Máfíò 2
2
Nyɔ ɓě sɔ̀ìn ɖé dyóɖó-xwáɖáún-wóɖóìn-naínɔ̀ kɛ
1Jízɛ̀ wóɖóìn ma ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖìà-ɓòɖòɔ̀ kɔ̃ɛɛ mú. Ɔ mɔ̀ ti ɓɛ́ Hɛ́wɔ̀ɖɔ̀ mɔ̀ ma ɓóɖóɔ̀ kã́á kɛ. Púɛɛ, gàa ɖíɛ́ ɓě ɓɛ́ wa cɛ̃́ ma dɛ̀nɛ̀ mɛ́nɛ́ɛ́ ɓěɔ̀ jè mìɔ kɛɛ sɔ̀ìn ma ɖé dyóɖó-xwáɖáún-wóɖóìn-naínɔ̀, ké wa dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. 2Ké wa diè ma ɖɛi, ké wa ɖá, “Dɛ̌ dyú ɓɛ́ ɔ wóɖóà, ɓɛ́ ɔ kéà Júù-nyɔ̀ ɓěɔ̀ kã́á jǔɛɛ nìɛ́? À dyé ɔ dɛ̀nɛ̀-dyùɔ̀ ti ɓɛ́ dɛ̀nɛ̀-dyùɔ̀ wóɖó ma xwáɖáún ɖé dyóɖó-xwáɖáún-wóɖóìn-naínɔ̀ kɛ, ké à ɖǎ dyi, ɓɛ́ à ké ɔ ɓiè.”
3Ti ɓɛ́ Kã́á Hɛ́wɔ̀ɖɔ̀ wɔ̃́ ma ɖɛ nìà kɛɛ, fũ̀à-fṹá nyu ma ɔ mìɔ, ké kǎà nyɔǔn séín ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ nì ma ɖekè. 4Ké Hɛ́wɔ̀ɖɔ̀ ɖá ma sáa-zà-nyɔ̀ kpa ɖɛ séín ɓěɔ̀ kè Gèɖèpɔ́ɔ̀-cèè-ɖɛ̀ dyuò-nyɔ̀ ɓěɔ̀, ké ɔ diè ma wa dɛ̀ ɓɛ́ Kɛ́ɖɛ́ì kɔ̃̀ ɓɛ́ ɔ ké ma kà wóɖóìn nyɛɛ jè dyi.
5Ké wa cɛ̃ɛ ma ɔ gbo, ké wa ɖá, “Ɔ mɔ̀ ɖé Bɛ́fèɖèhɛ̃́ɛ̀-hwɔ̀ɖɔ̀ nìà ɖé Júɖìà-ɓòɖòɔ̀ kɔ̃ɛɛ mú, sepóɛɖé ɖɛ ɓɛ́ kpáá-ɖɛ̀-cɛ̃-nyɔ̀ ɖò cɛ̃ zɔ̃̌ɔ̀ kɛɛ kɛà kɛ̀. Ɔ ɖá,
6‘Bɛ́fèɖèhɛ̃́ɛ̀-hwɔ̀ɖɔ̀ wè, mɔ̀ nìà ɖé Júɖà-ɓòɖòɔ̀ kɔ̃ɛɛ,
m̀ mɔ̀ hwɔɖɔ kpa ɖɛ ɖé Júɖà-ɓòɖòɔ̀ hwɔɖɔ ɓěɔ̀ hwìɛ̀.
Sepóɛɖé ɖé m̀ mú, ɖéɛ̀ nyɔ-wuɖuí-kɔ̃̀-nyɔ̀ ɖò mu sɔ̀ùn,
ké ɔ mu ní nyɔ ɓě mɔ̀à Éézùɖùɛ̀-dyù ɓěɔ̀ kɛɛ dyí gmɔ̀ùn.’ ”
7Púɛɛ, Hɛ́wɔ̀ɖɔ̀ ɖá ma gàa ɓě sɔ̀ìn kà ɖé dyóɖó-xwáɖáún-wóɖóìn-naínɔ̀ kɛ, ɓɛ́ wa ké ma ɖé ɔ gbo mu nyàà. Ké ɔ wɔ̃́ ma ti jɛ́ɛ́ ɓɛ́ dɛ̀nɛ̀-dyùɔ̀ wóɖó ma xwáɖáún wɛ̃ɛ jè. 8Ké ɔ cɛ̃ɛ ma wa gbo, ɓɛ́ wa ké ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ mú mu, ké ɔ ɖá, “Ɓě mu, ɓɛ́ ɓě ké dyúɔ̀ jè dyi gmɔìn nɔ̀mɔ̀ dyíin. Ɓě dyi dyúɔ̀ dyéín, ɓě mɛ nyuɛ ɓɛ́ mɔ́ún ké ɔ jè dyuò, ɓɛ́ mɔ́ún ké mu, ɓɛ́ ḿ ké ɔ ɓiè ɖekè.”
