Ore i mexü̃ ga Matéu ümatüxü̃ 9
9
Ngechuchu rü wüxi ga yatü ga nawãĩxãchixü̃ca̱x nayataanexẽxẽ
(Mr. 2.1-12; Lc. 5.17-26)
1Rü yexguma ga Ngechuchu rü wüxi ga nguegu nixüe. Rü naxtaxaarü tocutüwa naxũ, rü noxrütama ĩanewa nangu.
2Rü yéma guma ĩanewa rü duü̃xü̃gü rü Ngechuchuxü̃tawa nanangetaü̃gü ga wüxi ga yatü ga nawãĩxãchicü. Rü yexguma Ngechuchu nüxü̃ da̱u̱xgu nax aixcüma yaxõgüãxü̃ ga yema duü̃xü̃gü, rü ñanagürü nüxü̃ ga gumá ida̱xawecü: —¡Nataãxẽ, Pa Chaunex! Erü curü pecadugü rü marü cuxü̃́ nüxü̃ narüngüma —ñanagürü.
3Rü yéma nayexma ga ñuxre ga ngúexẽẽruü̃gü ga mugüwa ngu̱xẽẽtaegüxü̃. Rü nümagü rü naãẽgüwa ñanagürügü: —¿Ñaa yatü rü chixexü̃ Tupanamaxã nixugü? —ñanagürügü.
4Natürü ga Ngechuchu rü nüxü̃ nacua̱xama ga yema naãẽwa nagu naxĩnüexü̃. Rü yemaca̱x ñanagürü nüxü̃: —¿Tü̱xcüü̃ chixexü̃gu perüxĩnüe?
5¿Ta̱xacü nixĩ i ngẽma rütauxchamaexü̃ nax namaxã nüxü̃ ixuxü̃ ya daa nawãĩxãchicü: “Curü pecadugü rü marü cuxü̃́ nüxü̃ narüngüma”, rüẽ̱xna: “¡Inachi rü íixũ!” ñagüxü̃ nüxü̃?
6Natürü i ñu̱xma rü tá pexü̃ nüxü̃ nadauxẽxẽ ya yimá Tupana Nane ya duü̃xü̃xü̃ ixĩcü nax ñoma i naanewa nüxü̃́ nangẽxma i pora nax duü̃xü̃güaxü̃́ nüxü̃ yanangümaxü̃ca̱x i norü pecadugü —ñanagürü. Rü yexguma rü ñanagürü nüxü̃ ga gumá nawãĩxãchicü: —¡Inachi, rü nayaxu i curü caruxü̃, rü cupatawa naxũ! —ñanagürü.
7Rü yexgumatama ga gumá nawãĩxãchicü rü inachi, rü napatawa naxũ.
8Rü yexguma yemaxü̃ nadaugügu ga duü̃xü̃gü, rü poraãcü namuü̃e. Rü Tupanaxü̃ nicua̱xüü̃gü, rü ñanagürügü: —Moxẽ, Pa Tupanax, erü cunaporaxẽxẽ i ñaa yatü nax ngẽmaãcü mexü̃ toxca̱x naxüxü̃ca̱x —ñanagürügü.
Matéuca̱x naca ga Ngechuchu
(Mr. 2.13-17; Lc. 5.27-32)
9Rü yéma inaxũãchi ga Ngechuchu. Rü nüxü̃ nadau ga wüxi ga yatü ga Matéugu ãégaxü̃ ga yéma rütoxü̃ ga Rómaarü ãẽ̱xgacüca̱x diẽru ngĩxü̃ ínayauxgüxü̃wa, yerü woetama yemawa napuracü. Rü Ngechuchu rü ñanagürü nüxü̃: —¡Chowe rüxũ! —ñanagürü. Rü yexguma ga Matéu rü inachi, rü nawe narüxũ.
10Rü Mateupatawa naxũ ga Ngechuchu, rü yéma nachibü. Rü ínangugü ta ga muxü̃ma ga togü ga duü̃xü̃gü ga Rómaarü ãẽ̱xgacüca̱x diẽru ngĩxü̃ yauxgüxü̃wa puracüexü̃, rü togü ga duü̃xü̃gü ga taxúema nacümamaxã taãẽgüxü̃. Rü yema duü̃xü̃gü rü yéma mechawa narütogü namaxã ga Ngechuchu rü norü ngúexü̃gü.
