2 CORINTIOS 2
2
1Yechꞌo ti ijnop ti mu to bu chtal jvulaꞌanoxuque yuꞌun mu jcꞌan ti chtal cacꞌ avat avoꞌonic noxtoque. 2Mi voꞌon chcacꞌ avat avoꞌonique, coꞌol ta xcat coꞌontic yuꞌun coꞌol muc bu ijpatbe jbatic coꞌontic. 3Yechꞌo ti baꞌyi lacalbeic tal ta vun ti cꞌusi chopole ti tscꞌan chavalbe abaique, yoꞌ mu xcat o coꞌon ti cꞌalal xitale. Jpatoj coꞌon ti chachꞌun acotolique yoꞌ coꞌol jun o coꞌontique. 4Ti cꞌalal yolel ta jtsꞌiba ti primero jvun lajtacbeic tale, icat coꞌon tajmec, liꞌocꞌ, yuꞌun jnaꞌoj ti chavat o avoꞌonique, ti chopol chavaꞌiique. Pero muꞌnuc capemon. Ti xꞌelan ijtsꞌibae, jaꞌ yoꞌ xanaꞌic o ti jcꞌanojoxuc tajmeque.
Jaꞌ liꞌ yaloj ti iyacꞌ pertonal ti Pabloe
5Li muchꞌu isaꞌ smule mu jtucuc noꞌox liyacꞌ ta at-oꞌon; layaqꞌuic ta at-oꞌon uc. Pero muꞌnuc ta jticꞌbe smul ti xꞌelan chcale. 6Lavi sjalil muc xavaqꞌuic ochuc ta temploe, taꞌluc o. 7Aqꞌuic xa ta pertonal, patbeic yoꞌon, naca me yicta sba ta xchꞌunel li scꞌop Rioxe, yuꞌun chat o yoꞌon tajmec ti ista smule. 8Tscꞌan chavacꞌbeic yil ti acꞌanojique. 9Ti xꞌelan lajtsꞌibabeic tale, jaꞌ ta jqꞌuel noxtoc mi chachꞌunic scotol ti cꞌusi chayalbeic ti Cajvaltique. 10Mi chavaqꞌuic ta pertonale, chcacꞌ ta pertonal uc yoꞌ coꞌol jun o coꞌontique. Mi mu xcacꞌ ta pertonale, yuꞌun onox muc bu chꞌayem xcaꞌi yaꞌel ti smule. Yechꞌo un chcacꞌ ta pertonal acꞌu mi chꞌabal smul cuꞌun. Ti Cristoe yiloj ti sjunul coꞌon chcacꞌ ta pertonale. 11Ti chcacꞌtic ta pertonale, jaꞌ yoꞌ mu xcuch o yuꞌun ti Satanase. Yuꞌun jnaꞌojtic ti cꞌu xꞌelan chloꞌlovane.
Jaꞌ liꞌ yaloj ti muc bu jun yoꞌon ti cꞌalal tey ta Troas ti Pabloe
12Ti cꞌalal licꞌot ta jteclum Troase, ti ba cal aꞌyuc ti jaꞌ noꞌox chacꞌ jcuxlejaltic ta sbatel osil ti Cristoe, ep ti muchꞌutic tscꞌan chchꞌunique. 13Acꞌu mi ep ti muchꞌutic tscꞌan chchꞌunique, pero muc bu jun coꞌon icaꞌi, jaꞌ ti muc bu tey cꞌot jta li Titoe. Yechꞌo ti muc bu lijalije. Jaꞌ noꞌox ijcꞌopon comel ti muchꞌutic xchꞌunojic scꞌop Riox teyoꞌe, lital ta ora liꞌ ta estado Macedoniae.
Jaꞌ liꞌ yaloj ti iꞌal yuꞌun scꞌop Riox ti Pabloe yuꞌun icoltaat yuꞌun ti Cristoe
14Coliyal ti Rioxe ti jaꞌ chiscolta ti Cristoe yoꞌ más xvinaj o ti chacꞌ jcuxlejaltic ta sbatel osile. Coꞌol xchiꞌuc chvinaj smuil nichim. 15Lec chil ti Rioxe ti voꞌon chcalbe yaꞌiic scꞌoplal ti Cristoe ti muchꞌutic chcuxiic ta sbatel osile xchiꞌuc ti muchꞌutic ch-ochic ta cꞌocꞌ ta sbatel osile. 16Ti muchꞌutic ch-ochic ta cꞌocꞌ ta sbatel osile, mu cꞌusi bal o chaꞌiic li scꞌop Riox chcalbeique yuꞌun mu xchꞌunic. Yan ti muchꞌutic chcuxiic ta sbatel osile, lec chaꞌiic, ta xchꞌunic. Pero muc muchꞌu xuꞌ yuꞌun ta stuque, jaꞌ noꞌox mi chcoltavan ti Cajvaltique. 17Li voꞌone maꞌuc yechon chac cꞌu chaꞌal li yane ti staqꞌuin noꞌox tsaꞌique ti cꞌalal chalic li scꞌop Rioxe. Li voꞌone jun coꞌon ta stojol ti Rioxe yuꞌun jaꞌ yajmantalon. Sqꞌuelojon chcaꞌi ti Rioxe ti cꞌalal chcal aꞌyuc ti cꞌusi yaloje. Jaꞌ chiscolta ti Cristoe yechꞌo ti xuꞌ cuꞌune.
Currently Selected:
2 CORINTIOS 2: tzoZ
Highlight
Share
Copy
Want to have your highlights saved across all your devices? Sign up or sign in
© 2009, Wycliffe Bible Translators, Inc. All rights reserved.