San Juan 13
13
1Anste pascu, Jesús nánny dec azeddzɨny hor ni ibicány lo guɨchliuré par chanany Xtadny Dios. Laany quesentiand bcaazny de xpɨnny lo guɨchliuré, ne zélaa rcaazny laadeb.
2Lalzi ni cayundeb cen, biiu bɨndxab láani Judas Iscariote llingaan Simóny par gúnbɨ entriagu Jesús. 3Per laany nánny dec irate absáan Dios laznaany ne nánzacny dec pur Dios zéedny ne lo Diosza ná par yaicquiny. 4Pur ningui lalzi ni cayundeb cenqui, Jesús güesuny. Chiy guléeny xabloyaany ax bldiibny tuby tuay láanny. 5Chiyru gudáany nis láani tuby nchaa par guzulo caguiibyny nii de xpɨnny ax rsbizny niideb cun tuay ni llii láanny. 6Chi zétiibny nii Simóny Bed, ax raipbɨ laany:
—Dad, quɨt riáldti quiibbiu de niia.
7Jesús cuaibny:
—Anre quɨt racbeetiu xi zelo ni cayuna, per teru chúu chi gacbiiu.
8Chiy raipy Bed laany:
—Per nare quɨt chúuti dxi isaana quiibbiu niia.
Jesús ax cuaibny:
—Belati quɨt quiibia de niiu, aquɨtru nátiu xpɨnnia.
9Chiyru raipy Simóny Bed laany:
—Güén pɨs, Dad, per gati de niistia sino que néza de naa ne quiaa.
10Per Jesús raipy laab:
—Ni teste gudaz, de niisbɨ rquiiny chaady te pur iduibtecbɨ nania. Ne laat naniactɨ, masquɨ gati iratit.
11Laany guniiny “masquɨ gati iratit” pur ni nánny tú gún entriagu laany.
12Chi gulull gudiibny nii de xpɨnny, chiy gubíi gudacuny xabloyaany. Chiyru guriny lo mɨlly stuby ax raipny laadeb:
—¿Ta racbeet xi zelo ni bannía laat? 13Laat rniit nare Maistrɨ ne Dad, ne guldíctɨ narenquɨpacay. 14Anre nare ni naa Maistrɨ ne Dad agudiibia niit, ziygacza riáld gúntɨ, quiibytɨ nii de saat. 15Abliuua laat xa ná par gúntɨ, te par gúntɨ zectiziac ni abaania. 16Laat nanldít dec nic tuby mos quɨt sacti mazru que xlámni nicza ni re lo xcuend tu stuby quɨt sactib mazru que ni bxiaald laab. 17Dichos laat belati racbeet ne gúntɨ zec ni caniia.
18’Quɨt caniitia pur irat te pur nare nánna tú de aguliaa. Per ná par gac zec ni rnii lo xquiits Dios rut rnii: “Lagac ni rquinné nare, abiecquilob contrɨ naa.” 19Caguixteetellga lot te par chi gac ziy ax chaldilaaztɨ dec narenquɨpacay ni aguniia laat. 20Rguixteldía lot dec elquɨ ni gún cuend ni ixiaalda, laab cayunbɨ cuend nare. Ne ni run cuend nare, laab cayunbɨ cuend ni bxiaald naa.
(Mt. 26:20-25; Mr. 14:17-21; Lc. 22:21-23)
21Chi gulull gunii Jesús ziy, quesentiand nalas bziienny, ax gudixteeny lodeb raipny laadeb:
—Rguixtiia lot dec lagac tubytɨ gún entriagu naa.
22Chiy guzulo rguiaa lo saa de xpɨnny. Quɨt racbeetideb tú pur caniiny. 23Per tuby xpɨny Jesús ni quesentiand rcaazny, zubbɨ cueeny chi cayundeb cenqui. 24Ax baany Simóny Bed seny lob par inabdiidxbɨny tú pur caniiny. 25Chiyru gubigaxbɨ cuee Jesús ax gunabdiidxbɨny:
—Dad, ¿túngui gún entriagu laabiu?
26Jesús cuaibny:
—Iguadxa lday guechtily. Chiy ni ideedani, laabɨy.
Ax bguadxny lday guechtily chiy bdeednyni Judas Iscariote, llingaan Simóny Iscariote.
27Horac ni cuáa Judas guechtilqui, biiu bɨndxab láanbɨ. Chiy raipy Jesús laab:
—Ni ná par gúnu, gueeldzi baanni.
28Per nic tuby de xpɨnny ni zubnény lo mɨlly quɨt gucbeeti xínii raipny laab ziy. 29Ne cun laznaa Judas nuu bols mɨly, parzi nuudeb baandeb xgab dec nuudxa xi gunabee Jesús laab chasiib par laní, o nuudxa xi chadeedbɨ de ni ná probeen. 30Chi gulull bquiiny Judas guechtilqui, as bdiiagacbɨ. Per agac biiu guxiniy.
31Deni bdiia Judas, chiy gunii Jesús:
—Abdzɨny hor ni yíany xa ná guelrnabee ni nap Bniety ni bxiaald Dios, ne pur laany zacbeet xa ná guelrnabee xte Dios. 32Ne zec ni iliuu Bniety ni bxiaald Dios xa ná guelrnabee xte Dios, ziyza sliuuza Dios xa ná guelrnabee ni nap Bniety ni bxiaaldny, ne ziub chagac ziy. 33De lliinia, astuudxzi suguanía laat. Laat sguíilytɨ nare, per zectiziac ni raipia de bniety Israel rniizaca laat an: quɨt xo satit rut cháa. 34Ningui gulchané cuend ni iniia laat: Gulcaaz de saat. Zec ni rcaaza laat, ziyza gulcaaz de saat. 35Te pur belati icaaztɨ de saat, ziy xquel gacbee ira bɨnguɨchliu dec xpɨnnia laat.
(Mt. 26:31-35; Mr. 14:27-31; Lc. 22:31-34)
36Chiy gunabdiidx Simóny Bed Jesús:
—Dad, ¿calíll chiabiu?
Jesús cuaibny:
—Rut cháa anre, quɨt xo sanaldtiu nare. Per teru chúu dxi guednaldu naa.
37Ax gunii Bed:
—Dad, ¿xínii quɨt xo sanalda laabiu anre? Ne nare quɨt xi gúnti masquɨ gatia pur laabiu.
38Chiy cuaby Jesús:
—¿Ta guldíu gatiu pur nare? Per naa rguixtiia loo dec anste ni icuarsee bɨdygay, liú pur chon güelt aguniiu dec quɨt rumbeetiu naa.
Currently Selected:
San Juan 13: zab
Highlight
Share
Copy
Want to have your highlights saved across all your devices? Sign up or sign in
© 1995, Wycliffe Bible Translators, Inc. All rights reserved.