Juan 6
6
Pitsqa waranqa runakuna mikuyanqan
Mateo 14.13-21; Marcos 6.30-44; Lucas 9.10-17
1Tsaypitanam Galilea qochapa wak tsimpanman Jesús päsarqan. Tsay qochapa jukaq shutinmi Tiberias kaykan. 2Qeshyaqyashakunata kutikätsinqanta rikarmi atskaq runakuna Jesúspa qepanta aywayarqan. 3Qocha tsimpanchönam lömaman aywaykur discïpulunkunawan jamayarqan. 4Israel runakunapa Pascua fiestankunapaqmi ichikllana faltaykarqan. 5Paykuna kayanqanman atskaq runakuna chäyanqanta rikarmi Felipita Jesús nirqan: <<Kaytsikaq runakunapaq ¿maypitatan mikuyta rantimushun?>>
6Tsaynö nirqan <<mä Felipe ima nimanqash>> nirmi. Jesúsqa musyarqannam imata rurananpaq kanqantapis. 7Felipinam nirqan: <<Ishkay pachak (200) junaq arur gänanqantsikwan rantimushqapis manam ichik ichiklla mikuyänanpaqpis paqtanqatsu>>.
8Tsaynö niptinmi Jesúspa discïpulun Andrés nirqan (Andrésqa Simón Pedrupa wawqinmi karqan): 9<<Kaychö juk wamrapam pitsqa cebäda tantan y ishkay pescädun kaykäpun. Tsayllaqa manach llapan runakunapaq paqtanmantsu>>.
10Jesúsnam llapan runakunata jamatsiyänanpaq nirqan. Tsaymi atska qewakuna jananman jamakuyarqan. Runakuna pitsqa waranqanömi (5,000) kayarqan. 11Tsay pitsqa tantata Jesús aptarkurmi Dios Yayata mañakur agradëcikurqan. Jamaykaq runakunatanam [discïpulunkuna] aypuyarqan. Tsaynöllam pescädutapis aypuyarqan. Aypuyaptinmi llapan pacha junta mikuyarqan.
12Runakuna mikuskiyaptinnam discïpulunkunata nirqan: <<Llapan sobraqkunata qoriyämuy. Ama imatapis perditsishuntsu>>.
13Tsaynö niptinmi pitsqa cebäda tantallapita sobraqta chunka ishkay canasta juntata qoriyarqan. 14Tsay milagru ruranqanta rikarmi runakuna niyarqan: <<¡Kay runaqa Dios Yaya kachamunanpaq kaq profëtam!>>#Deut. 18.15-18.
15Tsaynö nirmi mandakuq rey kananpaq amälas churayta munayarqan. Peru tsayta tantiyaskirmi jirkapa Jesús japallan aywakurqan.
Yaku jananpa Jesús purinqan
Mateo 14.22-27; Marcos 6.45-52
16Patsa qoyaykaptinnam#6.16 Wakin runakunaqa patsa tsakaykaptinnam niyan. Jesúspa discïpulunkuna qocha kuchunman kutiyarqan. 17Patsa tutapashqachönam büquiman lätarkur Capernaúm markaman aywayarqan. Peru Jesúsqa manaraqmi kutimurqanraqtsu. 18Aywaykäyaptinnam alläpa wayrawan yaku laqchikar qallaykurqan. 19Tsaypita juk lëwatanöna aywaykarnam Jesústa rikaskiyarqan yaku jananpa paykuna kaqman shamuykaqta. Tsayta rikaskirmi alläpa mantsakäyarqan. 20Tsaymi Jesús nirqan: <<¡Noqam kä! ¡Ama mantsakäyaytsu!>>
21Tsaymi Jesús lätananpaq büquita ichïtsiyarqan. Tsaypita sasllanam qocha kuchunman chäyarqan.
Imayyaqpis kawatsikuq tanta kanqanta Jesús ninqan
22Patsa waraskiptinnam quëdaq runakuna musyayarqan tsaychö kaykaq jukllaylla büquiwan discïpulunkuna aywayanqanta. Tsaynöllam paykunawan Jesús mana aywanqanta musyayarqan. 23Tsaynö kaykäyaptinmi Tiberias markapita büquikuna chäyarqan Señor Jesús tantata qaranqan cercanman. 24Jesústa ni discïpulunkunata mana tarirmi tsay büquikunawan Jesústa ashirnin Capernaúm markaman aywayarqan.
