MATIUS 1
LAIASC

MATIUS 1

1
MATIUS
Aeapome Allah Akot Atakam
Yesus Kristus arfais owe bajititimar atakam
(Luk. 3:23-38)
1Ara atakam, Yesus Kristus arfaisomar juas bajititimar atakam. Armat Ipit Daut wurpisin. Daut Abraham wurpisin.
2Emesare, Abraham andep Ishak aren. Ishak andep ere, Yakub aren. Yakub aoorey jii ere, Yehuda aruum aren. 3Yehuda aoorey jii ere, Peres anama Sera aren. Era ipit amnuk arsoot ere, Tamar aren. Me Peres andep ere, Hesron aren. 4Hesron andep ere, Ram aren. Ram andep ere, Aminadab aren. Aminadab andep ere, Nahason aren. Nahason andep ere, Salmon aren. 5Salmon andep ere, Boas aren. Boas arsoot ere, Rahab aren. Boas andep ere, Obed aren. Obed arsoot ere, Rut aren. Obed andep ere, Isai aren. 6Isai andep ere, raja ipit juas Daut aren. Daut andep ere, Salomo aren. Salomo arsoot ere, Uria bonak ataete taot aren. 7Me Salomo andep ere, Rehabeam aren. Rehabeam andep ere, Abia aren. Abia andep ere, Asa aren. 8Asa andep ere, Yosafat aren. Yosafat andep ere, Yoram aren. Yoram andep ere, Usia aren. 9Usia andep ere, Yotam aren. Yotam andep ere, Ahas aren. Ahas andep ere, Hiskia aren. 10Hiskia andep ere, Manasye aren. Manasye andep ere, Amon aren. Amon andep ere, Yosia aren. 11Yosia andep ere, Yekhonya areotaisim aren. Ere, Babel owe, Israel owe, era Babel tapirmi jiisi atuumosomes bare aren.
12Are era owe jiisi atuumosomes ere, Yekhonya, Sealtiel aritipit aememen. Sealtiel andep ere, Serubabel aren. 13Serubabel andep ere, Abihud aren. Abihud andep ere, Elyakim aren. Elyakim andep ere, Asor aren. 14Asor andep ere, Sadok aren. Sadok andep ere, Akhim aren. Akhim andep ere, Eliud aren. 15Eliud andep ere, Eleasar aren. Eleasar andep ere, Matan aren. Matan andep ere, Yakub aren. 16Yakub andep ere, Yusuf aren. Me Yusuf ere, Maria armoen. Me Mariaam Yesus ajisipetiien. Me Yesus ere, juas Kristus.
17Emesare, Abraham awasieme, wanam Daut awasieme bare ajiire, anom owetambwey 14en. Erarawa, Daut awasieme, wanam Babel owe Israel owe Babel tapirmi jiisi atuumosomes bare ajiire, anom owetambwey 14en. Erarawa, Babel owe, Israel owe, Babel tapirmi jiisi atuumosomes, wanam Kristus ajisamse bare ajiire, anom owetambwey 14en.
Yesus Kristus ajisamse atakam
(Luk. 2:1-7)
18Emesare, Yesus Kristus ajisamse atakam emes are: Arsoot Maria aren. Bonaknak ere, armat taot owe juas Yusuf oorey bajuut aemapen. Me, are era ipit bajuut apok ere, Allah Jip Maria jak asumapomen. Mariaam ajak asiape aporen. 19Me, ajuutto ipit juas Yusuf, Musa Basakamtam Atakam ji bae ipitin. Are era taot damke bakamapom potan. Erarawa are era taot bataet apok, emes atakam tiruu asakamtiien. 20Armat ipit emes bimak binip atetaramen. Emes bimak binip atetaramerawa, ise atamwiten. Ise atamwiterawa, are Tuhan amalaikat bi aporen. Era malaikatam atakam Yusuf akoromen. “Yusuf! Wore Daut wurpis. Wore Maria bataet ombare bas. Era jak asiapmar ere, Allah jip aeme pak are. 21Armat taot jii jipit ajisipetiitem. Era jii ere, aowe, adosa ajortaertem. Erarawa wore era jii juas Yesus aemtiitemarem.” Malaikat emes atakam aesimen.
22,23Bonaknak ere, Tuhan, atakam aatakam bakoretam ipit akoromen. Era ipit arawa, era atakam asamot owe akoretamen: “Tamane ban amsam apok taot jak asiaptem. Are jii jipit ajisipetiitem. Owe, Armat Ipit, juas Imanuel aemtiitemas.” Emes atakam aesimen. Emesare, owe era pak takes era atakam jipu aemesen. “Imanuel” daatakam jow bauumamtaer, “Allah da takan ajamememmaro.”
24Emesare. Yusuf ise awasiten. Ise awasiterawa, are Tuhan amalaikat atakam jipu aemen. Are Maria ataeren. 25Armat ipit ere, aremo, era jii ajisipetiie bare ajiire, damo bajukun apoknaken. Emesare, Yusuf era jii juas Yesus aemtiien.

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.