Josué 1
1
Papang yaklau Josué yakat kiunin kalyulwi
1Dawan dini yamyang, Moses dauna usnit kat, Dawan laih Nun walanibis al dawak Moses tingnisut laihyang Josué karak yulbauna dai, dawi kalyulna:
2“Yang diki yamyang Moses dauna bahang, waralaih Jordán wasni man daklawanam ki, Israel tawanni balna bitik karak, manna yakat sau manaki kidika yakat yawanamna. 3Moses yakat pramis kalyamnayang kaput, yang lawik sau manaki ki manna kalmana ataknamna kidika. 4Kauhmak wanilang kaupak sau kiwa kidika dawak Líbano asangni kaupak Eufrates wasni nuhni kat kidika manaki ki, hitita balna saunina kidika bitik Mediterráneo kumani kat. 5Muih as bik mamat bayakwas karang sangmaka#Dt 11:24-25. bitik yakat, dawak yang laih man karak awakiki Moses karak yang dai kapat, dawak marumhtik bik madatas awakiki.#Dt 31:6,8; Hib 13:5. 6Kulnam dadasni dutah dawak bik barangni#Dt 31:6,7,23. kultah, man lawa sau wayahyakta diama ki adika tawanni akat, kat adika kuduh di pahni yang lawik man muihmabararak balna yakat dianik pramis yamnayang dai kidika. 7Di aslah mayultayang kidika laih kulnam dadasni dutah dawak bik barangni kultah, dawak yang diki yamyang Moses yaklau la balna mana kidika bitik yamtah. Amput yulwa kidika kaput yamtah man ais yamtaman balna kidika bitik yakat yamni manah makalahna atnin yulni. 8Papang lāni wauhnitaya yakat ais yulwa kidika wat wat lamta yamtah ban kaput, dawak kidika yakat madah dawak pukta kulta talah, ban kaput yamna atnam yulni kidika ais yamnin yulwa kidika. Kaput laih ais yamma balna bitik kidika yamni manah makalahwarang ki. 9Yang lawik masihtayang kulnam dadasni dunam dawak bik barangni atnam. Yamaduwinih dawak bik kulnam buknin awaski kat yang, man Damawan dawak Papangma yang adika, man karak awakiki angkat angkat yawama kidika.”
Josué laih ridi kalahwi kalbauwi dakyakna atnin
10Bahang Josué yaklau tawan tanituna balna yakat yamnin dipakna dai: 11“Ū lababanni balna bitik yakat yawanauh dawak bitik yakat diyultanang kat kasnin dini balna ridi yayamwang, kat ma bas pasyakat Jordán wasni kidika madaklawarang ki Dawan mayang Mapapangki yaklau sau mayawarang kidika yakat pa duna atnin yulni.”
12Josué witing Rubén sulani balna yakat, Gad sulani balna yakat dawak Manasés sulani balna papuswayah kidika yakat bik yuldibauna dai, dawak aput diyulna:
13—Manna ismangna aitanauh Dawan dini yamyang Moses yaklau ais yulni manasihna kidika, Dawan, manna Papangmana yaklau adika sauni manawakat urupdanama ki manatna kidika. 14Manna yalmana balna, walamanabis balna dawak tingmanalau balna bik adika sauni akat datanauh, Moses yaklau Jordán kaupak ma kilwa niningkauh manana yakat. Kaunah muih ahal kalbaunin sipmana kidika bitik kalbaunamna dini balna kidika duta wirahmana balna tanitna yakat yawanauh, ilp kalana atnamna yulni, 15Dawan yaklau witingna yakat yakurupdinin pāni as diawarang kat, manna yakat manana kaput, dawak witingna bik didawan kakalwarang kat Dawan yaklau sau diawarang kidika. Usnit kat manna saumana yakat nawatta yawanamna sip karang Jordán wasni kaupak ma kilwa niningkauh yakat, adika sauni akat barang dunamna yulni Papang dini yamyang Moses yaklau manana kidika.#Nm 32:28-32; Dt 3:18-20; Jos 22:1-6.
16Dawak witingna yaklau nangnitlalana:
—Ais yamnin yanayulnaman kidika bitik yamtanaki ki, dawak bik angkat pāni yanasihma kidika yawanaki ki. 17Ban kaput atnin yakat yulma dakanaki ki, muhnilau kau Moses yakat yulni dakanayangna dai kaput. Di aslah yultayangna kidika laih Dawan man Papangma kidika man karak kawang sihm Moses karak dai kaput. 18Angdika muihni man namangkauh yaklauwarang kidik awasbik yamnin yultaman kidika yakat yamwas karang laih dauna karangki. Kulnam dadasni duna atnam dawak barangni kulna atnam kidika manah mayultayangna.#Nm 27:20; Dt 34:9.
Currently Selected:
Josué 1: SUMU
Highlight
Share
Copy
Want to have your highlights saved across all your devices? Sign up or sign in
Biblia Sumo
Texto © Sociedad Bíblica de Nicaragua 1998