11Natürü yexguma yemaxü̃ nadaugügu ga Parichéugü, rü Ngechuchuarü ngúexü̃güna nacagü, rü ñanagürügü: —¿Ñuxãcü i perü ngúexẽẽruxü̃ rü namaxã nachibü i ngẽma duü̃xü̃gü i Rómaarü ãẽ̱xgacüca̱x diẽru ngĩxü̃ yauxgüxü̃ rü ngẽma duü̃xü̃gü i pecaduã̱xgüxü̃? —ñanagürügü.
12Rü yexguma yemaxü̃ naxĩnügu ga Ngechuchu, rü ñanagürü nüxü̃ ga Parichéugü: —Ngẽma tama ida̱xaweexü̃ rü tama nanaxwa̱xegü ya dutúru, natürü ngẽma ida̱xaweexü̃ nixĩ i naxwa̱xegüxü̃.
13¡Rü ípixĩ, rü nawa pengúe i Tupanaarü ore i ümatüxü̃ i ñaxü̃:
“Choma rü tama chanaxwa̱xe i cha̱u̱xca̱x peyama̱x rü peyagu i carnérugü,
natürü ngẽma chanaxwa̱xexü̃ nixĩ nax togü pexü̃́ ngechaxü̃tümüxü̃güxü̃”,
ñaxü̃! Choma rü tama núma chaxũ nax naxca̱x chayaca̱xaxü̃ca̱x i ngẽma ingearü pecaduã́xü̃, natürü núma chaxũ nax naxca̱x chayaca̱xaxü̃ca̱x i ngẽma pecaduã̱xgüxü̃ —ñanagürü.
Ngechuchuna nacagüe ga aurechiga
(Mr. 2.18-22; Lc. 5.33-39)
14Rü yexguma ga Cuáü̃ ga baiü̃xẽẽruü̃arü ngúexü̃gü, rü Ngechuchuca̱x naxĩ, rü nüxna nacagüe, rü ñanagürügü: —Toma i Cuáü̃arü ngúexü̃gü nax tixĩgüxü̃ rü nümagü i Parichéugü rü muẽ̱xpü̱xcüna tama tachibüeãcüma tayumüxẽgü. ¿Rü tü̱xcüü̃ i curü ngúexü̃gü rü tama toxrüxü̃ tama nachibüeãcüma nayumüxẽgü? —ñanagürügü.
15Rü Ngechuchu nanangãxü̃ rü ñanagürü: —¿Ẽ̱xna wüxi i ngĩgüarü petawa rü pexca̱x namexü̃ nax nangechaü̃güxü̃ rü naxaureexü̃ i ngẽma nüxna naxugüxü̃ ega natanüwa nangẽxmagu i ngẽma ngexwaca ãmaxü̃? Natürü wüxi i ngunexü̃gu rü ngẽma yatü i ngexwaca ãmaxü̃ rü tá namücügüna nayagagü. Rü ngẽma ngunexü̃gu tá nixĩ i aixcüma naxaureexü̃ i namücügü.
16Rü taxúema tanapaita i wüxi i naxchiru i ngauxü̃ namaxã i wüxi i naxchirutüchi i ngexwaca̱xü̃xü̃ i tauta nañaãchimüxü̃. Erü ngẽxguma nayaxugu i ngẽma naxchiru rü tá nügü ínanañaãchi i ngẽma naxchirutüchi i ngexwaca̱xü̃xü̃, rü tá nanagáuxẽxẽ i ngẽma wexachiru. Rü noxriarü yexera tá nixĩ nax nagáuxü̃ i ngẽma wexachiru.
