Ore i mexü̃ ga Cuáü̃ ümatüxü̃ 13
13
Ngechuchu rü norü ngúexü̃güxü̃ niyauxgücutü
1Rü marü íxraxü̃ nataxu nax nawa nanguxü̃ ga yema Yudíugüarü peta ga Üpetüchiga. Rü Ngechuchu nüxü̃ nacua̱x nax marü nawa nanguxü̃ nax ñoma ga naanewa yaxũxü̃ rü wenaxarü Nanatüxü̃tawa nax naxũxü̃. Rü nüma rü guxü̃guma tüxü̃ nangechaü̃ ga guxema noxrü ixĩgüxe ga ñoma i naanewa ngẽxmagüxe.
2-4Natürü ga Chataná rü marü Yúda ga Chimóü̃ ga Icharióte nanena nangu nax bexma Ngechuchuxü̃ ínaxuaxü̃xü̃ca̱x. Rü Ngechuchu rü marü nüxü̃ nacua̱x ga Nanatüxü̃tawa nax ne naxũxü̃ rü wena táxarü Nanatüca̱x nax nataeguxü̃. Rü nüxü̃ nacua̱x ga Nanatü rü naxme̱xgu nax naxüaxü̃ ga guxü̃ma ga pora. Rü yemaca̱x ga yema chütaxü̃gu ga yexguma mechawa ínachibüeyane, rü inachi ga Ngechuchu. Rü ínacuxuchi ga norü gáuxü̃chiru, rü wüxi ga tuayamaxã nügü nigoye.
5Rü ñu̱xũchi ya̱u̱xme̱xü̃páxü̃gu dexá ta naba, rü nayayauxgücutü ga norü ngúexü̃gü Rü gumá tuaya ga namaxã nügü yagoyecümaxã ínanapigücutü.
6Rü yexguma Chimóü̃ ga Pedruxü̃ nayauxcutüchaü̃gu rü ñanagürü ga Pedru: —Pa Corix, ¿ñuxãcü tá i cuma i choxü̃ cuyauxcutüxü̃? —ñanagürü.
7Rü Ngechuchu nanangãxü̃ rü ñanagürü: —Ñu̱xma rü tama nüxü̃ cucua̱x i tü̱xcüü̃ nax chanaxüxü̃ i ñaa, natürü yixcama rü tá nüxü̃ cucua̱x —ñanagürü.
8Natürü ga Pedru rü ñanagürü: —Choma rü taxũtáma chanaxwa̱xe nax choxü̃ cuyauxcutüxü̃ —ñanagürü. Rü Ngechuchu nanangãxü̃ rü ñanagürü nüxü̃: —Ngẽxguma tama cuxü̃ chayauxcutügu, rü taxũtáma choxrü quixĩ —ñanagürü.
9Rü yexguma ga Chimóü̃ ga Pedru rü ñanagürü nüxü̃: —Pa Corix, ¡Tama choxü̃ cuyauxcutüxicatama! Natürü chanaxwa̱xe i choxü̃ cuya̱u̱xme̱x rü choxü̃ cuyauxeru ta —ñanagürü.
10Natürü Ngechuchu nanangãxü̃ rü ñanagürü nüxü̃: —Texé ya ngexwaca aiyaxe rü tanaxwa̱xe i tümacutüxicatama tayaxu, erü guxü̃wama tangemata. Rü pema rü marü pingematagü, natürü tama guxãma aixcüma tingemata —ñanagürü.
11Rü Ngechuchu nüxü̃ nacua̱x nax texé tá bexma ínaxuaxü̃xü̃, rü yemaca̱x ñanagürü nüxü̃: —Natürü tama guxãma aixcüma tingemata —ñaxü̃.
12Rü yexguma norü ngúexü̃güxü̃ yayauxgücutüguwena, rü Ngechuchu wena nicu̱xcuchi ga norü gáuxü̃chiru. Rü wenaxarü mechawa narüto. Rü ñanagürü nüxü̃: —¿Nüxü̃ pecuáxü̃ yixĩxü̃ i ngẽma chaxüxü̃?
13Pema rü: “Pa Ngúexẽxẽruxü̃”, rü “Pa Corix”, ñaperügü choxü̃. Rü marü name i ngẽma ñaperügü, erü aixcüma ngẽma chixĩ.
