Mateo 1
FNT1988

Mateo 1

1
uLuko lwi Yesu Klisto
(Lk 3:23-38)
1Ichitaabu cha luko lwi Yesu Klisto, umwaana wi Daudi, umwaana wi Ablaamu. 2Ablaamu wafiile Isaka; Isaka wafile Yakobo; Yakobo wafiiile Yuda na aniina yaakwe. 3Yuda wafiile Pelesi na Sela kuli Tamali; Pelesi wafiile Esloni; Esloni wafiile Lamu; 4Lamu wafiile Aminadabu; Aminadabu wafiile Nashoni; Nashoni wafiile Salmoni; 5Salmoni wafiile Boazi kuli Laabu; Boazi wafiile Obedi kuli Luti; Obedi wafiile Yese; 6Yese wafiile umwene Daudi; Daudi wafiile Salomoni kuli nka Ulia; 7Salomoni wafiile Loboamu; Loboamu wafiile Abiya; Abiya wafiile Asa; 8Asa wafiile Yosafati; Yosafati wafiile Yolamu; Yolamu wafiile Usia; 9Uzia wafiile Yotamu; Yotamu wafiile Akazi; Akasi wafiile Yesekia; 10Yesekia wafiile Manasa; Manasa wafiile Amoni; Amoni wafiile Yosia; 11Yosia wafiile Yekonia na aniina yaakwe apa manda ya usaamyo wa Babeloni. 12Na pa chisila cha usaamyo wa Babeloni, Yekonia wafiile Syealtieli; Syealtieli wafiile Selubabeli. 13Selubabeli wafiile Abyudi; Abyudi wafiile Elyakimu; Elyakimu wafiile Asoli; 14Asoli wafiile Sadoki; Sadoki wafiile Akimu; Akimu wafiile Eliudi; 15Eliudi wafiile Eliasali; Eliasali wafiile Matani; Matani wafiile Yakobo; 16Yakobo wafiile Yosefu, nka Malia, wino wafiile Yesu wino yakuluuti i Klisto. 17Ngi iinko syooshi ukufuma Ablaamu kufika Daudi, iinko ikumi na yiini; na fuma Daudi kufika usaamyo wa Babeloni, inko ikumi na ini; na fuma usaamyo wa Babeloni kufika Klisto, imipanda ikumi na ini.
Kufyaalwa kwi Yesu
(Lk 2:1-7)
18Ukufyaalwa kwi Yesu Klisto kwaali fi: Malia nyina wayiile wimalwa na Yosefu, lino yatatana yemana, walolike ali ninda uku maka yi Mweso Nswefu. 19Nawe Yosefu iya, fino waali uwa chumi, atakasime uku nsekelisha, wakasime ukumta ukumbali. 20Nga pano welengulanga fiyo, lola, malaika wa Mwene wamwisila un-chiloto, waati: “Yosefu, mwaana Daudi, utachopa ukumtola Malia awe uwaako, kuno iinda yaakwe iya ku maka ya Mweso Nsweefu. 21Nawe alufyaala umwaana; newe uluntema ishina lyaakwe i Yesu. Kuno wiyo uwino akukulula aantu yaakwe na maifyo yao.” 22Fyoshi fi fyaombike, kuti chiwe chino uMweene wafashile na kalausha, ati: 23“Lola, unsuungu aluseenda iinda, nawe alufyala umwaana; nawe yalunta ishina lyaakwe: ‘Imanueli’,” alikuti: “Leesa apalipoonga neswe.” 24Nawe Yosefu pano walanka un-tulo, wachita ndi fino malaika wa Mwene wannenile; wamtola ukuwa uunchi. 25Nanti kumweema kufika na lino wafyala umwaana. Wamtema ishina lyaakwe i Yesu.

New Testament in Fipa © United Bible Societies, 1988. Bible Society of Tanzania.


Learn more about UPANGANO UPYA

Encouraging and challenging you to seek intimacy with God every day.


YouVersion uses cookies to personalize your experience. By using our website, you accept our use of cookies as described in our Privacy Policy.