Norü taxre ga popera ga Coríntiuwa yexmagüxü̃ ga yaxõgüxü̃tanüwa namuxü̃ ga Pauru 11
11
Pauru rü nüxü̃ nixuchiga ga yema orearü uruü̃güneta
1Rü ñu̱xma i ngẽma tá pemaxã nüxü̃ chixuxü̃, rü bexmana pexca̱x rü wüxi i ngeãẽmare nixĩ. Rü chierüx choxü̃́ iperüxĩnüemaregu rü yáxna chomaxã pexĩnüegu.
2Rü ngẽma nax pexü̃ chinuxuxü̃ rü ngẽma rü Tupanawa ne naxũ. Rü choma nixĩ ga Cristuna pexü̃ chamugüxü̃ nax noxrüxicatama pixĩgüxü̃ca̱x. Rü ngẽmaca̱x chanaxwa̱xe i ngearü chixexü̃ãxẽ Cristuxü̃ pexü̃ chawe̱x ñoma wüxi i pacü i taguma yatüxü̃ cua̱xcürüxü̃.
3Natürü chaxoegaãxẽ erü yema ãxtape norü doramaxã Ébaxü̃ nawomüxẽẽxü̃rüxü̃, ngürüãchi tá ta texé pexü̃ tawomüxẽxẽ nax nüxü̃ perüxoexü̃ca̱x nax Cristugu perüxĩnüexü̃ rü naxca̱xicatama nax pemaxẽxü̃.
4Erü pema rü tauxchaãcü nixĩ nax pexü̃ nawomüxẽẽgüxü̃. Rü ngẽxguma ínangugügu i duü̃xü̃gü i pemaxã nüxü̃ ixuxü̃ i to i Ngechuchuchiga ya tama yimá toma nüxü̃ tixuchigacü, rü pema rü nüxü̃́ peyaxõgü i ngẽma duü̃xü̃gü. Rü pema rü taãẽãcüma penayaxu i to i naãxẽ i tama Tupanaãxẽ ya Üünecü ga marü peyaxuxü̃ ixĩxü̃. Rü peyaxõgü i to i ore i tama Tupanaarü ore i mexü̃ ga noxri peyaxuxü̃ ixĩxü̃.
5Dücax, rü woo nawe perüxĩxgu i ngẽma togü i orearü uruü̃güneta i nügü írütagüxü̃, natürü cha̱u̱xca̱x rü taxuwama choxü̃ narüyexeragü.
6Rü woo tama choxü̃́ nangẽxmagu i tauxcha nax duü̃xü̃güpe̱xewa chidexaxü̃, natürü aixcüma mea nüxü̃ chacua̱x i ngẽma nachiga chidexaxü̃. Rü guxü̃guma guxü̃ma i torü puracüwa marü pexü̃ tanawe̱x nax aixcüma mea nüxü̃ tacuáxü̃ i ngẽma nachiga tidexagüxü̃.
7¿Pexca̱x rü chixexü̃ chaxü ga yexguma ngetanüãcüma pemaxã nüxü̃ chixuxgu ga Tupanaarü ore i tüxü̃ maxẽxẽẽxü̃? Rü choma rü aixcüma chaugü ícharüxíraxü̃ nax pexü̃ chataxẽẽxü̃ca̱x i pemax.
8Rü aixcüma nixĩ nax yema togü ga yaxõgüxü̃tanüwa ngĩxü̃ chayaxuxü̃ ga yema diẽru ga choxna ngĩxü̃ naxãgücü nax yemamaxã petanüwa chapuracüxü̃ca̱x rü pexü̃ charüngü̃xẽẽxü̃ca̱x.
9Rü yexguma petanüwa chayexmagu rü aixcüma choxü̃́ itaxu ga diẽru, natürü taguma texéna ngĩxca̱x chaca. Rü taenexẽgü ga Machedóniaanewa ne ĩxü̃ rü choxna ngĩxü̃ naxãgü ga yema choxü̃́ taxu̱xcü. Rü yemaacü tama petanüwa ngĩxca̱x íchaca ga yexguma. Rü ñu̱xma rü ta tagutáma ta̱xacüca̱x pexna chaca.
10Rü meama nüxü̃ chacua̱x nax aixcüma nüxü̃ chacuáxü̃ i ngẽma Cristuarü ore i aixcüma ixĩxü̃. Rü ngẽma nixĩ i chorü taãxẽ ixĩxü̃. Rü guxü̃ i Acáyaanewa rü taxúetama choxna tanapu i ngẽma taãxẽ i choxü̃́ ngẽxmaxü̃.
