Judas 1
1
Carta qalaykunan
1Yärakuq mayikuna:
Noqa Judasmi,#Mat. 13.55; Mar. 6.3. Jesucristupa sirviqnin y Santiagupa wawqin kar, kay cartata qamkunapaq apaykätsimü. Tayta Diosmi kuyashushpayki qayashushqanki salvashunaykipaq. Tsaymi mana alikunapitapis Jesucristo tsapaykäshunki. 2Tayta Dios kuyapäshushpayki imaypis yanapaykuläshunki kuyanakur ali kawapäkunaykipaq.
Lutan yachatsikuqkunata mana chaskipänanpaq yätsishqan
2 Pedro 2.1-17
3Kuyay wawqi panikuna, noqa yarparqä Jesucristo salvamashqantsipita qelqamuytami. Tsayno yarparpis kanan qelqaykämü lutan yachatsikuqkunata ichipänaykipaqmi. Tayta Diospa wilakuyninqa manami imaypis trukakantsu ni yapakantsu. Tsay wilakuynintami Tayta Dios mayna tantiyatsimashqantsi.
4Tsay lutan yachatsikuqkunaqa Diospa wilakuqnin tukurmi qamkunaman chayamushqa. Paykunaqa Tayta Diosta mana cäsukurmi runakunata criyitsir kayno nipäkun: <<Tayta Dios perdonamänantsipaq kaykaptinqa jutsata rurashqapis manami imananpistsu>>.
Tsayno nirqa lapanpaq munayniyuq Tayta Diosnintsita y Señor Jesucristutapis ñëgarkaykanmi. Tsayno yachatsiq runakunaqa infiernuman qaykushqa kananpaq unaypita patsami destinashqa karkaykan.
5Musyapäkushqaykinöpis Israel runakunata Egiptupita Señornintsi jorqarkamurmi#Éxo. 12.51. mana cäsukuqkunata ushakätsirqan.#Núm. 14.29-30. 6Tsaynölami Tayta Diosta mana cäsushqanpita wakin angilkunatapis yanawyaykaq tsakayman wichqaykushqa juiciu final chayamunanyaq. 7Tsaynölami Sodomacho, Gomorracho y cercan markakunacho taq runakunapis penqaypaq jutsata rurapäkurqan. Tsaymi runakuna tantiyakunanpaq tsay markakunata Tayta Dios ninawan ushakätsirqan.#Gén. 19.1-24.
8Tsay markakunacho taq runakunanölami tsay lutan yachatsikuqkuna mana penqakuypa jukwan jukwan purikärin. Tsaynöpis kikin munayniyuq kashqanta nirmi pitapis cäsukärintsu. Nirkurpis sueñuynincho Tayta Dios revelashqantami nipäkun.
Paykunaqa angilkunapaq y supaykunapaqpis shimin tarishqantami parlapäkun. 9Tsayno parlapäkuptinpis angilkunapa mandaqnin Miguelqa#Dan. 10.13, 21; 12.1; Apoc. 12.7. manami tsaynötsu parlan. Moiséspa ayanta#Deut. 34.6. diablu apakuyta munaptinpis manami qayaparqantsu, sinöqa: <<¡Tayta Diosmi upälakunaykipaq nishunki!>> nirqanmi.#Zac. 3.2. 10Tsay lutan yachatsikuqkunaqa mana tantiyashpanmi manakaqkunata parlapäkun. Paykunaqa uywakunano mana tantiyakuq karmi imatapis lutanta rurapäkun. Tsayno kashqanpitami ushakanqapaq.
11¡Paykunaqa imanöraq nakapäkunqa! Caín#Gén. 4.3-9; Heb. 11.4; 1Juan 3.12. wawqinta chikir wanutsishqanno y Balaam#Núm. 22.1-35; Apoc. 2.14. qellaylapaq kashqannömi paykunapis karkaykan. Moiséspa contran parlashqanpita Coré#Núm. 16.1-35. ushakashqannömi tsay lutan yachatsikuqkunapis elaqpita ushakanqapaq.
