Tito 2
2
Shumaq yachatsikunanpaq Tituta ninqan
1Peru qamqa Jesucristupa willakuynin ninqannölla wawqikunata y panikunata yachatsikuy. 2Awkinkunata yachatsinki imatapis llutanta mana rurayänanpaq, pïmaypitapis respitashqa kayänanpaq, shumaq yarpachakur imatapis rurayänanpaq, Dios Yayaman llapan shonqunkunawan creyikuyänanpaq, llakipäkuq kayänanpaq y pacienciakuq kayänanpaq.
3Chakwankunatapis yachatsinki Dios Yaya munanqannölla shumaq kawakuyänanpaq, pitapis mana tumpayänanpaq y mana machäyänanpaq. Masbien wakintapis alli kawakuyänanpaq yachatsiyätsun. 4Ollquwan tsayraq churakashqa jipashkunata yachatsiyätsun ollqunta y wamrankunata kuyayänanpaq. 5Tsaynölla yachatsiyätsun shumaq yarpachakuskir imatapis rurayänanpaq, ollqunkunata jukwan mana engañayänanpaq, wajinchö rurayninkunata shumaq rurayänanpaq, llakipäkuq kayänanpaq y ollqunkunata cäsuyänanpaq. Tsaynö alli kawakuqta rikarmi Dios Yayapa palabranta pipis manakaqman churanqatsu.
6Tsaynölla jövinkunatapis shumaq yarpachakur allikunata rurayänanpaq plëtunki. 7Rikäyäshunaykipaq kikikipis alli kawakuy. Pitapis yachatsirqa Dios Yayapa willakuynin ninqallanta yachatsikunki. 8Pipis mana rimashunaykipaq rasun kaqllata yachatsikunki. Tsaynö alli yachatsikuptikim contrantsikkunapis penqakur mana rimamäshunnatsu.
9Servikuqkunatapis yachatsinki patronninkunata cäsur mandayanqanta kushi kushi rurayänanpaq, llutalla mana contestakuyänanpaq 10y patronninpa imantapis mana suwapuyänanpaq. Masbien patronnin confiakunanpaq allillata rurayätsun. Jesucristuman creyikuq servikuqkuna alli kawaqta rikarmi runakuna musyayanqa salvamaqnintsik Dios Yayapa willakuynin alli kanqanta.
11Llapantsikta salvamänapaqmi Dios Yaya llakipämarnintsik Jesucristuta kachamurqan. 12Paymi yachatsimantsik kikintsikpa munayllantsikchö kawanqantsikpa rantin jutsa ruraykunata dëjaskir pay munanqannö allita rurar kawakunapaq. 13Tsaynö kawakurmi salvamaqnintsik Jesucristo kutimunqanyaq alistakushqa shuyaykäshun. Paymi poderösu Diosnintsik kar llapan runakuna rikäyänanpaq chipakyarraq kutimunqa.#Fil. 3.20. 14Jutsantsikpita jipimänapaqmi wañurqan.#Mat. 20.28; Mar. 10.45; Gál. 1.4; 1Tim. 2.6. Kuyanqan runakuna kanapaq y llapan shonquntsikwan allillata ruranapaqmi perdonamarnintsik qorikamashkantsik.#Éxo. 19.5; Deut. 7.6; 14.2; 1Ped. 2.9.
15Wawqi Tito, kay yätsinqaqkunata pitapis mana mantsapaypa yachatsikunki, animatsinki y tantiyatsinki. Pipis manakaqman mana churashunaykipaq shumaq kawakunki.
Currently Selected:
Tito 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.