Mataayo 3
3
UYohana uMutwiniaji iikhoma ku lunyikha
(Maluko 1:1-8; Luuka 3:1-18; Yohana 1:19-28)
1Uluhaavi lula uYeesu pina akhandi ashaanali ali ku Nasaleti, wáali akwali umuunu yumonga yuna itambulwagwa Yohana Mutwiniaji. Umuunu uyo wáwoneeshe ku lunyikha lwa nyi ya Yudeya. Akhandi iikhoma iijova, 2“Lambisilaji uwunansi weenyu, kwa kiiva uWutwa wa Nguluvi#3:2 UWutwa wa Nguluvi: Kwa Shiyunaani yiyandiikhwe, uWutwa wa kushaanya. UMataayo wájesaaga kikwepa kitambula iliswi Nguluvi kwa kiiva aVayahuudi vatiilaga kilitambula iliswi ili. Lulwene uMataayo ayandiishe, Wutwa wa kushaanya. Leelo ose tiyandiishe, Wutwa wa Nguluvi. Yimba iliswi ili mu Maswi aMahensa. wahejeela kunyeenyu.” 3UYohana yumwene yuna akhandi iijowa nu mukuwamalago uIsaaya kiija,
“Ishawuti ya muunu yipuliisikha mu lunyikha yiija,
‘Mumunosesaaje uMutwa insila yaakwe
na kimugolosesa muna akhashila.’”#3:3 Yimba mu litaafili lya Isaaya 40:3.
4Amenda ga Yohana gakhandi gatendiilwe kwa waaji wa ngamiya, akhandi ikiyipinya ulukhova lwa nkwembe mu shigudi#3:4 Umwenda guna akhandi ifwala uYohana, gukhandi guhwaneene nu mwenda ugwa mukuwamalago uEliya. Yimba mu litaafili lya 2 Vatwa 1:8. na kiilya inkumbi nu wuushi uwa mu lihakha. 5Avaanu kihuma ku Yelusalemu na ku mbali soona isa nyi ya Yudeya, na mu mbali soona isa mukhoga gwa Yolodani, 6vamulutiile uYohana. Vakhandi vilambiisila uwunansi waanave, woope akhandi ikivatwinia mu mukhoga gwa Yolodani.
7Leelo uYohana wáganaga kivaaga aVafalisaayo#3:7 AVafalisaayo: Yimba iliswi Vafalisaayo mu Maswi aMahensa. na Vasadukaayo,#3:7 Vasadukaayo: Yimba iliswi ili mu Maswi aMahensa. vikimuyinsila kwa winshi kiija avatwinie, uYohana wávajovela kiija, “Omwe muna muli vaana va njokha! Musikhahegukha uwuhigo kihuma kwa Nguluvi pina mulambiisila kwa wumyansi. 8Leelo injendo seenyu siwonensaaje kiija, mwalambiisila uwunansi weenyu. 9Musikhahiivaji kiija, ‘Takulukha kwa kiiva tili shisafi sha Abulahamu.’#3:9 Abulahamu: Yimba iliswi ili mu Maswi aMahensa. Shiyooli nikivajovela, uNguluvi akwiliile kiseetula amangʼanga aga, kiiva vaana va Abulahamu! 10Lino, uwuhigo wa Nguluvi waafikha, ngaja muunu yuna akheete inemo ayipinyile kidumula amapishi. Ilipishi lina lisiikhoma amakhomo amanofu, lidumulwa na kitaagwa mu mooto.
11“One nikivatwinia kwa malenga kiwonensa kiija mwalambiisila uwunansi weenyu, leelo kunyuma yangu iyinsa uyunji, umunya ngufu kishila one, yuna nisikwiliile kiiva muvanda waakwe wa kisumula indaatu saakwe. Uyo yumwene akhavatwinia kwa Numbula uMunofu nu mooto. 12Umwene akhavabagulania avagolofu na vanansi, ngaja umuunu pina iyeleelula ingano pa luuga, ikungaania ingano yaakwe na kiyiviikha mu shihenje. Leelo amapweleelo ikiganyaanya mu mooto gwa shiluta.”
Kitwinisiwa kwa Yeesu
(Maluko 1:9-11; Luuka 3:21-22)
13Uluhaavi ulo, pina uYohana itwiniaga, uYeesu wáhumile ku nyi ya Galilaya na kiluta ku mukhoga gwa Yolodani, kiija atwinisiwe nu Yohana. 14Leelo uYohana wájelaga kiija akhaane, wámujovela uYeesu wáaja, “One nisakulwa kitwinisiwa noowe, lino kwashi owe wiyinsa kunyangu?” 15UYeesu wámugomosesa wáaja, “Gahaga lino, kwa kiiva tisakulwa tigahe goona gina uNguluvi isakula.” Baheene uYohana wáyiitikha, wámutwinia.
16UYeesu wáganile kitwinisiwa, baaho wáahuma mu malenga, wáawona uwulanga widindukha, nayu Numbula wa Nguluvi iyiikha pamwene kwa shihwano sha nkunda. 17Baheene iliswi lyapuliisikha kihuma kushaanya liija, “Uyu yu Lusawo lwangu,#3:17 Lusawo lwangu: Yimba iliswi Lusawo lwa Nguluvi mu Maswi aMahensa. yuna nimuganile na ikinishendeefya.”
Currently Selected:
Mataayo 3: Shisangu
Highlight
Share
Copy
Want to have your highlights saved across all your devices? Sign up or sign in
© 2020, Wycliffe Bible Translators, Inc. All rights reserved.