San Juan 21
21
1Chi gudeed guc de cosré, Jesús gubíi bliulony lo de xpɨnny ruxchu nis xte Tiberias. Ne squé xquel bliulony lodeb: 2Deni dxasaa Simóny Bed, cun Mally ni raipdeb Cuach, ne cun Natanael ni zá Caná ni ná nez Galilea, cun de llingaan Zebedeo ne cun stiop de xpɨny Jesús. 3Chiy raipy Simóny Bed laadeb:
—Nare chanaaza beld.
Laadeb cuaibdeb:
—Néza dunnɨ izan.
Chiyru zédeb ax bieepydeb láani barcu, per guxinqui xíteete quɨt ninaaztideb. 4Chi bragueel deni bieeny chiy bdiacá Jesús ruxchu nisqui, per de xpɨnnyqui quɨt gántideb dec laaniy. 5Chiy gunabdiidx Jesús laadeb:
—De hombreen, ¿ta gady xi inaaztɨ?
Laadeb cuaibdeb:
—Xíteete.
6Chiyru raipy Jesús laadeb:
—Gulcuaa tarray xtentɨ lad naldí xte barcu, te inaaztɨ beld.
Ziy xquel baandeb, parzi chiguld niclɨ quɨt relee cuéedeb tarrayqui tant zieny beld nuu láanqui. 7Chiy xpɨny Jesús ni quesentiand rcaazny, raipbɨ Bed:
—¡Dad Jesúsiy!
Cuantpac bindiag Simóny Bed ziy, as gudacubɨ xabloyaab ni guléeb par canaazbɨ beld, ax desde láani barcuqui btesbɨ axtquɨ lo nis. 8Per dzɨ xoop de xpɨny Jesús láani barcu bdzɨndeb ruxchu nisqui. Rxiubiudeb tarray ni dxaa beldqui, te pur zecti stuby gayuaa metrɨ rieedx idzɨndeb par ruxchu nis horqui. 9Deni bdzɨndeb ruxchu nisqui, gunádeb cayac gui ruy ax zuub tuby beld lo guiqui, cun guechtily. 10Jesús raipny laadeb:
—Gultané tuby tiop beld ni teste gunaaztɨ.
11Chiyru bieepy Simóny Bed láani barcuqui, ax bxiubiudeb tarray ni dxaatec de beldroo axt ruxchu nisqui. Tuby gayuaa cincuenta y tres beld nuu láanqui. Ne masquɨ zienmɨ, per quɨt niallaati tarrayqui. 12Chiy raipy Jesús laadeb:
—Gultaa te iquiintɨ.
Ne nic tuby de xpɨnny quɨt riallti inabdiidx laany tú laany, te pur nándeb dec laaniy Jesús. 13Chiyru gubii Jesús, cuáany guechtilqui bdeedny laadeb, ziytiziac baanny cun beld.
14Niy guc chon güelt ni bliulo Jesús lo de xpɨnny deni gubíi gubánny.
15Chi gulull bquiindeb chiy raipy Jesús Simóny Bed:
—Simóny, llingaan Juany, ¿ta rcaazrupacu nare que iraru de ni rguiuu rurén?
Bed cuaibbɨ:
—Ɨɨ́, Dad, laabiu nánbiu dec rcaaza laabiu.
Ax raipy Jesús laab:
—Bcualo de lliliin xtena pɨs.
16Chiy gubíi gunabdiidx Jesús laab:
—Simóny, llingaan Juany, ¿ta rcaazpacu nare?
Bed cuaibbɨ:
—Ɨɨ́, Dad, laabiu nánbiu dec rcaaza laabiu.
Ax raipny laab:
—Bcualo de llíily xtena pɨs.
17Ni rion güelt gubíi gunabdiidx Jesús laab:
—Simóny, llingaan Juany, ¿ta rcaazu nare?
Bed nalas bziienbɨ pur ni gunabdiidxny laab chon güelt la rcaazbɨny. Chiyru cuaibbɨ lony:
—Dad, laabiu nánbiu irate. Ne laabiu nánbiu dec rcaaza laabiu.
Jesús raipny laab:
—Bcualo de llíily xtena pɨs. 18Liú nánnu dec chi gucu bniinru gudacu de xabu, güiu ruttisy rcaazu. Per chi anoo bɨngul, sldiuu de noo ax irɨnquɨ ni iguacu de xabu ne zenéb liú rut quɨt rcaaztiu chuu.
19Deni gunii Jesús de diidxré, ziy xquel caguixteeny xa xquel gaty Bed par izubyaab Dios pur guelguty xtenbɨ. Chiyru raipny laab:
—¡Quedanald nare!
20Chi bziecquilo Bed, gunáb zanald stuby xpɨny Jesús ni quesentiand rcaazny, ni guzub cueeny chi baandeb cen, lagac ni gunabdiidx laany, túngui gún entriagu laany. 21Ax chi guná Bed zanald xpɨnnyqui, chiy gunabdiidxbɨ Jesús:
—Dad, laab, xa xquel teedbɨ.
22Jesús cuaibny:
—Belati icaaza zbánybɨ axt chi yaicquia lo guɨchliu stuby, niy aríianiy pur naa. Liú quedanald nare.
23Deni gunii Jesús ziy guzulo brɨɨch diidx lo iraru de xpɨnny dec bnietqui quɨt gatytib. Per Jesús quɨt guniitiny dec quɨt gatytib sino que laany guniiny: “Belati icaaza zbánybɨ axt chi yaicquia lo guɨchliu stuby, niy aríianiy pur naa.”
24Ne lagac xpɨnnyquiy bcuaa de cosré. Ax nánnɨ dec didxldí ná ni rniib.
25Zienguilliúru de ni baany Jesús ne belati nicá tubyga pur tubygani, rliluaa niclɨ quɨt galdti lo guɨchliuré chúu de librɨqui. Amén.
Currently Selected:
San Juan 21: zab
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.