2 Pedro 1
1
Carta qalaykunan
1Yärakuq mayikuna:
Noqa Simón Pedrumi, Jesucristupa sirviqnin y apostolnin kar, kay cartata apaykätsimü. Qamkunatapis Jesucristo kuyapäshushpaykimi noqakunatano salvashushqanki. Payqa Diosnintsi y salvamaqnintsimi kaykan. 2Tayta Diosta y Señornintsi Jesucristuta reqipäkuptikimi kuyapäshunaykipaq y waran waran ali kawayta qoykuläshunaykipaq qamkunapaq manakü.
Tayta Dios munashqanno kawanantsipaq nishqan
3Payta reqiptintsimi munashqanno kawanantsipaq Tayta Dios munayninwan tukuynöpa yanapaykämantsi. Kuyapäkuq y alilata ruraq karmi tsayno kawanantsipaq qayamashqantsi. 4Tsaynölami imaypis yanapamänantsipaq promitimashqantsi. Tsayno yanapamäshun jutsaynaq kashqanno noqantsipis jutsa rurayta kacharir jutsaynaqna kanantsipaqmi.
5Tsayno kaykaptinqa Tayta Diosman imaypis yärakäriy. Payman yärakur alilata rurapäkuy. Alilata rurar palabranta yachakäriy. 6Palabranta yachakur shonquykita y yarpaynikita dominakuy. Dominakur wanunaykiyaq cäsukäriy. Cäsukur Tayta Dios munashqanno imaypis kawapäkuy. 7Tayta Dios munashqanno kawar juk aylunöla wamayänakäriy. Wamayänakur pïmaywanpis kuyanakur kawapäkuy.
8Waran waran tsayno kawapäkuptikiqa Señornintsi Jesucristuta reqishqaykipis manami manakaqpaqtsu kanqa. 9Tsayno mana kawarqa qapra runa rikayta mana puëdishqannömi karkaykanki. Tayta Dios perdonashushqaykitapis qonqaykärishqankimi.
10Wawqi panikuna, Tayta Dios qayashushqaykita y akrashushqaykita shumaq tantiyapäkunaykipaq imaykanöpapis pay munashqanno kawapäkuy. Tsaynöpami jutsa rurayman imaypis mana tunipäkunkitsu. 11Tsaymi mandaykashqanman chayaptiki salvamaqnintsi Señor Jesucristo kushishqa chaskipäkushunki.
12Tsayno kaptinqa mayna musyarkaykaptikipis y Diospa wilakuyninta shumaq yachakushqa karkaykaptikipis tsaykunata imaypis yarpaykätsishaykimi. 13Kawashqäyaqqa tsaykunata imaypis yarpätsishaykimi. 14Wanunäpaqna kaykashqäta Señor Jesucristo musyatsimashqa kaptinmi 15qamkunata yarpaykätsï wanuptïpis yätsishqäkunata mana qonqaypa yarparänaykipaq.
Jesucristo kutimunanpaq nishqan
16Señor Jesucristo munayniyuq kashqanta y kutimunanpaq kashqanta manami yarpayniläpitatsu yachaykätsï, sinöqa chipchipyaykaqta kikï rikashqa karmi tsayno yachaykätsï. 17Chipchipyaykaqman tikraptinmi Tayta Dios gloriapita kayno nimurqan: <<Paymi kuyay Tsurï. Paypitami kushishqa kaykä>>. 18Tsayno nimushqanta kikïmi mayashqä Jesucristuwan sagrädu jirka puntacho kaykar.#Mat. 17.1-5; Mar. 9.2-7; Luc. 9.28-35.
19Tsaymi masraq tantiyantsi profëtakuna wilakushqankuna rasunpa kashqanta. Tsayno kaykaptinqa profëtakuna qelqashqankunata shumaq cäsukäriy. Tsaykunaqa tsakaycho atski atskipämashqantsinömi kaykan. Tsayno cäsukäriy patsa waraptin waraq lucëru shonquykikunacho atsikyashqanyaq.#1.19 Waraq lucëru shonquykikunacho atsikyashqanyaq nishqanqa Jesucristo kutimushqanyaq ninanmi.
20Shumaq tantiyakäriy. Ama yarpapäkuytsu Tayta Diospa palabranta runakuna yarpaynilanpita qelqashqanta. 21Tayta Diospa profëtankuna manami imaypis kikinkunapa yarpaynilanpitatsu qelqarqan, sinöqa Espíritu Santu tantiyatsiptinmi Tayta Diospa yarpayninta qelqarqan.#2Tim. 3.16.
Currently Selected:
2 Pedro 1: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.