Gálatas 2
2
Jerusalénchö apostolkuna Pabluta chaskiyanqan
1Tsaypita chunka chusku watataraqmi Tituta pusharkur Bernabéwan#Hech. 11.29-30; 15.2. Jerusalénman kutirqä. 2Tsayman kutirqä Dios Yaya revelamar aywanäpaq tantiyatsimashqa kaptinmi. Jerusalénchö kaq apostolkunawan aparti qorikarmi mana Israel kaqkunata imata yachatsinqätapis willarqä. Mana allita yachatsikunqäta yarpäyaptinqa alläpa sufrir willakunqäpis manakaqllapaqmi kanman karqan. 3Willakunqäta tantiyatsiptïmi alli kanqanta niyämarqan. Tsaynöpam mana Israel runa kanqanta musyarpis Tito señalakunanpaq obligayarqantsu.
4Willakunqä alli kanqanta niyaptinpis juk ishkay runakunam creyiq tukur Moisés qellqanqan leykunata cumpliyänapaq wawqikunata y panikunata yachatsiyarqan. Peru Jesucristuman creyikushqana kaykarqa manam tsay leykunata cumplinantsiknatsu. Paykuna niyanqanta chaskirqa manam libritsu kantsik, sinöqa tsay leykunapa poderninchö karmi servikuqnölla kaykantsik. 5Peru tsay llutan yachatsikuykunata manam chaskiyarqätsu. Chaskiyaptïqa qamkunapis chaskiyankimanmi karqan.
6Jerusalénchö apostolkunaqa willakuptï manam michäyämarqantsu (Jesucristuwan paqta purishqa kayaptinpis Dios Yayapaqqa llapantsikpis iwalmi kantsik),#Deut. 10.17. 7masbienmi tantiyayarqan Israel runakunata willananpaq Pedruta churanqannö mana Israel kaqkunata willakunäpaq noqatapis Dios Yaya churamanqanta. 8Israel runakunapa apostolnin kananpaq Pedruta Dios Yaya churanqannömi mana Israel kaqkunapa apostolnin kanäpaq noqatapis churamashqa.
9Tsaymi Santiago, Pedro y Juanpis tantiyayarqan willakuyninta willakur purinäpaq Dios Yaya churamanqanta. (Paykunapaqmi iglesiachö columna kayanqanta niyan.) Tsaypitam paykunawan willanakuyarqä: <<Mana Israel kaqkunaman Bernabéwan qam aywayay y noqakunana Israel runakunaman aywayäshaq>>.
Tsaynö willanakuyanqätam acuerdu kayarqan. 10Tsaynöllam niyämarqan waktsa wawqikunata y panikunata mana qonqar yanapayänäpaq. Tsaytam imaypis ruraykä.#Hech. 11.29-30; 24.17.
Pedruta Pablo piñapanqan
11Antioquíaman Pedro chaykamur mana allita ruraptinmi piñaparqä. 12Puntatam mana Israel wawqikunawan y panikunawan qorikar mikuq.#Hech. 11.2. Peru Santiaguwan puriq runakuna chäyämuptinmi sïqa musyapäyänanta mantsakur mana Israel kaqkunawan qorikarqannatsu. 13Pedruta rikarmi wakin wawqikunawan panikunapis y Bernabépis mana Israel kaqkunawan mikuyänanpaq qorikäyarqannatsu.
14Tsaynö mana allita ruraptinmi wawqikunapa y panikunapa puntanchö Pedruta piñapar nirqä: <<Qampis mana Israel runanö Moisés qellqanqan leykunata mana cumpliykar ¿imanirtan munanki mana Israel runakuna tsay leykunataraq cumpliyänanta? 15Noqantsikqa manam mana Israel runatsu kantsik, masbienmi yurinqantsikpita Israel runa kantsik. 16Musyantsikmi Dios Yaya imanö perdonamanqantsikta. Manam Moisés qellqanqan leykunata cumplishqatsu perdonamantsik,#Sal. 143.2; Rom. 3.20. sinöqa Jesucristuman confiakushqam. Tsaymi Dios Yaya perdonamänapaq Jesucristuman confiakuntsik.#Rom. 3.22. Tsay leykunata cumplinqanpitaqa manam ni pitapis Dios Yaya salvantsu>>.
17Moisés qellqanqan leykunaman confiakunqantsikpa rantin Jesucristuman confiakushqam wakin runakuna yarpäyan jutsata ruranqantsikta. Tsaynö yarpäyaptinpis ¿Jesucristutsuraq jutsata ruratsimantsik? ¡Manam! 18Masbienmi jutsayuq kantsik Moisés qellqanqan leykunaman yapay confiakur. 19Moisés qellqanqan leykunapa poderninchö karmi tsay leykunapaq wañushqanöna karqä.#Rom. 7.4. Kananqa librinam kä#Gál. 3.19, 24. Dios Yaya munanqannö kawanäpaq. 20Noqaqa Jesucristuwan cruzchö wañushqanömi kä.#Rom. 6.6-8; Gál. 5.24; 6.14; Col. 2.20. Manam noqanatsu kawä, sinöqa Jesucristum noqachö kawan. Tsaymi Dios Yayapa Tsurinman confiakur kawaykä.#Fil. 1.21. Paymi kuyamarnintsik noqantsik rayku wañurqan.
21Manam Dios Yaya llakipämanqantsikta manakaqmantsu churaykä. Wakin runakuna niyanqannö leyninkunata cäsushqaraq Dios Yaya salvamashqaqa Jesucristo wañunqanpis manakaqllapaqmi kanman karqan.
Currently Selected:
Gálatas 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.