Máfíò Máfíò-cèè-ɖɛ̀ɔ̀ jè kɔ̃in-zaìn-zaìn
Máfíò-cèè-ɖɛ̀ɔ̀ jè kɔ̃in-zaìn-zaìn
Máfíò-cèè-ɖɛ̀ɔ̀ tɛ̀mɛ̀ìn kà Jízɛ̀ nyu ma cĩ́ɛ kè ɓá ɖɛ ɓě ɓɛ́ ɔ tɛ̀mɛ̀ìn ma nyɔǔn wɛ̃ɛ jè dyí. Bɔ̃̌ nɔ̀mɔ̀ dyíin ɓɛ́ Kɛ́ɖɛ́ì ɖeín-sí-nyɔ̀ ɓěɔ̀ cɛ̃ɛ mɔ̀ bɔ̃̌ nɔ̀mɔ̀ dyíin ɓá Gèɖèpɔ́ɔ̀ nyɔǔn mú ɖɛ̀ɓɛ̀ jè dyíɛ. Jízɛ̀ mɔ̀ nyɔ tɛ̀mɛ̀ìn ma nyɔǔn dyí. Céè-ɖɛ̀ nìà kɛ tɛ̀mɛ̀ìn kà nyɔ ɓě ɓɛ́ wa kè Gèɖèpɔ́ɔ̀ dè ma wuɖu ɖé dèè-wùɖù sùàɔ̀ kè ɔ ɖieɔ̀ múɛɛ nyu gbo muɛ̀n nyɛ. Nyɔ ɓě ɓɛ́ wa kè Gèɖèpɔ́ɔ̀ dè ma kà wuɖu ɖé dèè-wùɖù sùàɔ̀ múɛɛ mɔ̀ ma Éézùɖùɛ̀-nyɔ̀ ɓěɔ̀, ké ɔ kè cɔ́cì-nyɔ̀ ɓěɔ̀ dè ma wuɖu ɖé dèè-wùɖù ɖìèɔ̀ mú. Jízɛ̀ mɔ̀ Mɛ̀sádyà ɓɛ́ Gèɖèpɔ́ɔ̀ ɖá ma kà nyɛ́nɛ́ɛ. Ɔ mɔ̀ nyɔ kɔ̃̀ mú ɓɛ́ Gèɖèpɔ́ɔ̀ nyu, ké ɖɛ ɓě ɓɛ́ ɔ ɖáìn ma kà nyɔǔn nyɛ́nɛ́ín ɖé dèè-wùɖù sùàɔ̀ múɛɛ kpá ma jǎà kɛ.
Nyɔ céè ma céè-ɖɛ̀ nìà kɛ jè se céè nɔ̄ céè-ɖɛ̀ɛ̀ mú. Ti ɖòɛ̀ ɓaɖaín, nyɔ céè ma kà céè-ɖɛ̀ nìà kɛ mɔ̀ ma Júù-nyɔ̀ ɓě ɓɛ́ wa mɔ̀ ma Kɛ́ɖɛ́ì ɖeín-sí-nyɔ̀ ɓě kɛɛ ɖò. Nyɔ céèà céè-ɖɛ̀ɛ̀ kɛɛ gmɔ̀ ma ɖɛ ɓě ɓɛ́ nyɔ ɖíɛ́ ɓě ɖǎ ma céè kĩ́ín nyɛɛ dya. Dɛ̀ ɓě ɓɛ́ ɔ gmɔ̀ ma kɛɛ ɖò mɔ̀ dɛ̀ ɓɛ́ wa ɖáìn ɖɛ Máfíò ɓɛ́ ɔ mɔ̀ ma àpɔ́sò kɛɛ céè maa.
Céè-ɖɛ̀ɔ̀ dà ɓě m̀ ɓɛ́ìn ɖɛ kò-kò ɓěɛ̀ dyéɛ kɛɛ kɛà kɛ̀
1. Ɖíì-po-po ɔ kè Jízɛ̀ɛ̀ wóɖó-wóɖó. 1:1–2:23
2. Jɔ̃́ɔ́ nyɔ-níɔ-po-nyɔ̀ɔ̀ kũ̀à. 3:1-12
3. Jízɛ̀ɛ̀ níɔ-kpá-kpá kè ɔ mú-dɔ̃̌-dɔ̃̌. 3:13–4:11
4. Jízɛ̀ nyu kũ̀à ɖé Gáɖàɖíì-ɓòɖòɔ̀ kɔ̃. 4:12–18:35
5. Jízɛ̀ sɔ̀ Gáɖàɖíì-ɓòɖòɔ̀ kɔ̃, ké ɔ mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. 19:1–20:34
6. Wíkì hwɛ̀ìn-gbɔ Jízɛ̀ nyu ma kɛ. 21:1–27:66
7. Jízɛ̀ wóɖó gĩɔ, ké ɔ wóɖóìn nyɔǔn ɓě dyí. 28:1-20
Currently Selected:
Máfíò Máfíò-cèè-ɖɛ̀ɔ̀ jè kɔ̃in-zaìn-zaìn: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.