25Capernaúmchö tariskirnam tapuyarqan: <<Rabí, ¿imaytan kayman shamushkanki?>>
26Jesúsnam nirqan: <<Rasun kaqtam niyaq: Manam qamkunaqa milagrukunata rikartsu ashiyämanki, sinöqa pacha junta mikuyanqaykipitam. 27Ama ushakaq mikuyllapaqqa aruyaytsu, sinöqa imayyaqpis kawatsikuq mikuyta tariyänaykipaq aruyay. Tsay mikuytaqa Runapa Tsurinmi qarayäshunki. Tsaypaqmi Dios Yaya kachamushqa>>.
28Tsaynam tapuyarqan: <<Dios Yayapa aruyninchö aruyänäpaq ¿imatatan rurayäman?>>
29Jesúsnam nirqan: <<Dios Yayapa aruyninqa kachamunqanman creyikuyanqaykim>>.
30Tsaynam niyarqan: <<Dios Yaya kachamushunqaykita creyiyänäpaq mä juk milagruta ruramuy. 31Unay castantsikkunam manáta desiertuchö mikuyarqan. Dios Yayapa palabranmi nin: <Ciëlupita tantata mikuyänanpaqmi alistaparqan> >>.#Éxo. 16.4, 15; Sal. 78.24.
32Jesúsnam nirqan: <<Rasun kaqtam niyaq: Manam Moiséstsu ciëlupita tantata qararqan, sinöqa Taytämi. Paymi ciëlupita rasunpa kawatsikuq tantata qarayäshunki. 33Tsay tantaqa ciëlupita shamuq runam. Paymi pïmaytapis mana ushakaq kawayta qaranqa>>.
34Runakunanam niyarqan: <<Taytay, tsay tantata imaypis qaraykayämay>>.
35Jesúsnam nirqan: <<Noqam kawatsikuq tanta kä. Noqata chaskimaq kaqqa manam ni imaypis mallaqanqatsu ni yakunanqatsu. 36Ñawpata niyanqaqnöllam rikaykämarpis creyiyämankitsu.
37<<Taytä qaramanqan runakunaqa llapanmi chaskiyäman. Chaskimaq kaqkunataqa manam pitapis qarqushaqtsu. 38Manam kikï munanqäta ruranäpaqtsu ciëlupita shamushkä, sinöqa kachamaqnï munanqanta ruranäpaqmi. 39Kachamaqnï [Taytä] manam munantsu qaramanqan runakunata ni jukllayllatapis oqranäta, sinöqa llapanta día del juiciuchö kawatsimunätam munan. 40Paymi munan llapanpis Tsurinman creyiqkuna mana ushakaq kawayta tariyänanta. Paykunatam día del juiciuchö kawatsimushaq>>.
41<<Noqaqa ciëlupita shamuq tantam kä>> niptinmi tsaychö Israel runakuna Jesústa manakaqman churar 42niyarqan: <<Kay runaqa ¿manaku Josépa tsurin Jesús? Musyantsikmi maman taytan pï kanqanta. ¿Imanirtan <ciëlupitam shamushkä> nimantsik?>>
43Jesúsnam nirqan: <<Manakaqman ama churayämaytsu. 44Kachamaqnï Taytä mana tantiyatsiptinqa manam ni pipis chaskimanmantsu. Chaskimaq kaqkunatam día del juiciuchö kawatsimushaq. 45Profëtakuna qellqayanqanmi nin: <Llapan runakunatam kikï yachatsishaq>.#Isa. 54.13. Tsaynöllam Dios Yaya tantiyatsinqanta chaskiq kaqkunaqa llapanpis chaskiyäman. 46Dios Yayataqa manam ni pipis rikashqatsu. Diospita shamuq runallam paytaqa rikashqa. 47Rasun kaqtam niyaq: Noqaman creyikamuqkunaqa mana ushakaq kawaytam tariyanqa.
48<<Noqam kawatsikuq tanta kä. 49Unay castaykikunam desiertuchö manáta mikuykarpis wañuyarqan. 50Peru ciëlupita shamuq tantata mikuqkunam sïqa wañuyanqatsu. 51Noqam ciëlupita shamuq kawaq tanta kä. Pipis kay tantata mikuq kaqqa mana ushakaq kawaytam tarinqa. Kay tantaqa kikïpa cuerpümi. Runakuna mana ushakaq kawayta tariyänanpaqmi cuerpüta sacrificiutanö Dios Yayaman entregashaq>>.
