Luk 6
6
Disaipil balna plawar minik dadakwa kidikayakurupdinin mani yakat
(Mt 12:1-8; Mk 2:23-28)
1Yakurupdinin mani#6.1 Yakurupdinin mani: kidika laih yulwi satadi. as kat, Jisas laih di dahna balna kidika pasyakat lapakna dai. Disainipil balna laih plawar minik kidika dakwi tingnina kau unitak kidika ulwi kakaswadai.#Dt 23:25. 2Bahang fariseo muihni balna buas yaklau diyulwi dakakana:
—¿Ais yulni manna yakurupdinin mani balna yakat yamnin dini awas kidika yamtamanah?
3Jisas yaklau nangnitnalana:
—¿Manna baisa yulta talasmanah ma as kat Devid witing kaltalyang yayamni balna karak yuhdauwi ais yamna kidika? 4Papang ūni yakat kawi plawar busna Papang dini yakna balna kidika duwi kasna, dawak witing karak kaltalyang yayamni balna yakat bik diana dai,#1 Sam 21:1-6. kidika planiwar busna laih sumalyang balna manah kasninna sipdai.#Lv 24:9.
5Dawak baisa minit lakwi aput yulna:
—Muih Walanibis al kidika laih yakurupdinin mani yakat parasni duwi.
Muih al as tingni kusulana dai kidika
(Mt 12:9-14; Mk 3:1-6)
6Yakurupdinin mani ūk kat, Jisas laih Papang yulni sumamalwa ūni yakat kawi sumalna dai. Kidika yakat muih al as tingnipal niningkauh kidika kusulana kat sakdai; 7dawak lā sumalniyang balna dawak fariseo muihni balna kauna Jisas yakat pakwi kaltatalna dai yakurupdinin mani yakat yamni kalyamwarangpa, dawak kaput karak yulni yakna atnin. 8Kaunah Jisas laih, witingna ais kukulwa kidika amanglawadai bahang, muih al tingni kusulana yakat aput kalyulna:
—Lawah dawak kidika papus yakat kasakni sak-awah.
Muih al kidika laih yaklauwi kasakni sakdai, 9dawak Jisas yaklau ūk balna yakat aput diyulna:
—Manna yakat yul as manayultik dakaki ki: ¿Ais dini kidika yamnin sipyah yakurupdinin mani yakat: di yamni kidika kidik awaskat di dutni kidika? ¿Muih sangnika as laihwi yaknin kidik awaskat daukalpamnin?
10Usnit kat yaihnit yakat muih balna awaihdak bangdai yakat ditalna, dawak muih al dai kidika yakat aput kalyulna:
—Tingma kidika uhrtah.
Muih al kidika laih kaput yamna, dawak tingni kidika laih yamni kalnadai. 11Kaunah ūk balna kidika laih uba palni kulninna daukakalna dai dawak yulbauwi tatalna dai Jisas niningyakat ais yamninna sip karangpa.
Jisas yaklau apostel balna 12walwi yakna kidika
(Mt 10:1-4; Mk 3:13-19)
12Kidika mani balna yakat, Jisas laih asang as kau kiunadai minityulna atnin, dawak pukta naini bitik Papang yakat minityulna dai. 13Ma payahlana mani kat, disainipil balna yakat diyulwakat uina, dawak witingna kaupak 12 kidika walwi yakna dai, kidika balna laih apostel dipakna dai. 14Adika balna dai: Saiman, witing laih ayangni ūk bik paknadai Pita; Andru Saiman wirahni; Jims, Jan, Pilip, Bartolomé, 15Matyu, Tomás, Alfeo walanibis Jims; rahmni yulni kalbauyang Saiman kidika, 16Jims walanibis Judas, dawak Judas Iscariote kauna, Jisas yakat malni kau īna kidika.