11¿Rü ta̱xacüca̱x yixĩxü̃ i ngẽmaãcü chidexaxü̃? ¿Ẽ̱xna pexca̱x rü tama pexü̃ changechaü̃xü̃ca̱x yixĩxü̃ i ngẽmaãcü chidexaxü̃? Dücax, pemaxã nüxü̃ chixu rü Tupana nüxü̃ nacua̱x nax aixcüma pexü̃ changechaü̃xü̃.
12Rü ngẽmaca̱x tá petanüwa nüxü̃ chixuama i Tupanaarü ore, nax taxucürüwa chixri chauchiga yadexagüxü̃ca̱x i ngẽma orearü uruü̃güneta i nügü ixuxü̃ nax toxrüxü̃ naxügüãxü̃ i Tupanaarü puracü.
13Nümagü rü orearü uruü̃güneta nixĩgü. Rü nügü nixugü nax Cristu yamugüxü̃, rü ngẽmaãcü Tupanaarü orearü uruü̃gu nügü nicu̱xgü rü duü̃xü̃güxü̃ nawomüxẽẽgü.
14Rü ngẽma rü taxuca̱xma namaxã pebaixãchiãẽgü. Erü woo i Chataná rü ta rü Tupanaarü orearü ngeruü̃gü i daxũcüã̱x i ya̱u̱xracüxü̃rüü̃ãcü nügü nango̱xẽxẽ.
15Rü ngẽmaca̱x woetama ngẽmaãcü nixĩgü i ngẽma duü̃xü̃gü i Chatanáaxü̃́ puracüexü̃. Rü nümagü rü duü̃xü̃gü i mexü̃ ügüxü̃gu nügü nicu̱xgü. Natürü Tupana tá nanapoxcue naxca̱x i ngẽma chixexü̃ i naxügüxü̃.
Pauru rü Ngechuchuarü puracüca̱x ngúxü̃ ninge
16Rü wena pemaxã nüxü̃ chixu rü tama chanaxwa̱xe i nagu perüxĩnüe nax wüxi i ãũãẽxü̃ chixĩxü̃. Natürü ngẽxguma chi ngẽmaãcü chomaxã nagu perüxĩnüegu, rü tama chanaxwa̱xe i choxna penachu̱xu nax ñoma wüxi i ãũãẽxü̃rüxü̃ chaugüétüwa chidexaxü̃, nax ngẽmaãcü choma rü ta írarüwa chaugütama chicua̱xüxü̃xü̃ca̱x.
17Rü ñu̱xma nax chaugüétüwa chidexaxü̃ rü ngẽma rü tama tórü Coriarü mu nixĩ. Natürü ñoma wüxi i ãũãẽxü̃ nügü icua̱xüxü̃rüxü̃ nixĩ i chidexaxü̃.
18Rü ñu̱xma nax nangẽxmaxü̃ i muxü̃ma i duü̃xü̃gü i ñoma i naanewa nügü icua̱xüü̃güxü̃, rü choma rü tá ta chaugü chicua̱xüxü̃.
19Pema rü peãẽxü̃ pecua̱x, natürü taãẽãcüma yáxna namaxã pexĩnüe i ngẽma orearü uruü̃güneta.
20Rü yáxna namaxã pexĩnüe i ngẽma duü̃xü̃gü i nügüxü̃́ pexü̃ puracüexẽẽxü̃, rü ngẽma ngetanüãcüma pexü̃ puracüexẽẽmarexü̃, rü ngẽma pexü̃ womüxẽẽgüxü̃, rü ngẽma pexü̃ oexü̃, rü ngẽma pexü̃ pechiwegüxü̃.
21Rü woo ãne choxna naxã nax pemaxã nüxü̃ chixuxü̃, natürü cha̱u̱xca̱x rü tama aixcüma pexü̃ tanawe̱x ga torü pora ga yexguma petanüwa tayexmagügu. Natürü ñu̱xma nax tama namuü̃exü̃ nax nügü yacua̱xüü̃güxü̃ i ngẽma orearü uruü̃güneta, rü choma rü tá ta taxuca̱xma chamuü̃ nax chaugüétüwa chidexaxü̃ woo pexca̱x rü ñoma wüxi i ngeãẽxü̃rüxü̃ãcü chidexagu.
22Nümagü rü nügü yaxugügu rü Yudíugü nixĩgü. Natürü choma rü ta Yudíu chixĩ. Rü nümagü nügü yaxugügu rü Iraétanüxü̃ nixĩgü. Natürü choma rü ta rü Iraétanüxü̃ chixĩ. Rü nümagü rü nügü yaxugügu rü Abraáü̃tanüxü̃ nixĩgü. Natürü choma rü ta Abraáü̃tanüxü̃ chixĩ.