9Ti ɓɛ́ wa wɔ̃́ ma wuɖu nìà kɛɛ, wa sɔ̀ ma dyí, ké wa mu. Púɛɛ, wa dyé ma dɛ̀nɛ̀-dyù ɓɛ́ wa dyé ma kà ɖé dyóɖó-xwáɖáún-wóɖóìn-naínɔ̀ kɛɛ ɖe, ké ɔ nì ma wa dyúa tee, ké ɔ nyini ma dɛ̀ ɓɛ́ dyúɔ̀ nì ma kà kɛ. 10Ké wa zi ma múàǔn kpáuń mìɔ ti ɓɛ́ wa dyé ma dɛ̀nɛ̀-dyùɔ̀ kɛ. 11Ké wa dyá ma gbǒ kɔ̃̀ mú ɓɛ́ dyúɔ̀ kè ɔ ɖe Meɖé nì ma kà kɛ, ké wa dyé ma wa, ké wa taɓa ma kɔ́-dù hwuɖu, ké wa ɓiè ma ɔ. Ké wa kaà ma waà kɔ̃̀ɔ̀-ɖɛ̀ ɓěɔ̀ dyí, ké wa nyí ma ɔ nyíí-ɖɛ̀. Nyíí-ɖɛ̀ ɓěɔ̀ mɔ̀ ma góò kè nyɔ́ún-nɔ̀mɔ̀-ɖɛ̀ ɓě mɔ̀ ma fánákésĩ̀ìn kè mɛ́ɛ̀ kɛ.
12Sɔ̀ìn ɓóɛ gboɛɛ, Gèɖèpɔ́ɔ̀ po ma wa náún ɖé dya-dya mú, ɓɛ́ wa ní kɔ̃̀ ɖà ma ɖé Hɛ́wɔ̀ɖɔ̀ gbo ɖe mu. Ké wa kpa ma hwìè kà kò ɖò, ké wa mu ma wa ɓíɖí ɖe.
Wa gbǔ ké wa mu ɖé Íjè-ɓòɖòɔ̀ kɔ̃
13Ti ɓɛ́ gàa ɓě sɔ̀ìn kà ɖé dyóɖó-xwáɖáún-wóɖóìn-naínɔ̀ kɛɛ ɖǎ ma muɛɛ, púɛɛ, Bounɓoɔ̀ ínjà ɖò wóɖóìn ma Jòsé dyí ɖé dya-dya mú, ké ɔ ɖá, “Sɔ̀ dyí, ɖú dyúɔ̀ kè ɔ ɖe dyí, ɓɛ́ m̀ ké wa xwáɖáún kpáìn, ɓɛ́ ɓě ké ɖé Íjè-ɓòɖòɔ̀ kɔ̃ mu. M̀ mɛ nì ɖé tee ɓɛ́ ḿ ké ti ɓɛ́ m̀ ké ɖé sɔ̀ìn nyɛɛ m̀ gbo cɛ̃ hwɛ̀. Sepóɛɖé Hɛ́wɔ̀ɖɔ̀ muá dyúɔ̀ dyi mɔ́ùn, ɓɛ́ ɔ ké ɔ ɖáɓá.”
14Ti ɓɛ́ Jòsé sɔ̀ ma dyíɛɛ, ɔ ɖú ma dyúɔ̀ kè ɔ ɖe dyí, ké wa kpá ma hwìè xwíníín máaún-kà, ɓɛ́ wa ké ɖé Íjè-ɓòɖòɔ̀ kɔ̃ mu. 15Ké wa nì ma ɖé tee, ké Hɛ́wɔ̀ɖɔ̀ mɛ́ ma. Ɖɛ nìà kɛ kpá ma, ɓɛ́ ɖɛ ɓɛ́ Bounɓoɔ̀ cɛ̃̀ zɔ̃̌ɔ̀ dyììn ɖé ɔ kpáá-ɖɛ̀-cɛ̃-nyɔ̀ ɓěɔ̀ ɖò múɛɛ ké jǎà kpá. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá, “Ḿ ɖá ma ní Dyúɔ̀, ɓɛ́ ɔ ké ma ɖé Íjè-ɓòɖòɔ̀ kɔ̃ sɔ̀.”
