Popera ga Gárataanewa yexmagüxü̃ ga yaxõgüxü̃tanüwa namuxü̃ ga Pauru 6
6
Name i pegü perüngü̃xẽxẽgü
1Pa Chauenexẽgüx, ngẽxguma chi texéxü̃ peda̱u̱xgu nax ta̱xacürü chixexü̃gu tanguxü̃, rü pema nax Tupanaãxẽ ya Üünecü pewa ngẽxmaxü̃, rü name nixĩ i tüxü̃ pengechaü̃ãcüma tüxü̃ perüngü̃xẽxẽ nax itayarüwe̱xãchixü̃ca̱x. ¡Natürü pexuãẽgü i wüxichigü, nax pema rü ta tama ngẽma chixexü̃gu peyixü̃ca̱x!
2¡Rü ngẽxguma texé petanüwa guxchaxü̃gü tüxü̃́ ngẽxmagu, rü pegü perüngü̃xẽxẽgü! Erü ngẽmaãcü tá peyangu̱xẽxẽ i ngẽma Cristu pexü̃ muxü̃.
3Rü ngẽxguma texé nagu rüxĩnügu nax tachigacü tixĩxü̃, rüẽ̱xna woo taxuxü̃machire̱x tixĩxgu, rü tügütama tawomüxẽxẽ.
4Rü ngẽmaca̱x i wüxichigü, rü name nixĩ i mea tügüarü maxü̃tama tangugü. Rü ngẽxguma namexgu i tümaarü maxü̃, rü name nax tügümaxãtama tataãxẽ. Natürü taxuca̱xma tü̱xcüü̃ togüarü maxü̃wa tügü tangugü.
5Erü wüxichigü rü name nax tümaarü maxü̃na tadauxü̃ i Tupanape̱xewa.
6Rü yíxema nayaxúxe i ngu̱xẽẽtae i Tupanaarü orewa rü name nixĩ nax tümaarü ngu̱xẽẽruü̃maxã tangauxü̃ i tümaarü ngẽmaxü̃gü.
7¡Rü pexuãxẽgü nax tama ípetüexü̃ca̱x i perü maxü̃wa! Erü taxucürüwa texé Tupanaxü̃ tawomüxẽxẽ. Rü yíxema chixexü̃ ǘxe, rü chixexü̃ tá tayaxu. Rü yíxema mexü̃ ǘxe, rü mexü̃ tá nixĩ i tayaxuxü̃.
8Rü yíxema tümaxü̃nearü ngúchaü̃ üxe, rü ngẽma tümaxü̃nearü ngúchaü̃ rü tá yuwa tüxü̃ naga. Natürü yíxema Tupanaãxẽ i Üünexü̃arü ngúchaü̃ üxe, rü ngẽma Tupanaãxẽ i Üünexü̃wa tá tanayaxu i maxü̃ i taguma gúxü̃.
9Rü ngẽmaca̱x tama name nax nüxü̃ rüchauexü̃ nax mexü̃ ixüexü̃. Rü ngẽxguma tama nüxü̃ rüchauegu nax mexü̃ ixügüxü̃, rü ngẽxguma Tupanaxü̃tawa ingugügu rü mexü̃ tá tayaxu.
10Rü ngẽmaca̱x ngẽxguma tüxü̃́ natauxchagu nax ta̱xacümaxã togüxü̃ rüngü̃xẽẽxü̃, rü name nixĩ i guxãxü̃ma tarüngü̃xẽxẽ. Natürü yexera tanaxwa̱xegü nax nüxü̃ rüngü̃xẽẽgüxü̃ i ngẽma taenexẽgü rü taeya̱xgü i yaxõgüxü̃.
Pauru nayaxucu̱xẽgü ga yema yaxõgüxü̃, rü ñu̱xũchi nüxü̃ narümoxẽ
11Rü nua tá ichanaxügü nax chomaxü̃chima cho̱xme̱xmaxã pexca̱x chanaxümatüxü̃ i ñaa popera. ¡Rü dücax, nüxü̃ peda̱u̱x nax ñuxãcü natamatüxü̃ i ngẽma choma chaxümatüxü̃!
