Santiago 1
1
1Maytsaychöpis taykaq chunka ishkay trïbu Israel runakuna:
Noqa Santiago,#Mat. 13.55; Mar. 6.3; Gál. 1.19. Tayta Diospa y Señor Jesucristupa sirviqnin karmi qamkunapaq salüdüta apaykätsimü.
Imano nakarpis Tayta Diosman yärakunantsipaq nishqan
2Kuyay wawqi panikuna, ima nakaycho karpis lapan shonquykiwan kushikäriy. 3Musyapäkunkimi nakaykunawanraq lapan shonquykiwan Tayta Diosman yärakärishqaykita. 4Mana ajayaypa yärakurqa Tayta Dios munashqanno kawanaykipaqmi shumaq yachakärinki.
5Mayqaykipis Tayta Dios munashqanno kawayta mana kamäpakurqa tantiyatsishunaykipaq payta manakäriy. Manakuptikiqa tantiyatsishunkimi. Manakuq kaqtaqa imaypis yanapanmi.#Mat. 7.7-11; Juan 16.23-24. 6Itsanqa lapan shonquykiwan yärakur manakäriy. Manakushqayki höra ama yarpapäkuytsu <<¿mayamanqatsuraq o manatsuraq?>> nishpayki. Tsayno manakurqa lamarta wayra wak läduman kay läduman pulchaqyätsishqannömi karkaykanki. 7Tsayno karqa ama yarpapäkuytsu Tayta Diospita imatapis chaskinaykipaq kashqanta. 8Tsayno manakuq runaqa manami shumaq yärakuntsu ni Tayta Dios munashqannötsu kawan.
Waktsakunata y rïcukunata yätsishqan
9Waktsa kaq wawqi panikuna, Tayta Dios ali rikashushqaykipita kushikäriy. 10Rïcu kaq wawqi panikuna, qamkunapis kushikäriy riquëzaykikunaman mana atiënikunaykipaq Tayta Dios tantiyatsishushqaykipita. Mayjina rïcu karpis waytano ushakaqlami karkaykanki.
11Fiyupa shanaptin qewapis tsakikäkunmi.
Waytanpis kuyaylapaq kaykashqancho shushur ushakäkunmi.
Tsaynölami rïcukunapis mas rïcu kayta ashirkaykashqalancho ushakanqa.#Isa. 40.6-7.
Tayta Dios alilata ruraq kashqan
12Ima nakaycho karpis Tayta Diosman mana ajayaypa yärakuq runaqa kushishqami kawan. Tsayno yärakurqa Tayta Diospa nawpanchömi corönata chaskinqa. Tsay corönaqa mana ushakaq kawaymi kanqa. Kuyaqninkuna chaskipäkunanpaqmi tsay corönata Tayta Dios promitishqa.
13Yarpaynikiman jutsa ruraykuna shamuptinqa ama nipäkuytsu tsay yarpayta Tayta Dios qoshushqaykita. Tayta Diosqa manami imaypis jutsata rurantsu ni jutsata rurananpaq pitapis shakyätsintsu. 14Tsaypa trukanqa tantiyakäriy tsay yarpay kikikipa shonquykipita kashqanta. 15Shonquyki lutan yarpashqankunata rurarmi jutsata rurarkaykanki. Jutsata rurar kawaqkunataqa Tayta Dios infiernumanmi qaykunqa.
16Kuyay wawqi panikuna, lutanta ama yarpapäkuytsu. 17Lapan alikunata chaskipäkushqaykiqa atsikyaqkunata kamaq Taytantsipitami kaykan. Payqa manami lantuy pasashqannötsu, sinöqa imaypis kashqalanmi kaykan. 18Kikin munashqannölami ali wilakuyninwan mushuq kawayta qomashqantsi lapan kamashqankunapitapis mas kuyay wamrankuna kanantsipaq.#1Ped. 1.23.
Jesucristupa wilakuyninta cäsukunantsipaq nishqan
19Kuyay wawqi panikuna, tsayno kaykaptinqa yachaq tukur aläpa ama parlapäkuytsu, sinöqa wakinpis parlananpaq upälakäriy. Tsaynöpis lutalaqa ama rabyakäriytsu. 20Rabyakurqa manami Tayta Dios munashqannötsu kawarkaykanki.
21Mana ali ruraykunata y lapan viciukunatapis kacharipäkuy. Wilakuyninta shonquykikunaman Tayta Dios murushqa kaykaptinqa wilakuyninta shumaq cäsukäriy. Paypa ali wilakuyninqa salvashunaykipaq munayniyuqmi kaykan. 22Wilakuyninta wiyashqalaykiwanqa ama contentakäriytsu, sinöqa cäsukur kawapäkuy. Tsayno mana kawaptikiqa yachakärishqaykipis manakaqlapaqmi kanqa.
23Tayta Diospa wilakuyninta mayaykar mana cäsukuq runaqa qaqlanta espëjucho rikarpis 24aywakur jukla qonqaykuqnömi kaykan. 25Tayta Diospa wilakuyninta mana qonqaypa cäsukurmi itsanqa espëjucho rikakur qaqlan imano kashqanta mana qonqaqno kaykan. Tsayno kawaqtaqa Tayta Dios imachöpis yanapanqami.
26Mayqaykipis <<Tayta Diosmanmi yärakü>> niykarpis mana alikunata parlarqa manami rasunpatsu yärakurkaykanki. Tsayno kaptikiqa Tayta Diosman yärakärishqaykipis manakaqlapaqmi kaykan. 27Tayta Diosman rasunpa yärakurqa waktsakunata y viüdakunata nakaycho kaptin yanapanki. Wakinkuna jutsata rurar kawaptinpis noqantsiqa ama jutsata rurashuntsu.
Currently Selected:
Santiago 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.