Jisas yaklau muih mahni yakatdisumalna kidika
(Mt 4:23-25)
17Jisas laih witingna karak kalpakwi asang kaupak yaklakna dai dawak sau langni as kau watnadai. Kidika pāni yakat witing usnit uiyang balna dawak muih ūk balna bik mahni kalududuhna dai Judea dawak Jerusalén sauni kaupak dawak Tiro dawi Sidón kumani kung muihni balna kauna. Witingna laih Jisas sumalwa kidika dakana uinadai dawak sikninanis kaupak yamni diyamnin yulni bik uinadai. 18Spirit dutni yaklau diyamwakat dadauwa dai kidika bik balna bik yamni diyamwadai. 19Kaput bahang muih bitik laih Jisas yakat laihnin kukulwadai, kat muih bitik yakat witing parasni duwa yakaupak yamni diyamwadai kidika yulni.
Alasna atnin lani dawak alasna awasatnin lani kidika
(Mt 5:1-12)
20Jisas laih disainipil balna yakat ditalwi, aput diyulna:
“Manna mamaknakunni kidika laih alasna ismangnalak ki, kat Papang king kāwa sauni kidika laih manna dimana bahang.
21“Manna laih alasna ismangnalak ki warmani yuh mana kidika, kat manabuhng ismangnalak karang bahang.
“Manna laih alasna ismangnalak ki warmani aidamana kidika, kat usnit kat king āwanama bahang.
22“Manna laih alasna ismangnalak ki muih Walanibis al yulni muih balna yaklau dutni manayamwi, manakangwi yakwi dawak ayangmana daukakalwarang kidika sihm di dutni as kapat.#1 Pi 4:14. 23Muih mahni alasna alahwanauh kidika mani, kat manna laih kisang yakat warkmana minit nuhni as dutanama bahang; kat sihm kaput dutni diyayamna dai prapit balna yakat, kidika muihni balna muihnina bararak yaklau.#2 Cr 36:16; Ap.w 7:52.
24“Kaunah ¡manna di duyang balna mana kidika laih dutni palni awanama, kat manna laih alasmanana lani kidika uman dunamana bahang!
25“¡Manna warmani manabuhng ismangnalak kidika, dutni palni awanamaki kat yuh dautanama bahang!
“¡Manna warmani aramana kidika, dutni palni awanamaki, kat kulnamna bukwakat aidanama bahang!
26“¡Muih bitik yaklau manna ayangmana nuhni yayamwarang mani kat, manna laih dutni palni awanamaki, kat kidika muihni balna muihninabararak balna laih kaput yayamwadai prapit dauh balna yakat!
Manikingkauh yaklalauwa balna yakatdalani talnin lani kidika
(Mt 5:38-48; 7:12)
27“Kaunah manna yadakamana balna yakat manayultayang: Namangnakauh yaklalauwa muihni balna yakat dalani ditalnauh, dutni manayayamwa balna yakat yamni diyamtanauh, 28lamanatutuhwa muihni balna yakat blis diyamtanauh, dutni manayayamwa muihni balna yulnina mamatna yultanauh. 29Muih as yaklau muhma labanni yakat mawiswarang kat, ūk kidika bik kalatah; dawak muih as yaklau kalsuruhmnam dini kidika madakyakwarang kat, prakma kidika bik datang kat duwi kiwang. 30Muih as yaklau di mayulwarang kat, kalatah, dawak muih as yaklau man dīma kidika madakyakwarang kat, kalyulwinih. 31Manna muih balna yakat yamni yamtanauh, muih ūk balna yaklau manna yakat yamni manayamnin dukih manawa kapat.#Mt 7:12.
32“Angdika muihni balna yaklau manna yakat dalani manatatalwa muihni balna yakat manah dalani talnama kat, ¿ais as yamni yamtamanah? Dutni yamyang muihni balna manah kaput yayamwi. 33Dawak angdika muihni balna yaklau manna yakat yamni manayayamwa yakat manah yamni diyamtanama kat, ¿ais as yamni yamtamanah? Dutni yamyang muihni balna manah kaput yayamwi. 34Dawak angdika muihni balna yaklau manna yakat di as mananin muihni balna yakat manah di as wayaki kalatamana kat, ¿ais as yamni yamtamanah? Dutni yamyang muihni balna manah di wayaki kalyuyuwi, muih ūk kaupak duna atnin yulni. 35Manna laih namangnakauh yaklalauwa muihni balna yakat dalani ditalnamna ki, yamni diyamnamna ki, dawak di wayaki dianamna ki witingna kaupak di as bik dunin tahatas. Kaput laih manna mamatna kidika nuhni karang, dawak bik Papang makau sakkidika walanibis balna awanama, dutni muihni balna yakat bik dalani ditalwa kidika. 36Manna dalani lani dutanauh, Papangmana dalani lani duwa kapat.
