Ore i mexü̃ ga Matéu ümatüxü̃ 7
7
Tama name i toguxexü̃ tixu
(Lc. 6.37-38, 41-42)
1Rü Ngechuchu rü ñanagürü ta: “¡Taxṹ i toguxexü̃ pixuxü̃ nax tama togü pexü̃ ixuxü̃ca̱x!
2Erü ngẽxgumarüxü̃ nax toguxexü̃ pixuxü̃ rü togü tá pexü̃ nixu. Rü ngẽma dexa i namaxã tüxü̃ pixuxü̃, rü ngẽmatama dexamaxã tá pexü̃ tixu.
3¿Rü tü̱xcüü̃ i nüxü̃ cudawenüxü̃ i ngẽma íxraxü̃ i norü üxaxetü ya cuenexẽ rü tama nagu curüxĩnügu i ngẽma naixpüta i cuxetüwa ngẽxmaxü̃?
4Rü ngẽxguma cuxetüwatama nangẽxmagu i wüxi i naixpüta ¿rü ñuxãcü i cuenexẽxü̃ cuchixewexü̃, rü ñacuxü̃ nüxü̃: ‘Pa Chauenexẽx, cuxü̃ chanayauxchaü̃ i ngẽma curü üxaxetüxü̃’, ñacuxü̃?
5Pa Duü̃xü̃ i Nügü Írümenetaxü̃, rü name nixĩ i cunayauxíra i ngẽma naixpüta i cuxetüwatama ngẽxmaxü̃, rü ngẽmaãcü tá mea nüxü̃ cudau nax cunayaxuxü̃ca̱x i ngẽma cuenexẽarü üxaetüxü̃.
6Rü tama name i Tupanaarü ore i üünexü̃maxã penachixewe i ngẽma duü̃xü̃gü i tama yaxõgüchaü̃xü̃, erü ngürüãchi ngẽmaca̱x tá pexü̃ nadai. Rü tama name i Tupanaarü oremaxã penachixewe i ngẽma duü̃xü̃gü i tama nüxü̃ cua̱xgüchaü̃xü̃, erü tá ínanata̱xgü.
¡Naxca̱x ínaca, rü naxca̱x nadau, rü nüxna nacagü!
(Lc. 6.31; 11.9-13)
7¡Tupanana naxca̱x peca! Rü nüma tá pexna nanaxã. ¡Rü naxü̃tagu naxca̱x pedau! Rü tá nüxü̃ ipeyangau. ¡Rü norü ĩã̱xwa nüxna pecagü! Rü tá pexca̱x nayawãxna.
8Erü guxãma ya yíxema naxca̱x íca̱xaxe, rü tanayaxu. Rü guxãma ya naxca̱x dauxe, rü nüxü̃ itayangau. Rü guxãma ya yíxema norü ĩã̱xwa nüxna cagüxe, rü tá tümaca̱x nayawãxna.
9Rü dücax i pemax, rü ngẽxguma chi wüxi i pexacü paũca̱x ícaxgu, rü ¿ñuxãcü chi wüxi ya nuta nüxna pexãxü̃?
10Rü ngẽxguma chi choxnica̱x pexna nacaxgu rü ¿ñuxãcü chi i ãxtape nüxna pexãxü̃?
11Rü pema nax pichixecümachiréxü̃ rü nüxü̃ pecua̱x nax mexü̃ pexacügüna pexãxü̃. Rü Penatü ya daxũgucü rü tá perü yexera mexü̃ tüxna naxã ya yíxema nüxna naxca̱x ca̱xaxe i ngẽma mexü̃.
12Rü pemaxã nüxü̃ chixu, rü ngẽma mexü̃ i pema penaxwa̱xexü̃ nax togü pemaxã naxüxü̃, rü name i ngẽmatama mexü̃ togümaxã pexü. Erü ngẽma nixĩ i Tupanaarü mugüwa ngóxü̃ rü norü orearü uruü̃gü nüxü̃ ixugüxü̃.
Ĩã̱x i íxraxü̃chiga
(Lc. 13.24)
13Name i ngẽma ĩã̱x i íxraxü̃waama pichocu. Erü ngẽma ĩã̱x i taxü̃ rü ngẽma nama i tamaxü̃ rü yuwa tüxü̃ naga, rü muxũchixü̃ma i duü̃xü̃gü nagu naxĩ.
14Natürü marü naxíra i ngẽma ĩã̱x rü naxímaxü̃ i ngẽma nama i maxü̃wa tüxü̃ gaxü̃, rü noxretama nixĩ i duü̃xü̃gü i nüxü̃ iyangaugüxü̃.