14Rü ñu̱xma i choma nax perü ngúexẽẽruxü̃ chixĩxü̃ rü perü Cori chixĩxü̃, rü pexü̃ chiyauxgücutü. Rü ngẽxgumarüxü̃ ta i pema rü name i wüxichigü i pemücüxü̃ piyauxgücutü.
15Choma rü pexü̃ nüxü̃ chadauxẽxẽ nax ñuxãcü tá penaxüxü̃ nax pema rü ta ngẽma pemaxã chaxüxü̃ãcü penaxüxü̃ca̱x.
16Rü aixcüma pemaxã nüxü̃ chixu rü taxuxü̃ma i wüxi i coriarü duü̃xü̃ rü norü coriétüwa nügü nangẽxmaxẽxẽ. Rü taxuxü̃ma i ãẽ̱xgacüarü orearü ngeruxü̃ i norü ãẽ̱xgacü i namuxü̃étüwa nügü nangẽxmaxẽxẽ.
17Rü ngẽxguma nüxü̃ pecua̱xgu i chorü ore rü penaxü̱xgu i ngẽma pemaxã nüxü̃ chixuxü̃, rü aixcüma tá petaãẽgü.
18Rü tama guxãma i pechiga nixĩ i chidexaxü̃. Erü choma rü tüxü̃ chacua̱x rü texégü tixĩ ya yíxema tüxü̃ chidexechixe. Natürü tá ningu i ngẽma Tupanaarü ore i ümatüxü̃ i ñaxü̃:
“Yíxema chomaxã chibüxe rü chomaxã tarüxuanü”,
ñaxü̃.
19Natürü naxü̃pa nax nangupetüxü̃ i ngẽma, rü pemaxã nüxü̃ chixu nax ngẽxguma nangupetügu peyaxõgüxü̃ca̱x nax choma rü Cristu chixĩxü̃.
20Aixcüma pemaxã nüxü̃ chixu rü texé mea tüxü̃ yaxúxe ya yíxema choma ngéma tüxü̃ chamuxẽ, rü choxü̃ nixĩ i tayaxuxü̃. Rü texé ya choxü̃ yaxúxe, rü Chaunatü ga núma choxü̃ mucüxü̃ nixĩ i tayaxuxü̃ —ñanagürü ga Ngechuchu.
Ngechuchu nüxü̃ nixu rü Yúda tá nixĩ i bexma ínaxuaxü̃xü̃
(Mt. 26.20-25; Mr. 14.17-21; Lc. 22.21-23)
21Rü yexguma yema ñaxguwena ga Ngechuchu rü poraãcü ngechaü̃ nüxü̃́ nangu̱x, rü meama nananango̱xẽxẽ, rü ñanagürü: —Aixcüma pemaxã nüxü̃ chixu rü wüxíe i petanüwa tá nixĩ i bexma choxü̃ íxuaxü̃xü̃ —ñanagürü.
22Rü yexguma ga norü ngúexü̃gü rü wüxichigü nügüna nadaugü, rü tama nüxü̃ nacua̱xgü nax texéchiga yema ñaxü̃.
23Rü wüxi ga norü ngúexü̃ ga poraãcü nüxü̃ nangechaü̃xü̃ rü yexguma nachibüeyane rü Ngechuchucüwawa narüto.
24Rü Chimóü̃ ga Pedru rü bexma nüxü̃ naxuneta ga yema Ngechuchucüwawa rütoxü̃ nax Ngechuchuna naca̱xaxü̃ca̱x nax texé tixĩxü̃ ya yíxema.
25Rü yexguma ga nüma rü yexeraãcü Ngechuchuna nangaicama rü nüxna naca, rü ñanagürü: —Pa Corix, ¿texé tá tixĩ ya yíxema? —ñanagürü.
26Rü Ngechuchu nanangãxü̃, rü ñanagürü: —Wüxi i paũarü bücuxü̃ tá íchacúe, rü yíxema tüxna chanaxãxẽ, rü yíxema tá tixĩ —ñanagürü. Rü yexguma ínanacúe ga wüxi ga paũarü bücuxü̃ rü Yúda ga Icharióte ga Chimóü̃ nanena nanaxã.
27Rü yexguma Yúda nayaxugu ga yema paũarü bücuxü̃ rü yexgumatama ngo̱xo ga Chataná rü Yúdagu naxücu. Rü yexguma ga Ngechuchu rü ñanagürü nüxü̃: —Ngẽma cuxüxchaü̃xü̃, ¡rü paxa naxü! —ñanagürü.
