Hechos 1
1
Espíritu Santuta chaskikunanpaq wilashqan
1Tayta Teófilo,#Luc. 1.1-4. punta kaq libruchömi qelqamurqä Jesús lapan rurashqankunata y yachatsishqankunata. Tsaykunata rurarqan y yachatsirqan wilakuyta qalaykushqanpita 2jana patsaman aywakushqan junaqyaqmi. Jana patsaman manaraq aywakurmi akrashqan apostolninkunata Espíritu Santupa munayninwan tantiyatsirqan imata rurananpaq kashqantapis. 3Wanushqanpita kawarirkamurmi chusku chunka (40) junaqyaq paykunata yuriparqan. Rasunpa kawaykashqanta criyinanpaqmi tukuynöpa tantiyatsirqan. Tsaynölami Tayta Dios mandaykashqanpitapis shumaq tantiyatsirqan.
4Apostolninkunawan kaykarmi Jesús kayno nirqan: <<Qamkunata wilashqänömi promitishushqaykita#Luc. 24.49. Taytä kachamunqa. Tsayta manaraq chaskirqa Jerusalénpita ama aywakäriyraqtsu. 5Juanqa yakulawanmi bautizarqan. Qamkunami itsanqa Espíritu Santuwan bautizashqa kankipaq. Bautizashqa kanaykipaq walka junaqlanami pishiykan>>.#Mat. 3.11; Mar. 1.8; Luc. 3.16; Juan 1.33.
Jana patsaman Jesús kutikushqan
6Jesúswan juntakashqa kaykaqkunami tapupäkurqan kayno nir: <<Tayta, ¿kananpitaqa Israel nacionnintsipa mandaqnintsuraq kanki?>>
7Tsayno tapuptinmi Jesús kayno nirqan: <<Tsaytaqa manami musyapäkunkimantsu. Imay junaq imay höra tsayno kananpaq kashqantaqa Tayta Dioslami musyan. Paymi munayniyuq kaykan munashqan höra tsayta kamakätsinanpaq. 8Tsayno kaptinpis Espíritu Santu qamkunaman shamuptinmi poderninta chaskipäkunkipaq. Chaskirkurnami wilakuynïta wilakärinki Jerusaléncho, intëru Judeacho, Samariacho y maytsay markakunachöpis>>.#Mat. 28.19; Mar. 16.15; Luc. 24.47-48.
9Tsayno parlayta usharkurmi jana patsapa witsayta qalaykurqan. Rikarpaykaptinmi pukutay tsaparkuptin elqakäkurqan.#Mar. 16.19; Luc. 24.50-51. 10Jana patsapa nukirpaykaptinmi yoraq röpashqa ishkay runakuna elaqpita yuriparkur 11kayno nipäkurqan: <<Galilea runakuna, ¿imanirtaq jana patsapa rikarpaykanki? Nawpaykikunapita jana patsaman aywakushqannölami Jesús yapay kutimunqa>>.
Judaspa trukan apóstol kananpaq Matíasta akrashqan
12Tsayno niptinmi Olivos jirkancho kaykashqanpita apostolkuna Jerusalénman kutikärirqan. Tsay jirkanpita Jerusalénmanqa manami aläpa karutsu karqan, sinöqa jamay junaqcho puripäkushqannölami.#1.12 Jamay junaq kaptin Israel runakuna hasta ishkay waranqa (2,000) japaylatami puripäkurqan. Tsaypita masta manami purirqantsu. Ishkay waranqa japayqa juk kilömetrupita ichik maslami kaykan. 13Chayaykushpannami witsäpäkurqan patsarashqan altusman. Paykunami karqan Pedro, Juan, Santiago, Andrés, Felipe, Tomás, Bartolomé, Mateo, Alfeupa tsurin Santiago, Zelote nishqan Simón y Santiagupa tsurin Judas.#1.13 Bartolomépa jukaq jutinmi karqan Natanael (Juan 1.45-49; 21.2). Santiagupa tsurin Judaspa jukaq jutinmi karqan Tadeo (Mat. 10.3; Mar. 3.18). 14Paykunami Jesúspa maman Maríawan, Jesúspa wawqinkunawan y wakin warmikunawanpis Tayta Diosta manakunanpaq imaypis juntakaq.
15Tsay junaqkunami Jesúsman yärakuqkuna pachak ishkay chunkano (120) juntarpaykaptin ichirkur Pedro kayno nirqan: 16<<Wawqi panikuna, musyashqantsinöpis Judasmi runakunata pusharqan Jesústa prësu tsaripäkunanpaq. Tsayno kananpaq kashqanta qelqananpaqmi Espíritu Santu rey Davidta tantiyatsirqan. Tsawraqa Judasta pasananpaq kashqanta Tayta Diospa palabran nishqannölami kanan cumplishqa. 17Judasqa noqakunawanmi purirqan. Paytapis apóstol kananpaqmi Jesús akrarqan>>.
18(Jesústa rantikushqan qellayta Judas kutitsishqanwanmi chakrata rantipäkurqan. Judasqa pachanpis pashtaqpaq uray senqaypa jeqaptinmi aqishninpis mashtakarqan. 19Tsayta musyarmi Jerusaléncho taq runakuna tsay chakrapa jutinta churaparqan Acéldama jutin kananpaq. Paykunapa idiömancho Acéldama ninanqa Yawar Pampa ninanmi.)#Mat. 27.3-8.
20<<Judasta pasananpaq kaqtaqa Salmo librucho kayno nirmi qelqaraykan:
<< <Wayinpis chunyaq rikakutsun.
Tsaycho pipis ama tätsunnatsu>.#Sal. 69.25.
Maspis kaynömi qelqaraykan:
<Pay rurananpaq kaqta jukna ruratsun>.#Sal. 109.8.
21<<Tsayno kaykaptinqa juktana churashun Judaspa trukan apóstol kananpaq. Tsay runa katsun Jesús wilakuyta qalaykushqanpita patsa noqakunawan puriq. 22Tsaynöpis Jesústa Juan bautizashqanpita patsa#Mat. 3.16; Mar. 1.9; Luc. 3.21. jana patsaman kutikushqanyaq#Mar. 16.19; Luc. 24.51. qatiraq katsun. Tsay runata churashun noqakunano apóstol kar Jesús kawarimushqanta wilakur purinanpaq>>.
23Tsayno niptinmi ishkay runakunata akrapäkurqan. Jukmi karqan Matías. Jukaqnami karqan José. Wakin runakuna Joséta Barsabás nipäkuq y wakinnami Justo nipäkuq. 24Nirkurmi Tayta Diosta manakur kayno nipäkurqan: <<Tayta Dios, qam musyankimi lapan runakunapa shonqun imata yarpashqantapis. Kanan musyaykatsimay mayqantapis akrashqaykita. 25Akrashqayki runami apostolniki kanqa Judas Iscariotipa trukan. Judasqa jutsata rurarmi nakay patsaman aywakushqa>>.
26Tsayno manakurir suertita jitaptinmi Matíaspaq yarqurqan. Matíaswanmi apostolkuna yapay chunka ishkay karqan.
Currently Selected:
Hechos 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.