Matewu 1
BEC2016

Matewu 1

1
Lihunzu la Jesu Kristu
(Luka 3:23-38)
1Dibhuku da liveleko la Jesu Kristu, Mwanana wa Dhavhidha, Mwanana wa Abrahamu.
2Abrahamu a to veleka Isaake, Isaake a to veleka Jakobe, Jakobe a to veleka Judha ni vananda vakwe, 3Judha ni Tamari va to veleka Farezi ni Zera, Farezi a to veleka Esroni, Esroni a to veleka Aramu, 4Aramu a to veleka Aminadhabhe, Aminadhabhe a to veleka Naasoni, Naasoni a to veleka Salmoni, 5Salmoni ni Rahabhi, va to veleka Bhowazi, Bhowazi ni Rute va to veleka Obhedhi, Obhedhi a to veleka Jese.
6Jese a to veleka mfumeli Dhavhidha, Dhavhidha ni msikati wa Uriya va to veleka Solomoni, 7Solomoni a to veleka Robhowamu, Robhowamu a to veleka Abhiya, Abhiya a to veleka Asa. 8Asa a to veleka Josafati, Josafati a to veleka Joramu, Joramu a to veleka Uziya, 9Uziya a to veleka Jothamu, Jothamu a to veleka Akazi, Akazi a to veleka Ezekhiya, 10Ezekhiya a to veleka Manasi, Manasi a to veleka Amoni, Amoni a to veleka Josiya, 11Josiya a to veleka Jekoniya ni vananda vakwe, mbimo yi va ka Israyeli va nga payulwa ve yiswa Bhabhilona.
12Msana ka kupayulwa ve yiswa Bhabhilona, Jekoniya a to veleka Salatiyeli, Salatiyeli a to veleka Zorobhabheli, 13Zorobhabheli a to veleka Abhiyudhe, Abhiyudhe a to veleka Eliyakimu, Eliyakimu a to veleka Azori, 14Azori a to veleka Sadhoki, Sadhoki a to veleka Akimi, Akimi a to veleka Eliyudhe, 15Eliyudhe a to veleka Eleyazari, Eleyazari a to veleka Matani, Matani a to veleka Jakobe, 16Jakobe a to veleka Josefa, mwamna wa Mariya, awu a nga veleka Jesu, a dhanwako ku i Kristu.
17Ngu toneto, kukhukhela ka Abrahamu kala ka Dhavhidha, ndigumi da tiveleko ni mune. Se kukhukhela ka Dhavhidha kala ka mbimo ya kupayulwa ve yiswa Bhabhilona, ndigumi da tiveleko ni mune. Kukhukhela kupayulwani ka kuyiswa Bhabhilona kala ka Kristu, ndigumi da tiveleko ni mune.
Kuvelekwa ka Jesu Kristu
(Luka 2:1-7)
18 # Wona ni ka: Luk. 1:27. Kuvelekwa ka Jesu Kristu ku mahisile tiya: Mariya, Mame wakwe, a manekile a di thembisilwe ngu Josefa; se va sinzi kutekana, a manekile a di ni txirumbu ngu mtamo wa Moya wo Sawuleka. 19Aniko Josefa, mwamna wakwe, ngako i nga ti m'thu wo lulama, asi ti lavi ku mu bhumisa phungo yo biha, a to alakanya ku mu leka, na ti si ziwi. 20Na a di pimisile toneto, ha wukoheni a to lora a txi wona Ngelozi ya Mkoma yi nga mu gela tiya:
“Josefa, mwanana wa Dhavhidha, u nga thave kutekana ni Mariya, kasi kuva msikati wako, nguko txirumbu txi a ku natxo, txi ta ngu ka Moya wo Sawuleka; 21a na veleka mwanana wa m'zambi, awu u no m'raya ditina daku i Jesu, nguko Ene a na hanyisa ngamu yakwe ka sionho sawe.”
22Totshe tiya ti mahekile kasi kutatiseka atile Mkoma a nga womba ngu mprofeti, a txi khene:
23“Wotuma a na mana txirumbu
e veleka mwanana wa m'zambi,
awu a no raywa ditina daku i Emanuweli,
(Emanuweli, ati ti wombako ku ‘Txizimu txi na ni nathu.’ ”)
24Mbimo yi Josefa a nga wuka ngu wukoheni a to maha nga ti Ngelozi ya Mkoma yi nga mu gelisa tona; a to teka msikati wakwe kasiku e zumba nayo. 25#Wona ni ka: Luk. 2:21. Kambe kha nga za e zivana nayo, kala mbimo yi ene a nga veleka mwanana, awu a nga m'raya ditina daku i Jesu.

A Bíblia em Txitxopi © Bible Society in Mozambique, 2016.


Learn more about Bhiblia Yo Sawuleka