12Rü ngẽma Yudíugü i pexü̃ ngúexẽẽxü̃ nax pegü ípewíecha̱xmüü̃pe̱xechiraü̃güxü̃ca̱x, rü ngẽmaãcü pexü̃ namu erü nanataãẽxẽẽgüchaü̃ i ngẽma togü i Yudíugü nax tama naxchi naxaiexü̃ca̱x nagagu nax Ngechuchu ya Cristu ga curuchagu yucüaxü̃́ nax yaxõgüãxü̃.
13Erü woo i nümagü nax ínawíü̃cha̱xmüü̃pe̱xechiraü̃xü̃, rü tama nayanguxẽxẽ i guxü̃ma i mugü. Natürü nümagü rü nanaxwa̱xegü nax pegü ípewíü̃cha̱xmüü̃pe̱xechiraü̃xü̃, nax yixcama nügü yacua̱xüü̃güxü̃ca̱x rü togü i Yudíugümaxã nüxü̃ nax yaxuxü̃ca̱x nax pema rü ta naxrüxü̃ nagu pexĩxü̃ i ngẽma nũxcümaü̃güxü̃ i mugü.
14Natürü i choma rü chaugü chicua̱xüxü̃ erü nüxü̃́ chayaxõ ya tórü Cori ya Ngechuchu ya Cristu ga curuchagu yucü. Rü ngẽmaca̱xicatama nixĩ i chaugü chicua̱xüüxü̃. Rü ñu̱xma nax Cristu ga curuchagu yucüaxü̃́ chayaxõxü̃, rü marü tama nagu charüxĩnü i ñoma i naane rü norü ngẽmaxü̃gü. Rü ngẽxgumarüxü̃ ta i ñoma i naane rü marü tama choxü̃ nacuáxchaü̃.
15Erü ngẽxguma Ngechuchu ya Cristuarü duü̃xü̃gü ixĩgügu, rü Tupanape̱xewa rü taxuxü̃ma nixĩ i ngẽma nax íiwíecha̱xmüpe̱xechiraü̃xü̃ rüe̱xna tama. Natürü ngẽma aixcüma nape̱xewa mexü̃ nixĩ nax naxüchicüüxü̃ i tórü maxü̃ nax ngexwaca̱xü̃xü̃ i duü̃xü̃gü ixĩgüxü̃ca̱x.
16Rü Tupanana naxca̱x chaca nax pexü̃ nataãẽxẽẽgüxü̃ca̱x rü nüxü̃́ pengechaü̃tümüxü̃güxü̃ca̱x i guxãma i pema i aixcüma yanguxẽẽgüxe i ngẽma pemaxã nüxü̃ chixuxü̃, rü guxãma ya yíxema aixcüma Tupanaarü duü̃xü̃gü ixĩgüxe.
17Rü ñu̱xmawena rü tama chanaxwa̱xe nax texé ta̱xacürü guxchaxü̃gü choxna ãxü̃. Erü choma rü aixcüma tórü Cori ya Ngechuchuarü duü̃xü̃ chixĩ. Rü ngẽma chorü o̱xrigüchica i chowa ngẽxmagüxü̃wa nüxü̃ pecua̱x nax aixcüma yixĩxü̃ i ngẽma.
18Pa Chauenexẽgüx, chanaxwa̱xe i tórü Cori ya Ngechuchu ya Cristu pexü̃ narüngü̃xẽxẽ rü pexü̃ nangechaü̃ i guxãma i pemax. Rü ngẽmaãcü yixĩ.
Currently Selected:
Popera ga Gárataanewa yexmagüxü̃ ga yaxõgüxü̃tanüwa namuxü̃ ga Pauru 6: tcaP
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.