12Kuyanakur juntu mikupäkushqaykichöpis mana penqakuypami luta aptarkur mikupäkun. Kikilankunapaqmi imatapis ashipäkun. Usya witsan tsaki pukutay wakpa kaypa aywaqnömi karkaykan. Wayunanpaq tiempunchöna kaykarpis wayuyniynaq sapintin tsakishqa yöranömi karkaykan. Tsaynöpis lukiriptin tsakiq yöranömi karkaykan. 13Tukuy niraq qanrata lamar jitamushqannömi paykunapis penqakuypaq kaqkunata rurarkaykan. Qoylar shikwamushqannömi yanawyaykaqman qaykushqa kanqa.
14Adánpa wilkanpa wilkanpa wilkanmi karqan Enoc.#Gén. 5.18, 21-24. Paymi Tayta Diospa profëtan kar tsay lutan yachatsikuqkunata Tayta Dios juzgananpaq kashqanpita kayno nirqan: <<Tayta Diostami rikashqä waranqanpa santu angilninkunawan aywaykämuqta. 15Paymi lapan runakunata juzganqa mana mantsakuypa jutsata rurashqanpita y paypa contran parlashqanpita>>.
16Tsay lutan yachatsikuqkunaqa imalapitapis jamurpäkunmi. Paykunapaqqa manami imapis alitsu kaykan. Yarpashqantami imatapis ruratsipäkun. Runa tukärishpanmi shimin tarishqanta imatapis riman. Yarpashqankunata ruratsinan kashqalami ali shimilanpa pitapis parlapan.
Jesúsman yärakuqkunata shakyätsishqan
17Kuyay wawqi panikuna, yarpapäkuy Señor Jesucristupa apostolninkuna 18kayno nishqanta: <<Ultimu tiempuchöqa Jesucristupa wilakuyninta manakaqman churaq runakunami yurimunqa. Paykunaqa Tayta Diosta cäsukunanpa trukan kikinkuna munashqannömi jutsata ruralar kawapäkunqa>>.#2Tim. 3.1-5; 2Ped. 3.3.
19Tsay nishqannölami lutan yachatsikuqkuna kanan yurimushqa. Paykunami jutsayuq karkaykan wawqi panikuna chikinakur iglesiapita qarqunakunanpaqpis. Espíritu Santuta mana chaskikushqa karmi munashqanno jutsata rurar kawarkaykan.
20Kuyay wawqi panikuna, Jesucristupa wilakuyninta yachakushqa kaykarqa payman yärakur imaypis kawapäkuy. Tsaynöpis Espíritu Santu tantiyatsishushqaykinöla Tayta Diosta manakäriy. 21Tayta Dios kuyaykäshuptikiqa imaypis payta cäsukäriy. Señor Jesucristo kutimunanpaq kashqanta musyaykarqa kamarikushqala shuyarpaykay. Pay kutimurmi kuyapäshushpayki pushakushunki imayyaqpis kushishqa kawapäkunaykipaq.
22Tsayno kaykaptinqa shumaq manaraq yärakuykaq wawqi panikunata tantiyatsipäkuy Jesucristuman yärakärinanpaq. 23Wakinta ninapita imaykanöpapis jorquqno jukla tantiyatsipäkuy. Wakintana kuyapar ali shimilaykipa parlapay. Paykunawan juntakarpis paqta mana ali rurayninkunata yachakärinkiman.
Tayta Diosta alabashqan
24Tayta Dios alabashqa kaykulätsun. Paymi jutsa rurayman mana ishkipäkunaykipaq munayninwan imaypis yanapaykäshunki. Paymi nawpanman jutsaynaqtana pushakushunki imayyaqpis kushishqa kawapäkunaykipaq. 25Pay japalanmi [yachayyuq] Tayta Dios. Señornintsi Jesucristo noqantsi rayku wanuptinmi salvamashqantsi. Payqa lapanpaq munayniyuqmi y imayyaqpis reymi kaykan. Tsayno kashqanpita kananpis, warapis y imayyaqpis alabashqa kaykulätsun. Amén.
Currently Selected:
Judas 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.