23Nümagü rü nügü yaxugügu rü Cristuaxü̃́ napuracüe. Natürü choma rü norü yexera Cristuaxü̃́ chapuracü. Rü ngẽma ñachagürü pexü̃ woo pema nagu perüxĩnüegu nax ñoma wüxi i ãũãẽxü̃rüxü̃ chidexaxü̃. Rü ngẽma duü̃xü̃güarü yexera poraãcü Tupanaaxü̃́ chapuracü. Rü norü yexera Tupanaarü oreca̱x chapoxcu, rü norü yexera choxü̃ nacua̱i̱xgü. Rü mue̱xpü̱xcüna ãũcümaxü̃wa chayexma, yerü choxü̃ nima̱xgüchaü̃.
24Rü 5 e̱xpü̱xcüna nixĩ ga 39 ga cuaximaxã choxü̃ nacua̱i̱xgüxü̃ ga Yudíugü.
25Rü tomaepü̱xcüna nixĩ ga naimaxã choxü̃ nacua̱i̱xgüxü̃, rü wüxicana ga nutamaxã choxü̃ ínamuxũchigüxü̃. Rü tomaepü̱xcüna nixĩ ga guma wapuru ga nagu chixũxü̃ne rü chomaxã inanguxü̃. Rü wüxicana ga yexguma chomaxã inanguxgu ga wapuru rü wüxi ga chütaxü̃ rü wüxi ga ngunexü̃ chinge nax már arü ngãxü̃tüwa chayexmaxü̃.
26Rü mue̱xpü̱xcüna tóxnamana chaxũ, rü natügü ga ãũcümaxü̃wa chayexma, rü ãũcümaxü̃ ga ngĩ́ta̱xagüxü̃ íyexmagüxü̃wa chayexma. Rü woo Yudíugütanüwa, rü woo yema tama Yudíugü ixĩgüxü̃tanüwa, rü woo ĩanegüwa, rü woo namagüwa, rü woo márwa rü ãũcümaxü̃wa chayexma. Rü woo yema yaxõgünetaxü̃tanüwa rü ãũcümaxü̃wa chayexma.
27Rü poraãcü chataarü puracüã̱x, rü muxũchixü̃ ga guxchaxü̃gü choxü̃ nangupetü. Rü mue̱xpü̱xcüna rü tama chape, rü chataiya, rü chita̱xawa. Rü mue̱xpü̱xcüna rü tama chachibü, rü choxü̃ nanadeyu, rü choxü̃́ nataxu ga chauxchiru.
28Rü guxü̃ma i ngẽmaétüwa, rü guxü̃ i ngunexü̃gu rü chaxoegaãxẽ naxca̱x i guxü̃ma i ngẽma yaxõgüxü̃ i guxü̃ i ĩanegüwa ngẽxmagüxü̃.
29Rü ngẽxguma chi texé taturagu, rü choxü̃́ rü ta nangu̱x. Rü ngẽxguma chi wüxíe texéxü̃ pecadugu nguxẽẽgu, rü chauãẽwa nangu̱x i ngẽma.
30Natürü ngẽxguma chi chaugü chicua̱xüxü̃chaü̃gu, rü tá chaugü chicua̱xüxü̃ naxca̱x nax chaturaxü̃.
31Rü Tupana ya tórü Cori ya Ngechuchu ya Cristunatü rü name nax guxü̃guma nüxü̃ icua̱xüü̃güxü̃. Rü nüma rü nüxü̃ nacua̱x nax aixcüma yixĩxü̃ i ngẽma nüxü̃ chixuxü̃.
32Rü yexguma Damácuwa chayexmagu, rü ãẽ̱xgacü ga Arétaarü ngü̃xẽẽruxü̃ ga gumá ĩanemaxã icuáxü̃, rü norü churaragüxü̃ namu nax nüxna nadaugüxü̃ca̱x ga guma ĩanearü poxeguxü̃arü ĩã̱xgü nax choxü̃ yayauxgüxü̃ca̱x.
33Natürü yema ĩanearü poxeguxü̃arü beü̃tánawa rü wüxi ga pexchigu choxü̃ ínarüchü̱xüxüetaü̃gü ga chomücügü. Rü yemaacü chiña na̱xcha̱xwa ga yema ãẽ̱xgacü.
© 2022, Wycliffe Bible Translators, Inc. All rights reserved.