28Natürü taxuxü̃ma ga mechawa chibüexü̃ nüxü̃ nacua̱xgü nax ta̱xacüchiga yixĩxü̃ nax yema ñaxü̃ ga Ngechuchu.
29Rü nüma ga Yúda rü diẽruchiü̃arü dauruxü̃ nixĩ. Rü yemaca̱x ñuxre ga nümagü rü nagu narüxĩnüe nax Ngechuchu rü taxewa namuaxü̃ nax ta̱xacüca̱x yataxexü̃ca̱x naxca̱x ga peta, rüe̱xna duü̃xü̃gü ga ngearü diẽruã́xü̃na ngĩxü̃ nax naxãxü̃ca̱x ga diẽru.
30Rü yexguma Yúda nayaxugu ga yema paũ, rü ínaxũxũ ga yema ucapuwa. Rü marü nachüta ga yexguma.
Ngechuchu norü ngúexü̃gümaxã nüxü̃ nixu ga yexwaca̱xüxü̃ ga norü mu
31Rü yexguma Yúda íxũxguwena, rü Ngechuchu rü ñanagürü: —Rü ñu̱xma rü tá nango̱x i norü pora ya Tupana Nane ya duü̃xü̃xü̃ ixĩcü. Rü yimáwa tá nixĩ i nango̱xẽẽãxü̃ ya Tupana i norü pora.
32Rü ngẽxguma yimá Tupana Nane nango̱xẽẽ̱xgu i Tupanaarü pora, rü ngẽxgumarüxü̃ tá ta ya Tupana rü nanango̱xẽxẽ i Nanearü pora. Rü paxa tá nixĩ i ngẽma.
33Pa Chauxacügüx, taxũtáma muxü̃ i ngunexü̃ petanüwa changexma. Rü pema rü tá cha̱u̱xca̱x pedaugü, natürü ngẽma choma íchaxũxü̃wa rü taxucürüwama ngéma pexĩ. Rü ñaatama ore nixĩ ga marü Yudíugümaxã nüxü̃ chixuxü̃, rü ñu̱xma rü pemaxã rü ta nüxü̃ chixu.
34Rü pemaxã nüxü̃ chixu i wüxi i ngexwaca̱xü̃xü̃ i mu. Rü ngẽma pexü̃ chamuxü̃ nixĩ i pemücügüxü̃ nax pengechaü̃xü̃ i wüxichigü. Rü ngẽma nax choma pexü̃ changechaü̃xü̃rüxü̃, rü chanaxwa̱xe i wüxichigü i pema rü pemücügüxü̃ pengechaü̃gü.
35Rü ngẽxguma wüxichigü pemücügüxü̃ pengechaü̃gu, rü guxü̃ma i duü̃xü̃gü tá nüxü̃ nicua̱xãchitanü nax chorü ngúexü̃gü pixĩgüxü̃ —ñanagürü.
Ngechuchu nüxü̃ nixu rü Pedru rü taxũtáma nügü nixu nax norü ngúexü̃ yixĩxü̃
(Mt. 26.31-35; Mr. 14.27-31; Lc. 22.31-34)
36Rü Chimóü̃ ga Pedru rü Ngechuchuna naca, rü ñanagürü: —Pa Corix ¿ngextá tá cuxũ? —ñanagürü. Rü Ngechuchu nanangãxü̃, rü ñanagürü: —Ngéma íchaxũxü̃wa rü taxucürüwa chowe curüxũ i ñu̱xmax. Natürü yixcama rü ngẽmáacü tá chowe curüxũ —ñanagürü.
37Rü yexguma ga Pedru rü ñanagürü: —Pa Corix, ¿tü̱xcüü̃ taxucürüwa cuwe charüxũ i ñu̱xmax? Erü marü íchamemare nax cuxca̱x nax chayuxü̃ —ñanagürü.
38Rü Ngechuchu nanangãxü̃, rü ñanagürü: —¿Rü aixcüma yixĩxü̃ i marü ícumemarexü̃ nax cha̱u̱xca̱x cuyuxü̃? Aixcüma cumaxã nüxü̃ chixu rü taxũta yacaxgu ya ota, rü tomaepü̱xcüna tá nüxü̃ quixu nax tama choxü̃ cucuáxü̃ —ñanagürü ga Ngechuchu.
Currently Selected:
Ore i mexü̃ ga Cuáü̃ ümatüxü̃ 13: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.