52Israel runakunanam kikinkunapura ninakuyarqan: <<¿Imanöpatan kay runa cuerpunta mikutsimäshun?>>
53Jesúsnam nirqan: <<Rasun kaqtam niyaq: Runapa Tsurinpa cuerpunta mana mikurqa y yawarninta mana upyarqa manam imaypis mana ushakaq kawayta tariyankitsu. 54Peru cuerpüta mikur y yawarnïta upyarmi sïqa mana ushakaq kawayta tariyanki. Noqam día del juiciuchöpis kawatsiyämushayki. 55Noqapa cuerpümi rasunpa kaq mikuy y yawarnïpis rasunpa kaq yakum. 56Cuerpüta mikuq kaqqa y yawarnïta upyaq kaqqa noqawanmi jukllayllanö kanqa y noqapis paywanmi jukllayllanö kashaq.
57<<Noqam kawä kachamaqnï imayyaqpis kawaq Taytä kawayta qaramaptin. Taytäpita kawayta chaskinqänöllam cuerpüta mikuq kaqkunapis noqapitaraq kawayta chaskiyanqa. 58Ciëlupita shamuq tantam noqaqa kä. Tsay tantaqa manam unay castaykikuna manáta mikuyanqannötsu. Manáta mikurpis paykunam wañuyarqan. Peru kay tantata mikuq kaqmi sïqa imayyaqpis kawayanqa>>.
59Jesúsmi tsaynö yachatsikurqan Capernaúmchö kaykaq sinagögachö.
Jesús yachatsikunqankuna mana ushakaq kawayta qaramänapaq kanqan
60Tsaynö yachatsikunqanta wiyarmi Jesústa atskaq discïpulunkuna niyarqan: <<Kay yachatsikuykunaqa alläpa ajam. Tsaynö yachatsikuptin ¿piraq payta creyinqa?>>
61Tsaynö niyanqanta tantiyaskirmi Jesús nirqan: <<¿Tsaynö yachatsikunqäpitaku rabyayanki? 62Tsaynö rabyakurqa ¿ima niyankimanraq Runapa Tsurin ciëluman kutiykaqta rikar? 63Manam pipis kikinllapitatsu mana ushakaq kawayta tarin, sinöqa Espïritupitam. Noqa yachatsikunqäqa Espíritu Santupita karmi mana ushakaq kawayta qarayäshunaykipaq kaykan. 64Peru tsaynö kaykaptinmi wakikiqa ninqäkunata creyiyankitsu>>.
Mayqan runakunapis mana chaskiyanqanta musyarmi Jesús tsaynö nirqan. Tsaytam qallananpita musyarqan. Tsaynöllam mayqan discïpulun rantikunanpaq kanqantapis musyarqan.
65Jesúsnam nirqan: <<Wakiki mana creyiyanqaykita musyarmi niyashkaq: <Taytä mana tantiyatsiptinqa manam ni pipis chaskimanmantsu> >>.
66Jesús ninqanta wiyaykurmi atskaq discïpulunkuna dëjaskir aywakuyarqan. 67Tsaymi chunka ishkay akranqan kaq discïpulunkunata Jesús tapurqan: <<¿Qamkunapis aywakuytaku munayanki?>>
68Tsaynö niptinmi Simón Pedro nirqan: <<Taytay, qampita mas jukqa manam ni pipis qatiräyänäpaq kantsu. Ninqaykikunaqa mana ushakaq kawayta tariyänäpaqmi kaykan. 69Noqakunaqa qammanmi creyiyä. Qamqa Dios Yaya kachamunqan santu runam kanki#6.69 Wakin qepa kaq griego copiakunam niyan: Qamqa kawaykaq Dios Yayapa Tsurin Cristum kaykanki.>>.#Mat. 16.16; Mar. 8.29; Luc. 9.20.
70Jesúsnam nirqan: <<¿Manaku chunka ishkay discïpulükuna kayänaykipaq akrayashkaq? Peru juknikim diablupa poderninchö kayanki>>.
71Jesús tsaynö nirqan Simónpa tsurin Judas Iscariotipaqmi. Paymi apostolnin kaykar Jesústa wañutsiyänanpaq rantikurqan.
Currently Selected:
Juan 6: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.