Matayo 1
1
1Kitabu kya makula ga Yesu Kristo, mwana wa Daudi, mwana wa Abrahamu.
2Abrahamu yivula Isaka; na Isaka yivula Yakobo; na Yakobo yivula Yuda navamwavo veve; 3na Yuda yivula Pereze na Zara ku Tamaru; na Pereze yivula Heziron; na Heziron yivula Ramu; 4na Ramu yivula Aminidabu; na Aminidabu yivula Nahashoni; na Nahashoni yivula Salmona; 5Salmona na Rahab yivula Boaz; na Boaz na Ruth yivula Obedi; na Obedi yivula Jesse; 6na Jesse yivula Daudi mwami.
Na Daudi halala no wa li na a va mkali wa Uria yivula Solomoni.
7Na Solomoni yivula Rehoboam; na Rehoboam yivula Abija; na Abija yivula Asa, 8na Asa yivula Jehosafatu; na Jehosafatu yivula Joram; na Joram yivula Uzia; 9na Uzia yivula Jotham; na Jotham yivula Ahazu; na Ahazu yivula Hezekia, 10na Hezekia yivula Manase; na Manase yivula Amoni; na Amoni yivula Josia; 11na Josia yivula Jekonia navamwavo veve, inyinga ya va hilwa mu Babuloni.
12Inyima yokuhilwa mu Babuloni, Jekonia yivula Shealitieli; na Shealitieli yivula Zerubabeli; 13na Zerubabeli yivula Abiudi; na Ahiudi yivula Eliakim; na Eliakim yivula Azor; 14na Azor yivula Sadoki; na Sadoki yivula Akim; na Akim yivula Eliudi; 15na Eliudi yivula Eleazaru; na Eleazaru yivula Mathani; na Mathani yivula Yakobo; 16na Yakobo yivula Yosefa musatsa wa Maria, wivula Yesu wa gulikwa Kristo.
17Amakula gosi kutwula wa Abrahamu kuduka ku Daudi amakula ga veye likumi na gane; nokutwula ku Daudi kuduka inyinga yokuhilwa mu Babuloni amakula ga veye likumi na gane; nokutwula inyinga yokuhilwa mu Babuloni kuduka ku Kristo amakula ga veye likumi na gane.
18Livulwa lya Yesu Kristo lya li ndi. Mama wewe, Iwa Yosefa ya mala kumkwa, navutswa inyinga va kikiri kuva halala ya nyolwa na a ve inda ya Roho Mtakatifu. 19Yosefa musatsa wewe, kigira ya li mundu mulungi, si yenya kumvuula, ya ganagana kumleka makiriri. 20Navutswa lwa ya ganagana vindu yivi, henza ingelosi wo Mwami ya loleka kuye mu maloto na a vola, Yosefa, mwana wa Daudi, u ta tia kuleta Maria mkali wowo: kigira kya verekwa muye ki veye kya Roho Mtakatifu. 21Naye a livula mwana muyai; na ive u la mu gulika lyeta lilye YESU; kigira uyu niye u li honnya avandu veve va twula mu bwoni bwavo. 22Yaga gosi ga kolwa ndi, ga duke kukolwa ago Mwami ya vola nomunwa gwomprofeti, na a vola.
23Henza, mkana mgima a la vereka, na a livula mwana muyai, Na va gulike lieta lilye Imanueli; li veye kuvola, Nyasaye a veye halala ne kwinye. 24Yosefa ya vuka mu tsindolo tsitsye, na a kola kuli ingelosi wo Mwami ya mu ha munwa, na a leta mkali wewe; 25na a vula kuva halala naye na a luha na a duka kwivula mwana muyai; naye ya mu gulika lieta lilye YESU.
Currently Selected:
Matayo 1: MBE
Highlight
Share
Copy
Want to have your highlights saved across all your devices? Sign up or sign in
©Bible Society of Kenya, 1967