Wa ɖáɓá dyú ɓě
16Ti ɓɛ́ Hɛ́wɔ̀ɖɔ̀ dyéɛ ma kà ɓɛ́ gàa ɓě sɔ̀ìn kà ɖé dyóɖó-xwáɖáún-wóɖóìn-naínɔ̀ kɛɛ ɖǎ ma ɔ cáa, ɔ kpá ma dyoɖoún mìɔ. Ké ɔ cɛ̃ɛ, ɓɛ́ wa ké gàa-dyù séín ɓě nì ma ɖé Bɛ́fèɖèhɛ̃́ɛ̀-hwɔ̀ɖɔ̀ɔ̀ kè gbɛ̌ɛ̀ ɓě nì ma ɖé ɔ ɖeiɛ múɛɛ ɖáɓá. Ɔ mɔ̀ dyú ɓě mɔ̀ ma zɔ̃ sɔ̃́ kè nyɔ ɓě séè ma zɔ̃ sɔ̃́ nyu keɛ. Ɔ mɔ̀ ɓó ɖɛ ɓě ɓɛ́ gàa ɓěɔ̀ cɛ̃ ma ɔ gbo ɓá ti ɓɛ́ dɛ̀nɛ̀-dyùɔ̀ wóɖó ma kà xwáɖáún wɛ̃ dyíɛɛ jè.
17Ké kǎà ɖɛ ɓɛ́ kpáá-ɖɛ̀-cɛ̃-nyɔ̀ Jɛ̀ɖèmádyà cɛ̃ zɔ̃̌ɔ̀ kɛɛ nyu ma kǎà jǎà kpáa. Ɖɛ ɔ cɛ̃ zɔ̃̌ɔ̀ kɛɛ kɛà kɛ̀. Ɔ ɖá,
18“Vĩ̌-wùɖù kè kpé-po-wùɖù zoo ɖò sɔ̀ìn ɖé Wáɖámà-hwɔ̀ɖɔ̀ɔ̀ mú.
Wéɖécà nì vĩ̌ɛń ɓó ɔ dyú ɓěɔ̀ jè.
Ɔ se ɓɔ́í kpáa ɓɛ́ìn ɓó ɔ dyú ɓěɔ̀ jè,
sepóɛɖé wa se nì ɖe.”
Wa sɔ̀ ɖé Íjè-ɓòɖòɔ̀ kɔ̃
19Ti ɓɛ́ Hɛ́wɔ̀ɖɔ̀ ɖǎ ma mɛ́ɛ, Bounɓoɔ̀ ínjà ɖò wóɖóìn ma Jòsé dyí ɖé dya-dya mú, ɖé Íjè-ɓòɖòɔ̀ kɔ̃, ké ɔ ɖá, 20“Sɔ̀ dyí, ɖú dyúɔ̀ kè ɔ ɖe dyí, ɓɛ́ m̀ ké ɖé Éézùɖùɛ̀-ɓòɖòɔ̀ kɔ̃ ɖe kɔ́ìn, sepóɛɖé nyɔ ɓě vɔ̃ ɓɛ́ wa ké ma kà dyúɔ̀ ɖáɓáa ɖǎ mɛ́.” 21Ké Jòsé sɔ̀ ma dyí, ké ɔ ɖú ma dyúɔ̀ kè ɔ ɖe dyí, ké ɔ kɔ́ìn ma ɖé Éézùɖùɛ̀-ɓòɖòɔ̀ kɔ̃ ɖe.
22Ti ɓɛ́ Jòsé wɔ̃́ɔ ma kà ɓɛ́ Àkèɖédyà ɖǎ ma ɔ ɓǎ Hɛ́wɔ̀ɖɔ̀ dúí sè, ké ɔ kɔ̃̀ ma Júɖìà-ɓòɖòɔ̀ wuɖuíɛɛ, ɔ fɛ̃̀ìn ma ɓɛ́ ɔ ké ma ɖé mu. Gèɖèpɔ́ɔ̀ po ma ɔ náún ɖé dya-dya mú, ké ɔ mu ma ɖé Gáɖàɖíì-ɓòɖòɔ̀ kɔ̃. 23Ɔ mu, ké ɔ cĩ́ ma hwɔɖɔ ɖò ɓɛ́ wa ɖáìn Názɛ̀ɖɛ̀ kɛɛ mú. Ɔ nyuɛ ma náa, ɓɛ́ ɖɛ ɓɛ́ kpáá-ɖɛ̀-cɛ̃-nyɔ̀ ɓěɔ̀ cɛ̃ zɔ̃̌ɔ̀ kɛɛ ké jǎà kpá. Ɖɛ wa cɛ̃ zɔ̃̌ɔ̀ kɛɛ kɛà kɛ̀. Wa ɖá, “Wa mu ɔ Názɛ̀ɖɛ̀-nyɔ̀ ɖáìn.”
Currently Selected:
Máfíò 2: ƁB02
Highlight
Share
Copy
Want to have your highlights saved across all your devices? Sign up or sign in
Bassa Bible © Bible Society Liberia, 2002.