃ nangãxü̃, rü ñanagürü tá: “Tama pexü̃ chacua̱x nax Nge̱xtácüã̱x pixĩgüxü̃”, ñanagürü tá pexü̃.
26Rü ngẽxguma rü tá ñaperügügü nüxü̃: “Cumaxãchire̱x wüxiwa tachibüe rü taxaxegü. Rü toxü̃ cungúexẽxẽ ga torü ĩanearü namagüwa”, ñaperügügü tá.
27Natürü nüma rü tá pexü̃ nangãxü̃ rü ñanagürü tá: “Marü pemaxã nüxü̃ chixu rü tama pexü̃ chacua̱x nax ngextácüã̱xgü pixĩgüxü̃. ¡Rü ípixĩ i nua chauxü̃tawa i guxãma i pemax, Pa Chixexü̃gu Maxẽxü̃x!” ñanagürü tá.
28Rü ngéma tá pexauxe, rü tá pixü̃́xchapütagü i ngẽxguma nüxü̃ peda̱u̱xgu i Abraáü̃ rü Ichaá rü Acóbu rü guxü̃ma i Tupanaarü orearü uruü̃gü nax Tupana ãẽ̱xgacü ixĩxü̃wa nangẽxmagüxü̃ rü pema rü nüxna ípewoxü̃xü̃.
29Erü nórtewa rü súrwa rü éstewa rü oéstewa tá ne naxĩ i duü̃xü̃gü nax Tupana ãẽ̱xgacü ixĩxü̃wa nangẽxmagüxü̃. Rü ngéma mechawa tá narütogü nax nachibüexü̃ca̱x.
30Rü tá nangẽxma i nümaxü̃ i ñoma i naanewa duü̃xü̃gü nüxü̃ oexü̃, natürü daxũguxü̃ i naanewa rü Tupana tá wixpe̱xewa nanaxügüxẽxẽ. Rü tá nangẽxma i nümaxü̃ i ñoma i naanewa duü̃xü̃gü nüxü̃ icua̱xüü̃güxü̃, natürü daxũguxü̃ i naanewa rü Tupana rü tá wixweama nanaxügüxẽxẽ —ñanagürü ga Ngechuchu.
Ngechuchu naxaxu naxca̱x i duü̃xü̃gü i Yerucharéü̃wa maxẽxü̃
(Mt. 23.37-39)
31Rü yematama ngunexü̃gu rü Ngechuchuxü̃tawa nangugü ga ñuxre ga Parichéugü. Rü ñanagürügü Ngechuchuxü̃: —¡Íixũ i nua! Erü ãẽ̱xgacü ya Eróde rü cuxü̃ nimáchaü̃ —ñanagürügü.
32Natürü nüma ga Ngechuchu nanangãxü̃ rü ñanagürü: —¡Naxü̃tawa pexĩ i ngẽma yatü i nüxü̃ cua̱xüchixü̃ nax duü̃xü̃güxü̃ nawomüxẽẽxü̃, rü namaxã nüxü̃ pixu rü ñu̱xma rü moxü̃ rü tá íchanawoxü̃ i ngo̱xogü, rü tá chanameexẽxẽ i ngẽma duü̃xü̃gü i ida̱xaweexü̃, rü pa̱xmaacü tá chanagu̱xẽxẽ!
33Natürü chanaxwa̱xe i ichixũchigü i ñu̱xma rü moxü̃ rü pa̱xmaacü ñu̱xmatáta Yerucharéü̃wa changu. Erü Yerucharéü̃gu nixĩ i nax nayuexü̃ i guxü̃ma i Tupanaarü orearü uruü̃gü.
34Rü dücax, Pa Yerücharéü̃cüã̱x, pema peyadaietanü i Tupanaarü orearü uruü̃gü, rü nutamaxã ípenamuxũchigü i Tupanaarü orearü ngeruü̃gü i pexca̱x núma namugüxü̃. Rü ñuxree̱xpü̱xcüna wüxigu chaugüxü̃tagu pexü̃ chanutaque̱xexẽẽchaü̃, ñoma wüxi i ota ya naxacüã̱x nügütüü̃gu tüxü̃ nutaque̱xexü̃rüxü̃. Natürü pema rü tama penaxwa̱xe.
35Dücax ya perü ĩane, rü Tupana tá ínanata̱x. Rü pemaxã nüxü̃ chixu rü taxũtáma wena choxü̃ pedau ñu̱xmatáta ngẽma ngunexü̃ i nagu ñapegügüxü̃: “Namexẽchi nixĩ ya yimá Cori ya Tupanaégagu núma ũcü”, ñapegügü —ñanagürü ga Ngechuchu.
Currently Selected:
Ore i mexü̃ ga Luca ümatüxü̃ 13: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.