Muih ūk balna yakat lanina yamnin awas
(Mt 7:1-5)
37“Manna muih ūk balna yakat yulwi lanina yayamwinih, dawak Papang yaklau manna yakat lamana yamwas karang. Muih ūk balna yakat pāt ahawinih, dawak Papang yaklau manna yakat pāt mana-awas karang. Muih dutni datanangkat diswang dawak Papang yaklau dutmana dawak diswarang. 38Muih ūk balna yakat di diatanauh, dawak Papang yaklauwi manna yakat manawarang. Pamanakit yakat mahni yamni, itis, dawak bung manawarang. Manna lawa muih ūk balna yakat ais kau kulta talnama kidika, sihm kidika kau Papang yaklauwi manna yakat manakulwi talna karangki.”
39Jisas yaklau adika libitwi talna karak diyulna dai: “¿Ais muih as minikpa di talwas kidika muih ūk minikpa di talwas yakat tanit kanin sipkatpah? ¿Pasulihni as kau albupak uiwas karangyah?#Mt 15:14. 40Disaipil as bik maestro minitkau awaski:#Mt 10:24-25; Jn 13:16; 15:20. skulni balna saran laihwarang kat laih sihm witing maestro kapat kalwarang ki.
41“¿Ais yulni man wirahma minikpa yakat di yayahni duwa kidika talamahn, dawak man mamakpa yakat pan sakkidika laih talasdata? 42Dawak man silp mamakpa yakat pan sakkidika amanglatasman kat, ¿amput wirahma yakat aput kalyultamahn: ‘Yang wirahki, mamakpa yakat di yayahni dutaman kidika yatang kat yaktik makuh?’ ¡Sins dis! Man mamakpa yakat pan sakkidika tatuna yaktah, dawak kaput laih man wirahma minikpa kau di yayahni sakkidika yamni lāih tala yakma.
Pan kidika laih minik munahtalwi amanglawi
(Mt 7:17-20; 12:34-35)
43“Pan yamni as bik diski minik dutni yaknin, dawak pan dutni as bik diski minik yamni yaknin. 44Pan bitik laih minik munah taldi amangladi:#Mt 12:33. ani damni minik kidika wakal kaupak yakdaski, dawak wain minik kidika bik pan wakal kaupak anadaski. 45Muih yamni kidika laih di yayamni balna kidika yulwi kat yamni kidika laih witing isning yakat sakbahang, dawak muih dutni kidika laih di dudutni balna kidika yulwi kat di dutni kidika laih witing isning yakat sakbahang. Bahang ismang yakat ais dini minit bayakwa kidika laih tamapas kidika yulwi.#Mt 12:34.
Ū rahni bu yulni kidika
(Mt 7:24-27)
46“¿Ais yulni manna, ‘Dawan Dawan’ yatimanah, dawak yang manayultayang kidika laih yamtasmanah? 47Angdika muihni yang yakat kaiwi, yadakawi dawak ais kalyultingkat yamwa kidika laih, sihm wais kapat kidika manayulki ki: 48sihm muih al as ū as paknin kat tatuna pāni sulihni balna kidika tuhni kuhrna, dawak ū kal balna kidika laih kipala minityakat ukna dai. Was nuhni āna mani kat, was kidika laih ū yakat parasni kakna dai, kaunah sip kalitikwas dai, kat yamni yamna dai kidika yulni. 49Kaunah yang yultayang kidika dakawi kaput yamwas muihni kidika laih, sihm muih al as sau minit yakat ūni pakwi kalni balna yamni ukwasdai kidika kapatki; dawak was nuhni āwi ū yakat parasni kakna mani kat, bukkiwi bitik daukalna dai.”
Currently Selected:
Luk 6: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998