2 Timoteo 4
4
Dios Yayapa palabranta willakunanpaq ninqan
1Dios Yayapa shutinchö y kawaqkunata wañushqakunata juzgaq [Señor] Jesucristupa shutinchömi niq: 2Creyikuyänan y mana creyikuyänan kaptinpis Dios Yayapa palabranta imaypis willakuy. Mana ajayaypa shumaq tantiyatsiy, consejay y animatsiy.
3Shamuq tiempuchömi Jesucristupa willakuyninta wiyaytapis munayanqanatsu. Masbienmi llutan yachatsikuqkunata ashiyanqa mana alli yachatsiyanqallanta wiyayta munayanqa. 4Mana allikunallata wiyayta munarmi rasunpa kaq yachatsikuytaqa chaskiyanqanatsu. 5Peru qamqa Dios Yaya munanqannö kawakunaykipaq shumaq tantiyakuy. Imaykata sufrirpis payman creyikur willakuyninta pïmaytapis willay. Mana qeläkur Dios Yayata serviy.
6Noqaqa wañunäpaqnam kaykä. Sacrificiuman wiñäyanqan vïnu altarchö ushakanqannömi#Éxo. 29.38-41. noqapis ushakänäpaqna kaykä. 7Alli soldädunömi llapanta cumplishkä. Imayka llallinakuqnöraqmi chänäpaq kaqman chashkä. Creyikunqänöllam mana dëjaypa imaypis firmi creyikushkä. 8Tsaymi kananqa shuyaraykä rasunpa kaqta juzgakuq juez Señor Jesucristo kutimunan junaq corönata entregamänanpaq kanqanta. Tsay corönaqa puntanchö jutsannaqta chaskimanqanmi. Manam noqallatsu corönata chaskishaq, sinöqa Jesucristuta llapan shuyaraqkunam chaskiyanqa.
Carcelchö kanqanta willanqan
9Timoteo, tinkunapaq saslla shamuykullay. 10Wawqintsik Demasmi#Col. 4.14; Film. 24. kikinpa munayllanchö kawakuyta munarnin dëjaskamar Tesalónica markaman aywashqa. Crescentitam Galacia provinciaman kachashkä, Titutanam#2Cor. 8.23; Gál. 2.3; Tito 1.4. Dalmacia markaman. 11Lucasllanam#Col. 4.14; Film. 24. paqtä kaykan. Shamurnin Marcusta#Hech. 12.12, 25; 13.13; 15.37-39; Col. 4.10; Film. 24. pushamunki. Paymi Dios Yayapa willakuyninta willakuptï alli yanapamanqa. 12Wawqintsik Tíquicutanam#Hech. 20.4; Efe. 6.21-22; Col. 4.7-8. Éfesuman kachamü.
13Troaschömi#Hech. 20.6. Carpupa wajinchö capötïta jaqimushkä. Shamur capötïta y librükunatapis apakarkamunki. Mana qonqarlla pergamïnükunatapis apakarkamunki.
14Fiërru takaq Alejandrum#1Tim. 1.20. alläpa conträ tikrashqa. Peru tsaynö kanqanpitam Señor Jesucristo juzganqa.#Sal. 62.12; Rom. 2.6. 15Alejandrupita qampis cuidakunki. Willakunqantsik mana alli kanqantam pïmaytapis nin.
16Autoridäkunachö puntata declaraptï manam ni pipis favornï shärishqatsu. Llapanmi japalläta dëjayämashqa. Tsaynö dëjayämanqanpita Dios Yaya perdonaykullätsun. 17Paykuna dëjayämaptinpis Dios Yayaqa noqawan karmi valorta qaramashqa. Tsaymi mana Israel autoridäkunapa puntanchöpis alli willakuyninta willakunäpaq yanapamashqa. Wañutsiyämänan kaykaptinmi leonpa shiminpitanö Dios Yaya salvamashqa. 18Tsaynöllam llapan mana allikunapita salvamanqa. Tsaypitam mandakuyninchö imayyaqpis kawakunäpaq pushamanqa. ¡Dios Yaya imaypis alabashqa kaykullätsun! Amén.
Cartapa ushanan
19Priscilatawan Aquilata saludaykullay.#Hech. 18.2, 18. Onesíforupa#2Tim. 1.16-17. ayllunkunatapis saludaykullay. 20Erastum#Hech. 19.22; Rom. 16.23. Corintuchö quëdamushqa. Trófimutanam#Hech. 20.4; 21.29. Miletuchö qeshyaykaqta jaqimushkä. 21Tamya killa manaraq chämunqanyaq imaykatapis dëjaskir shamunki. Eubulo, Pudente, Lino, Claudia y wakin wawqikuna y panikunam saludayämushunki.
22Señor Jesucristo imaykachöpis yanapaykulläshuy. Tsaychö llapaykita llakipaykuyälläshuy. [Amén.]
Currently Selected:
2 Timoteo 4: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.