Matius 1
1
En daftar é apo-apo' i Yesus Kristus
(Luk. 3:23-38)
1Si anioo en daftar é apo-apo' i Yesus Kristus taranak i Daud wo taranak i Abraham.
2Si Abraham makatoyaang, si Ishak. Si Ishak makatoyaang ngaranna Yakub. Wo si Yakub makatoyaang ngaranna Yehuda wo sé metuari wo sia. 3Si Yehuda makatoyaang rua asi Tamar owo si makangaran Peres wo Zerah. Si Peres makatoyaang ngaranna Hezron. Wo si Hezron makatoyaang ngaranna Ram. 4Si Ram makatoyaang ngaranna Aminadab. Si Aminadab makatoyaang ngaranna Nahason. Si Nahason makatoyaang ngaranna Salmon. 5Si Salmon makatoyaang asi penanaanna Rahab ngaranna Boas. Wo si Boas makatoyaang asi penanaanna Rut si ningaranan Obed. Si Obed makatoyaang ngaranna Isai. 6Wo si Isai makatoyaang si colano Daud.
Si Daud makatoyaang ngaranna Salomo asi penanaan i Uria owo. 7Wo si Salomo makatoyaang ngaranna Rehabeam. Si Rehabeam makatoyaang tuama ngaranna Abia. Wo si Abia makatoyaang ngaranna Asa. 8Si Asa makatoyaang ngaranna Yosafat. Wo si Yosafat makatoyaang ngaranna Yoram. Si Yoram makatoyaang ngaranna Uzia. 9Wo si Uzia makatoyaang ngaranna Yotam. Si Yotam makatoyaang ngaranna Ahas. Wo si Ahas makatoyaang ngaranna Hizkia. 10Si Hizkia makatoyaang ngaranna Manasye. Wo Si Manasye makatoyaang ngaranna Amon. Si Amon makatoyaang ngaranna Yosia. 11#2Raj. 24:14-15; 2Taw. 36:10; Yer. 27:20 Si Yosia makatoyaang ngaranna Yekhonya wo sé metuari wo sia an tutuw é tou Israel aitiya' am Babel.
12Kekawus é tou Israel aitiya' am Babel, si Yekhonya makatoyaang ngaranna Sealtiel. Wo si Sealtiel makatoyaang ngaranna Zerubabel. 13Si Zerubabel makatoyaang ngaranna Abihud. Wo si Abihud makatoyaang ngaranna Elyakim. Si Elyakim makatoyaang ngaranna Azor. 14Si Azor makatoyaang ngaranna Zadok. Wo si Zadok makatoyaang ngaranna Akhim. Si Akhim makatoyaang ngaranna Eliud. 15Si Eliud makatoyaang ngaranna Eleazar. Wo si Eleazar makatoyaang ngaranna Matan. Si Matan makatoyaang ngaranna Yakub. 16Wo si Yakub makatoyaang ngaranna Yusuf penanaan i Maria si itumou si Yesus, si patuulen Kristus.
17Anaé, tumo'tol asi Abraham akar a si Daud, awéan sangapulu' epat taranak. Wo tumo'tol asi Daud akar a sé tou Israel aitiya' am Babel, awéan ka'i sangapulu' epat taranak. Wo ang kauré é tou Israel am Babel akar a si Yesus Kristus tumou, awéan ka'i sangapulu' epat taranak.
Eng ketou i Yesus Kristus
(Luk. 2:1-7)
18 #
Luk. 1:27
Tana'i en sisisilen andumoro' ing ketou i Yesus Kristus: Si Maria inang i Yesus, tinantuano kawéngen i Yusuf, taan an tutuw éra ra'ipé' icumawéng, si Maria maowa-owako ampa'paan ing kawasa i Roh Le'nas. 19Si Yusuf penanaan i Maria, sia anio' tou sama' até wo ra'ica kiimna mapalawi-lawi' i ngaran i penanaanna an dior é tou keli. Sia mawasa i maene-enep en tumela'u woo si Maria.
20Taan ang karoro'an i Yusuf memero-merot im basana itu wo mai si malaékat i Casuruan mapaturu' am pinangipina wo kumua, “Yusuf, taranak i Daud, tioo ko maindé' mindo si Maria mamuali penanaanmu ampa'paan si toyaang am pootna itu asi Roh Le'nas owo. 21#Luk. 1:31Sia makéré oka esa toyaang tuama wo ngarananmu si toyaang itu ‘Yesus’, ampa'paan Sia oka en lumowir sé tou-Na ang kamesé-meséaan éra.”
22Pakasa en itu mamuali wosama' malekep sapa en aicua i Amang Kasuruan a si nabi-Na indior: 23#Yes. 7:14“En ulitna, si esa mangala'un maowa-owak oka wo itouna oka mai esa toyaang tuama wo ngaranan éra Sia Imanuel.” (En kaangéanna, Si Amang Kasuruan mewali-wali wo icita.)
24Kekawus in itu si Yusuf mapolo wo émaanna meputé si aiperénta i malaékat i Casuruan itu ai sia. Wo kawéngenna si Maria, mamuali penanaanna, 25#Luk. 1:31taan sia ra'ica kawisa tumekel ang karapi i Maria akar si Maria makéré toyaang tuama. Wo ngaranan i Yusuf si toyaang itu, Yesus.
Currently Selected:
Matius 1: TNT
Highlight
Share
Copy
Want to have your highlights saved across all your devices? Sign up or sign in
En Taar Weru a nunuwu' é Tontemboan @ LAI 2018