Wüxi i nanetü rü norü owa nixĩ i nüxü̃ icuáxü̃
(Lc. 6.43-44)
15Rü naxca̱x pexuãẽgü i ngẽma dorata̱a̱xgüxü̃ i nügü ixugünetaxü̃ nax Tupanaarü orearü uruü̃gü yixĩgüxü̃. Erü nümagü rü ñoma carnérugü i tama ãũcümaxü̃rüxü̃ pepe̱xewa nügü nixĩgüxẽxẽ, natürü norü ĩnüwa rü ñoma dauxchitacüã̱x i airugü i düraexü̃rüxü̃ nixĩgü.
16Rü pema rü nacümawa tá nüxü̃ pecua̱x i ngẽma duü̃xü̃gü, ngẽxgumarüxü̃ i wüxichigü i nanetügü rü norü owa nax nüxü̃ icuáxü̃rüxü̃, rü aixcüma name rüe̱xna tama. Rü wüxi i torawa rü taxucürüwama úbagü tayaxu. Rü wüxi i chuchuxü̃wa rü taxucürüwama ori̱x i igu tayaxu.
17Erü guxü̃ma i nanetü i mexü̃ rü name i norü o. Natürü ngẽma nanetü i chixexü̃ rü nachixe i norü o.
18Rü wüxi i nanetü i mexü̃ rü taxucürüwama nachixe i norü o. Rü wüxi i nanetü i chixexü̃ rü taxucürüwama name i norü o.
19Rü guxü̃ma i nanetü i tama mexü̃ i norü o rü tayadaxüchi rü üxüwa tayata̱xcuchi.
20Rü ngẽxgumarüxü̃ ta nacümawa tá nüxü̃ pecua̱x i ngẽma Tupanaarü orearü uruü̃güneta ixĩgüxü̃.
Taxũtáma guxü̃ma i duü̃xü̃gü nichocu i Tupana ãẽ̱xgacü ixĩxü̃wa
(Lc. 13.25-27)
21Rü tama guxü̃ma i duü̃xü̃gü i nügü ixugüxü̃ nax chorü duü̃xü̃gü yixĩgüxü̃ rü tá nichocu i ngextá Tupana ãẽ̱xgacü ixĩxü̃wa. Rü yíxema aixcüma Chaunatü ya dauxü̃gucüarü ngúchaü̃ ügüxexicatama tá tixĩ i ngéma ichocuxe.
22Rü ngẽxguma nawa nanguxgu i ngẽma ngunexü̃ i nagu Tupana duü̃xü̃güxü̃ ícagüxü̃, rü muxü̃ma i duü̃xü̃gü rü choxü̃ tá ñanagürügü: ‘Pa Corix, toma rü duü̃xü̃gümaxã nüxü̃ tixu i curü ore, rü cuégagu ítanawoxü̃ i ngo̱xogü, rü cuégagu tanaxü i muxü̃ma i mexü̃ i taxü̃’, ñanagürügü tá.
23Natürü ngẽxguma i choma rü tá ñachagürü nüxü̃: ‘Taguma pexü̃ chacua̱x nax chorü duü̃xü̃gü pixĩgüxü̃. ¡Rü choxna pixĩgachi i pema i chixexü̃arü üruü̃gü!’ ñachagürü tá.
Yatü i Cristuga ĩnüxü̃ rü yatü i tama Cristuga ĩnüxü̃chiga
(Mr. 1.22; Lc. 6.47-49)
24Rü ngẽmaca̱x ya yíxema choxü̃ ĩnüxe rü naxǘxe i ngẽma choma tüxü̃ chamuxü̃, rü wüxi ga yatü ga mea naãẽxü̃ cuácü ga nuta ga tacüétügu üpatacürüxü̃ tixĩ.
25Rü pucü ga tacü ínangu, rü narübaigü ga natügü, rü nixũũchi ga tacü ga buanecügü rü gumá ĩgu nanguema. Natürü gumá ĩ rü tama niwa̱xtaü̃ yerü nutaétügu naxǘ.
26Natürü yíxema choxü̃ ĩnüxẽ rü tama naxǘxe i ngẽma choma tüxü̃ chamuxü̃, rü wüxi ga yatü ga tama naãẽxü̃ cuácü ga naxnücügumare üpatacürüxü̃ tixĩ.
27Rü pucü ga tacü ínangu, rü narübaigü ga natügü, rü tacü ga buanecügü nixũũchi rü nagu nanguema ga gumá ĩ, rü niwa̱xtaü̃. Rü yexma nayarüxo ga guma ĩ”, ñanagürü ga Ngechuchu.
28Rü yexguma yagúegagu ga Ngechuchu, rü duü̃xü̃gü rü naba̱i̱xãchiãẽgü namaxã ga norü ngúexẽẽtae.
29Yerü nüma rü Tupanaarü poramaxã nanangúexẽxẽ, rü tama yema ngúexẽẽruü̃gü ga mugüwa ngu̱xẽẽtaegüxü̃rüxü̃ nixĩ.
Currently Selected:
Ore i mexü̃ ga Matéu ümatüxü̃ 7: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.