17Rü ngẽxgumarüxü̃ ta rü taxúema ngexwacaxü̃cü ya bínu rü nagu tayabacuchi i wüxi i naxchixü̃ i marü ngauxü̃ i naxcha̱xmünaxca̱x. Erü ngẽxguma ngẽmaãcü naxü̱xgu rü yimá bínu ya ngexwacaxü̃cü rü tá narüngu, rü tá nayawã̱ĩ̱xẽxẽ i ngẽma naxchixü̃ i ngauxü̃ i naxcha̱xmünaxca̱x. Rü ngẽxma tá inayarüxo ya bínu rü ngẽma naxchixü̃ rü ta. Rü ngẽmaca̱x tanaxwa̱xe ya ngexwacaxü̃cü ya bínu rü ngexwaca̱xü̃xü̃ i naxchiü̃gu tayabacuchi. Rü ngẽmaãcü ya yimá bínu rü ngẽma naxchixü̃ rü taxũtáma inayarüxo —ñanagürü ga Ngechuchu.
Yáiruxacüchiga rü yema nge ga Ngechuchuchirugu ingógücüchiga
(Mr. 5.21-43; Lc. 8.40-56)
18Rü yexguma ínangúexẽẽtaeyane ga Ngechuchu, rü naxü̃tawa nangu ga wüxi ga Yudíugüarü ãẽ̱xgacü. Rü Ngechuchupe̱xegu nayacaxã́pü̱xü, rü ñanagürü nüxü̃: —Pa Corix, chauxacü rü ngexwaca iyu. Natürü ngẽxguma chi ngéma cuxũxgu rü ngĩxü̃ quingõgügu, rü wena chixarü imaxü̃ —ñanagürü.
19Rü inachi ga Ngechuchu, rü norü ngúexü̃gümaxã yema ãẽ̱xgacüwe narüxũ.
20Rü yexguma namagu yaxũxyane rü wüxi ga ngecü ga 12 ga taunecü ãgüechacü rü Ngechuchuweama ne ixũ. Rü naxpechinüchirugu iyangõgü.
21Yerü ngĩma rü nagu irüxĩnü rü yexguma chi naxchirupechinügu yangõgümaregu, rü chi ngĩxca̱x nitaane.
22Natürü nüma ga Ngechuchu rü nügü ínidau, rü ngĩxü̃ nadau ga yema nge. Rü ñanagürü ngĩxü̃: —¡Nataãxẽ, Pa Chauxacüx! Marü cuxca̱x nitaane, erü cuyaxõ —ñanagürü. Rü yexgumatama ngĩxca̱x nitaane.
23Rü yexguma yema ãẽ̱xgacüpatawa nanguxgu ga Ngechuchu, rü nüxü̃ nadau ga paxetatanüxü̃ ga marü nax ínamemaregüxü̃ nax ngĩxü̃ iyata̱xgüxü̃ ga yema bucü. Rü ga duü̃xü̃gü rü nixáicha rü naxauxe.
24Rü Ngechuchu ñanagürü nüxü̃ ga yema duü̃xü̃gü: —¡Ípechoxü̃ i nua! Erü ngẽma bucü rü tama iyu. Rü ipemare —ñanagürü. Natürü nümagü ga duü̃xü̃gü rü Ngechuchuxü̃ nacugüeama.
25Rü yexguma Ngechuchu ínachoxü̃xẽẽgu ga duü̃xü̃gü, rü yema bucüarü ucapugu naxücu. Rü ngĩxme̱xgu nayayauxãchi, rü yexgumatama íirüda ga ngĩmax.
26Rü guxü̃wama ga yema naanewa, rü duü̃xü̃gü nüxü̃ nixuchigagü ga yema Ngechuchu üxü̃.
Ngechuchu naxca̱x nayataanexẽxẽ ga taxre ga yatü ga ingexetüxü̃
27Rü yexguma yéma ínaxũũxgu ga Ngechuchu, rü taxre ga ngexetüxü̃ nawe narüxĩ. Rü tagaãcü ñanagürügü: —Pa Ngechuchux, Pa Dabítanüxü̃x, ¡cuxü̃́ tangechaü̃tümüxü̃gü! —ñanagürügü.
28Yexguma Ngechuchu gumá ĩ ga nagu napexü̃negu naxücu̱xgu, rü naxca̱x naxĩ ga yema taxre ga ngexetüxü̃. Rü Ngechuchu nüxna naca, rü ñanagürü: —¿Peyaxõgüxü̃ yixĩxü̃ nax chaporaxü̃ nax pexü̃ charümeexẽẽxü̃ca̱x? —ñanagürü. Rü nümagü nanangãxü̃gü, rü ñanagürügü: —Ngü̃, Pa Corix, tayaxõgü —ñanagürügü.
