YouVersion Logo
Search Icon

MATIUS 1

1
Matius ecic dau Yesus meijemouwer ebiji dau Abraham terim edebeij sug Yusub
(Luk. 3:23-38)
1Dan dog dau mougt mera medam, moho Daud dara Abraham, lan mardebeito, moho Yesus Krisdus, en meijemouwer dou yen dag gini:
2Abraham en meisi Isag. Isag en meisi Yakub. Yakub en meisir Yehuda an en maguner dara magtor.
3Yahuda mesira ebsa mebeba Tamar, kaba, lan maraisi Peres dara Serah. Peres en meisi Hesron. Hesron en meisi Ram.
4Ram en meisi Aminadab. Aminadab en meisi Nahason. Nahason en meisi Sarmon.
5Sarmon en eici Rahab, kaba, lan maraisi Boas. Boas en eici Rud, kaba, lan maraisi Obed. Boas en meisi Isai.
6Isai en meisi Daud leng Yahudi meren mougt mera medam. Daud en mesira ebsa Uria mesouwa, kaba, lan maraisi Solaiman.
7Solaiman en meisi Rahabeam. Rahabeam en meisi Abia. Abia en meisi Asa.
8Asa en meisi Yosapad. Yosapad en meisi Yoram. Yoram en medebeito Usia.
9Usia meisi Yotam. Yotam en meisi Ahas. Ahas en meisi Hiskia.
10Hiskia en meisi Manasei. Manasei en meisi Amon. Amon en meisi Yosia.
11Yosia en medebeito Yakonia an en maguner dara magtor len laugwan.
Hanoba ogdoc len gini meriresebaba, kaba, leng Babel lahwan len dag sogougb dig meren hancob.
12Sug Yesus meijemouwer len lecicugb dau Babel dig meren hancobohob, kaba, len meroho aududi dag gini:
Yakonia en medebeito Sealtiel. Sealtiel en meisi Serubabel.
13Serubabel en meisi Abiud. Abiud en meisi Eliakim. Eliakim en meisi Asor.
14Asor en meisi Sadog. Sadog en meisi Akim. Akim en meisi Eliud.
15Eliud en meisi Eleaser. Eleaser en meisi Matan. Matan en meisi Yakub.
16Yakub en meisi Yusub. Yusub gini en eic gidob hom, en moho Mariam, dag en mesouwa. Dangga Mariam gini en ouwadan meisi hom en moho dag Yesus. Lusud leija Yesus gini dag Krisdus, anai en eigdoc len dau meren gogom augwan.
17Dangga Yesus men meijemouwer dau Abraham terimda edebeij Daud, kaba, merug sisa hobjerogu. Dara men meijemouwer dau Daud terimda leng Babel lahwan len aud meren hancob, kaba, merug sisa hobjerogu. Dara sug len lecicugb dau Babel terimda edougdoc sug Krisdus enin, kaba, en meijemouwer merug sisa hobjerogu toua.
Malaikad enara dou Yusub
(Luk. 2:1-7)
18Yesus Krisdus sug mem ouwadan en, kaba, men meijouhw augwan audud dag gini: Sug sud hom moho Yusub, dara Yesus mem moho Mariam, lan lameicimbuma, kaba, en menuhwohob. Anai Yusub en erba ara debin en dousaba. Doba gini ogdoc Mena Gogoufu men goubesa dous. 19Dangga Yusub areg en moho aiga Mariam enohob, kaba, en ouwan ogod ameiji dougwo eni. Doba en medoc edag beim an Mariam namcir. Hang en emod en moho se simei. Anai en emouwan naugb esmesman en deseino lusud leinyanero.
20Doba sug en auwaman ucina naugb sug en ogod ameiji dougwo en deb, kaba, maman Adehsud men malaikad hom ens enin dou en se augwa. Hanoba en enara, endagai: Yusub, Daud medebeito, igdebes emeba ban an Mariam sug bahwan en dag ban absouwero. Anai godeh hom gebsa mem menuhwa gini, kaba, dau Mena Gogoufu dous. 21Dangga sug en ouwadan meisi hom gini, kaba, ban beija en moho dag Yesus. Anai enin dous eng emeigdoc men lusud laugwan dau meren sesar augwans.
22Aremer augwan gini esogwesa dau areg Allah enara ogdoc Yesaya deb nosohob, endagai: 23Ban bemeiya gidob hom gemebarebma, en menuhwa, en ouwadan meisi hom, kaba, ban beija en moho dag Imanuel. Gini leija dag Allah eigtou desij mamanohob.
24Dangga sug Yusub eisa dau atoudohob, kaba, en eicara aimo dau areg Adehsud men malaikad enara dou enohob. Hanoba en ahwan Mariam dag en mesouwa misen toua. 25Doba en emeici Mariam terimda en ouwadan meisi hom gini dauwahabi. Dangga sug en ouwadanohob, kaba, Yusub eija godeh gini en moho dag Yesus toua.

Currently Selected:

MATIUS 1: INOSOU

Highlight

Share

Copy

None

Want to have your highlights saved across all your devices? Sign up or sign in

YouVersion uses cookies to personalize your experience. By using our website, you accept our use of cookies as described in our Privacy Policy