Marcos 3
3
Makin wanushqa runata jamay junaqcho Jesús aliyätsishqan
Mateo 12.9-14; Lucas 6.6-11
1Juk kutichömi sinagögaman Jesús yapay yaykurqan. Tsaychömi makin wanushqa runapis kaykarqan. 2Tsaymi Jesústa rikaparkaykarqan jamay junaqcho aliyätsiptinqa tsay achäquila contran sharkapäkunanpaq.
3Tsawraqa makin wanushqa runata Jesús kayno nirqan: <<Runakunapa nawpanman ichiy>>.
4Nirkurnami runakunata tapurqan kayno nir: <<Jamay junaqcho ¿ali kaqtaku o mana ali kaqtaku rurashwan? Runa mayintsita ¿salvashwanku o <wanukutsunpis> nishwanku?>>
Tsayno niptin manami imatapis nipäkurqantsu. 5Tsaymi paykunata Jesús rabyashqa rikärirqan. Mana kuyapäkuq kashqanta musyarmi pasaypa lakikushpan makin wanushqa runata kayno nirqan: <<¡Makikita joqariy!>>
Joqarkuptinmi makin aliyashqana rikakurqan. 6Tsawraqa fariseukuna yarqurishpan Herodespa favornin sharkuq runakunawan wilanakurqan Jesústa wanutsipäkunanpaq.
Atska runakuna qocha kuchunman juntakashqan
7Tsaypitanami discïpulunkunawan Jesús aywarqan qocha kuchunman. Qepantanami tsaytsika runakuna Galileapita y Judeapita aywapäkurqan. 8Tsaynöpis Jesús rurashqankunata mayaykurmi tsaytsika runakuna aywapäkurqan Jerusalénpita, Idumeapita, Jordán mayu wak tsimpanpita, Tiro markapita y Sidón markapitapis. 9Tsaymi discïpulunkunata Jesús kayno nirqan: <<Büquita kamarishqala kaykätsiy runakuna juntapämaptin tsayman witsänäpaq>>.
10Atska runakunata aliyätsishqa kaptinmi lapan qeshyaqkuna imaykanöpapis Jesústa yataykuyta munapäkurqan.#Mar. 4.1; Luc. 5.1-3.
11Jesústa rikashpanmi supaykuna löcuyätsishqan runakunapis nawpanman lätakuykur fuertipa kayno nipäkurqan: <<¡Qamqa Diospa Tsurinmi kanki!>>
12Tsayno niptinmi paykunata Jesús olqüparqan pï kashqantapis mana wilakärinanpaq.
Chunka ishkay apostolninkunata Jesús akrashqan
Lucas 6.12-16
13Tsaypita jirkaman Jesús witsarkurmi wakin discïpulunkunata jutinpa jutinpa qayarqan. 14Tsay qayashqan discïpulunkunami chunka ishkay apostolninkuna karqan. Paykunata qayarqan paywan purinanpaq, Tayta Diospa wilakuyninta wilakunanpaq, 15[qeshyaykaqkunata aliyätsinanpaq] y runakunapita supaykunata qarqupäkunanpaq. 16Paykunami karqan Simón (paypa jutintami trukatsirqan Pedro kananpaq) 17y Zebedeupa tsurinkuna Santiago y Juan. Santiaguta y Juantami kuyay jutinta churaparqan Boanerges jutin kananpaq. Boanerges nishqanqa <<räyupa tsurinkuna>> ninanmi. 18Wakin kaqkunami karqan Andrés, Felipe, Bartolomé, Mateo, Tomás, Alfeupa tsurin Santiago, Tadeo, Zelote nishqan Simón 19y Jesústa rantikuq Judas Iscariote.
Jesúspa contran parlashqan
Mateo 12.22-32; Lucas 11.14-23; 12.10
20Tsaypita juk wayiman Jesús yaykuptinmi tsaymanpis atska runakuna juntakarqan. Tsaymi tiempun mana karqantsu discïpulunkunawan mikunalanpaqpis. 21Jesús tsayno kaykashqanta mayaykurmi löcuyashqa kaykashqanta yarpashpan aylunkuna shuntaq aywapäkurqan.
22Tsay junaqkunami ley yachatsiqkuna Jerusalénpita chayaykur kayno nipäkurqan: <<Kay runaqa supaykunapa mandaqnin Beelzebúpa#3.22 Beelzebúqa Satanáspa jukaq jutinmi. munayninwanmi supaykunata qarquykan>>.#Mat. 9.34; 10.25.
23Tsayno niptinmi tsay runakunata qayaykatsir Jesús tinkutsiypa kayno nirqan: <<¿Imanöpataq Satanás kikinta qarqukunman? 24Juk nacioncho runakuna kikinpura chikinakurqa ¿manatsuraq wanutsinakur ushakanqa? 25Tsaynöpis juk wayicho taqkuna chikinakurqa ¿manatsuraq wakpa kaypa aywakur ushakanqa? 26Satanáspis kikinpa contran sharkurqa ushakanqami. 27Kalpayuq runata manaraq matwarqa manami pipis wayinman yaykur imankunatapis apakuntsu. Matwaykurmi itsanqa imankunatapis apakun.#3.27 Kalpayuq runamanmi Satanásta tinkutsin. Imankunamanmi munaynincho tsararashqan runakunata tinkutsin. Satanásta matwaq runamanmi Jesucristo kikinta tinkutsikun. Tsaynöpami tantiyatsirqan Satanáspita mas munayniyuq kashqanta.
28<<Rasunpami kayno nï: Runakuna jutsa rurashqanta y Diospa contran parlashqantapis Tayta Dios perdonanqami. 29Espíritu Santupa contran parlashqantami itsanqa imaypis mana perdonanqatsu>>.#3.29 Espíritu Santuqa jutsantsita kacharir Jesucristuta chaskikunantsipaqmi tantiyatsimantsi (Juan 16.8-11). Tsaymi Espíritu Santupa contran parlarqa pay tantiyatsishqanta mana chaskikur Jesucristutapis mana chaskikuntsu (Hech. 7.51). Jesucristuta chaskikuq kaqmi itsanqa perdonashqa kanqa.#Luc. 12.10.
30Jesús tsayno nirqan supay yanapaykashqanta nipäkuptinmi.
Jesúspa maman y wawqinkuna pï kashqanpis
Mateo 12.46-50; Lucas 8.19-21
31Tsaypitanami Jesúspa maman y wawqinkuna wayi punkuman chayaykur Jesústa qayatsirqan. 32Tsaymi Jesúswan jamaraykaqkuna wilarqan kayno nir: <<Mamayki y wawqikikunami punkucho shuyarpaykäshunki>>.
33Tsayno niptinmi Jesús kayno nirqan: <<Mamä y wawqïkuna ¿pï kashqantapis musyankiku?>>
34Tsayno nirmi paywan jamaraykaqkunata rikärir kayno nirqan: <<Kaychömi mamä y wawqïkuna karkaykan. 35Pipis Tayta Dios munashqanno kawaq kaqmi wawqï, panï y mamä kaykan>>.
Currently Selected:
Marcos 3: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.