29Rü yexguma ga Ngechuchu rü naxẽtügügu ningõgü, rü ñanagürü nüxü̃: —¡Cü, pexca̱x yataane, erü peyaxõgü! —ñanagürü.
30Rü naxca̱x nitaanegü. Rü Ngechuchu rü poraãcü nayaxucu̱xẽgü nax taxúemaama nüxü̃ nax yaxugüxü̃ca̱x ga yema nüxü̃ ngupetüxü̃.
31Natürü yema taxre rü yexguma yéma ínachoxü̃gu rü guxü̃wama ga yema naanewa rü nüxü̃ nixugüeama ga yema Ngechuchu üxü̃.
Ngechuchu rü naxca̱x nayataanexẽxẽ ga wüxi ga yatü ga tama idexacü
32Rü yexguma yema taxre ga yatü íchoxü̃yane, rü ñuxre ga duü̃xü̃gü rü Ngechuchuxü̃tawa nanagagü ga wüxi ga yatü ga tama idexacü yerü ngo̱xo nawa nayexma.
33Rü Ngechuchu ínanata̱xüchi ga yema ngo̱xo. Rü yexgumatama inanaxügü ga nax yadexaxü̃ ga gumá yatü. Rü nümagü ga duü̃xü̃gü rü nabaixãchiãẽgü. Rü ñanagürügü: —Taguma nüxü̃ tadau i nua tachiü̃anewa i ta̱xacü i ñaarüxü̃ ixĩxü̃ —ñanagürügü.
34Natürü ga Parichéugü rü ñanagürügü: —Ñaa yatü rü ngo̱xogüarü ãẽ̱xgacü i Chatanáarü poramaxã nixĩ i ínawoxü̃ãxü̃ i ngo̱xogü —ñanagürügü.
Ngechuchuaxü̃́ nangechaü̃tümüxü̃gü ga duü̃xü̃gü
35Rü Ngechuchu rü guxü̃nema ga ĩanegügu rü ĩanexacügügu nixũgüchigü. Rü wüxichigü ga ĩanewa, rü ngutaque̱xepataü̃wa ningu̱xẽẽtaechigü. Rü duü̃xü̃gümaxã nüxü̃ nixuchigü ga ore ga mexü̃ ga ãẽ̱xgacü nax yixĩxü̃ ya Tupana. Rü nanameexẽxẽ ga duü̃xü̃gü ga ida̱xaweexü̃. Rü woo nañuxraü̃xü̃ ga norü da̱xawe nüxü̃́ yexmaxü̃, rü nanameexẽxẽ.
36Rü yexguma Ngechuchu nüxü̃ da̱u̱xgu ga yema muxü̃ma ga duü̃xü̃gü ga naxü̃tawa ngugüxü̃, rü nüxü̃́ nangechaü̃tümüü̃gü. Yerü carnérugü ga ngearü dauruü̃ã́xü̃rüxü̃ nanaxĩ̱xãchiãẽgü, rü tama nataãẽgü.
37Rü yexguma ga Ngechuchu rü ñanagürü nüxü̃ ga norü ngúexü̃gü: —Aixcüma pemaxã nüxü̃ chixu rü nangẽxma i muxũchixü̃ i duü̃xü̃gü i ímemaregüxü̃ nax yaxõgüãxü̃ i Tupanaarü ore. Natürü nanoxree̱xpü̱x i puracütanüxü̃ nax namaxã nüxü̃ yaxugüxü̃ca̱x i ngẽma mexü̃ i ore.
38Rü ngẽmaca̱x name nax duü̃xü̃güarü yora ya Tupanana naxca̱x pecaxü̃ i perü yumüxẽwa nax yamugüãxü̃ca̱x i norü puracütanüxü̃ i orearü uruü̃gü nax ngẽma duü̃xü̃gümaxã nüxü̃ yaxugüxü̃ca̱x i norü ore i mexü̃ —ñanagürü ga Ngechuchu.
Currently Selected:
Ore i mexü̃ ga Matéu ümatüxü̃ 9: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.